1 Mbai 28 - Mbeti ti Nzapa - Tënë so amu fini

Salomon aga gbia

¹ David abongbi amakonzi ti Israel kue na Jérusalem: amakonzi ti amara, amakonzi ti abongbi ti aturugu ti gbia, ala so ayeke na li ti aturugu saki oko, ala so ayeke na li ti aturugu ngbangbo oko, amakonzi so ayeke baa ndo na ndö ti amosoro nga na anyama ti gbia na ti amolenge ti lo. Gbia abongbi nga akota zo ti kua ti yangbo ti lo, akpengba turugu na angangu koli kue.

² Gbia David aluti na nduzu si lo tene: “A-ita ti mbi, azo ti mbi, ala ma mbi! Mbi leke lani na be ti mbi ti sara da ti zia sanduku ti *mbuki ti *KOTA GBIA daa, so ti tene mbata so Nzapa ti e ayeke zia gere ti lo daa. Mbi leke aye ti sarango na da ni awe.

³ Me Nzapa atene na mbi: ‘Mo laa mo yeke sara da na iri ti mbi pepe, ngbanga ti so mo yeke zo ti sarango bira, mo tuku mene mingi.’

⁴ KOTA GBIA, Nzapa ti Israel asoro mbi na popo ti asewa ti mbi kue titene mbi ga gbia ti Israel kpu na kpu. Ando lo soro Juda titene lo ga makonzi; na ya ti mara ti Juda, lo soro sewa ti mbi si na popo ti amolenge ti babâ ti mbi, be ti lo anzere ti zia mbi gbia na ndö ti Israel kue.

⁵ KOTA GBIA amu na mbi amolenge-koli mingi. Na popo ti amolenge ni, lo soro Salomon, molenge ti mbi titene lo duti na ndö ti mbata ti gbia na sese ti Israel si lo le-gbia na iri ti KOTA GBIA.

⁶ Na pekoni, KOTA GBIA atene na mbi: ‘Molenge ti mo Salomon laa ayeke sara da nga na gbagba na mbi. Biani, mbi soro lo titene lo ga molenge ti mbi si mbi, mbi yeke duti babâ ti lo.

⁷ Fade mbi yeke sara titene lengo-gbia ti lo akpengba kpu na kpu, tongana lo bata andia na ambela ti mbi tongana ti so lo yeke sara laso so’.

⁸ Ti fadeso, na le ti azo ti Israel kue, na le ti bongbi ti azo ti KOTA GBIA nga na le ti Nzapa ti e, ayeke nzoni ala, a-ita ti mbi, ala bata andia kue ti KOTA GBIA, Nzapa ti ala. Tongaso si ala yeke ngba na nzoni kodro so si ala yeke zia ni titene aga ti amolenge ti ala kpu na kpu.

⁹ – Ti mo, molenge ti mbi Salomon, ayeke nzoni mo hinga Nzapa ti babâ ti mo; mo sara na lo na be ti mo kue, tere ti mo ayapu na kua, ngbanga ti so KOTA GBIA laa ayeke baa ya ti be ti zo si lo hinga tënë ti be ti zo. Tongana mo gi lo, fade lo yeke zia lege na mo ti wara lo; me tongana mo zia lo, fade lo yeke ke mo kpu na kpu.

¹⁰ Mo baa fadeso, KOTA GBIA asoro mo titene mo sara da so a yeke zia ni nde ndali ti lo. Ayeke nzoni mo gbu ngangu, mo sara ye!”

David amu na Salomon mbeti ti kode ti sarango kota da ti Nzapa

¹¹ David amu na molenge ti lo Salomon mbeti so afa kode ti sarango na da ti Nzapa, akubu ti ada so ayeke na tere ni, akubu so a yeke bata amosoro daa, akubu so a leke ni na nduzu, akubu so ayeke na be ti da ni nga na kubu so a yeke zia sanduku ti *mbuki daa.

¹² Lo mu nga na Salomon mbeti so afa kode ti ambeni ye so lo leke na be ti lo ti sarango ni: ya ti gbagba ti kota da ti *KOTA GBIA, ada so angoro tere ti ya ti gbagba ni, akubu so a yeke bata amosoro ti kota da ti Nzapa daa nga na akubu so a yeke bata aye so a zia ni nde ndali ti Nzapa daa.

¹³ David amu na lo mbeti so afa kode so a leke na abongbi ti awayango-sandaga na ti azo ti mara ti Lévi nga na akua so ala yeke sara. Lo mu nga na lo iri ti akungba ti sarango na kua ti kota da ti KOTA GBIA.

¹⁴ Na pekoni, lo fa na Salomon nengo ti lôro so alingbi ti leke na asembe ti lôro nga na nengo ti wen ti nginza so alingbi ti leke na asembe ti wen ti nginza; aye so kue ayeke ti sara na akua nde nde ti kota da ni.

¹⁵ David afa na lo nengo ti agere ti lamba na alamba so a leke na lôro nga na wen ti nginza. Lo fa nga kua so a yeke sara na gere ti lamba oko oko kue.

¹⁶ Lo fa nengo ti lôro so a yeke sara na ameza oko oko ndali ti mapa so a leke ti zia na dawa ti Nzapa; lo fa nga nengo ti wen ti nginza so a yeke sara na ameza ti wen ti nginza,

¹⁷ na nengo ti afurshete ti kpongo na kasa, adu ti sembe na akopo so a sara na lôro ti nzoni ni, akota sembe so a sara na lôro nga na wen ti nginza, alingbi na kua ti sembe oko oko.

¹⁸ Lo fa na lo nengo ti gbalaka ti zongo na yombo so a sara na lôro ti nzoni ni. Lo mu nga na lo kode ti sarango na pusu so a zia nde ndali ti Nzapa, ti *asheruben so a sara na lôro si ala zi ya ti *akpangi ti ala ti kanga ndö ti sanduku ti mbuki ti KOTA GBIA.

¹⁹ Tongaso David atene: “Aye so kue ayeke na ya ti mbeti so mbi wara na maboko ti KOTA GBIA; mbeti so afa akode oko oko ti sarango na aye ni.”

²⁰ Na pekoni, David atene na molenge ti lo Salomon: “Gbu ngangu, sara ye ti koli, mo sara ye! Zia mbeto asara mo pepe, zia mbeto ahon ndö ti mo pepe! Fade KOTA GBIA, Nzapa ti mbi ayeke na mo, lo yeke girisa mo pepe, lo yeke zia mo pepe, ngbii kua ti kota da ti KOTA GBIA ahunzi.

²¹ Baa awayango-sandaga na azo ti mara ti Lévi so ayeke na ya ti abongbi ti ala ayeke daa ti sara kua ti kota da ti Nzapa. Azo ti nzoni be so kue ahinga kode ti akua nde nde, amakonzi na azo ti kodro kue ayeke na tere ti mo, fade ala yeke sara ye so kue mo yeke mu yanga daa na ala.”