1 Mbai 15 - Mbeti ti Nzapa - Tënë so amu fini

Lekengo tere ti yo sanduku ti mbuki ti Nzapa ti gue na ni na Jérusalem

¹ David asara ada ndali ti lo wani na Gbata ti David. Lo leke mbeni ndo ndali ti sanduku ti *mbuki ti Nzapa si lo kpo na nduzu mbeni da ti bongo ndali ti sanduku ni.

² Tongaso lo tene: “Gi azo ti mara ti Lévi laa ayeke yo sanduku ti mbuki ti Nzapa, ngbanga ti so ala laa *KOTA GBIA asoro ala titene ala yo ni nga titene ala sara kua na lo kpu na kpu.”

³ David abongbi azo ti Israel kue na Jérusalem titene ala mu sanduku ti mbuki ni ague na ni na ndo so lo leke ndali ni.

⁴ Lo bongbi *ahale ti Aaron nga na azo ti mara ti Lévi.

⁵ Na popo ti azo ni, makonzi Uriel ayeke daa, lo na a-ita ti lo 120 ti azo ti kete mara ti Kehat;

⁶ ti azo ti kete mara ti Merari, makonzi Asaya ayeke daa, lo na a-ita ti lo 220;

⁷ ti azo ti kete mara ti Gershom, makonzi Joël ayeke daa, lo na a-ita ti lo 130;

⁸ ti azo ti kete mara ti Elisafan, makonzi Shemaya ayeke daa, lo na a-ita ti lo 200;

⁹ ti azo ti kete mara ti Hebron, makonzi Eliel ayeke daa, lo na a-ita ti lo 80;

¹⁰ ti azo ti kete mara ti Uziel, makonzi Aminadab ayeke daa, lo na a-ita ti lo 112.

¹¹ David airi awayango-sandaga Sadok na Abiatar; lo iri nga azo ti mara ti Lévi tongana: Uriel, Asaya, Joël, Shemaya, Eliel na Aminadab.

¹² Lo tene na ala: “Ala so ayeke amakonzi ti sewa ti mara ti Lévi, ayeke nzoni ala na a-ita ti ala, ala zia tere ti ala nde ndali ti Nzapa, na pekoni ala gue, amu sanduku ti mbuki ti KOTA GBIA, Nzapa ti Israel, ala zia na ndo so mbi leke ndali ni.

¹³ So kozoni ala yeke daa pepe so, KOTA GBIA, Nzapa ti e apika azo na kuâ na popo ti e, ngbanga ti so e sara ye na lege ti andia ni pepe.”

¹⁴ Awayango-sandaga na azo ti mara ti Lévi *asukula sioni ti ala titene ala gue, ayo sanduku ti mbuki ti KOTA GBIA, Nzapa ti Israel.

¹⁵ Azo ti mara ti Lévi amu ayongoro keke si ala yo na sanduku ti mbuki ti Nzapa na ndö ti go ti ala alingbi na yanga so Moïse amu, alingbi nga na tënë ti KOTA GBIA.

¹⁶ Tongaso, David atene na amakonzi ti azo ti mara ti Lévi ti zia na yanga ti kua, a-ita ti ala so ayeke he bia si ala yeke pika mozoko na gbe ni; ala yeke pika kota kundi, kete kundi na wen. Lo tene nga na ala ti pika mozoko ni ngangu ti fa ngia ti be ti ala.

¹⁷ Azo ti mara ti Lévi amu kua ni na Heman, molenge ti Joël; na popo ti a-ita ti lo, ala mu Asaf, molenge ti Berekia; na popo ti amolenge ti Merari, ala mu ita ti ala Etan, molenge ti Kushaya.

¹⁸ Azo so ayeke na tere ti ala ti mu maboko na ala ayeke a-ita ti ala, azo ti batango ayanga ti gbagba tongana: Zakarii, Ben, Yaziel, Shemiramot, Yehiel, Uni, Eliab, Benaya, Maaseya, Matitia, Eliflehu, Mikneya, Obed-Edom na Yeiel.

¹⁹ Azo ti hengo bia ayeke Heman, Asaf na Etan; ala yeke pika wen so a leke na bengba wen si ayeke toto ngangu;

²⁰ Zakarii, Aziel, Shemiramot, Yehiel, Uni, Eliab, Maaseya na Benaya ayeke pika kundi so go ni atoto na nduzu;

²¹ Matitia, Eliflehu, Mikneya, Obed-Edom, Yeiel na Azazia ayeke pika kundi ti kamba miombe ti mu na li ti bia ni.

²² Kenania, makonzi ti azo ti mara ti Lévi, ayeke baa lege ti yongo sanduku ti mbuki ti Nzapa, ngbanga ti so lo lingbi na kua ni.

²³ Berekia, lo na Elkana ayeke azo ti batango sanduku ti mbuki ni,

²⁴ ala na Obed-Edom nga na Yehia. Ti awayango-sandaga Shebania, Yoshafat, Netaneel, Amasai, Zakarii, Benaya na Eliezer, ala yeke azo ti hurungo tatalita na dawa ti sanduku ti mbuki ti Nzapa.

Sanduku ti mbuki ti Nzapa asi na Jérusalem

²⁵ David, *akangba ti Israel na amakonzi ti aturugu 1 000 ague na ngia na be ti ala ti mu sanduku ti *mbuki ti *KOTA GBIA kâ na da ti Obed-Edom.

²⁶ Ndali ti maboko so Nzapa amu na azo ti mara ti Lévi, ala yo sanduku ti mbuki ti KOTA GBIA; ala mu *sandaga ti akoli-bagara mbarambara na ti akoli-taba mbarambara.

²⁷ David ayu kota bongo ti *len, lo na azo ti mara ti Lévi so kue ayeke yo sanduku ni, azo ti hengo bia na Kenania, so ayeke baa lege ti yongo sanduku ni. David ayu nga bongo ti awayango-sandaga so a sara na len.

²⁸ Azo ti Israel kue ague na sanduku ti mbuki ti KOTA GBIA na Jérusalem; ala yeke dekongo na ngia si ala yeke huru adidi, atatalita, ala yeke pika awen so atoto, akota kundi na akete kundi.

²⁹ Na ndembe so sanduku ti mbuki ti KOTA GBIA ayeke li na Gbata ti David, Mikal, molenge ti Saul ti wali ayeke baa ndo na le ti fenetere. Lo baa gbia David so ayeke dodo si lo yeke sara ngia; na be ti Mikal, lo baa David tongana mbumbuse zo.