1 Mbai 14 - Mbeti ti Nzapa - Tënë so amu fini

David aduti na Jérusalem

¹ Hiram, gbia ti Tir atokua azo na David; lo tokua nga akeke ti sedre, amason na asarapande titene ala sara da na lo.

² David ahinga atene, *KOTA GBIA laa azia lo gbia na li ti azo ti Israel si lo yeke sara titene komandema ti David ayeke gue guengo na nduzu lakue ndali ti azo ti Israel, azo ti KOTA GBIA.

³ David akiri amu ambeni wali si lo du ambeni molenge-koli na ambeni molenge-wali.

⁴ Iri ti amolenge so lo du ala na Jérusalem ayeke so: Shamua, Shobab, Natan, Salomon,

⁵ Ibar, Elishua, Elpelet,

⁶ Noga, Nefeg, Yafia,

⁷ Elishama, Beeliada na Elifelet.

David aso benda na ndö ti azo ti Filistii

⁸ So azo ti Filistii ama a tene, a tuku mafuta na li ti David titene lo ga gbia ti azo ti Israel kue, ala kue ague ti gi ti gbu lo. David ama tënë ni si lo sigigi, lo gue ti tengbi na ala.

⁹ Azo ti Filistii asi si ala buba ndo so kue ayeke na popo-hoto ti azo ti Refa.

¹⁰ David ahunda Nzapa, atene: “Alingbi mbi gue, mbi tiri bira na azo ti Filistii so? Fade mo yeke zia ala na maboko ti mbi?” KOTA GBIA akiri tënë na David: “Mo gue! Fade mbi yeke zia ala na maboko ti mo.”

¹¹ Tongaso, azo ti Filistii asi na Baal-Perasim; na ndo so laa David afâ ala. Na pekoni, lo tene: “Na lege ti maboko ti mbi, KOTA GBIA asuru lege na popo ti awato ti mbi, tongana ti so ngu ayeke suru lege na ndo so azo aye ti kanga lege na ni.” Ndani laa azo adi iri ti ndo ni so Baal-Perasim.

¹² Azo ti Filistii azia anzapa ti ala na ndo ni so. David amu yanga titene a gbi ni na wâ.

¹³ Azo ti Filistii akiri abuba ndo so ayeke na popo-hoto ni.

¹⁴ David akiri ahunda Nzapa; Nzapa atene na lo: “Mo gue, mo tiri bira na ala na mbage ti peko ti ala pepe; me mo ngoro ala ayo kete si mo ga, mo tengbi tere na ala na yanga ti gbako ti akeke ti mikokulie.

¹⁵ Tongana mo ma toto ti mbeni ye tongana toto ti gere ti zo na li ti akeke ni, fade mo yeke sigigi ti to nda ti bira ni, ngbanga ti so mbi Nzapa, mbi hon kozo ti mo awe ti tiri bira na aturugu ti Filistii.”

¹⁶ David asara ye gi na peko ti yanga ti Nzapa. Nilaa azo ti Israel afâ aturugu ti Filistii, ti londo na gbata ti Gabaon ngbii asi na gbata ti Gezer.

¹⁷ Tongaso laa iri ti David amu ya ti akodro kue; KOTA GBIA asara si mbeto ti David asara amara kue.