1 Mbai 11 - Mbeti ti Nzapa - Tënë so amu fini

David aga gbia ti Israel

¹ Azo ti Israel kue abongbi na tere ti David na gbata ti Hebron si ala tene na lo: “E azo ti mara ti mo laa, e asewa ti mo laa.

² So Saul ayeke ando gbia so, mo laa mo yeke lakue na li ti azo ti Israel ti gue na ala na bira nga ti kiri na ala. *KOTA GBIA, Nzapa ti mo atene na mo: ‘Mo laa mo yeke bata ande azo ti Israel, azo ti mbi; mo laa mo yeke ga makonzi ti azo ti Israel, azo ti mbi.’ ”

³ Tongaso, *akangba ti Israel kue aga na mbage ti gbia David na Hebron. Kâ, lo na ala asara *mbuki na dawa ti KOTA GBIA. Ala tuku mafuta na li ti David titene lo ga gbia ti Israel alingbi na tënë so KOTA GBIA atene lani na lege ti Samuel.

David amu gbata ti Jérusalem

⁴ David na azo ti Israel kue ague, amu gbata ti Jérusalem, so ti tene Yebus. Azo ti Yebus so alango na sese ni asara lani kodro kâ.

⁵ Azo ti gbata ti Yebus ni atene na David: “Mo yeke li na ya ti gbata so pepe!” Me David amu ngangu gbagba ti *Sion, so ti tene Gbata ti David.

⁶ David atene: “Kozo zo so ayeke fâ mbeni zo ti Yebus, fade lo yeke ga makonzi ti aturugu.” Yoab, so iri ti mama ti lo ayeke Seruya laa ague kozoni si lo ga makonzi ti aturugu.

⁷ David aduti na ya ti ngangu gbagba ni; ndani laa azo adi iri ti gbata ni “Gbata ti David”.

⁸ Lo sara ambeni vaka angoro ndo so iri ni Milo. Yoab laa akiri aleke tanga ti gbata ni.

⁹ Ngangu ti David ayeke mai maingo, ngbanga ti so *KOTA GBIA so ayeke na ndö ti dunia kue ayeke na lo.

Akpengba turugu ti David

¹⁰ So ayeke iri ti amakonzi ti akpengba turugu ti David, ala na azo ti Israel so kue amu maboko na David titene lo ga gbia alingbi na tënë so *KOTA GBIA atene lani na ndö ti Israel.

¹¹ Akpengba turugu ti David ayeke so: Ishebaal, molenge ti mbeni zo ti kete mara ti Hakmoni; lo yeke na li ti aturugu ti batango gbia. Lo laa na ya ti lango oko, lo fâ azo 300 na likongo ti lo.

¹² Na peko ti Ishebaal ayeke Elazar, molenge ti Dodo, zo ti kete mara ti Ahoa; Elazar ayeke na popo ti “akpengba turugu ota” so.

¹³ Lo yeke lani na tere ti David na Pas-Damim na ndembe so azo ti Filistii abongbi tere ti ala ti tiri bira. Aturugu ti Israel akpe na dawa ti azo ti Filistii. Kâ, mbeni yaka ti *orze ayeke daa;

¹⁴ Elazar na azo ti lo aluti na ya ti yaka ni. Na pekoni, ala mu ni si ala fâ azo ti Filistii. KOTA GBIA asara si azo ti Israel aso benda.

¹⁵ Mbeni lâ, akpengba turugu ota asigigi, ala gue, awara David na du ti têne ti Adulam. Andaa aturugu ti Filistii asara bâbâ ti ala na popo-hoto ti azo ti Refa.

¹⁶ David ahonde tere ti lo na mbeni ndo so singo daa ayeke ngangu; andaa ambeni turugu ti Filistii aduti ti bata ndo na Betlehem.

¹⁷ Gi hio tongaso, nzara ti mbeni ye agbu David si lo tene: “Zo wa laa ayeke gue ti to ngu ti du ti ngu so ayeke na yanga ti gbata ti Betlehem ti ga na ni titene mbi nyon?”

¹⁸ Tongaso akpengba turugu ota so ali na ya ti bâbâ ti azo ti Filistii na ngangu, ala to ngu ti du ti ngu so ayeke na yanga ti gbata ti Betlehem, ala ga na ni na David; me lo ke ti nyon ngu ni. Lo tuku ngu ni na sese tongana *sandaga ti samba ndali ti KOTA GBIA.

¹⁹ Lo tene: “Oko pepe! Ayeke nzoni Nzapa akanga lege na mbi ti sara mara ti ye tongaso. Mbi lingbi ti nyon mene ti azo so aka tere ti ala na kuâ tongana nyen? Ala ka tere ti ala na kuâ ti gue ti to ngu ni so!” Nilaa David ake ti nyon ngu ni. Baa ye so akpengba turugu ota so asara laa.

²⁰ Abishai, ita ti Yoab, lo yeke na li ti akpengba turugu ota. Lo laa lo yo lani likongo ti lo na nduzu si lo koro ya ti azo 300; iri ti lo awu tongana ti akpengba turugu ota so.

²¹ Azo agonda lo mingi na popo ti use bongbi ti “akpengba turugu ota” so; lo ga makonzi ti ala. Me lo lingbi na “akpengba turugu ota” so pepe.

²² Benaya, molenge ti Yoyada ayeke mbeni kpengba turugu; lo yeke zo ti kodro ti Kabseel, lo sara akota ye mingi. Lo laa lo fâ azo ti mara ti Moab use so iri ti ala Ariel; lo laa na ngoi ti *neze, lo zu na ya ti du ti ngu si lo fâ mbeni bamara.

²³ Lo laa lo fâ mbeni zo ti Ezipte so ayo metere use na ndambo. Likongo ti zo ti Ezipte ni akono tongana keke ti masini ti wasarango-bongo. Benaya amu keke si lo gue na tere ti zo ti Ezipte ni, lo gboto likongo ti koli so na maboko ti lo si lo fâ lo na ni.

²⁴ Baa ye so Benaya, molenge ti Yoyada asara si iri ti lo awu na popo ti akpengba turugu ota so laa.

²⁵ Lo laa azo agonda lo mingi na popo ti aturugu ti batango gbia; me lo lingbi na akpengba turugu ota so pepe. David amu lo titene lo duti na li ti aturugu ti batango lo.

²⁶ Ambeni kpengba turugu ni ayeke Asael, ita ti Yoab; Elanan, molenge ti Dodo, zo ti Betlehem;

²⁷ Shamot, zo ti kodro ti Haror; Heles, zo ti kodro ti Palon;

²⁸ Ira, molenge ti Ikesh, zo ti kodro ti Tekoa; Abiezer, zo ti kodro ti Anatot;

²⁹ Sibkai, zo ti kodro ti Husha; Ilai, zo ti kodro ti Ahoa;

³⁰ Marai, zo ti kodro ti Netofa; Heled, molenge ti Baana, zo ti kodro ti Netofa;

³¹ Itai, molenge ti Ribai, zo ti Gibea, na sese ti Benjamin; Benaya, zo ti kodro ti Piraton;

³² Hurai so ayeke lango na tere ti akete ngu ti Gaash; Abiel, zo ti kodro ti Bet-Araba;

³³ Azmavet, zo ti kodro ti Bahurim; Eliaba, zo ti kodro ti Shaalbon;

³⁴ amolenge ti Hashem, zo ti kodro ti Gizon; Jonatan, molenge ti Shage, zo ti kodro ti Harar;

³⁵ Ahiam, molenge ti Sakar, zo ti kodro ti Harar; Elifal, molenge ti Ur;

³⁶ Hefer, zo ti kodro ti Mekera; Ahia, zo ti kodro ti Palon;

³⁷ Hesro, zo ti kodro ti Karmel, Naarai, molenge ti Ezbai;

³⁸ Joël, ita ti Natan; Mibar, molenge ti mbeni zo ti Hagri;

³⁹ Selek, zo ti mara ti Amon; Narai, zo ti kodro ti Beerot, zo ti yongo aye ti bira ti Yoab, so iri ti mama ti lo ayeke Seruya;

⁴⁰ Ira, zo ti sewa ti Yeter; Gareb, zo ti sewa ti Yeter;

⁴¹ Urii, zo ti mara ti Het; Zabad, molenge ti Alai;

⁴² Adina, molenge ti Shiza, mbeni makonzi ti azo ti mara ti Ruben, aturugu baleota ayeke na peko ti lo;

⁴³ Hanan, molenge ti Maaka; Yoshafat, zo ti kodro ti Meten;

⁴⁴ Uzia, zo ti kodro ti Ashetarot; Shama na Yeiel, amolenge ti Hotam, zo ti kodro ti Aroer;

⁴⁵ Yediael, molenge ti Shimri, lo na ita ti lo Yoha, zo ti kodro ti Tis;

⁴⁶ Eliel, zo ti kodro ti Mahava; Yeribai na Yoshavia, amolenge ti Elnam; Itma, zo ti kodro ti Moab

⁴⁷ na Eliel, Obed nga na Yasiel, azo ti kodro ti Soba.