1 Korente 16 - Mbeti ti Nzapa - Tënë so amu fini

Bongbingo nginza ti mu maboko na ambeni zo ti Christ

¹ Tënë ti bongbingo nginza ti mu maboko na azo ti Nzapa, ayeke nzoni ala sara ni gi tongana ti so mbi mu yanga na *a-Eglize ti Galasii ti sara.

² Na layenga, fade zo oko oko ayeke mu mbeni nginza, lo zia ni nde na da ti lo alingbi na ye so lo wara. Tongaso, ala to nda ti bongbi nginza ni kozoni si mbi si.

³ Tongana mbi si kâ, fade mbi yeke sara mbeti, mbi mu na azo so ala soro ala so si mbi yeke tokua ala na Jérusalem na aye so ala bongbi so.

⁴ Tongana alingbi titene mbi nga, mbi gue, fade mbi na ala, e yeke gue senge.

Ambeni ndo so Paul aye ti gue daa

⁵ Mbi yeke hon na mbage ti sese ti Masedoane ti si na ala kâ; mbi yeke fâ ya ti sese ti Masedoane ti hon.

⁶ A-ita, tongana lege ayeke daa, fade mbi yeke ngba ti duti na ala kete, wala mbi duti na ala kâ na ngoi ti de kue titene ala mu na mbi maboko ndali ti tambula ti mbi.

⁷ Mbi ye ti si gi ti baa ala ti hon pepe, me mbi ye ti duti na ala kete, tongana *Kota Gbia ayeda.

⁸ Me mbi yeke ngba ande na gbata ti Efeze ngbii lango ti *Pantekote alingbi si,

⁹ ngbanga ti so Nzapa azi na mbi nzoni lege ti sara kota kua kâ, me awato ayeke mingi.

¹⁰ Tongana Timothée asi na ala kâ, ayeke nzoni ala sara titene lo duti na popo ti ala na mbeto pepe, ngbanga ti so lo yeke sara nga kua ti Kota Gbia tongana mbi.

¹¹ Alingbi zo oko abaa lo tongana senge zo pepe. Ala mu na lo maboko titene lo kiri na tere ti mbi na siriri, ngbanga ti so mbi na a-ita e yeke ku lo.

¹² Ti ita ti e Apolos, mbi tene tënë na lo mingi titene lo na a-ita ague, abaa ala, me ti be ti lo, lo ye ti gue fadeso pepe. Tongana ndembe ni alingbi, fade lo yeke gue.

Tanga ti atënë na barango ndo

¹³ Le ti ala akpengba, ala gbu ngangu na lege ti mabe, ala duti tongana akoli, ala kpengba!

¹⁴ Na ya ti aye so kue ala yeke sara, ala ye amba ti ala.

¹⁵ A-ita, ala hinga atene, Stefanas na azo ti sewa ti lo ayeke akozo zo ti Akayi so ama na be si ala mu tere ti ala kue ti sara nzoni na azo ti Nzapa. Mbi hunda na ala mingi, a-ita,

¹⁶ ti ma yanga ti azo tongaso. Ambeni zo na a-ita ni so ayeke sara kua si ala yeke baa pasi legeoko: ala ma nga yanga ti azo ni.

¹⁷ Mbi yeke na ngia ndali ti gango ti Stefanas, Fortunatus na Akaikus. Ala, a-ita ti Korente, ala yeke na tere ti mbi pepe, me azo ota so asara ye so ala, a-ita, alingbi fade ti sara na mbi,

¹⁸ ngbanga ti so a-ita ota so asara si be ti mbi na ti ala so angba kâ ade. Ala gi ti hinga nzoni ye so azo tongaso ayeke sara!

¹⁹ *A-Eglize so ayeke na sese ti Azii abara ala. Akilas na Priscille, na azo ti Eglize so ayeke bongbi na da ti ala abara ala mingi na iri ti Kota Gbia so asara si e na ala e ga oko.

²⁰ A-ita so kue ayeke ge abara ala. Ala bara tere na popo ti ala na lege ti sungo ngbangba so ayeke nzoni na le ti Nzapa.

²¹ Mbi Paul, mbi wani laa mbi su atënë so: mbi bara ala.

²² Tongana mbeni zo aye *Kota Gbia pepe, ayeke nzoni a deba lo! Maranata! – Kota Gbia, mo ga! –

²³ Ayeke nzoni Kota Gbia Jésus asara nzoni be na ala!

²⁴ Na lege ti gango so e ga oko na Jésus Christ, mbi ye ala kue.