1 Korente 11 - Mbeti ti Nzapa - Tënë so amu fini

¹ Ala sara ye tongana mbi, tongana ti so mbi yeke sara ye tongana Christ.

Lege ti dutingo ti awali na ya ti da ti Nzapa

² Mbi gonda ala, ngbanga ti so na ngoi kue, ala yeke dabe ti ala na mbi si ala yeke sara ye alingbi na atënë so mbi fa na ala.

³ Me mbi ye ala hinga so Christ ayeke makonzi ti koli kue; koli ayeke makonzi ti wali si Nzapa ayeke makonzi ti Christ.

⁴ Koli so ayeke sambela wala ayeke tene peko ti tënë ti yanga ti Nzapa si lo kanga mbeni ye na li ti lo, andaa lo ke ti ne Christ, makonzi ti lo.

⁵ Me wali so ayeke sambela wala ayeke tene peko ti tënë ti yanga ti Nzapa si lo kanga mbeni ye na li ti lo pepe, andaa lo ke ti ne koli ti lo so ayeke makonzi ti lo; lo yeke legeoko tongana wali so akio kua ti li ti lo.

⁶ Tongana wali akanga ye na li ti lo pepe, ayeke nzoni lo fâ kua ti li ti lo. Me tongana fango kua ti li wala kiongo kua ti li ayeke ye ti kamene, ayeke nzoni lo kanga ye na li ti lo.

⁷ Ti koli, alingbi lo kanga mbeni ye na li ti lo pepe, ngbanga ti so lo yeke limo ti Nzapa si lo yeke fa gonda ti Nzapa. Me wali ayeke fa gonda ti koli.

⁸ Biani, Nzapa amu mbage ti tere ti wali si lo sara na koli pepe, me lo mu mbage ti tere ti koli si lo sara na wali.

⁹ Nzapa asara koli ndali ti wali pepe, me lo sara wali ndali ti koli.

¹⁰ Ndani laa, ndali ti *a-ange, alingbi wali akanga ye na li ti lo ti fa so lo yeke na gbe ti koli.

¹¹ Me so e na *Kota Gbia e ga oko, tongana koli ayeke daa pepe, wali ayeke daa pepe; tongana wali ayeke daa pepe, koli ayeke daa pepe.

¹² Biani, Nzapa amu mbage ti tere ti koli si lo sara na wali, me wali laa ayeke du koli. Ye kue alondo na Nzapa.

¹³ Ala wani agbu li ti ala na ndö ti tënë so: tongana wali akanga ye na li ti lo pepe si lo sambela, so ayeke na legeni?

¹⁴ Tongana koli ayeke na yongoro kua ti li, lo bi tere ti lo na sese awe. Gigi laa ayeke fa na ala ye so pepe?

¹⁵ Ti wali, yongoro kua ti li ayeke ye ti nengo lo, ngbanga ti so Nzapa amu ni na lo tongana ye ti kangango na li ti lo.

¹⁶ Me tongana mbeni zo aye ti ke tënë so, ayeke nzoni lo hinga lo tene, mbeni lege nde ayeke daa pepe so e na *a-Eglize ti Nzapa, e yeke sara ka na ni.

Kobe ti Kota Gbia

¹⁷ Tënë so mbi ye ti tene fadeso na ala, mbi yeke gonda ala pepe. Bongbingo tere ti ala ayeke sara nzoni na ala pepe, me ayeke sara sioni mingi na ala.

¹⁸ Kozo ye so mbi ye ti tene na ala ayeke so: azo atene na mbi atene, tongana ala yeke bongbi tere ti ala, akangbi ayeke na popo ti ala. Mbi hinga so ayeke mvene kue pepe.

¹⁹ Ti tene taa-tënë, alingbi kangbi aduti na popo ti ala, tongaso si a hinga azo so na popo ti ala ayeke sara ye na legeni.

²⁰ Na ndembe so ala yeke bongbi, ye so ala yeke te ayeke kobe ti *Kota Gbia pepe.

²¹ Biani, zo oko oko ayeke do tere ti te kobe ti lo wani, ambeni zo ayeke ngba na nzara si samba ayeke sara ambeni.

²² Ala yeke na ada ti ala titene ala te si ala nyon na ya ni pepe? Wala ala baa *Eglize ti Nzapa na le ti ala tongana buba ye? Ala ye ti zia kamene na le ti azo so ayeke na ye pepe so? Fade mbi yeke tene na ala nyen? Mbi gonda ala? Oko pepe! Mbi yeke gonda ala na ndö ti tënë so pepe.

²³ Ti mbi, tënë so mbi ma na yanga ti Kota Gbia si mbi fa na ala ayeke so: na bi so ala ka lo, Kota Gbia Jésus amu mapa,

²⁴ lo mu singila na Nzapa, lo fâ ya ni si lo tene: “So ayeke tere ti mbi so mbi mu ndali ti ala. Ala sara ye so ti dabe ti ala na mbi.”

²⁵ Na peko ti tengo kobe, lo mu kopo si lo kiri lo sara gi tongaso, lo tene: “Kopo so ayeke fini *mbuki na lege ti mene ti mbi. Lakue tongana ala yeke nyon ni, ala sara ye so ti dabe ti ala na mbi.”

²⁶ Biani, lakue tongana ala yeke te mapa so si ala yeke nyon kopo so, ala yeke fa tënë ti kuâ ti Kota Gbia ti ku na gango ti lo.

²⁷ Ndani laa, zo so ate mapa so si anyon kopo ti Kota Gbia na lege so ane lo pepe, fade tënë ayeke na li ti lo ndali ti tere na mene ti Kota Gbia.

²⁸ Ayeke nzoni zo oko oko abaa be ti lo nzoni kozoni si lo te mapa so si lo nyon kopo so,

²⁹ ngbanga ti so zo so ate mapa ni si anyon kopo ni, lo baa na le ti lo tongana tere ti Kota Gbia pepe, andaa lo yeke te, lo yeke nyon ti fâ ngbanga na li ti lo wani.

³⁰ Ndani laa, na popo ti ala, azo ti kobela na azo so mbage ti tere ti ala abuba ayeke mingi si ambeni mingi akui.

³¹ Tongana e wani, e baa fade be ti e nzoni kozoni, ka Kota Gbia afâ ngbanga na li ti e pepe.

³² Me Kota Gbia afâ ngbanga ti e si lo pika e titene lo fâ ngbanga na li ti e tongana ti tanga ti azo ti dunia so pepe.

³³ Tongaso a-ita, tongana ala bongbi ti te kobe ti Kota Gbia, ala ku amba ti ala.

³⁴ Tongana nzara asara mbeni zo, alingbi lo te kobe na da ti lo, tongaso si ala bongbi ti iri ngbanga ti Nzapa na li ti ala pepe. Tongana mbi si kâ, fade mbi yeke leke tanga ti atënë ni.