1 Agbia 8 - Mbeti ti Nzapa - Tënë so amu fini

A zia sanduku ti mbuki na ya ti kota da ti Nzapa

¹ Tongaso, Salomon abongbi *akangba ti Israel, amakonzi ti amara kue nga na amakonzi ti asewa ti Israel na tere ti lo na Jérusalem titene ala mu sanduku ti *mbuki ti *KOTA GBIA so ayeke na Gbata ti David, so ti tene na Sion, ti gue na ni na ya ti kota da ti Nzapa.

² Azo ti Israel kue abongbi na tere ti gbia Salomon na nze ti Etanim ti sara matanga; Etanim ayeke nze mbarambara ni.

³ So akangba ti Israel kue asi awe, awayango-sandaga ayo sanduku ti mbuki ni.

⁴ Ala yo sanduku ti mbuki ti KOTA GBIA, da ti bongo so KOTA GBIA na azo ti lo ayeke wara tere daa nga na aye so kue a zia nde ndali ti Nzapa. Awayango-sandaga na azo ti mara ti Lévi laa ayo aye ni so.

⁵ Gbia Salomon na azo ti Israel so kue abongbi na tere ti lo na dawa ti sanduku ni, amu gba ti ataba na angasa nga na gba ti abagara na *sandaga; zo alingbi ti diko ala pepe wala ti hinga wungo ti ala pepe.

⁶ Na pekoni, awayango-sandaga aga na sanduku ti mbuki ti KOTA GBIA na ya ti kota da ti Nzapa, na ndo so ayeke nde si ayeke nzoni kue ahon atanga ni, na gbe ti *akpangi ti *asheruben.

⁷ Biani, asheruben ni azi ya ti akpangi ti ala na ndö ti ndo so sanduku ti mbuki ni ayeke daa ti kanga ndö ti sanduku ni nga na akeke ti yongo na ni.

⁸ Ndali ti so akeke ni ayo mingi, zo alingbi ti baa yanga ni gi tongana lo luti na popo ti sanduku ti mbuki nga na dawa ti ndo so ayeke nde si ayeke nzoni kue ahon atanga ni. Me tongana zo aluti na gigi, lo lingbi ti baa yanga ti akeke ni pepe. Akeke ni angba kâ ngbii asi laso.

⁹ Mbeni ye nde ayeke na ya ti sanduku ni pepe, gi akpangbara têne use so Moïse awara lani na ndö ti hoto ti Horeb. Lo zia atêne ni na ya ti sanduku ni na ndembe so KOTA GBIA asara mbuki na azo ti Israel, na peko ti so lo sara si ala sigigi na sese ti Ezipte.

¹⁰ So awayango-sandaga alondo na ndo so ayeke nde si ayeke nzoni kue asigigi awe, mbinda asi singo na ya ti kota da ti KOTA GBIA.

¹¹ Awayango-sandaga alingbi pepe ti sara kua ti ala ndali ti mbinda ni, ngbanga ti so gonda ti KOTA GBIA asi singo na ya ti kota da ni.

¹² Tongaso Salomon atene: “KOTA GBIA, mo tene lani, mo tene, mo yeke duti na ya ti vukongo ndo so avuko pitipiti.

¹³ Me ti mbi, mbi sara da na mo, ndo so mo yeke duti daa lakue lakue!”

Salomon azia kota da ti Nzapa nde ndali ti Nzapa

¹⁴ Azo ti Israel kue abongbi, ala luti na nduzu; Salomon abaa ndo na mbage ti ala si lo sara tufa na ndö ti ala.

¹⁵ Lo tene: “Mbi mu singila na *KOTA GBIA, Nzapa ti Israel! Zendo so lo mu lani na babâ ti mbi David, lo wani, lo sara ye alingbi na ni;

¹⁶ nilaa lo tene: ‘Ti londo na lango so mbi sara si azo ti mbi asigigi na sese ti Ezipte, mbi soro laoko pepe mbeni gbata na popo ti amara ti Israel kue titene a sara da na ya ni ndali ti mbi; me mbi soro David titene lo sara komandema na ndö ti Israel, azo ti mbi.’

¹⁷ Babâ ti mbi David aleke lani na be ti lo ti sara da ndali ti KOTA GBIA, Nzapa ti Israel.

¹⁸ KOTA GBIA atene na lo: ‘Mo leke na be ti mo ti sara da ndali ti mbi, so nzoni mingi.

¹⁹ Me mo laa mo yeke sara ande da ni pepe; molenge ti mo laa ayeke sara da ni ndali ti mbi.’ ”

²⁰ Salomon akiri atene: “Tënë so KOTA GBIA atene lani so, lo sara ye alingbi na ni awe: mbi ga gbia na peko ti babâ ti mbi David, mbi duti na ndö ti mbata ti gbia ti Israel, alingbi na tënë so KOTA GBIA atene lani, nilaa mbi sara kota da so ndali ti KOTA GBIA, Nzapa ti Israel.

²¹ Kâ, mbi leke mbeni ndo ndali ti sanduku so atêne so a su atënë ti *mbuki na le ni ayeke daa; mbuki so KOTA GBIA na akotara ti e asara ni na ngoi so lo sara si ala sigigi na sese ti Ezipte.”

Salomon asambela Nzapa

²² Na pekoni, Salomon aluti na dawa ti gbalaka ti *KOTA GBIA, na dawa ti bongbi ti azo ti Israel kue, lo yoro maboko ti lo na nduzu ti sambela,

²³ lo tene: “KOTA GBIA, Nzapa ti Israel, mbeni nzapa tongana mo ayeke daa pepe, ataa na yayu kâ wala na sese ge. Mo yeke bata tënë ti *mbuki na azo ti kua ti mo si mo yeke sara nzoni be na azo so ayeke tambula na dawa ti mo na be ti ala kue.

²⁴ Zendo so mo mu lani na babâ ti mbi David, zo ti kua ti mo, mo sara ye alingbi na ni awe. Tënë so mo tene na lo, mo wani, mo sara ye alingbi na ni awe; ye ni laa asi laso so.

²⁵ Fadeso KOTA GBIA, Nzapa ti Israel, sara ye alingbi na tënë so mo tene lani na babâ ti mbi David, zo ti kua ti mo; lani mo tene: ‘Tongana amolenge ti mo abata lege ti dutingo ti ala nzoni, tongana ala tambula na dawa ti mbi tongana ti so mo wani, mo sara, fade mbeni zo oko ti ya ti sewa ti mo ayeke duti lakue na ndö ti mbata ti gbia ti Israel.’.

²⁶ Fadeso Nzapa ti Israel, tënë so mo tene na zo ti kua ti mo David, babâ ti mbi so, mbi voro mo ti sara ye alingbi na ni!

²⁷ “Me Nzapa alingbi biani ti duti na ndö ti sese so? So yayu so akono ahon ndoni alingbi na konongo ti lo pepe si kota da so mbi sara ayeke kete mingi so!

²⁸ Ataa so kue, KOTA GBIA, Nzapa ti mbi, dingi mê ti mo, mo ma sambela ti mbi na toto ti mbi, zo ti kua ti mo. Ma dekongo na sambela so mbi, zo ti kua ti mo, mbi yeke ya na mo laso.

²⁹ Zi le ti mo bi na lâ ti baa ndo na tere ti kota da so, ndo so mo tene: ‘Ndo so mbi yeke duti daa laa.’ Ma sambela so mbi, zo ti kua ti mo, mbi yeke ya na mo na ndo so.

³⁰ Ma vorongo tere ti mbi, zo ti kua ti mo na vorongo tere ti azo ti Israel, azo ti mo so ayeke na ndo so si ala yeke sambela mo. KOTA GBIA, mo so mo yeke na yayu kâ, ma sambela ti e, mo zi nga tënë na li ti e.

³¹ “Tongana mbeni zo asara sioni na mba ti lo si a hunda na lo ti deba yanga ti lo, tongana lo ga nduru na gbalaka ti mo ti deba yanga ti lo, na ya ti kota da so,

³² mo so mo yeke na yayu kâ, ayeke nzoni mo ma zo ni; mo sara ye, mo fâ ngbanga ti azo ti kua ti mo titene zo so asara sioni, mo fâ ngbanga na ndö ti lo si sioni ti lo akiri na li ti lo wani; zo so asara sioni pepe, mo sara na lo alingbi na mbirimbiri ti lo.

³³ “Tongana awato ahon ndö ti azo ti Israel, azo ti mo, na bira, ngbanga ti so ala sara siokpari so ake mo, tongana ala kiri na mbage ti mo, ala sepela mo, ala sambela mo si ala voro tere ti ala na mo na ya ti kota da so,

³⁴ mo so mo yeke na yayu kâ, ma sambela ti ala, zi siokpari na li ti azo ti Israel, azo ti mo; mo kiri na ala na sese so mo mu ando na akotara ti ala.

³⁵ “Tongana le ti nduzu akanga si ngu-Nzapa apika pepe, ngbanga ti so azo ti Israel asara siokpari so ake mo, tongana ala baa ndo na mbage ti da so ti sambela mo, tongana ala sepela mo si ala zia lege ti siokpari ti ala, ngbanga ti so mo sara ngangu na ala,

³⁶ mo KOTA GBIA so mo yeke na yayu, ayeke nzoni mo ma ala si mo zi siokpari na li ti azo ti kua ti mo nga na li ti azo ti Israel, azo ti mo. Mo fa na ala nzoni lege titene ala tambula daa. Na pekoni, sara si ngu-Nzapa apika na ndö ti sese so mo mu na ala si aga ti ala so.

³⁷ “Tongana kota nzara ati na ya ti kodro, tongana sioni kobela ti bubango kodro asi, tongana akobe ti yaka ahole si abuba kue, tongana agbadola na angadi atuku na ya ti kodro, tongana awato angoro agbata ti azo ti mo, azo ti Israel, ti mu na bira, wala mara ti sioni ye wa, wala mara ti kobela wa ati na ya ti kodro,

³⁸ tongana mbeni zo, wala azo ti Israel so kue ayeke azo ti mo, tongana zo oko oko ahinga sioni ti lo nga na pasi so lo yeke baa, tongana lo sambela mo, lo voro tere ti lo na mo si lo yoro maboko ti lo na mbage ti kota da so ti sambela mo,

³⁹ mo so mo yeke na yayu, na ndo so mo yeke duti daa, ma sambela ti ala, mo zi siokpari na li ti ala, mo sara mbeni ye; mo sara na zo oko oko alingbi na sarango ye ti lo, ngbanga ti so mo hinga tënë ti be ti lo. Biani, gi mo oko laa mo hinga tënë ti be ti azo kue.

⁴⁰ Tongaso, fade azo ti Israel ayeke kpe mbeto ti mo si ala yeke sara ye so be ti mo aye na ngoi so kue ala yeke duti na fini na ndö ti sese so mo mu ando na akotara ti e.

⁴¹ “Tongana wande, lo so lo yeke na popo ti azo ti Israel pepe, azo ti mo, tongana lo ma tënë ti iri ti mo na ya ti mbeni kodro yongoro si lo ga,

⁴² – biani, azo ni ayeke ma tënë ti kota iri ti mo, tënë ti ngangu ti maboko ti mo, maboko ti mo so mo yoro – tongana lo ga na mbage ti kota da so ti sambela mo,

⁴³ mo so mo yeke na yayu, na ndo so mo yeke duti daa, ayeke nzoni mo ma sambela ti wande so si ye so kue lo hunda na mo, mo mu ni na lo. Tongaso, fade azo kue ti ndö ti sese so ayeke hinga mo, ala yeke kpe mbeto ti mo tongana ti so azo ti Israel, azo ti mo, ayeke kpe mbeto ti mo; azo ni ayeke hinga nga atene, da so mbi sara so, a di iri ti mo na ndö ni.

⁴⁴ “Tongana azo ti mo ague ti tiri bira na awato ti ala na ndo so mo ye ti tokua ala daa, tongana ala baa ndo na mbage ti gbata so ti sambela mo KOTA GBIA, so ti tene gbata so mo soro; tongana ala baa ndo na mbage ti kota da so mbi sara ndali ti mo,

⁴⁵ mo so mo yeke na yayu, ma sambela ti ala na vorongo tere ti ala, mo gbu koko ti ala!

⁴⁶ “Tongana azo ti Israel asara siokpari so ake mo – ngbanga ti so mbeni zo so asara siokpari pepe ayeke daa pepe – tongana mo sara ngonzo na tere ti ala si mo zia ala na maboko ti awato ti ala titene awato ti ala ni agbu ala, ague na ala na mbeni kodro so ayeke yongoro, wala so ayeke nduru,

⁴⁷ na kodro so a gbu azo ti mo si a gue na ala daa so, tongana ala gbu li ti ala, ala zia ngbene lege ti sarango ye ti ala si ala toto na mo na ya ti kodro ni kâ, atene: ‘E ke yanga ti mo awe, e sara siokpari awe, e sara sioni awe!’,

⁴⁸ tongana ala kiri na mbage ti mo na be ti ala kue, na yingo ti ala kue na ya ti kodro so awato ti ala agbu ala si ague na ala daa, tongana ala baa ndo na mbage ti kodro so mo mu ando na akotara ti ala, wala ala baa ndo na mbage ti gbata so mo soro nga na mbage ti da so mbi sara ndali ti mo, tongana ala sambela mo,

⁴⁹ mo so mo yeke na yayu, na ndo so mo yeke duti daa, ma sambela ti ala na vorongo tere ti ala, mo gbu koko ti ala.

⁵⁰ Siokpari so ala sara ti ke mo, mo zi tënë ni na li ti ala. Asioni so kue ala sara ti ke mo, mo zi tënë ni na li ti ala; mo zia lege na azo so agbu azo ti mo si ague na ala na kodro wande titene ala baa mawa ti azo ti mo.

⁵¹ Biani, ala yeke azo ti mo, ala ga azo ti mo awe, ala so mo sara si ala sigigi na Ezipte, kodro so ala baa ando pasi daa ahon ndoni so.

⁵² “Zi le ti mo ti baa ndo; mo ma vorongo tere ti mbi nga na vorongo tere ti azo ti Israel, azo ti mo! Mo ma e lakue tongana e dekongo na mo!

⁵³ Biani, Kota Gbia NZAPA, mo laa mo soro e na popo ti amara kue ti sese so titene e ga azo ti mo. Mo tene tënë ni na e na lege ti Moïse, zo ti kua ti mo na ndembe so mo sara si akotara ti e asigigi na kodro ti Ezipte.”

Salomon ahunda na Nzapa ti sara tufa na ndö ti azo ti Israel

⁵⁴ Gbia Salomon akuku kukungo na sese na dawa ti gbalaka ti *KOTA GBIA, lo yoro maboko ti lo use kue na nduzu, lo yeke tene sambela so si lo yeke voro tere ti lo na KOTA GBIA. Na ndembe so lo hunzi sambela ni awe, lo londo na nduzu.

⁵⁵ Lo ngba na nduzu si na kota go, lo sara tufa na ndö ti bongbi ti azo ti Israel, lo tene:

⁵⁶ “Mbi mu singila na KOTA GBIA so amu siriri na azo ti lo, azo ti Israel, alingbi na zendo so lo mu. Biani, anzoni tënë so kue lo tene ando na lege ti Moïse, zo ti kua ti lo, mbeni oko angba senge pepe.

⁵⁷ Fadeso, ayeke nzoni KOTA GBIA, Nzapa ti e aduti na e tongana ti so lo duti ando na akotara ti e! Ayeke nzoni lo zia e pepe, lo girisa e pepe.

⁵⁸ Ayeke nzoni lo sara si be ti e angba na mbage ti lo, tongaso si e sara ye na lege so be ti lo aye, e sara ye alingbi na atënë ti ndia ti lo, ambela ti lo nga na andia so lo mu ando na akotara ti e.

⁵⁹ Ayeke nzoni KOTA GBIA Nzapa ti e adabe ti lo bi na lâ na sambela nga na vorongo tere ti mbi; na ya ti lango oko oko, lo gbu koko ti mbi, zo ti kua ti lo na ti azo ti Israel, azo ti lo.

⁶⁰ Tongaso si fade amara ti ndö ti sese kue ahinga atene, KOTA GBIA oko laa ayeke Nzapa, mbeni Nzapa nde ayeke daa pepe.

⁶¹ Ayeke nzoni, ala azo ti Israel, be ti ala kue angba na KOTA GBIA Nzapa ti e, ti sara ye alingbi na andia ti lo nga na atënë ti yanga ti lo, tongana ti so ala yeke sara laso so.”

Asandaga so a mu na KOTA GBIA

⁶² Gbia na azo ti Israel so kue ayeke na tere ti lo amu *asandaga na dawa ti *KOTA GBIA.

⁶³ Salomon amu sandaga ti beoko na KOTA GBIA: abagara saki baleuse na use, ataba na angasa saki ngbangbo oko na baleuse. Lege so lo na azo ti Israel kue asara matanga ti ziango kota da ni nde ndali ti KOTA GBIA laa.

⁶⁴ Na lango ni so, gbia azia nde ndali ti Nzapa ya ti gbagba so ayeke na dawa ti kota da ti KOTA GBIA. Na ndo so laa lo mu asandaga so a yeke gbi ni kue na wâ, asandaga ti ale ti kobe, mafuta ti anyama so a yeke mu na sandaga ti beoko, ngbanga ti so gbalaka so a sara na bengba wen si ayeke dawa ti kota da ti KOTA GBIA so ayeke kete mingi, alingbi pepe titene a zia asandaga ni kue na ndö ni.

⁶⁵ Na ngoi ni so, Salomon na azo ti Israel so kue ayeke na tere ti lo asara matanga ti Akpangba. Azo ni ayeke gbani, ala londo na ando nde nde laa aga: ti londo na sese ti Lebo-Hamat, na mbage ti Banga ngbii asi na ngu ti Ezipte, na mbage ti Mbongo. Ala sara matanga ni na dawa ti KOTA GBIA na ya ti lango mbarambara; na pekoni, ala kiri asara matanga ni na ya ti lango mbarambara, so ti tene kue lango baleoko na osio.

⁶⁶ Na ndade ni, Salomon azia lege na azo ni ti kiri na da ti ala. Ala bara gbia si ala kiri na da ti ala; tere ti ala anzere, be ti ala gi na ngia ndali ti nzoni so KOTA GBIA asara lani na David, zo ti kua ti lo, na azo ti Israel, azo ti lo.