1 Agbia 7 - Mbeti ti Nzapa - Tënë so amu finiSalomon aleke yangbo ti lo ti gbia 1 Salomon asara nga yangbo ti lo; lo sara ni na ya ti ngu baleoko na ota si lo hunzi ni kue kue kue. 2 Lo sara kozoni mbeni da so iri ni “Gbako-ti-Liban”. Yongoro ti da ni ayeke metere baleoku, konongo ni ayeke metere baleuse na oku, yongo ni na nduzu ayeke metere baleoko na oku. Lo sara da ni na ndö ti angbongboro gere ni osio so ayeke na keke ti sedre. Ayongoro keke ti gbungo-li ti da ni ayeke nga na keke ti sedre si aduti na ndö ti angbongboro gere ti da ni so. 3 Plafon ti da ni ayeke nga na keke ti sedre; a pika plafon ni na ndö ti ayongoro keke ti gbungo-li ti da ni so wungo ni kue ayeke baleosio na oku. Amolongo ti akeke ni kue ayeke ota: molongo oko, akeke baleoko na oku, molongo oko, akeke baleoko na oku. 4 Na tere ti da ni mbage na mbage, a leke akadere ti fenetere so molongo ni ayeke ota. Du ti fenetere oko oko ti amolongo ota so ayeke baa le na mbeni du ti fenetere. 5 A sara ayanga ti da ni nga na akadere ni kue si ayeke rektangle. Adu ti fenetere oko oko ti amolongo ota so ayeke baa le na mbeni du ti fenetere. 6 Na pekoni, Salomon aleke mbeni veranda so iri ni “Ti-angbongboro-yongoro-gere-ti-da”. Yongoro ni ayeke metere baleuse na oku, konongo ni ayeke metere baleoko na oku. Azo ayeke hon na ndo so ti li na ya ti kota ya ti da ni. Mbeni kete veranda ayeke na dawa ti kozo veranda ni so. Angbongboro gere ni ayeke daa si yanga ni ayo yongo na dawa ahon atanga ni. 7 Salomon aleke nga mbeni veranda so iri ni “Ti-mbata-ti-gbia”. A yeke iri ni nga “Ti-fango-ngbanga”, ngbanga ti ayeke ndo so lo yeke duti daa ti fâ ngbanga ti azo laa. A leke ya ni kue na keke ti sedre, ti londo na sese ngbii asi na nduzu. 8 Da ti lango ti Salomon wani ayeke na ya ti mbeni gbagba nde; da ni ayeke na peko ti da so iri ni “Gbako-ti-Liban”. A sara da ni akpa tere na kozo da ni. Salomon asara mbeni da ndali ti molenge ti Faraon ti wali, lo so Salomon amu lo titene lo ga wali ti lo so. Da ni ayeke gi tongana ti “Gbako-ti-Liban”. 9 A sara ada so kue gi na apendere têne: atêne so akono nzoni si a de tere ni dengo, atêne so a fâ ni na sii na mbage ti ya ni nga na mbage ti gigi. Atêne ni alondo na agere ti da ni ngbii asi na go ti ada ni. Na mbage ti gigi, atêne ni aga dere ti kota ya ti gbagba ni. 10 Ti agere ti ada ni, a mu gi apendere têne so akono mingi si a sara na ni: ambeni têne ni ayo metere osio si ambeni ayo metere oku. 11 Na ndö ti agere ti ada ni, a zia atêne so a de tere ni dengo nga na angbongboro keke ti sedre. 12 Na tere ti kota gbagba ni kue, atêne so a de tere ni dengo, molongo ni ayeke ota; molongo ti angbongboro keke ti sedre ayeke oko. A leke ya ti kota gbagba ti kota da ti *KOTA GBIA gi na oko kode so a leke na veranda ni. Akua so a mu na Hiram ti sarango ni ( 2 Mbai 2.12-13 ) 13 Gbia Salomon atokua na Tir titene a iri Hiram ti ga. 14 Hiram ayeke molenge ti mbeni wali-mua so ayeke zo ti mara ti Neftali. Babâ ti Hiram ayeke zo ti Tir. Hiram ayeke zo ti sarango kua ti bengba wen, lo si singo na ndara, na hingango ndo nga na kode ti sarango kua na mara ti abengba wen nde nde. Nilaa gbia Salomon airi lo ti ga titene lo leke aye so kue lo ye. A sara angbongboro yongoro gere ti da na bengba wen ( 2 Mbai 3.15-17 ) 15 Hiram asara angbongboro yongoro gere ti da use na bengba wen: yongo ni na nduzu ayeke metere gumbaya; tongana a ngoro tere ni na kamba, yongo ni ayeke metere omene. 16 Lo leke ambeni pendere ye use so akpa kpoto titene lo zia na li ti angbongboro yongoro gere ti da ni. Aye ni ayeke na bengba wen so lo kporo ni kporongo; yongo ti aye ni oko oko na nduzu ayeke metere use na ndambo. 17 Lo mu bengba wen si lo sara na ambeni ye so akpa gbanda nga na aye so akpa akete zingiri; lo zia aye ni na tere ti aye so akpa kpoto si ayeke na ndö ti angbongboro yongoro gere ti da so; aye ni mbarambara ayeke ndali ti apendere ye oko oko so akpa kpoto so. 18 Lo sara nga ale ti keke so iri ni grenade; amolongo ni ayeke use si lo zia na tere ti agbanda so ayeke na li ti kozo ngbongboro yongoro gere ti da ni; lo sara gi oko ye ni ndali ti use ngbongboro yongoro gere ti da ni. 19 Na li ti angbongboro gere ti da oko oko, na ya ti kota kubu ni, a zia mbeni use pendere ye so akpa kpoto si akpa apendere kongo; yongo ni na nduzu ayeke metere use. 20 Taa na li ti apendere ye so akpa kpoto si ayeke na li ti angbongboro gere ti da so, mbeni ndo ayeke daa so akono konongo; akono ahon ndö ti gbanda ni nga na ale ti grenade ngbangbo use so a zia na molongo si angoro apendere ye ni so. 21 Hiram azia angbongboro gere ti da use so aluti na nduzu na dawa ti kota kubu ti kota da ti Nzapa, oko na mbage ti maboko ti koli si a di iri ni Yakin; oko na mbage ti maboko ti wali si a di iri ni Boaz. 22 Na li ti angbongboro yongoro gere ti da ni, mbeni pendere ye so akpa kongo ayeke daa. Lege so Hiram ahunzi na akua ti lekengo angbongboro yongoro gere ti kota da ti Nzapa laa. Ngbongboro sembe so a sara na bengba wen ( 2 Mbai 4.2-5 ) 23 Hiram akporo bengba wen si a sara na ngbongboro sembe. Ti londo na yanga ni ti si na mbeni yanga ni, yongo ni ayeke metere oku. Ti londo na ngbonda ni ti si na yanga ni na nduzu, yongo ni ayeke metere use na ndambo. Tongana a gboto kamba na yanga ni angoro na ni atengbi, alingbi metere baleoko na oku. 24 Na gbe ti yanga ti ngbongboro sembe ni ti ngoro na ni, lo leke limo ti ale ti keke so iri ni kolokente. Molongo ti alimo ni ayeke use. Na ya ti metere oko oko, akolokente ayeke baleuse, baleuse. Lo kporo bengba wen si lo leke na alimo ni legeoko na sembe ni. 25 Lo zia sembe ni na ndö ti abagara baleoko na use; abagara ota abaa ndo na mbage ti Banga, ota abaa ndo na mbage ti Do, ota abaa ndo na mbage ti Mbongo si ota abaa ndo na mbage ti To. Ngbongboro sembe ni ayeke na ndö ti abagara ni, ngbonda ti ala kue aturne na mbage ti ya ni. 26 Yanga ti sembe ni *amï alingbi na santimetere miombe. A leke tere ti yanga ni tongana ti so a leke tere ti yanga ti mbeni kopo so akpa pendere kongo. Sembe ni ayeke mu sembe so iri ni bat saki use. Apusu so a sara na bengba wen 27 Na pekoni, Hiram amu bengba wen si lo sara na pusu baleoko. Yongoro ti pusu oko ayeke metere use, konongo ni ayeke metere use, yongo ni na nduzu ayeke metere oko na ndambo. 28 A sara apusu ni tongaso: a sara akadere ni na bengba wen so amï mingi pepe. A zia nga ambeni bengba wen tongana ti so a zia na ndo so awen ti kadere agbu tere daa. 29 A sara limo ti abamara, ti abagara na ti *asheruben na le ti abengba wen ni. A sara nga alimo ni na li ti awen ti kadere ni. Na gbe ti limo ti abamara na ti abagara ni, a zia ambeni kamba ti akongo daa. 30 Pusu oko oko, gere ni ayeke osio so a sara ni na bengba wen. Ambeni wen ayeke daa so agbu agere ti pusu ni; awen ni ayeke nga na bengba wen. Na andangoro osio kue ti pusu ni, ambeni wen ayeke daa so akpa gere ti meza; a kporo awen ni kporongo legeoko na kadere ti pusu ni, me li ti awen ni ayo ahon yanga ti kamba ti akongo ni pepe. 31 Yanga ti pusu ni na mbage ti nduzu ayeke *kerebende; yanga ni so ayo kete na nduzu alingbi na ndambo ti metere oko. Yanga ni so laa kota sembe ni ayeke duti na ndö ni. Yanga ni so ayeke kerebende so akono santimetere balembarambara na oku. Yanga ni so ayo kete na nduzu so, atere ni ayo alingbi tere mbage na mbage, ayeke kerebende pepe; a sara aye ti kode nde nde daa. 32 Agere ti pusu osio so aduti na gbe ti yanga ti kadere ni; awen so agbu agere ni ahon na ya ti pusu ni asigigi na mbeni mbage ni. Konongo ti ya ti agere ti pusu ni ayeke santimetere balembarambara. 33 A leke agere ti pusu ni gi na kode so a yeke leke na agere ti apusu ti mbarata. Aye ti tere ti agere ti pusu ni kue ayeke na bengba wen so a kporo ni kporongo. 34 Awen osio so akpa gere ti meza si ayeke na andangoro osio ti pusu oko oko, awen ni abongbi na kadere ti pusu ni si aga gi ye oko. 35 Na ndö ti yanga ti apusu ni oko oko kue so ayeke kerebende so, a leke ambeni ye ti pendere. Konongo ni ayeke santimetere baleuse na oku; a zia aye ti pendere so angoro yanga ni kue. Gi na tere ti yanga ti apusu ni, a zia ambeni kutu nga na ambeni wen so le ni akono konongo; awen ni ayeke na bengba wen. Akutu na awen ni abongbi si aga gi ye oko na tanga ti aye so a sara na pusu ni. 36 Na ndö ti yanga ti apusu so akutu ayeke daa pepe so, Hiram ade limo ti asheruben, ti abamara na ti amaboko ti mburu daa. Lo sara nga mbeni kamba ti akongo angoro yanga ti pusu ni kue. 37 Kode so Hiram aleke na apusu baleoko so kue ayeke legeoko, awen so a sara na apusu ni kue ayeke legeoko, yongo ni na konongo ti ya ni kue legeoko. 38 Hiram asara akota sembe baleoko na bengba wen; a zia ni na ndö ti apusu baleoko. Yongo ti kota sembe oko na nduzu ayeke metere use; sembe oko ayeke mu litere ti ngu 1 600. 39 Lo zia apusu oku na asembe ni na tere ti kota da ti *KOTA GBIA, na mbage ti maboko ti koli. Lo zia nga apusu oku na mbage ti maboko ti wali. Ngbongboro sembe ni, lo zia ni na tere ti kota da ni na mbage ti maboko ti koli, na mbage ti Mbongo-To. Iri ti aye nde nde so Hiram asara na awen ti gbe ti sese ( 2 Mbai 4.7–5.1 ) 40 Hiram aleke asembe, apao na adu ti sembe so a yeke tuku mene daa ti fi na tere ti aye. Lo hunzi kua ti aye so kue gbia Salomon ahunda na lo ti sarango ni ndali ti kota da ti *KOTA GBIA. Akua ni ayeke tongaso: 41 ayongoro gere ti kota da ni use, ambeni pendere ye use so akpa kpoto titene ala zia ni na li ti ayongoro gere ti kota da ni; ambeni ye use so akpa gbanda titene ala kanga na li ti aye ti pendere so akpa kpoto so; 42 limo ti ale ti keke so iri ni grenade ngbangbo osio si a kanga ni na tere ti agbanda use so a zia na li ti aye ti pendere so akpa kpoto so, so ti tene molongo ti agrenade use so; 43 apusu baleoko, asembe baleoko so a zia ni na ndö ti apusu ni; 44 ngbongboro sembe oko, abagara baleoko na use so ayeke yo ngbongboro sembe ni; 45 asembe ti ziango mburu ti wâ daa, apao na adu ti sembe so a yeke tuku mene daa ti fi na tere ti aye. Aye so kue Hiram aleke ni ndali ti kota da ti KOTA GBIA; lo leke ni na peko ti yanga ti gbia Salomon. Aye ni so kue, lo leke ni na bengba wen so a kpaka tere ni nzoni. 46 Hiram ato aye ni so na kpangbara sese ti Jourdain; gbia atuku ni na ya ti sese ti sara na ta. Lo sara ni na popo ti kete kodro ti Sukot na ti Sartan. 47 Na pekoni, Salomon azia aye so kue na ya ti kota da ti KOTA GBIA. Aye so a leke ni so ayeke gbani gbani, asara si lege ti hinga nengo ti abengba wen ni ayeke daa oko pepe. 48 Salomon akiri amu lôro si aleke na ambeni ye ndali ti kota da ti *KOTA GBIA. Aye ni ayeke tongana: gbalaka so a yeke zö dukani na ndö ni, ayeke na lôro; meza so a yeke zia mapa ti Nzapa na ndö ni, ayeke na lôro; 49 agere ti lamba baleoko ayeke na lôro ti nzoni ni, oku ayeke na mbage ti maboko ti koli si oku ayeke na mbage ti maboko ti wali; a zia agere ti lamba ni na dawa ti ndo so ayeke nde si ayeke nzoni kue ahon atanga ni; akongo, alamba na aye ti zingo azende na tere ti ameshe ti alamba ni, aye ni kue ayeke gi na lôro; 50 adu ti sembe, aye ti mingongo na wâ, adu ti sembe so a tuku mene daa ti fi na tere ti aye, akete ta ti zongo na dukani, aye so kue ayeke na lôro ti nzoni ni; awen ti agere ti ayanga ti kubu so iri ni “Ndo so ayeke nde si ayeke nzoni kue ahon atanga ni” nga na awen ti agere ti ayanga ti kota kubu ni, aye ni kue ayeke gi na lôro. 51 So gbia Salomon ahunzi ti sara kota da ti *KOTA GBIA kue awe, lo tene na azo ti ga na aye so babâ ti lo David azia ando nde ndali ti KOTA GBIA so: wen ti nginza, lôro na akungba; lo zia aye ni na ya ti kubu so ayeke bata ka amosoro ti da ti KOTA GBIA daa. |
© La Société Biblique de Centrafrique 2010
Bible Society in the Central African Republic