1 Agbia 6 - Mbeti ti Nzapa - Tënë so amu fini

Salomon asara kota da ti KOTA GBIA

¹ Salomon ato nda ti sara kota da ti *KOTA GBIA na ngu ngbangbo osio na balemiombe na peko ti so azo ti Israel asigigi na sese ti Ezipte. Na ngoi so Salomon ato nda ti akua ni so, andaa lo to nda ti le-gbia na Israel asara ngu osio awe. Akua ti sarango kota da ni ato nda ni na nze ti Ziv, so ti tene na use nze ti ngu ni.

² Kota da so Salomon asara na KOTA GBIA so, yongo ni ayeke metere baleota, nduru ni ayeke metere baleoko, yongo ni na nduzu ayeke metere baleoko na oku.

³ Na dawa ti kota da ti Nzapa, a sara mbeni kubu so a yeke hon daa ti li na ya ti da ni. Kubu ni so alingbi na nduru ti kota da ti Nzapa ni kue, so ti tene metere baleoko. Ti hon na ya ti kubu ni ayeke metere oku.

⁴ Na tere ti kota da ni, a leke afenetere ni si a zia gbanda ti wen na le ni.

⁵ A sara ambeni da ota so ayeke na ndö ti tere, na ndö ti tere. A sara ada ni na tere ti adere ti kota kubu ni nga na tere ti adere ti kubu so ayeke na ngbonda ni kâ, ti londo na mbeni mbage ni, angoro ngbii asi na mbeni mbage ni.

⁶ Konongo ti ya ti da ti gbeni ayeke metere use na ndambo; konongo ti ya ti kozo da-nduzu ni ayeke metere ota; konongo ti ya ti use da-nduzu ni ayeke metere ota na ndambo. Biani, dere ti kota kubu ni na mbage ti gigi ti guengo na ni na nduzu akono kue legeoko pepe. A leke ni tongaso titene akeke so agbu li ti ada ni ali na ya ti adere ti kota kubu ni pepe.

⁷ A sara kota da ti Nzapa ni na atêne so a leke ni kozoni na ndo so a yeke suru ka atêne daa. Nilaa, na ngoi ti sarango kota da ni, zo oko ama go ti wen ti surungo na ya ti atêne pepe, wala martoo wala mbeni wen nde pepe.

⁸ Yanga-da ti lingo na ya ti da ti gbeni ayeke na mbage ti Mbongo ti kota da ti Nzapa. Ti londo na ndo so ti li na ya ti kozo da-nduzu nga na ya ti use da-nduzu, azo ayeke mondee eskalie.

⁹ Ti hunzi sarango kota da ti Nzapa, a mu ambeni yongoro keke ti sedre nga na ambeni keke ti sedre so le ni akono konongo si a pika na plafon ti da ni.

¹⁰ Ada-nduzu so a sara si agbu tere na kota da ni, yongo ni na nduzu ayeke metere use na ndambo; akeke so agbu li ti da ni ayeke akeke ti sedre si aduti na ndö ti dere ti kota da ti Nzapa.

¹¹ Tënë ti KOTA GBIA asi na Salomon, atene:

¹² “Mo yeke sara kota da so ndali ti mbi. Tongana mo sara ye alingbi na atënë ti ndia ti mbi, tongana mo bata akpengba tënë ti mbi si mo ma yanga ti mbi lakue, fade mbi yeke sara ye na mo alingbi na tënë ti yanga ti mbi so mbi tene na babâ ti mo David.

¹³ Fade mbi yeke duti na ya ti kota da so na popo ti azo ti Israel si mbi yeke zia azo ti Israel pepe so ayeke azo ti mbi.”

Lekengo ya ti kota da ti Nzapa pendere pendere

¹⁴ Na peko ti yanga so Salomon amu, a sara kota da ti Nzapa ahunzi awe.

¹⁵ A mu akeke ti sedre so le ni akono konongo si a pika na tere ti adere ti kota da ni na mbage ti ya ni, ti londo na sese ngbii asi na nduzu na tere ti plafon. A leke sese ti ya ti kota da ni na akeke ti sipre.

¹⁶ Kubu ti kota da so ayeke na mbage ti ngbonda ni kâ, a mu nga akeke ti sedre so le ni akono konongo si a pika na tere ti adere ni. Ti londo na sese ngbii asi na nduzu na tere ti plafon, yongo ni ayeke metere baleoko. Na pekoni, a leke ya ti kubu ni si aga ndo ti Nzapa, ndo so ayeke nde si ayeke nzoni kue ahon atanga ni.

¹⁷ Ti tanga ti kota da ni, so ti tene kota kubu so a yeke si daa kozo titene a li na ndo so ayeke nde si ayeke nzoni kue ahon atanga ni, yongoro ni ayeke metere baleuse.

¹⁸ Akeke ti sedre so ayeke na ya ti kota da ni, a de na tere ni alimo ti ale ti keke so iri ni kolokente nga na alimo ti akongo so ya ni azi zingo. Atere ti kota da ni kue gi na akeke ti sedre; zo alingbi ti baa atêne ni oko pepe.

¹⁹ Na ya ti kubu so ayeke na ngbonda ti kota da ni kâ, so ayeke kubu so ane ahon atanga ni, a leke mbeni ndo ti zia sanduku ti *mbuki ti *KOTA GBIA daa.

^20-21 Yongo ti kubu ni ayeke metere baleoko, nduru ni ayeke metere baleoko, yongo ni na nduzu ayeke nga metere baleoko. A zia lôro ti nzoni ni na tere ti dere ti kubu so ayeke na ngbonda ni kâ nga na ya ti kota da ni kue. Na dawa ti ndo so ayeke nde si ayeke nzoni kue ahon atanga ni, a kanga mbeni zingiri so ayeke na lôro; a zia nga na dawa ti ndo ni mbeni gbalaka so a sara na keke ti sedre si a zia lôro na tere ni.

²² Tongaso a zia lôro na tere ti kota da ni kue kue kue; a zia nga lôro na tere ti gbalaka ni kue, gbalaka so ayeke na yanga ti kubu so ayeke na ngbonda ti kota da ni kâ so.

²³ Na ya ti kubu so ayeke na ngbonda ni kâ, a leke *asheruben use na keke ti olive ti ngonda; sheruben oko ayo na nduzu metere oku.

²⁴ Yongo ti *kpangi oko ti kozo sheruben ni ayeke metere use na ndambo. Ti londo na li ti mbeni kpangi oko asi na li ti mbeni kpangi ni na mbage, yongo ni ayeke metere oku.

²⁵ Yongo ti use sheruben ni na nduzu ayeke nga metere oku; konongo ti lo alingbi na konongo ti kozo sheruben ni si ala use kue akpa tere. Yongo ti ala na nduzu nga na konongo ti ala alingbi tere.

²⁶ Yongo ti asheruben oko oko na nduzu ayeke metere oku.

²⁷ A zia asheruben ni na be ti kubu so ayeke na ngbonda ti kota da ni. Ya ti kpangi ti asheruben ni kue azi; kpangi ti kozo sheruben ni andu dere ti kubu ni na mbage, kpangi ti use sheruben ni andu dere ti kubu ni na mbeni mbage. Ti ambeni kpangi use so, ala tengbi tere taa na be ti kota da ni.

²⁸ A zia lôro na tere ti asheruben ni.

²⁹ A de alimo so akpa limo ti asheruben, ti amaboko ti mburu na ti akongo so ya ni azi zingo na tere ti dere ti kota da ni kue, na ya ti akubu ni use kue.

³⁰ A leke ndö ti sese ti akubu use kue ti kota da ni na lôro.

³¹ Titene a kanga yanga ti kubu so ayeke na ngbonda ni kâ, a leke aye ti kangango na ni na keke ti olive ti ngonda; yongoro keke ti kadere ni na nduru ni ayo metere use.

³² Aye use ti kangango na yanga ti kubu so ayeke na ngbonda ni kâ si a sara na keke ti olive ti ngonda so, a de na le ni alimo ti asheruben, ti amaboko ti mburu na ti akongo so ya ni azi zingo; a zia lôro na tere ni kue. A pika lôro na tere ti asheruben ni nga na tere ti amaboko ti mburu ni.

³³ A sara gi oko ye so na yanga ti kota kubu ti da ni. Akadere ni ayeke na keke ti olive ti ngonda; ayo metere use na ndambo.

³⁴ Aye use ti kangango na yanga ti kota kubu ni, a sara ni na keke ti sipre; ye ti kangango na yanga ni oko oko, a fâ ya ni use use, alingbi ti zi ni na mbage ti ya ni nga na mbage ti gigi.

³⁵ Na le ti aye ti kangango na yanga ti kota kubu ni, a de alimo ti asheruben, ti amaboko ti mburu na ti akongo so ya ni azi zingo. A zia lôro na ndö ti alimo so a de ni dengo so.

³⁶ Na pekoni, a sara gbagba ti kota da ti Nzapa, – so ti tene gbagba ti ya ni – na atêne so a de tere ni dengo, molongo ti atêne ni ayeke ota; na ndö ni, a zia molongo oko ti angbongboro keke ti sedre.

³⁷ Na ya ti ngu osio ni so Salomon aga gbia, na nze ti Ziv laa a lu gere ti kota da ti KOTA GBIA.

³⁸ Na ya ti ngu baleoko na oko ni, na nze ti Bul, so ti tene na nze miombe ni laa akua ti kota da ti KOTA GBIA kue ahunzi; mbeni ye oko so angba ti lekengo ni ayeke daa pepe. Salomon asara kota da ni na ya ti ngu mbarambara.