1 Agbia 3 - Mbeti ti Nzapa - Tënë so amu fini

Salomon amu mbeni molenge ti Faraon ti ga wali ti lo

¹ Salomon aga kogara ti Faraon, gbia ti Ezipte, na lege so lo mu mbeni molenge ti Faraon ti ga wali ti lo. Salomon amu wali ni si lo ga na lo na Gbata ti David. Wali ni ngba kâ ngbii Salomon ahunzi ti sara yangbo ti lo, kota da ti *KOTA GBIA nga na gbagba so ayeke na tere ti Jérusalem.

² Na ngoi ni so, azo angba ti mu *asandaga na ndo so a leke na ndö ti ahoto. Azo angba ti mu asandaga kâ, ngbanga ti so a de ti leke da na iri ti KOTA GBIA pepe.

³ Salomon aye KOTA GBIA si lo yeke sara ye alingbi na aye so babâ ti lo David amu yanga na lo. Me lo nga, lo yeke mu asandaga ti anyama si lo yeke zö dukani na li ti ahoto ni.

Salomon ahunda ndara na Nzapa

⁴ Mbeni lâ, Salomon ague na Gabaon ti mu *sandaga na Nzapa, ngbanga ti so Gabaon ayeke mbeni kota ndo so azo aleke na nduzu ti mu asandaga daa. Salomon aya anyama saki oko na sandaga so a yeke gbi ni kue na wâ na ndö ti gbalaka ni.

⁵ Kâ na Gabaon, na bi, *KOTA GBIA asi na Salomon na ya ti bango-li si atene na lo: “Hunda na mbi ye so mo ye, fade mbi yeke mu ni na mo.”

⁶ Salomon akiri tënë, lo tene: “Mo sara nzoni be mingi na babâ ti mbi David, zo ti kua ti mo. Lani lo sara ye na le ti mo na lege ti taa-tënë, na lege ti mbirimbiri nga na legeni mbirimbiri. Nilaa mo ngba ti sara nzoni be na lo si mo mu na lo mbeni molenge-koli titene lo duti laso gbia na ndö ti mbata ti lo ti gbia.

⁷ Biani, KOTA GBIA Nzapa ti mbi, mo laa mo mu mbi, zo ti kua ti mo titene mbi le-gbia na plase ti babâ ti mbi David, ataa so mbi de molenge si mbi hinga lege ti sara komandema pepe.

⁸ Mbi zo ti kua mo, mbi yeke na li ti azo ti mo so mo soro ala. Ala yeke gbani gbani, zo alingbi ti diko ala pepe.

⁹ Tongaso, mu na mbi, zo ti kua ti mo hingango ndo so alingbi titene mbi sara na komandema na ndö ti azo ti mo, titene mbi hinga ye so ayeke nzoni na ye so ayeke sioni. Tongaso pepe, zo wa laa alingbi ti sara komandema na ndö ti azo ti mo, azo ti mo so ayeke mingi mingi so?”

¹⁰ Ye so Salomon ahunda so anzere na be ti KOTA GBIA.

¹¹ Nzapa atene na lo: “Mo hunda pepe ti duti na gigi aninga, wala ti wara mosoro, wala kuâ ti awato ti mo; me mo hunda hingango ndo titene mo sara na komandema na ndö ti azo ti mbi na legeni,

¹² mbi yeke sara ye alingbi na ye so mo hunda: mbi yeke mu na mo ndara na hingango ndo. Mbeni zo ti duti na ndara tongana mo ayeke daa pepe, ataa kozo na mo wala na peko ti mo.

¹³ Ataa ye so mo hunda pepe, mbi yeke mu ni na mo; mbi yeke mu na mo mosoro na gonda. Na gigi ti mo kue, mbeni gbia ti lingbi na mo ayeke duti daa pepe.

¹⁴ Tongana mo tambula na lege ti mbi, mo sara ye alingbi na andia ti mbi nga na atënë ti yanga ti mbi tongana ti so David, babâ ti mo asara, fade mbi yeke sara titene gigi ti mo ayo.”

¹⁵ So Salomon azingo na lango awe, lo hinga so bango-li laa. Lo kiri na Jérusalem si lo gue, lo luti na dawa ti sanduku ti *mbuki ti KOTA GBIA. Na pekoni, lo mu na Nzapa asandaga so a yeke gbi ni kue na wâ nga na asandaga ti beoko. Lo sara kota matanga ndali ti azo ti yangbo ti lo kue.

Salomon afâ ngbanga na lege ti ndara

¹⁶ Mbeni lâ, awali-ndumba use aga abaa gbia Salomon.

¹⁷ Mbeni oko atene: “Gbia ti mbi, mbi gbu gere ti mo, mo ma mbi si! Mbi na wali so, e yeke lango na ya ti da oko. Mbi du molenge na ndembe so lo nga lo yeke na ya ti da ni.

¹⁸ Lango ota na pekoni, lo nga lo du. Mbi na lo laa e yeke na ya ti da ni, mbeni zo nde ayeke daa pepe, gi mbi na lo use.

¹⁹ Na bi ni, molenge-koli ti wali so akui, ngbanga ti so lo lango na ndö ti lo.

²⁰ So mbi zo ti kua ti mo, mbi ngba na lango, lo londo na be ti bi, lo mu molenge ti mbi ti koli so alango na tere ti mbi, lo zia na kate ti lo; lo mu molenge ti lo so akui, lo zia lo na kate ti mbi.

²¹ Na ndaperere, mbi londo ti mu me na molenge ti mbi, mbi baa so molenge ni akui awe. So ndo ahan mbirimbiri awe, mbi baa molenge ni kpoo, mbi baa so ayeke molenge so mbi du so laa pepe.”

²² Me mbeni wali ni so atene: “Mvene laa! Molenge ti mbi laa ayeke na fini so! Molenge ti mo laa akui so!” Me kozo wali ni atene: “Mvene laa! Molenge ti mo laa akui so! Molenge ti mbi laa ayeke na fini so!” Tongaso laa ala yeke papa na dawa ti gbia.

²³ Gbia Salomon atene: “Mbeni atene: ‘Molenge ti mbi laa ayeke na fini so; lo so akui so ayeke ti mo!’, mbeni atene: ‘Mvene laa! Molenge so akui so ayeke ti mo; lo so ayeke na fini so ayeke ti mbi!’ ”

²⁴ Na pekoni, gbia atene: “Ala ga na mbi yongoro zeme!” Azo amu zeme aga na ni na gbia

²⁵ si lo tene: “Molenge so ayeke na fini so, ala fâ ya ti lo use, ala mu ndambo ni na mbeni wali ni, ndambo ni na mbeni.”

²⁶ Wali so molenge ti lo ti koli angba na fini so aye molenge ni mingi. Lo tene na gbia: “Gbia, mbi gbu gere ti mo, molenge so angba na fini so, ala mu lo na wali so, ala fâ lo pepe!” Me mbeni wali ni so atene: “Ala fâ ya ti molenge ni use! Tongaso si lo lingbi ti duti ti mbi pepe wala ti lo nga pepe.”

²⁷ Tongaso gbia atene: “Molenge so angba na fini so, ala fâ lo pepe, ala mu lo na kozo wali so; lo laa lo yeke mama ti molenge ni.”

²⁸ Azo ti Israel kue ama tënë ti ngbanga so gbia Salomon afâ. Ala kpe mbeto ti gbia, ngbanga ti so ala baa so Nzapa amu na lo ndara ti fâ ngbanga mbirimbiri.