1 Agbia 10 - Mbeti ti Nzapa - Tënë so amu fini

Gbia-wali ti kodro ti Saba aga ti baa Salomon

¹ Gbia-wali ti kodro ti Saba ama sango ti Salomon so awu ndali ti iri ti *KOTA GBIA. Nilaa lo ga ti tara ndara ti Salomon na lege ti angangu hundango tënë.

² Gbia-wali ni asi na Jérusalem, lo ga na azo gbani gbani na peko ti lo, *azambala so ayo ayombo, lôro gbani gbani nga na atêne ti ngangu ngere. So lo si na tere ti Salomon awe, lo hunda na lo atënë so kue lo leke na be ti lo.

³ Salomon akiri na lo peko ti ahundango tënë ti lo kue; mbeni tënë oko so angba na hondengo ni so gbia akiri tënë daa pepe ayeke pepe.

⁴ Gbia-wali ti Saba abaa ndara so kue Salomon ayeke na ni, yangbo so lo sara,

⁵ kobe so ayeke na ndö ti meza ti lo, da ti lango ti azo ti yangbo ti lo, lege so azo ti gbe ti lo ayeke sara kua ti ala, amakonzi ti mungo samba na lo; lo baa nga *asandaga so a yeke gbi kue na wâ so Salomon ayeke mu ni na ya ti kota da ti KOTA GBIA. Na bango aye so kue, li ti gbia-wali ni kue akpe.

⁶ Tongaso lo tene na gbia: “Tënë so mbi ma na kodro ti mbi kâ na ndö ti mo nga na ndö ti ndara ti mo ayeke taa-tënë biani.

⁷ Kozo titene mbi ga si mbi baa aye ni na le ti mbi, mbi ke ti yeda na atënë so azo atene na mbi. Ye so azo ni afa peko ni na mbi so, asi na ndambo ti ye so mbi baa ge so pepe! Ndara ti mo na mosoro ti mo ahon ti so mbi ma sango ni.

⁸ Ti ala nzoni, azo ti mo! Ti ala nzoni, azo ti kua ti mo, ala so ayeke duti na tere ti mo lakue ti ma atënë ti ndara ti mo so!

⁹ Singila na KOTA GBIA, Nzapa ti mo so asara nzoni be na mo si lo soro mo titene mo le-gbia na ndö ti Israel! KOTA GBIA aye azo ti Israel kpu na kpu, nilaa lo zia mo gbia titene mo fâ ngbanga mbirimbiri si mo sara ye na lege ti ndia”.

¹⁰ Na pekoni, gbia-wali ni amu na gbia Salomon kilo ti lôro saki ota na ngbangbo oku, ayombo gbani gbani nga na atêne ti ngangu ngere. Ti londo na lango ni so, zo ade ti baa gba ti yombo tongaso laoko pepe, tongana ti so gbia-wali ti Saba amu na Salomon.

¹¹ Amangboko ti gbia Hiram so amu lôro na kodro ti Ofir si aga na ni, amangboko ni aga nga na gba ti keke ti santal na atêne ti ngangu ngere.

¹² Gbia amu keke ti santal ni, lo sara na kete gbagba ti tere ti eskalie ndali ti kota da ti KOTA GBIA nga ndali ti yangbo ti lo. Lo mu nga keke ni, lo sara na aye ti mozoko, akete kundi na akota kundi ndali ti azo ti hengo bia. Keke ti santal so aga na ni lani na Israel, zo ade ti baa mara ni laoko pepe ngbii asi laso.

¹³ Ti gbia Salomon, lo mu na gbia-wali ti Saba aye so kue be ti lo aye nga na aye so kue lo hunda. Na ndoni, Salomon amu na lo ambeni nzoni ye mingi alingbi na nengo ti lo ti gbia. Na pekoni, gbia-wali na azo ti yangbo ti lo akiri na kodro ti ala.

Amosoro ti Salomon

¹⁴ Nengo ti lôro so Salomon ayeke wara na ya ti ngu oko oko ayeke kilo saki baleuse.

¹⁵ Na ndö ni, lo yeke wara nga nginza ti lapo so a yeke futa na ndö ti akungba so ayeke londo na kodro wande nga na ndö ti akungba ti azo ti dengo buze. Agbia ti amara nde nde na agovoronere ti kodro ni ayeke futa nga na lo lapo.

¹⁶ Gbia Salomon asara akota *vala ngbangbo use na lôro so a pika tere ni pikango. Ti sara vala oko, a mu kilo omene ti lôro.

¹⁷ Lo sara nga akete vala ngbangbo ota na lôro so a pika tere ni pikango. Ti sara vala oko, a mu kilo oko na ndambo ti lôro. Gbia azia avala ni na ya ti da so a iri ni “Gbako-ti-Liban”.

¹⁸ Gbia asara mbeni kota mbata ti gbia na pembe ti doli, a zia lôro ti nzoni ni na tere ni.

¹⁹ Titene zo ako na ndö ti mbata ni, lo yeke bi gere ti lo na ndö ti eskalie oko na oko ngbii omene; peko ti mbata ni aba bango na mbage ti gigi. Ndo ti ziango maboko daa ayeke mbage na mbage; a sara alimo use ti abamara so aluti na nduzu na tere ti ndo ti ziango maboko ni, oko na mbage, oko na mbage.

²⁰ A sara nga alimo baleoko na use ti abamara so aluti na tere ti eskalie, na ndo so zo ayeke bi gere daa ti ko na ndö ti mbata ni so; limo omene ti abamara ayeke na mbage ti maboko ti koli, omene na mbage ti maboko ti wali. Zo ade ti sara mara ti ye tongaso laoko pepe na ya ti mbeni kodro-gbia.

²¹ Akopo ti gbia Salomon kue ayeke na lôro; asembe so kue ayeke na ya ti da so a iri ni “Gbako-ti-Liban” ayeke na lôro ti nzoni ni. Mbeni ye oko so a sara ni na wen ti nginza ayeke daa pepe. Na ngoi ti gbia Salomon, azo abaa wen ti nginza tongana senge ye na le ti ala.

²² Biani, gbia ayeke na amangboko ti Tarsis so ayeke tambula na le ti kota ngu-ingo legeoko na amangboko ti gbia Hiram. Lakue na peko ti ngu ota ota, amangboko ti Tarsis ayeke yo gba ti lôro, wen ti nginza, pembe ti doli, amakako nga na apendere ndeke ti ga na ni.

²³ Gbia Salomon ahon agbia ti sese kue na mosoro nga na ndara.

²⁴ Azo ti sese kue ayeke gi lege ti baa Salomon titene ala ma tënë ti ndara so Nzapa azia na be ti lo.

²⁵ Na ngu oko oko, zo oko oko ayeke ga na mbeni nzoni ye ti mu na lo: aye so a sara na wen ti nginza nga na lôro; abongo, aye ti bira, ayombo, ambarata na *apâkârâ.

²⁶ Salomon abongbi apusu ti bira nga na ambarata: apusu ti bira ayeke saki oko na ngbangbo osio, ambarata ayeke saki baleoko na use. Lo bata ambeni pusu ni nga na ambarata ni na tere ti lo na Jérusalem; lo bata nga ambeni na ya ti agbata so a leke ndali ni.

²⁷ Gbia asara si wen ti nginza asi singo na Jérusalem tongana têne; lo sara si keke ti sedre asi singo tongana keke ti sikomor na *Kodro-ti-gbeni.

²⁸ A mu ambarata ndali ti Salomon na Ezipte nga na Silisii si a yeke ga na ala. Azo ti dengo buze ti gbia ague kâ si ayeke vo ala.

²⁹ Pusu ti bira oko so a mu na Ezipte si a ga ni, ngere ni ayeke ale ti nginza ngbangbo omene; mbarata oko, ngere ni ayeke ale ti nginza ngbangbo oko na baleoku. Azo ti dengo buze ni ayeke ga nga na ni ti ka na agbia ti mara ti Het kue nga na agbia ti sese ti Sirii.