Bìoball air-loidhne

Tȩtɔ̀s 3 - Mundani

Nkɨ̀atsə abua bòt Yesò

¹ Neeta shu abua bòt Yesò nê, bɔ̀ me zə bòt bɔ̀ɔ mbà̧aã àlaꞋ la, mè ngɨ̀à àghɨa bɔ shu la, mè me taŋke à màngɨa mènəè ntsɔ̧̀.

² Shu abua yɔb nê, wòt ka ndàꞋa kàbɔ̀ŋ adù̧ wòt kǒ, wòt ka nkɨ̀ àyɔ̀ŋ, bɔ̀ nɨ a waa waa mbɨ̀Ꞌɨ̀ shu̧, mè me ghɨ a ntsɔ̧̀ abua wòt ègème.

³ À wu ale nkàà nê bàambɔŋ e li ndzaã ngu èkèghɨ̧̀, me ghɨ̀ àtsəa kekweelè, mè ngɨ̀à mènəè kàbɔ̀ŋ. Ba li ndzaã ngu èbùꞋ èbɨꞋte mènəè, mè me zì mèntɨ̧ɨ̧ ma wuê adù̧ tèwuute èghɨ tèa mbɔ̀ awa la. Ba li ngua ntsèka nkwàꞋtà wuê mènəè kàbɔ̀ŋ mè ngòꞋnà bòt. Bòt ko e li ngua mpààbà awa, ba mèà mpààbà àwɔb mɨ̧̂.

⁴ Ka è li ngu àfɨ̀Ꞌ àko, Mbɔ̧ɔ̧mà Mpemnà wa nyɨꞋtè nê, yeà ngɨ̀à ntsɔ̧̀, mè ntàꞋa wua nkɔ̀ŋkà àwa,

⁵ ngɨ̀ ba pem, kà wu nê bàambɔŋ e ghɨ̀ àghɨa tàa nkɨà la. Tà li ngua ngɨ̀à ale ane tèsȩ ti. Fo Kèfə li shùù mènəè kàbɔ̀ŋ ma, mè ŋà àwa mèmpème fi tè ba tsiꞋi mbɨ̀Ꞌɨ̀ bòt bɔ mè mbì àwɔb la.

⁶ Mbɔ̧ɔ̧mà li ntsaa Yesò Klistò Mpemnà wa, tà kɨ̀Ꞌɨ̂ nèètè ndzì Fo tò yu adù̧ ya,

⁷ mbɨ̀Ꞌɨ̀ Mbɔ̧ɔ̧mà wu naa ku tèsȩ ta, e mě ghɨ̀ mènəè ma naa tɨ̧ɨ̧ ndɨŋndɨ̀ŋ a mbì li. Tà li ngua ngɨ̀à ale mbɨ̀Ꞌɨ̀ baa bɔ mèmpème kàlìà mu ba nɔ̀ŋe ntɨ̀ ya adù̧ la.

⁸ Èngà̧ waa mâ laꞋa la wu nkûŋ. Maà nkɨà nê, neeta èsèntè mènəè maa mbɨ̀Ꞌɨ̀ bòt bu bɔ zì mèntɨ̧ɨ̧ mɔb ane Mbɔ̧ɔ̧mà la aa zì àtsə me ghɨ̀ mènəè ntsɔ̧̀. Mènəè maa nàà mbɔ̀ mè ntàꞋa wua ntɨ̀ŋa bòt.

⁹ È me wu awê, ko mâ laꞋnê ka ndzì ètsəê wê ane mèngǎ̧ èkèghɨ̧̀. Bòt e me kààne ànəê adù̧ èseele tèlente bètǎt nyaꞋ ba, à ka ntɨ̧ɨ̧ abot, à ka ndzɔ̀ bɨ wòt. Bɨ wòt è ka nkàànè ànəê adù̧ mbɨ̧te Musì. Mènəè ngaa wu mènəè àku, kà wua ntɨ̀ŋa bòt.

¹⁰ Wòt me tsòkè àtsəa bòt Yesò nkɨ eghàbtè àwɔb, à ŋȩ̀te atò. À ŋȩte ngò̧ tebe, tà me ghɨ̀ wuê ghɨ̌, à tsi atò ayɔɔ.

¹¹ Ko nê, èwuu wòt ngaa e bɔ èntɨ̧ɨ̧ kàbɔ̀ŋ, mènəè kàbɔ̀ŋ mu tàa ngɨ̀à la me nyɨꞋte nê tà wu wòt kàbɔ̀ŋ.

Èngà̧ enɨ lìa nè mèntsàꞋte

¹² Maa tsàa wòt kǒ ane Àtemàs bɔ̂ Tȩ̀kɨkùs abua yê. Ŋut naa kɨꞋɨ tà kwene ane yê, à nyɔ̀Ꞌtè nkɨ̀Ꞌɨ̂ nkwène ane yaã a Nìkopolìs, nkàà nê mâ taŋke etseke abàꞋ və ane àfɨꞋa àbɨ̂ŋ yaa.

¹³ NyɔꞋta ndze nê à tɨŋe a Zenàs wu tàa sàꞋa mènəè la, bɔ̂ Àpolòs ndɨ bɔ̀ɔ bùꞋu a lèghȩ̀ȩ̀nè wɔb la, mè ndze nê bɔɔ̀ ka nkɨ̀ŋkè àghɨ.

¹⁴ NyɨꞋte bòt Yesò baa nê, bɔ̀ me zì ètsə bɔb fàꞋa èfàꞋ ntsɔ̧̀, mbɨ̀Ꞌɨ̀ e me tɨŋe bòt bu bɔ̀ɔ nkɨ̀ŋkà èghɨ la. Nê, bɔ̀ ka me tseke mbɨꞋɨ̀ bòt kà ye àtsə ànəê àyɔb.

¹⁵ Bòt bàgème ba tò ba è wu nɔ̂ la e tsàꞋtè awê. TsàꞋtè bèshu̧ ba bòt Yesò ko bu ŋa abua ya. Maà shù̧ù̧ta nê Mbɔ̧ɔ̧mà è me nyɨꞋte a ntsɔ̧̀ vi abua yɨ̧ bɨ̀agème.

« Roimhe

Air adhart »

Lean sinn:

Ceanglaichean taic

Sanasan