Bìoball air-loidhne

Ntu̧ Ntsɔ̧̀ MAK 7 - Mundani

Èngà̧ ane mènəè bètǎt nyaꞋ
( Mat 15:1-9 )

¹ ÀfɨꞋa Bèfalèsiì e mbù̧ù̧te a mbì Yesò, nè bènyɨꞋtà mbɨ̧te Musì ko be dzəâ a Jèlusalèm la,

² bɔ ye bɔkatè tò ko njɨ̀a èghɨjɨ nè èbu mèkɨ, ngua shua nê bɔ bakà shuù èbu bɔb ndɨ Bèfalèsiì e laꞋnê bòt è me shùù la.

³ (Bèfalèsiì nè Bèjuê bàgème aà ngɨ̀à mènəè mɔb wuê mbɨ̀Ꞌɨ̀ bètǎt nyaꞋ bɔb è le sa abua yɔb la. Bɔ̀ɔ kà jɨ èghɨjɨ kà shuu èbu a èlɨ̀ wɔb mbɔŋ.

⁴ Bɔ̀ kua a èwen, bɔ̀ ka jɨ àghɨa kà bɨ shùu àwɔb. Bɔ taꞋa bɔ mbɨ̧te ko nyaŋ bɔ̀ɔ nkùŋà tùà la mbɨ̀Ꞌɨ̀ màshua ndɔŋtsə nè bakɨ̀ŋ nè tèpfəèꞋtsə nè tèku̧ tɔb, ane èlɨ̀ ko tsa.)

⁵ Bèfalèsiì bu nè bènyɨꞋtà mbɨ̧ tu e biite a Yesò nê, “Àghɨ yu a ghɨ̂ ka bɔkatè bê è ka wua nkùŋà mènəè bètǎt nyaꞋ ba e li sa abua ya la wu ghà à? Bɔ̀ɔ njɨ̀a èghɨjɨ kà wua shùà èbu bɔb a shua yu bòt ko àa shùà la.”

⁶ Yesò tsɔ̀Ꞌɔ èngǎ̧ wɔb nê, “Àsayà li ndàꞋà nkûŋ zi ane yɨ̧, bɨa wàà bɨ̀a shua nê bɨ wu àghɨa kà wu yùà la, àfɨꞋa tà li nê Mbɔ̧ɔ̧mà laꞋnê, ‘Bòt baa aà ngùꞋtè am wuê ane èkuube ètsəê bɔb, ka mèntɨ̧ɨ̧ mɔb ka wu ane yaã.

⁷ Bɔ tsiꞋa ngùꞋtè am àku, nkàà nê bɔɔ̀ nɨa mènəè bɔbȩ nyɨ̀Ꞌta bòt, mbɨ̀Ꞌɨ̀ wu mènəè Mbɔ̧ɔ̧mà.’

⁸ Bɨ nɔ̀ŋè mbɨ̧te Mbɔ̧ɔ̧mà a si me kùŋè mènəè bɔbȩ e nyɨꞋtà la.”

⁹ Yesò shu abua yɔb nê, “Bɨ bɔ èyì ko bɨ̀a nkɨ̌ nɨ etu̧ èngǎ̧ Mbɔ̧ɔ̧mà mbɨ̀Ꞌɨ̀ me kùŋe wuê mènəè ndɨ̧ yɨ̧ la.

¹⁰ Musì li shu nê, ‘Me zəa tǎt wè bɔ̂ nyɨ̌ wè’ mè nê, ‘Wòt làꞋ ànəa kàbɔ̀ŋ ane tǎt vi kò nyɨ̌ vi leꞋ, bɔ bùŋè atò.’

¹¹ Ka è wu awɨ̧, bɨ me shu nê, ‘Wòt nɨa àghɨa tà wu enɨ tɨŋe a tǎt vi kò nyɨ̌ vi la leꞋ, è ntsiꞋi shu nê, wu Kɔbàn’, (ngua shua nê wu àghɨa Mbɔ̧ɔ̧mà),

¹² bɔ̀ ka tsi feele atò nê tà bakà tɨŋe a tǎt vi bɔ̂ nyɨ̌ vi.

¹³ Ale, bɨ gha ambo mènəè ndɨ̧ yɨ̧, ngwàꞋa ànəa Mbɔ̧ɔ̧mà shu nê bɨ̀ me ghɨ̀ la, mè me ghɨ̌ èbɨꞋte ènəê ko nyaŋ mbɨ̀Ꞌɨ̀ baa.”

Èghɨ àa ntsòkà wòt e mbì Mbɔ̧ɔ̧mà la
( Mat 15:10-20 )

¹⁴ Ale, Yesò mè ntɔ ènɔ̧̂ bòt bu shu abua yɔb nê “Bɨ̀ zə am bɨ̀agème, à nyi àtsəa yɨ̧ ntsɔ̧̀!

¹⁵ Àghɨa ko a ntsě àa ndzəèà nàbȩ̂ è nyi ane wòt ntsòka atò a mbì Mbɔ̧ɔ̧mà la. Àghɨa àa ndzəa ètsəê wòt la, ka àa ntsòke tò la.”

¹⁶ [Wòt tà bɔ ètû̧, la tà zə.]

¹⁷ ÀfɨꞋa tà sa ènɔ̧̂ bòt bu enyi a lob la, bɔkatè tò e biite atò nê tà shua wɔb lə èngà̧teme wu.

¹⁸ Yesò shu abua yɔb nê, “Bɨ̀a mbɔŋ e nyaã mbèle kà bɔ èyì mbɨ̀Ꞌɨ̀ bòt koê? Bɨ bakà ko nê àghɨ àa ndzəèà nàbȩ̂ nyia ètsəê wòt la, aà kà tsòka atò a mbì Mbɔ̧ɔ̧mà à?

¹⁹ Aà kà nyi a èntɨ̧ɨ̧ tò, aà nyia wuê a èbem tò ndzəèà ngà àbȩ.” (Yesò làꞋ èngà̧ waa ale nɨŋ nyɨ̀Ꞌte nê betsiꞋa wòt jɨ àghɨ àgème).

²⁰ Tà nê, “Àghɨ àa ndzəa ètsəê wòt la, wu àghɨa àa ntsòkà tò e mbì Mbɔ̧ɔ̧mà la.

²¹ Ngu nê àghɨa àa ndzəa nè èbem a èntɨ̧ɨ̧ wòt la ka àa ngɨ̀à tà bɔ mèmɨ̀ɨ̀te kàbɔ̀ŋ, a màpaꞋte wòt kà bɔ̂ tò eyɔꞋ, nè ètsɔŋ, màmbuŋa wɔ̀bȩ̂,

²² mànjɨa àbȩ, nè èghoꞋ nè mènəè kàbɔ̀ŋ ègème la. NdàꞋà mèfà̧, ngɨ̀à èbɨꞋte mènəè, ngòꞋnà bòt, ntsòkà tèlente bòt tsa, ŋèꞋa tèkwȩtsə a ègwet, mè ngɨ̧̀ɨ̧̀nà la.

²³ Èghɨ baa ègème aà ndzəèà nè èntɨ̧ɨ̧ wòt ka tsòka tò.”

Àvi kǒ zì èntɨ̧ɨ̧ vi ane Yesò
( Mat 15:21-28 )

²⁴ Yesò lɔ̀Ꞌ abot nga àbâ àlaꞋ a Tȩê nè Sidɔ̀n, nyi a èbem lob kǒ, ka tà kà wua nkɨà nê wòt kǒ nê ye wu abàꞋ və. Ka tà kà wu eko lò̧ò̧te.

²⁵ ÀfɨꞋa mbɔŋ, àvi kǒ fo kàbɔ̀ŋ nyi ane waã tò waàvi la, zə nkɨ̀Ꞌɨ̂ nkwene a èka Yesò.

²⁶ Àvi nga li ngu vi Glɨ̂k, bɔ bi atò a Sìlòfònisìà a èbem àlaꞋ a Silìà la. Tà li shù̧ù̧te a Yesò nê tà fəâ fo kàbɔ̀ŋ yu ane waã vi la.

²⁷ Ka Yesò shu abua tò nê, “TsiꞋ bà bɨa njɨ̀ɨ bɔ̧ lob yaꞋ. A bakà bɔ̀ŋ laꞋ nê, bɔ̀ nɨ èghɨjɨ bɔtechɨɨle màꞋà abua babə.”

²⁸ Àvi wu mè nê, “Oò a Tè, ka wuê babə bu a èten tibàlà la àa ngɨ̀ e me jɨ tèboꞋte èghɨjɨ bɔtechɨɨle bu.”

²⁹ Ale, Yesò shu abua tò nê, “Ndɨ̀ wu à ŋa èwuu àbɨ̀t yaa la, me ghà àwê àpfəè, fo kàbɔ̀ŋ yu èsà waàvi wè wu!”

³⁰ Àvi wu wene àpfəè azi, ndze waã vi wu tà nɔ̀ŋke a ègwet èku̧ la, me ko fo kàbɔ̀ŋ yu sa atò tè ndɔ̀Ꞌ.

Yesò bəâ mbûꞋ kǒ

³¹ Yesò ghɨ̀ ale, ndɔ̀Ꞌ àbâ àlaꞋ Tȩê nga èlemè Galìlî. Me ghǎ abot ale, ntse àbâ àlaꞋ a Sidɔ̀n, nè àbâ àlaꞋ a Èpfəè nɨ̧ Èghem.

³² Tà ghǎ abot ale, bɔ nɨ wòt kǒ ètû̧ tò e lem, tà kà meè ngua nkoà ndàꞋà la, nkɨ̀Ꞌɨ̂ shù̧ù̧te a Yesò nê tà nɔ̀ŋè èbu bi adù̧ ŋut mbəâ atò.

³³ Ale, Yesò nɨ̀a ŋut ndzə a kètsìà bòt, ndzì tèti ti a èbem ètû̧ tò, ntsəè mattsə nɨŋ mbà̧à̧te èlɨ̧ tò.

³⁴ Yesò ghɨ̀ ale, mbɔ̂ ndɨ̀ŋkè ègwet, ntsà̧ vi ane ètɨ̧̂ shu abua mbê wu nê, “Èfatà”, ngua shua nê, “GhaꞋa!”

³⁵ KwàꞋ àfɨꞋa mbɔŋ, ètû̧ mbê wu e ghaꞋà, èlɨ̧ tò e yàà, tà bùꞋ me làꞋa ntsɔ̧̀.

³⁶ Yesò bɔ̂ səèŋkè ètû̧ bòt bàgème nê bɔ̀ ka shu ànəa mbɔŋ abua wòt. Mbàte səèŋkè ètû̧ bɔb ale, ka bɔ paà ndàꞋtè.

³⁷ Wòt ègème tà li ndzəâ ànəa ngaa la li ntsiꞋi ghaꞋa ètsəê vi me shu nê, “Tà ghe tàa ngɨ̀à èghɨ ègème la. Tàa ngɨ̀à fɔ̀ɔ̀le mbuꞋtsə te zəa èdziꞋ mè ndàꞋà.”

« Roimhe

Air adhart »

Lean sinn:

Ceanglaichean taic

Sanasan