Ntu̧ Ntsɔ̧̀ MAK 5 - Mundani

Yesò bəâ wòt kǒ fote kàbɔ̀ŋ tèa ane tò la
( Mat 8:28-34 ; Lk 8:26-39 )

¹ Bɔ ntu̧ èlemè Galìlî ngà aguŋ nkwene àlaꞋ a bòt Galasìn.

² Mbɨ̀Ꞌɨ̀ Yesò bê ndzəè a èbem ànkànuꞋ yu la, wòt kǒ fote kàbɔ̀ŋ tèa ane tò la kɨꞋɨ̀ nkwene ane tò.

³ Tà li ngua ntsèka ètsəsì, wòt kà bê nguê tàa ko ekuule atò, ka wuê ane fȩtsə la.

⁴ Bɔ li bɔ̀ ghɨ̀ bɔ̀ kuule èbu tò, nè èkǎ tò, tà lòòte fȩ tu, ŋèꞋnè ètɨ̧ɨ̧na bu a èka bi la. Tà li nkwèèle tè ntsè ndɨ wòt kǒ nàa mě ko baabe atò la.

⁵ È ghɨ̀ è wu àfɨ̀Ꞌ àgème, ètsəꞋ nè nèngû̧, tà me ghǎ a èbem ètsəsì bu nè ègwet tèbȩtsə, ŋȩ̀a, ŋeꞋa àti mbùꞋa avi.

⁶ Tà li ndze a Yesò a endɨ̌, ndùùlà nkɨ̀Ꞌɨ̂ ntèm tènjûŋ ti a si a mbì tò,

⁷ mbɔ̂ ŋȩ ane àtɔŋ ànɨ̧ nê, “Yesò, Waã Mbɔ̧ɔ̧mà Àtsèàngɔ̀ŋ, à kɨa ghà abua am à? Ane èlen Mbɔ̧ɔ̧mà, mâ shu̧u̧te awê nê à ka ngɨ̧̀ɨ̧̀nè am.”

⁸ (Tà li me shu ale, ngu ndɨ Yesò li ngua shua abua tò nê, “Fo kàbɔ̀ŋ, sǎ mbê waa la!”)

⁹ Yesò bììte atò nê, “Èlen lê wu wà à?” Mbê wu bɨ̀ɨ̀lè nê, “Èlen laã wu ‘Àlaã’ - nkàà nê baa ndzǎ̧ nyaŋ.”

¹⁰ Tà bɔ̂ me shu̧u̧te a Yesò nê tà ka fəè fote kàbɔ̀ŋ tu ntsàà tê a endɨ̌.

¹¹ TaꞋà àlaã mèkunyà̧ ko a li ngua njɨ̀a a ngèt abot a mbɨ̧̀ èkù̧ù̧nè.

¹² Fote kàbɔ̀ŋ tu te shu̧u̧te a Yesò nê, “Tsàà àwa ane mèkunyà̧ maa, bàà nyi ane yɔb.”

¹³ Ale, Yesò bɨ̧̀ɨ̧̀ne fote kàbɔ̀ŋ tu te dzəè ane mbê wu ngà nyi ane mèkunyà̧ mu. Àlaã mèkunyà̧ yu à wu mbɔ̀ŋè bètɔsì babe la, a lùùlà nchu èkù̧ù̧nè lu, ndèbte a èbem èlemè wu, nu àtɨ̀ŋ mpfəèꞋtê.

¹⁴ Bèmbaabà mèkunyà̧ mu e lùùlà ngà a èbem àpfəèà nɨ̧ yu, nè èpfəè techɨɨle a ngèt ngwȩ̀ȩ̀te ànəê àgème shuê. Bòt e zə nkɨ̀Ꞌɨ̂ eye àghɨa a ghɨ̀ la.

¹⁵ Bɔ kɨꞋɨ ndzèa Yesò bɔ̂ mbê wu fote kàbɔ̀ŋ tèa wu ane tò la. Bɔ me ye tà kwaã ndǐ ti ntsèke a si, èyì tò e kuà, kèbɔɔ ke baãaã wòt ègème.

¹⁶ Bòt bɔ ye la, e shu bòt àghɨa a ghɨ̀ ane wòt wu fote kàbɔ̀ŋ tu te li ngua ane tò la, nè àghɨa a ghɨ ane mèkunyà̧ mu la.

¹⁷ Ale, bɔ me shu̧u̧te Yesò nê, tà dzə àbâ àlaꞋ a yɔb me ghǎ.

¹⁸ Mbɨ̀Ꞌɨ̀ Yesò tsìꞋa nkɨ nyi a èbem ànkànuꞋ yu la, mbê wu tàa bɔ fote kàbɔ̀ŋ ane zi la shu̧u̧te a Yesò nê tà ghɨa bɔ̂ tò è ghà nɔ̂.

¹⁹ Ka Yesò tu̧, mbɔ̂ shu abua ŋut nê “Wène àpfəèa yɨ̧ shu bòt àghɨa Mbɔ̧ɔ̧mà ghɨ ane yê la, mè shua wɔb ndɨ tà ku tèsȩ tê la.”

²⁰ Ale, tà ghà me ghȩ̀ȩ̀nè èbem èpfəè nɨ̧ bu èghem la ègème, shu àghɨa Yesò ghɨ ane zi la. A taꞋa tsě waa waa tà zə ànəa ngaa la.

Waàvi Jalùs nè àvi wu tà li mbà̧à̧te ndǐ Yesò la
( Mat 9:18-26 ; Lk 8:40-56 )

²¹ Yesò tu̧u̧ èlemè Galìlî wu tè tà wènè agua ko zìà, ènɔ̧̂ bòt e bu̧u̧te a mbì tò mbɨ̀Ꞌɨ̀ tà bele a ngèt èlemè la.

²² Wajûŋ kǒ a èbem lob Mbɔ̧ɔ̧mà èlen tò wu Jalùs la, kɨꞋɨ̀, tà ye a Yesò, tà tèmè tènjûŋ ti a si a mbì tò

²³ me dɨ̀a shua abua tò nê, “Waã am, waàvi tèchɨɨle nàà ngò̧ò̧nà ànyaꞋne tè ntsìꞋa nkɨ epfə. Lefɨ̀Ꞌ, kɨꞋɨ a lob yaã nɔ̀ŋè èbu bê adù̧ tò mbɨ̀Ꞌɨ̀ taa peme!”

²⁴ Yesò zə ale, ndɔ̀Ꞌ a si bɔ̂ tò e me ghǎ. Mbɨ̀Ꞌɨ̀ bɔ̀ɔ ngà la, ènɔ̧̂ bòt a me nkùŋe atò ŋweela atò a èba èbà.

²⁵ Àvi kǒ mbàŋ dzə ane tò ane èngùꞋ èghem ntsɔ̀b yebe la li ngu abot, nkɨ̀Ꞌɨ̂ mbà̧à̧te àtsəa ndǐ tò.

²⁶ Tà li ntàꞋa ye ngoꞋ a tèkitebu bèngàŋ, ntsòkè èkab vi ègème, ka tà kà pem. Ka àghɔ̧ atò a me paa ngà wuê nè mbì.

²⁷ Tà li ndzəè mènəè Yesò, nkɨ̀Ꞌɨ̂ akwèn tò è nyi ènɔ̧̂ bòt, mbà̧à̧te ndǐ tò.

²⁸ Ngu nê tà shua a èntɨ̧ɨ̧ vi nê, “E ngu anè nyaꞋà mbà̧à̧te wuê àtsəa ndǐ tò ko maa peme.”

²⁹ Tà bà̧à̧te ndǐ Yesò, mbàŋ yu bê ndòa, tè tà zə a èbem ènyit zi nê ye pem.

³⁰ Yesò bê nko nê mètàŋ è dzə ane zi, mbê ngèble avi a èbem ènɔ̧̂ wu mbììte nê, “Wa baãaãte ndǐ yaã à?”

³¹ “Bɔkatè tò bu e bɨ̀ɨ̀lè nê, ‘Bòt e ghaale awê anè, à me biite nê wa baãaãte awê leꞋ ale, è wu ghàà?’ ”

³² Yesò me lɨ̀ŋkè wuê lɨ̀ŋkè nkɨ ye wòt wu tà baãaãte avi la.

³³ Àvi wu ko àghɨa a ghɨ̂ ane zi la, nkɨ̀Ꞌɨ̂ me benta mbɔ̀a nkwen a mbì tò, shu atò nkûŋ.

³⁴ Yesò shu abua tò nê, “Waã am, èntɨ̧ɨ̧ wu à zi ane yaã la, e ghɨ̂ à pem. Ghǎ ane ntsɔ̧̀. À pem ane àghɔ̧ yê.”

³⁵ Yesò bela ndàꞋà, bɔntu̧ ko e dzə àpfəa Jalùs nkɨ̀Ꞌɨ̂ shu abua tò nê, “Waã wè wu è pfə tê ndɔ̀Ꞌ, è wu ale à ka tsi ŋǎ ngoꞋ abua nyɨꞋtà wu.”

³⁶ Ka Yesò kà yutè ànəa bɔ shua la. Tà shu abua Jalùs nê, “Ka mbɔ̀a, zǐ èntɨ̧ɨ̧ wê wuê ane yaã.”

³⁷ Tà ghɨ̀ ale, ngà wuê bɔ̂ Pità nè Jimsì bɔ̂ wanyɨ vi Jɔ̌n, tà kà tsi nɨ wòt kǒ tsa.

³⁸ Bɔ ghà tê bɔ̀ nyi àpfəa wajûŋ wu, Yesò ye ndɨ bòt e kɔꞋɔ kɔꞋɔ, nchua chu, ŋȩ̀a ndɨ̀à ànyaꞋne, la,

³⁹ nyi a lob mbììte awɔb nê, “Bɨ̀ dɨ̀a ghǎ? Waã wàa bakà pfə. Tà lia li!”

⁴⁰ Bɔ bùꞋ me wȩ̀ȩ̀te atò. Tà tsà àwɔb àbȩ bàgème, nɨ a tǎt waã wu bɔ̂ nyɨ̌ tò, nè bɔkatè bi bu batat la nɨŋ nyi àtsəa lob yu waã wu wu a èbèm la.

⁴¹ Tà baãaã àbu a waã wu nê, “Tàlità komì”, ngua shua nê “Waàvi tèchɨɨle, mâ laꞋnê lɔ̀Ꞌɔ a si!”

⁴² Waàvi wu bê nkȩ ndɔ̀Ꞌ a si me ghȩ̀ȩ̀ne. (Waàvi mbɔŋ li ngu èngùꞋ èghem ntsɔ̀b yebe.) Ale, a taꞋa tsě bòt bu.

⁴³ Yesò bɔ̂ səèŋkè ètû̧ bɔb nê bɔ̀ ka shu wòt ànəa a ghɨ̀ la, mbɔ̂ nê “Bɨ̀ ŋa tò àghɨ tà jɨ.”

« Roimhe

Air adhart »

Lean sinn:

Ceanglaichean taic

Sanasan