Bìoball air-loidhne

Ntu̧ Ntsɔ̧̀ MAK 4 - Mundani

Èngà̧teme adù̧ wòt màsa èsaãaãme
( Mat 13:1-9 ; Lk 8:4-8 )

¹ Yesò mè bùꞋ me nyɨꞋte èngǎ̧ Mbɔ̧ɔ̧mà abua bòt a ngèt èlemè Galìlî. TaꞋà ènɔ̧̂ bòt e kɨꞋɨ̀ mbù̧ù̧tè a ngèt tò, kwat tè tà tsìꞋi sà àwɔb nyi a èbem ànkànuꞋ ngà a èbem *èdzî. Ènɔ̧̂ bòt bu e wu aguŋ.

² Tà shua awɔb mènəè nyaŋ ane mèngà̧teme, mè nɨ̀ mèngà̧ mi nyɨ̀Ꞌte awɔb nê,

³ “Bɨ̀ zə! Wòt kǒ li ndɔ̀Ꞌ nga esà èsaãaãme.

⁴ Mbɨ̀Ꞌɨ̀ tàa sà la, è weko e kwentè a èbuꞋ èlu̧, banɨ̧̀ e kɨꞋɨ ngwȩ̀ȩ̀te,

⁵ è weko e kwentè a ègwet èwu, kà ye ètsaꞋ nyaŋ. ÀdziꞋ bê me wù̧ù̧ne e tuutè ndɨ̀ wu ètsaꞋ wu abot àa ndzàŋà la.

⁶ Nyèm chu mbê ntò̧ èsaãaãme wu e tuute la, e yu̧ ndɨ̀ wu tèghaŋ tɔb tè bakà nyi a si ntsɔ̧̀ la.

⁷ È weko e kwente a èbèm àdzɔ̧, a kɔꞋ nɨŋ tè è ka kɔɔle tètaãaãtsə.

⁸ Ka è weko nè èsaãaãme e kwente adù̧ ètsaꞋ ntsɔ̧̀, nkɔꞋ nkɔ̀ɔ̀le, me nkwèꞋne tè nkɔ̀ɔ̀la tètaã èghem yetat, èghem yentùa, nè ènkɨ̀.”

⁹ Yesò me lìà nê, “Wòt bɔ̌ ètû̧, tà yùte èngà̧ waa.”

Lə mèngà̧teme
( Mat 13:10-17 ; Lk 8:9-10 )

¹⁰ È lè wu àfɨꞋa Yesò tseke zìa ndziꞋne la, bòt ko bɔ̀ le zə ndɨ tà làꞋà la, nè bɔntu̧ tò e kɨꞋɨ̀ nê tà shua wɔb lə mèngà̧teme mu.

¹¹ Yesò bɨ̀ɨ̀lè nê “Bɔ tuꞋu ànəa ndò̧ Kèfɔ̧̀ Mbɔ̧ɔ̧mà abua yɨ̧, ka è wu bòt kà zi mèntɨ̧ɨ̧ mɔb ane yaã ko bɔɔ̀ ndzəèa mènəè ègème ane mèngà̧teme,

¹² mbɨ̀Ꞌɨ̀, ‘Bɔ̀ lâ bɔ̀ lɨŋka, bɔ̀ lɨŋka, bɔ̀ ka ye, bɔ̀ yute, bɔ̀ yute, bɔ̀ ka zə, mbɨ̀Ꞌɨ̀ e ghɨ̀ bɔ kubtè, Mbɔ̧ɔ̧mà waꞋa a kàbɔ̀ŋ wɔb.’ ”

Yesò shu lə èngà̧teme wu ane wòt màsa èsaãaãme la
( Mat 13:18-23 ; Lk 8:11-15 )

¹³ Yesò ghɨ̀ ale, mbììte awɔb nê, “Bɨ bakà ko lə èngà̧teme wàa ko bɨ̀a li ghɨ̀ na ka eko lə èngà̧teme ko tsa à?”

¹⁴ Àghɨ yu bɔ sà la wu èngǎ̧ Mbɔ̧ɔ̧mà.

¹⁵ Bòt bu bɔ zə èngǎ̧ Mbɔ̧ɔ̧mà la aà mbɨ̀Ꞌɨ̀ èsaãaãme wu e kwentè a èbuꞋ alu̧ la. Bɔ̀ɔ ngɨ̀ bɔ̀ zə, àdziꞋ me wù̧ù̧ne, Satàn kɨ̀Ꞌɨ̂ ntsì a mèntɨ̧ɨ̧ mɔb.

¹⁶ È baa e wu mbɨ̀Ꞌɨ̀ èsaãaãme wu e kwentè a ègwet èwu la. Bɔ̀ɔ ngɨ̀ bɔ̀ zə èngà̧ wu, bɔ bê mbɨ̧̀ɨ̧̀ne nè mèngùꞋte,

¹⁷ ka bɔ̀ ka zi èntɨ̧ɨ̧ wɔb adù̧, ale è ka tseke ane àfɨ̀Ꞌ a seè. ÀfɨꞋa ngoꞋ kɨꞋɨ̀, kò bòt e me kɨ àtsəa yɔb enɨ ambo èngǎ̧ mbɔŋ la leꞋ, bɔ bê màꞋà a si.

¹⁸ Èbeko, e wu mbɨ̀Ꞌɨ̀ èsaãaãme wu e kwentè a èbem àdzɔ̧ la. Bɔ wu mbɨ̀Ꞌɨ̀ bòt bu bɔ zə èngà̧ wu,

¹⁹ ka ndɨ̀ wu bɔ̀ɔ ndèbà ènyit yɔb ane èghɨ sitsǎꞋ nè èkɔŋ èghɨ èkab, mè ndzì mèntɨ̧ɨ̧ mɔb ane èghɨ tsa la, ekuule èngà̧ wu tè èngǎ̧ mbɔŋ e tsiꞋi tsè àku.

²⁰ È me wu èsaãaãme wu e kwente a si ntsɔ̧̀ la, e wu mbɨ̀Ꞌɨ̀ bòt bu bɔ zə èngà̧ wu e nyi àtsəa yɔb bɔ me ghɨ̀ àghɨa e shua la, tè bɔ tsiꞋi mbɨ̀Ꞌɨ̀ èsaãaãme wu e kɔɔle tetaã èghem yetat, weko èghem yentùa nè weko ènkɨ̀ la.

ÈkaꞋà a èten èpfəèꞋ
( Lk 8:16-18 )

²¹ Yesò mè mbììte awɔb nê, “BetsiꞋa wòt tò̧ èkaꞋà nɨŋ nkɨ̀Ꞌɨ̂ ndzì a èten èpfəêꞋ, kò a èten èku̧? ChaꞋ, ka wòt nàa ngɨ̀ tà tsia èkaꞋà wuê a ègwet èkɔꞋ mbɨ̀Ꞌɨ̀ bòt àa me ye à?

²² Àghɨ àgème a lò̧ò̧tè la aa li pùùla ayaã, àyea bɔ kaba la aa li edzəâ àbȩ.

²³ Wòt tà bɔ ètû̧ la, yute èngà̧ waa!”

²⁴ Tà mè shu abua yɔb nê, “Bɨ̀ me ko awɨ̧ ndɨ bɨ̀a njùta èngǎ̧ Mbɔ̧ɔ̧mà la. Ndɨ bɨ̀a ngɨ̀à nè wùà la, wu ndɨ Mbɔ̧ɔ̧mà nàa ghɨ̀ ne nɨ̧̀ te kwèꞋnè la.

²⁵ Nkàà nê bɔɔ kwèꞋnà àghɨa wòt tà bɔ àghɨ la, ka wòt kà bɔ àghɨ, bɔɔ paa ka wuê adzìꞋ wu tà bɔ la enɨ.”

Èngà̧teme adù̧ èsaãaãme àa ntsəèa la

²⁶ Enɨ eghà ne mbì, Yesò mè nê, “Kèfɔ̧̀ Mbɔ̧ɔ̧mà wu mbɨ̀Ꞌɨ̀ wòt tà gha sà èsaãaãme vi a mbȩ la.

²⁷ Kò ŋut è nɔ̀ŋkè a si ètsəꞋ, kò tà wu àtatsi nèngû̧ leꞋ, èsaãaãme wu e wua ntùa, ntsəèa, ka tà kà lem nko ndɨ e ghɨ̀à ka ntsəèa la.

²⁸ Wu ètsaꞋ wùà wùà ka àa ngɨ̀à èghɨ bu e tsəa, nkɔ̀ɔ̀la tètaãaãtsə la. TèfəꞋtsə tèa ngɨ̀ te bɨ̀ saꞋ, mèsaŋ dzəè, ka àtsə yu a zì tèmbèmtsə la a kɔꞋ.

²⁹ Nàa ngɨ̀ è wu àfɨꞋa tèmbèm tu te kweele la, mbê wu bùꞋ me tsɔꞋɔ nkàà nê àfɨꞋa màfuꞋa a kuêꞋ.”

Èngà̧teme adù̧ èsaãaãme èwuu maŋkaŋa kǒ
( Mat 13:31-32 , 34 ; Lk 13:18-19 )

³⁰ Yesò ghɨ̀ ale, mè mbììtê nê, “Bàa laꞋ nê Kèfɔ̧̀ Mbɔ̧ɔ̧mà wu mbɨ̀Ꞌɨ̀ èghà à? Bàa nɨ kǎ èngà̧teme ka enyɨꞋte ndɨ nàa la à?

³¹ Nàà mbɨ̀Ꞌɨ̀ èsaãaãme èwuu maŋkaŋa kǒ, bɔ̀ɔ ngɨ̀à bɔ̀ me sǎ a mbȩ, e koote tè ntsè èsaãaãme ègème àa sitsǎꞋ la.

³² Ka bɔ̀ɔ ngɨ̀ bɔ̀ sa, e tsə faŋ ntsè èghɨjɨ ègème bɔ liꞋi a mbȩ la, tè ntsìꞋi mbɨ̀Ꞌɨ̀ àyɨt, tè banɨ̧̀ bu bèa ndèa la e me kɨꞋa nkùùla tèjî tɔb adù̧ mèntaãaã tò.”

³³ Yesò li ntàꞋa wua nɨa mèngà̧teme mbɨ̀Ꞌɨ̀ maà nɨa ndàꞋà èngǎ̧ vi ane ndɨ bɔ̀ɔ ko ezə la.

³⁴ Tà le kaꞋa wua mbê ndàꞋà ànəê abua yɔb kà zi ane èngà̧teme. Ka è wu àfɨꞋa tà wu zìa ndziꞋne nè bɔkatè bi la, tà yààtè ànəê àgème shua wɔb.

Yesò fìi àfeme àkekweelè
( Mat 8:23-27 ; Lk 8:22-25 )

³⁵ Nyèm li fen ane àlia mbɔŋ, Yesò shu abua bɔkatè bi nê, “Bɨ̀ ghɨa bà tu̧ èlemè waa nga aguŋ zìa.”

³⁶ Ale, bɔkatè bu è sà ènɔ̧̂ bòt bu ngà nyi a èbem ànkànuꞋ yu Yesò bɨ̌ a èbèm la, nɨa tò bɔ me ghǎ. ÈnkànuꞋ ko è le wu a èbem èlemè wu mɨ̧̂.

³⁷ Àfeme àkekweelè a bùꞋ me tsě, fòa mèleb ntsàà a èbem ànkànuꞋ yu, tè è bùꞋ me lu̧ a èbèm.

³⁸ Yesò wu akwene ànkànuꞋ yu tà nɔ̀ŋè àtsəa zi a ègwet àbuŋke me li la. Bɔkatè bu e yɔ̧̀ atò mbììte nê “NyɨꞋtà, aà kà saa awê nê ba tsiꞋa nga eleme?”

³⁹ Yesò lɔꞋɔ a si, ŋȩ̂ àfeme yu nê “Buŋ”, mè shu abua mèleb mu nê, “TsiꞋ ale.” Àfeme yu a loà, èdziꞋ ègème e fi.

⁴⁰ Yesò bɔ mbììte bɔkatè bi bu nê, “Bɨ ghɨ̀ na ka me bɔɔ anè à? Bɨ bakà zìꞋ ndzì èntɨ̧ɨ̧ wɨ̧ ane yaã à?”

⁴¹ Mbɨ̀Ꞌɨ̀ tà shu ale la, bɔ paà bɔɔ̀ ànyaꞋne, mbùꞋ me làꞋte a kètsìà wɔb nê, “Eyaa chɨɨme ngu wàa ka àfeme bɔ̂ mèleb e me zəè atò à?”

« Roimhe

Air adhart »

Lean sinn:

Ceanglaichean taic

Sanasan