Bìoball air-loidhne

Ntu̧ Ntsɔ̧̀ MAK 2 - Mundani

Yesò bəâ wòt kǒ àbâ ènyit tò a pfə la
( Mat 9:1-8 ; Lk 5:17-26 )

¹ Èli ko e li nyàꞋa ntsè, Yesò wènè a Kàpenàwuêm. Tà ghà ale, a bê mbùà nê tà kua tê ntsìꞋi àpfəè.

² Ale, bòt nyaŋ e bù̧ù̧te abot tè àdziꞋ à ka bê tsi ngu, ka wuê a mbì ètsələèꞋ. Mbɨ̀Ꞌɨ̀ Yesò nàa ntsɔ̀tà Ntu̧ Ntsɔ̧̀ yu abua yɔb la,

³ bòt bakwì e ŋeꞋè wòt kǒ àbâ ènyit tò a pfə la, nɨŋ nkɨ̀Ꞌɨ̂ abua tò.

⁴ Bɔ kɨꞋɨ ale, bɔ̀ ka ye èlu̧ bɔ̀ɔ nɨa ŋut epùùla a mbì Yesò nkàà ènɔ̧̂ bòt bu abot la. Ale, bɔ kɔꞋ a ègwet lob, ntùꞋ èləꞋ kwàꞋ a ègwet àdziꞋ yu Yesò tɨ̧ɨ̧ la, shùke a mbê wu a ègwet àkwàŋkè ntsàà a lob.

⁵ Yesò ye ndɨ bòt ngaa e bɔ ntɨ̀ ane zi la, shu abua mbê ngaa nê, “Waã am, mâ waꞋa a kàbɔ̀ŋ wê.”

⁶ BènyɨꞋtà mbɨ̧te Musì ko e tsekè abot me lèmte a mèntɨ̧ɨ̧ mɔb shua nê,

⁷ “Mbê waa ghɨ̀ na ka me làꞋa anè à? Tàa fɨ̀Ꞌnà àvi ane Mbɔ̧ɔ̧mà! Wàa tsa nàa ngwàꞋa kàbɔ̀ŋ ka nè Mbɔ̧ɔ̧mà à?”

⁸ KwàꞋ àfɨꞋa mbɔŋ, Yesò ko àghɨa bɔ mɨ̀ɨ̀tà la a èntɨ̧ɨ̧ vi mbììte awɔb nê, “Bɨ ghɨ̀ na ka me kwàꞋtè èwuu maa nè mènəè à?

⁹ Àyea ŋa àa njùa à, e shu abua wòt àbâ ènyit tò a pfə la nê ‘Mâ waꞋa kàbɔ̀ŋ wê’, kò wuê nê ‘Lɔ̀Ꞌɔ a si ŋèꞋè àkwàŋkè ye me ghȩ̀ȩ̀ne à?’

¹⁰ Maa nyɨꞋte awɨ̧ laꞋnê Waã Wòt bɔ àtɔŋ a sitsǎꞋ à màngwaꞋa kàbɔ̀ŋ.” Ale, tà shu abua wòt wu àbâ ènyit tò a pfə la nê,

¹¹ “Mâ laꞋnê, lɔ̀Ꞌɔ a si ŋèꞋe àkwàŋkè àyê me ghǎ àpfəè.”

¹² Ŋut bê ndɔ̀Ꞌ a si ŋèꞋe àkwàŋkè zi yu me ghà àbȩ a mbì lɔb bàgème. A tsè ènɔ̧̂ bòt bu, bɔ tsiꞋi me wùꞋte a Mbɔ̧ɔ̧mà shua nê, “Ba te bakà ye ànəê àko anè!”

Yesò tɔa Levì
( Mat 9:9-13 ; Lk 5:27-32 )

¹³ Yesò li mè nkua akwèn nga a ngèt èlemè Galìlî, ènɔ̧̂ bòt e kɨꞋɨ̀ nkwene ane tò, tà bùꞋ me laꞋa abua yɔb.

¹⁴ MbɨꞋɨ tàa ngȩ̀ȩ̀tà la, tà yèa nɨà èkab taksì kǒ èlen to wu Levì, waã Alfeɔ̀ tà tsekè àdzìꞋa àfàꞋ àzi la. Yesò shu abua tò nê, “KɨꞋɨ nkùŋè am.” Levì lɔ̀Ꞌɔ a si nkùŋè atò.

¹⁵ Mbɨ̀Ꞌɨ̀ Yesò tsekè me jɨ èghɨ a lob Levì la, bòt nyaŋ bɔ̀ɔ nɨ̀a èkab taksì la nè bòt kàbɔ̀ŋ e tsekè a si bɔ̂ Yesò ba nè bɔkatè tò me jɨ èghɨjɨ. A li ngu anè nkàà nê èwuu bòt bàa e li ntàꞋa wua nkuŋa tò.

¹⁶ BènyɨꞋtà mbɨ̧te Musì ko è wu Bèfalèsiì la e ye ndɨ tà fɔta èghɨjɨ bɔ̂ bènɨa èkab taksì nè bòt kàbɔ̀ŋ la, mbììtè bɔkatè Yesò bu nê, “Tà ghɨ̀ na ka me fɔte èghɨjɨ bɔ̂ èwuu bòt ba à?”

¹⁷ Yesò zə ale, mbɨ̀ɨ̀lè nê, “Bòt kekweelè aà kà kɨ ngàŋ. Bèngɔ̧̀ ka bɔ̀ɔ nkɨà ngàŋ la. È nka kɨꞋa etɔ bòt bɔ mɨɨtè nê bɔ tɨ̧ɨ̧ ndɨŋndɨ̀ŋ la, e nkɨꞋa etɔ bòt kàbɔ̀ŋ.”

Èngà̧ ane ànəa màntseka kà jɨ àghɨ
( Mat 9:14-17 ; Lk 5:33-39 )

¹⁸ È li ngu àfɨ̀Ꞌ àko, bɔkatè Jɔ̌n ndzìà èdzî nè Bèfalèsiì e me tseke àfɨ̀Ꞌ àko kà jɨ àghɨ mbɨ̀Ꞌɨ̀ etsàꞋte a Mbɔ̧ɔ̧mà. Bòt ko e kɨꞋɨ̀ mbììte a Yesò nê, “Ghǎ ghɨ̀ ka bɔkatè Jɔ̌n ndzìà èdzî, nè èbe Bèfalèsiì be me tseke àfɨ̀Ꞌ àko kà jɨ àghɨ mbɨ̀Ꞌɨ̀ etsàꞋte a Mbɔ̧ɔ̧mà ka èbê è ka wua ngɨ̀à ale à?”

¹⁹ Yesò bììte a wɔb nê, “Tè betsiꞋa bègɨ̧̌ ndzɔꞋɔ etɔ̧ɔ̧ èbu bɔb àfɨꞋa lu̧ ndzà bèlè bɔ̂ tò ba la à?

²⁰ Àfɨ̀Ꞌ aa ghɨ̌ nkùꞋ bɔ tsì lu̧ ndzà yu ayɔɔ yɔb, e ye wu àfɨꞋa bɔ̀ɔ me tseke kà jɨ àghɨ la.

²¹ “Wòt nàà kà lɔꞋ àlia nɨ̀ àdziꞋa ndǐ fi ntèmte ndǐ èlènè la, nkàà nê ye fi yu naa tseke tê sààlà ndzəè, èləꞋ mbɔŋ e mè mpàa fàŋ tê ntsè ndɨ e ghɨ̂ ngu la.

²² Wòt kà meè ngua ndɔ̀Ꞌ àlia ndzìà mèlùꞋ fi a èbem ètetuꞋ gùbnyà̧ e lènè la. Tà ghɨ̀ ale, ko ètetuꞋ gùbnyà̧ bu aa gwele, mèlùꞋ mu naa tsəète, ètetuꞋ bu aa bɨɨ. ChaꞋ bɔ̀ɔ ndzìà mèlùꞋ fi wuê a èbem ètetuꞋ gùbnyà̧ è fi.”

Èngà̧ ane ànəa àliapfəèa Bèjuê
( Mat 12:1-8 ; Lk 6:1-5 )

²³ È li ngu àliapfəèa Bèjuê àko, Yesò me tsě a èbem mbȩte bɔ liꞋi èwuu ntsəètè ko la. Mbɨ̀Ꞌɨ̀ bɔ̂ bɔkatè bi àa ngȩ̀ȩ̀nà la, bɔ bùꞋ me fààte ntsəè tu.

²⁴ Bèfalèsiì e shu abua Yesò nê, “Ye àghɨa bɔkatè bê e ghɨ̀à, è wu àghɨa bɔ̀ɔ ka ghɨ àliapfəèa Bèjuê la.”

²⁵ Yesò bɨ̀ɨ̀lè nê “Bɨ te bakà tɔ ezə àghɨa fɔ̧̀ Dàbid bɔ̂ bòt bi e li ngɨ̀ àfɨꞋa ndzìtsə te li ngua nkua awɔb la à?

²⁶ Ka tà li nyi a èbem lob nɨ̧ Mbɔ̧ɔ̧mà bɔ̂ bòt bi, àfɨꞋa Àbiatà lè wu àtsəa bèntsìà mèpɨ̧̀ Mbɔ̧ɔ̧mà la, kwèle a bled wu bɔ tɔ èlen Mbɔ̧ɔ̧mà adù̧ la à? Bɔɔ̀ nkwèla ale è kà wu àghɨa mbɨ̧ ta te bɨ̧ɨ̧nè nê wòt tsa kà wu ntsìà mèpɨ̧̀ Mbɔ̧ɔ̧mà ghɨa la.”

²⁷ Yesò lìà nê, “Mbɔ̧ɔ̧mà li ngɨ̀ àliapfəè mbɨ̀Ꞌɨ̀ nɨ etɨŋe wɔ̀bȩ̂, tà li tà kà wua ngɨ̀à nê, wɔ̀bȩ̂ ŋà àtsəa zi ane ànəa àliapfəè.

²⁸ È wu ale, bɨ̀ ko nê, Waã Wòt wu wòt tà bɔ àtɔŋ a ègwet àliapfəèa Bèjuê la.”

« Roimhe

Air adhart »

Lean sinn:

Ceanglaichean taic

Sanasan