Bìoball air-loidhne

Matìù 28 - Mundani

Yesò yù̧ù̧me
( Mk 16:1-10 ; Lk 24:1-12 ; Jn 20:1-10 )

¹ Àliapfəèa Bèjuê yu a li ntsè, è sàꞋà me wu a ntɔtetsɔ̌Ꞌ ane àlia mbì ane nkàb, Màlià Màdàlin bɔ̂ Màlià kǒ wu e ghǎ eye àtsəasì yu.

² KwàꞋ àfɨꞋa mbɔŋ sitsǎꞋ nyìꞋnè ànyaꞋne. Wantu̧ Mbɔ̧ɔ̧mà chu a ègwet mpàà èti lu, mbɔ̂ ntsèke a ègwet.

³ Tà li ngua nkàꞋtà mbɨ̀Ꞌɨ̀ nyèm, ndìte tò te mè me fəə mbɨꞋɨ̀ èŋu.

⁴ Bòt bu bɔ wua mbààba àtsəasì yu la e bɔa kwàꞋ ànyaꞋne tè ntsìꞋi mbɨ̀Ꞌɨ̀ bòt bɔ pfəꞋte la.

⁵ Wantu̧ Mbɔ̧ɔ̧mà wu shu abua bèzi bu nê, “Bɨ̀ ka mbɔ̀a, mâ ko nê bɨ wua nkɨà Yesò wu bɔ li ngù̧ù̧te atò a mbɨ̧̀ mbasa la.

⁶ Tà ntsě adzìꞋ yaa, tà yu̧u̧me mbɨ̀Ꞌɨ̀ tà li shu la. Bɨ̀ kɨꞋɨ ndze àdziꞋ yu bɔ li nɔ̀ŋè àpfəꞋte atò la.

⁷ Bɨ̀ bê ngà kwàla àfɨ̀Ꞌ yaa shu bɔkatè tò nê, ‘Tà yu̧u̧mè, tè ngu a mbì lɔb àfɨ̀Ꞌ yaa ngà a Galìlî. Bɨa ye atò abàꞋ və!’ Bɨ̀ ku̧u̧te ànəa mâ shu awɨ̧ la.”

⁸ Ale, bɔ lɔ̀Ꞌ àtsəasì yu me lùùla ngà e shu bɔkatè Yesò, ngà ale mbɔ̀â, ka mbɔ̂ me wùꞋtè àwɔb kwàꞋ ànyaꞋne ane àghɨa a ghɨ̀ la.

⁹ KwàꞋ àfɨꞋa mbɔŋ Yesò kwene ane yɔb nê, “Àlàŋkè à wu nè nɨ̧̀.” Bɔ kɔꞋ ngà mbà̧ àka atò ngùꞋtè atò.

¹⁰ Yesò shu abua yɔb nê “Bɨ̀ ka mbɔ̀â, bɨ̀ ghǎ shu bɔnyɨ bɔ̧ nê bɔ̀ ghǎ a Galìlî ko bɔɔ ye am abàꞋ və.”

Ànəa Bèmbaabà àtsəasì yu e li nkɨ̀Ꞌɨ̂ shuê la

¹¹ Mbɨ̀Ꞌɨ̀ bèzi bu àa ngà la, àbəèꞋ ako ane bèshujà bu bɔ wua mbààba àtsəasì yu la e gha a èbem àpfəa nɨ̧ yu è shuê bètǎt bèntsìà mèpɨ̧̀ Mbɔ̧ɔ̧mà àghɨa àgème a ghɨ̀ la.

¹² Bètǎt bèntsìàs mèpɨ̧̀ Mbɔ̧ɔ̧mà nè bɔɔjuŋ Bèjuê e bù̧ù̧tè ndàŋkè, mbɔ̂ ŋà èkab e nɨ zi ètsəê bèshujà bu,

¹³ mbɔ̂ shu abua yɔb nê, “Bɨ̀ shu bòt nê, ‘Baa nɔ̀ŋke a si ètsəꞋ me li bɔkatè Yesò e kɨꞋɨ tsɔ àpfəꞋta tò nɨŋ ngà.’

¹⁴ Gɔvanɔ̀, zəa ànəê yaa mbììte awɨ̧ ànəê, ko baa ko ndɨ bàa làꞋà tê tsì àwɨ̧ a èbem ngoꞋ la.”

¹⁵ Ale, bèshujà bu e nɨ èkab wu, ngɨ̀ mbɨ̀Ꞌɨ̀ bɔ shu awɔb la. E bùꞋu ane àlia mbɔŋ kɨꞋɨ ŋa laane waa, mèfà̧ maa bèla ngȩ̀ȩ̀nà wuê a kètsìà Bèjuê.

Yesò sàꞋa a mbì bɔkatè bi
( Mk 16:14-18 ; Lk 24:36-49 ; Jn 20:19-23 ; Àf 1:6-8 )

¹⁶ ÀfɨꞋa mbɔŋ bɔkatè Yesò bu èghem ntsɔ̀b wemɔ̀Ꞌ la e gha a Galìlî nkɔꞋ nga a ègwet èbȩ lu Yesò li ntsɔ̀tè la.

¹⁷ Mbɨ̀Ꞌɨ̀ bɔ ye atò la, bɔ wùꞋtè atò, ka èbeko e ka lâ bɨ̧ɨ̧ne nê wu tòà.

¹⁸ Yesò kɨ̀Ꞌɨ̂ a ngèt yɔb shu abua yɔb nê, “Mbɔ̧ɔ̧mà ŋa mètàŋ nàa ègwet nè sitsǎꞋ la ègème abua am.

¹⁹ È wu ale, bɨ̀ ghǎ ngɨ̀ bòt èlaꞋ ègème è tsiꞋi bɔkatè bɔ̧, ngɨ̀ bɔ zì àwɔb a èdzî ane èlen Mbɔ̧ɔ̧mà, nè èlen Waã, nè èlen Fo Kèfə,

²⁰ mbɔ̂ nyɨ̀Ꞌte awɔb nê bɔ̀ me ghɨ̌ àghɨ àgème e ndi shu awɨ̧ la, nko nê maa wu nè nɨ̧̀ tê ghǎ dzəâ àfɨꞋa ngɔ̀ŋ nàa li lìà la.”

« Roimhe

Air adhart »

Lean sinn:

Ceanglaichean taic

Sanasan