Bìoball air-loidhne

Matìù 21 - Mundani

Yesò nyi a Jèlusalèm mbɨ̀Ꞌɨ̀ Fɔ̧̀ nɨ̧
( Mk 11:1-11 ; Lk 19:28-40 ; Jn 12:12-19 )

¹ È li ngu àfɨꞋa Yesò bɔ̂ bɔkatè bi e kɨꞋɨ tê ngua a ngèt Jèlusalèm, a Befagè, a ègwet èbȩ Olìf la, tà tsɔ̀Ꞌɔ bɔkatè bi ko babe

² shu abua yɔb nê “Bɨ̀ gha àpfəè zia a mbì lɨ̧ la ko bɨa bê ye a jàkâ ko bɔ sèlè la bɔ̂ waã vi. Bɨ yà nɨŋ nkɨ̀Ꞌɨ̂ abua am.

³ Wòt è bììte awɨ̧ ànəê, bɨ nê ‘Lefɨ̀Ꞌ nàa nkɨà bùà.’ Ko taa bê sǎ bɨa nɨ ekɨꞋɨ.”

⁴ Mènəè maà li ntsè ane mbɨ̀Ꞌɨ̀ e ghɨ̌ ànəa ndàꞋàtɔŋ Mbɔ̧ɔ̧mà li shu la aa wu nkûŋ. Tà li nê,

⁵ Bɨ̀ shu bòt Zayɔ̀n nê “Bɨ̀ ye; Fɔ̧̀ wɨ̧ nàà nkɨ̀Ꞌa abua yɨ̧, Tà nɨa vi a si tè ntsèke nè ègwet jàkâ. Wu waã anyà̧ nàa ŋèꞋa àbòꞋà la.”

⁶ Bɔkatè tò bu e ghà ngɨ̀ mbɨ̀Ꞌɨ̀ tà shu la.

⁷ Bɔ nɨ a jàkâ wu nè waã wu nɨŋ nkɨ̀Ꞌɨ̂ ale maꞋa ndǐ tɔb a ègwet lɔb, Yesò kɔꞋ ntsèke a ègwet.

⁸ TaꞋà ènɔ̧̂ bòt e sàŋkè ndǐ tɔb a alu̧, èbeko e loote ètsə èyɨt nɨŋ sàŋkè alu̧.

⁹ Bòt bu nga a mbì tò la nè è bu akwèn la e bùꞋ me ŋȩa shua nê “MèngùꞋte wu abua waã Fɔ̧̀ Dàbid; TsiꞋ Mbɔ̧ɔ̧mà lɔ̀ɔ̀le a wòt wu nkɨ̀Ꞌa ane èlen tò la; MèngùꞋte wu abua Mbɔ̧ɔ̧mà wu a ègwet la.”

¹⁰ Yesò ghà tê tà nyi a Jèlusalèm, àpfəa nɨ̧a mbɔŋ a nyìꞋnè tè bòt e tsiꞋa mbììta nê “Eyaa wu wàà?”

¹¹ Ènɔ̧̂ bòt bu e nê “Eyaa wu ndàꞋàtɔŋ Mbɔ̧ɔ̧mà wu èlen tò wu Yesò, tà dzəa Nazàlet àbâ àlaꞋ a Galìlî la.”

Yesò ghà a lob nɨ̧ Mbɔ̧ɔ̧mà
( Mk 11:15-19 ; Lk 19:45-48 ; Jn 2:13-22 )

¹² Yesò nyi a èbem lob nɨ̧ Mbɔ̧ɔ̧mà fəè bòt bu bàgème fɨ̧̀ɨ̧̀nà mè nju̧a èghɨ a èbèm la. Mè mpààtè mèkɔꞋ bòt bu bɔ wua nkùbta mèkab nkɨà àbȩ̀ la, nè batɨ̧ bòt bu bɔ wua fɨ̧̀ɨ̧̀nà banɨ̧̌ ndɨk la.

¹³ Tà ghɨ̀ ale, shu abua yɔb nê “Àkate a Mbɔ̧ɔ̧mà a laꞋ ne, ‘Lob yaã wu lob bɔ̀ɔ me tsàꞋtè am a èbèm la’, ka bɨ nɨŋ ngɨ̀ è tsìꞋi àdziꞋa bètsɔŋ aa nkɨ̀Ꞌa ndɔ̧̀ɔ̧̀tà la.”

¹⁴ ÀfɨꞋa mbɔŋ bòt àghɨ àleme nè bòt èka bɔb e ŋɔꞋte la, e kɨꞋɨ abua tò a èbem lob nɨ̧ Mbɔ̧ɔ̧mà yu, tà bəè àwɔb.

¹⁵ Bètǎt bèntsìà mèpɨ̧̀ Mbɔ̧ɔ̧mà nè bènyɨꞋtà mbɨ̧te Musì e ye tèwuute ènəê kà ye àfəa tu tà ghɨ̀ la, mè nè ndɨ bɔtechɨɨle àa ŋȩ a èbem lob nɨ̧ Mbɔ̧ɔ̧mà shua nê “MèngùꞋte wu ane Waã Fɔ̧̀ Dàbid la”, a taꞋa saa awɔb.

¹⁶ Ale, bɔ biite atò nê “Tè à bakà zə ànəa bɔ̀ɔ shua la à?” Tà bɨ̀ɨ̀lè nê, “Naa, ma zə, ka la, tè bɨ bakà tɔ èngà̧ waa a èbem Àkata Mbɔ̧ɔ̧mà à? Nê, ‘À ghɨ̂ bɔtechɨɨle nè bɔkefi e ŋa ngule mèngùꞋte abua yê’.”

¹⁷ Yesò làꞋ ale sà àwɔb ndzəè a èbem àpfəèà nɨ̧ yu ngà ndi a Betanì.

Yesò tsɔ̧̀ àyɨt a fik
( Mk 11:12-14 , 20-24 )

¹⁸ Tà lɔ̀Ꞌɔ a ntɔtetsɔ̌Ꞌ tà me kua akwèn nkɨ̀Ꞌa àpfəa nɨ̧ yu ndzìtsə te baãaã atò.

¹⁹ Tà ye àyɨt a fik a ngèt alu̧, nga a mbɨ̧̀ tà kà ye àghɨ a ègwet, tà ye wuê tèfəꞋtsə. Ale, tà tsɔ̧̀ àyɨt ngaa nê “À ka lɔ̀Ꞌ àlia tsi kɔɔle tetaãtsə a.” A bê ntɨ̧ kwàꞋ àfɨꞋa mbɔŋ mpfə.

²⁰ Bɔkatè tò e ye ale, a bê ntsè àwɔb tè bɔ tsiꞋi biite nê “Àyɨt yàa a ghɨ̀ na ka mbê njù̧ anè à?”

²¹ Yesò bɨ̀ɨ̀lè nê “Ane nkûŋ, tsiꞋ è shu awɨ̧ nê bɨ zìà èntɨ̧ɨ̧ wɨ̧ ane Mbɔ̧ɔ̧mà tè mbakà wua màkà, ko betsiꞋa bɨ ghɨ̀ àghɨa mâ ghɨ ane àyɨt a fik yaa la. È ntsě wuê ndàꞋà yùà, bɨ màà shu wuê abua èbȩ la nê ‘ŊeꞋe awê ndebe a èbem *èdzî,’ ko aa ŋeꞋe avi.

²² Bɨ mè me biite àghɨ abua Mbɔ̧ɔ̧mà bɨ̧̀ɨ̧̀ne a mèntɨ̧ɨ̧ mɨ̧ nê tàa ŋa, ko bɨa bɔ yùà.”

Èngà̧ ane àtɔŋ Yesò
( Mk 11:27-33 ; Lk 20:1-8 )

²³ Mbɨ̀Ꞌɨ̀ Yesò mee nyi a èbem lob nɨ̧ Mbɔ̧ɔ̧mà tè me nyɨꞋte mènəè la, bètǎt bèntsìà mèpɨ̧̀ Mbɔ̧ɔ̧mà nè bɔɔjuŋ Bèjuê e kɨ̀Ꞌɨ̂ mbììte atò nê “Àa nɨa àtɔŋ nè ŋa ka ngɨ̀à èghɨ baà? Waa ka tà ŋa awê àtɔŋ ngaa la à?”

²⁴ Yesò bɨ̀ɨ̀lè nê “TsiꞋ è mbììte awɨ̧ èngà̧ waa mɨ̧̂. Bɨ bɨ̀ɨ̀là ntsɔ̧̀, ko maa shua wɨ̧ àdziꞋa mâ nɨ àtɔŋ ka me ghɨ̌ èghɨ baà la.

²⁵ Wàa ka tà li ntsà a Jɔ̌n nê tà me zǐ bòt a èdzî la à? È li ngu Mbɔ̧ɔ̧mà kò wuê bɔbȩ à?” Bɔ zə ale, mbùꞋ me kààne a kètsìà wɔb shua nê “Bàa laꞋ nê ghàà? Ba wu anè nê ‘Mbɔ̧ɔ̧mà’, ko taa biite awa nê, ‘a wu ale ghǎ a ghɨ̀ ka bà ka bɨ̧ɨ̧ne èngǎ̧ tò à?’

²⁶ Ka bà nê abua bɔbȩ, ko baa mbɔ̀a àghɨa ènɔ̧̂ bòt baa àa ghɨ̀ la, nkàà nê bɔ bɨ̧ɨ̧ne bàgème nê Jɔ̌n li ngu ndàꞋàtɔŋ Mbɔ̧ɔ̧mà.”

²⁷ Ale, bɔ tsɔꞋɔ èngǎ̧ Yesò nê “ChaꞋ, baa bakà ko.” Tà shu abua yɔb nê “Ale betsiꞋa è nka shua wɨ̧ àdziꞋa mâ nɨ àtɔŋ ka me ghɨ̌ èghɨ bàa la.”

Èngà̧teme ane bɔmbâ̧ ko babe

²⁸ Yesò ghɨ̀ ale, mè nê “Bɨ kwàꞋte ànəê yaa bà zə; wòt kǒ li ndɔ̀Ꞌ mbɔ̀ bɔ̧ bi babe, ngà abua ewe mbì shu nê ‘Waã am, ghǎ faꞋa mbȩ laane’.

²⁹ “Waã wu bɨ̀ɨ̀lè nê ‘È nka ghàa’, ka àfɨ̀Ꞌ a me wu tà kùbte èntɨ̧ɨ̧ vi ngà

³⁰ ŋut ghɨ̀ ale, mè nga abua ewe kwèn, shu abua tò nê tà ghà zi a mbȩ mɨ̧̂. Waã wu bɨ̀ɨ̀lè nê ‘Oo Tè, maa ghǎ’, ka ngɨ̀ ale tà kà ghâ.

³¹ “Yesò làꞋ ale mbɔ̂ mbììte nê ane bɔ̧ bàa babe la wàa li ngɨ̀ àghɨa tǎt tò li ngua nkɨà nê tà ghɨa la à?” Bɔ bɨ̀ɨ̀lè nê “Èwe mbì.” Ale, Yesò shu abua yɔb nê “Ane nkûŋ tsiꞋ è shua wɨ̧ nê, bèfetà èkab taksì nè bèghȩ̀ȩ̀nè ghȩ̀ȩ̀ne aa pààtè àwɨ̧ wàa e nyi a Kèfɔ̧̀ Mbɔ̧ɔ̧mà.

³² A me wu ale ngu nê Jɔ̌n ndzìà èdzî li nkɨ̀Ꞌɨ̂ nyɨ̀Ꞌte awɨ̧ alu̧ ndɨ bɨ̀a me ghɨ̀ àghɨa Mbɔ̧ɔ̧mà nàa nkɨà la, ka bɨ tu̧u̧ ebɨ̧ɨ̧ne ànəa tà li ngua shua la. Bèfetà èkab taksì, nè bèghȩ̀ȩ̀ne ghȩȩne e bɔ̂ mbɨ̧̀ɨ̧̀ne. Ka bɨ ye ale, ntsiꞋi akwèn bɨ̀ ka lem kùbte mèntɨ̧ɨ̧ mɨ̧, ebɨ̧ɨ̧ne ànəa tà shua la.”

Èngà̧teme ane bèlentà mbȩ ko
( Mk 12:1-12 ; Lk 20:9-19 )

³³ Yesò shu abua yɔb nê “Bɨ̀ mèe ndzəè è waa nè èngà̧teme. Wòt kǒ li ndɔ̀Ꞌ ndìꞋi èyɨt vȩn a mbȩ zi, nkùùlè àkaã nɨŋ ngààle mbȩ yu, ntu àdziꞋa màngɨa mèlùꞋ mu, mbɔ̧̀ àdziꞋa bɔ̀ɔ me tɨ̧ɨ̧ a ègwet mbààba èbaꞋ lu la. Mbɔ̂ ŋǎ abua bòt bɔ me faꞋa, tà ndzəè ngà àvi àlaꞋ a ko tsa.

³⁴ ÀfɨꞋa mànkaaba tètaãaãte vȩn tu a tseke te nkùꞋ, tà tsà bɔfàꞋ bi nê bɔ̀ gha ngɨ̀ bèlentà bu è ŋa evi ne èghàb ane èghɨ bɔ fùꞋù la.

³⁵ “BɔfàꞋ tò bu e ghà, bèlentà bu e baãaã wɔb, ndène wekǒ, mbùŋè wekǒ, ndɔ̀Ꞌ nɨa àti ŋèꞋnè wekǒ.

³⁶ Tà mè ntsà bɔfàꞋ bi ko be tsè èbe mbì bu la, bɔ mè ngɨ̀ wuê a èlɨ mbɔŋ ane yɔb.

³⁷ A me lìa tà tsà waã vi abua yɔb, mɨ̀ɨ̀tè nê bɔɔ kà̧aã me bɔa tò.

³⁸ “Mbɨ̀Ꞌɨ̀ bɔ ye atò la bɔ nê ‘Ye njɨlob mbê wu, bɨ̀ kɨꞋɨ bà bùŋa tò mbɨ̀Ꞌɨ̀ ejɨ èbaꞋa tǎt tò.’

³⁹ Ale, bɔ baãaã atò a èbem mbȩ yu mii àbȩ, mbɔ̂ bùŋè atò.”

⁴⁰ Yesò bɔ̂ mbììte awɔb nê “Tǎt mbȩ me ghɨ̀ tê nkɨ̀Ꞌɨ̂ ko tàa ghɨ̀ na nè bòt ba à?”

⁴¹ Bɔ bɨ̀ɨ̀lè nê “Ko taa bùŋe bòt kàbɔ̀ŋ mbɔŋ kà ku tèsȩ, ebɔ ŋa mbȩ mbɔŋ abua bòt tsa bɔɔ me faꞋa ŋa èwe tò nè èghàb àfɨꞋa ntsɔ̧̀.”

⁴² Yesò bììte awɔb nê “Tè bɨ bakà li me tɔ èngà̧ waa a èbem Àkata Mbɔ̧ɔ̧mà ezə? ‘Èti lu bèmbɔ̧ɔ̧ lob e li ngwaꞋ nê wu èti kàbɔ̀ŋ la, wu lùà ka è tsìꞋi ngule èti tɔ̀Ꞌɔ̀ lob la. Eyaa wu àghɨa Mbɔ̧ɔ̧mà ghɨ̀ la, a ghe àa mbɔ̀ la.’

⁴³ “Ale, Yesò mè nê ‘TsiꞋ è shua wɨ̧ nê bɔɔ nɨ àdziꞋ yu Mbɔ̧ɔ̧mà ŋa abua yɨ̧ a èbem Kèfɔ̧̀ vi la eŋa abua bòt bɔɔ ghɨ̌ àghɨa Mbɔ̧ɔ̧mà nàa nkɨà la.’ ”

⁴⁴ Wòt tà kwene a ègwet èti làa la, tàa bəꞋte atem atem, ka èti ngaa è kwene a ègwet wòt, ko aa ŋèꞋne atò.

⁴⁵ Bètǎt bèntsìà mèpɨ̧̀ Mbɔ̧ɔ̧mà nè Bèfalèsiì e zə èngà̧teme wàa ale nko nê tà wua ndàꞋà ŋǎ abua yɔb.

⁴⁶ Ale, bɔ nyɔ̀Ꞌtè nê bɔ kɨ ebaãaã tò ka me bɔɔ bòt bu nkàà nê bɔ̀ɔgème e li ngua nɨ̀a tò mbɨ̀Ꞌɨ̀ ndàꞋàtɔŋ Mbɔ̧ɔ̧mà.

« Roimhe

Air adhart »

Lean sinn:

Ceanglaichean taic

Sanasan