Matìù 16 - Mundani

Bɔ biitè àlȩê

¹ Bèfalèsiì nè Bèsadùsiì e li nkɨ̀Ꞌɨ̂ abua Yesò, me kɨ enyɔ̀Ꞌte atò shu abua tò nê tà nyɨꞋte awɔb àlȩê nê Mbɔ̧ɔ̧mà ka tà tsàà vi la.

² Yesò bɨ̀ɨ̀lè nê, “Nàa ngɨ̀ è wua nyèmtèsi ègwelebuule è me fəəte, bɨ nê àbȩ aa sàꞋa me bɔ̌.

³ È wu a ntɔtetsɔ̌Ꞌ ègwet è me fene, mbɨ̀ŋ me kwèle, bɨ nê mbɨ̀ŋ naa lu. Bɨà nkòa ndȩ̀ ègwelebuule shu ndɨ àbȩ àa wu la, ka bɨ̀ ka wu eko shu ndɨ àbȩ àa la.

⁴ Bòt laane wu bòt kàbɔ̀ŋ bɔ̀ɔ ka bɔa Mbɔ̧ɔ̧mà la. Bɨà nkɨà nê è nyɨꞋte awɨ̧ àlȩê ka bɨ̀ ka wu eye. NdàꞋ èwuu ànəa kà ye fɨ̀Ꞌ màa nyɨꞋte awɨ̧ la wu à yu Mbɔ̧ɔ̧mà li ngɨ̀ ane Jɔnà la.” Tà ghɨ̀ ale, sà àwɔb me ghǎ.

Yis Bèfalèsiì bɔ̂ Bèsadùsiì

⁵ Bɔkatè Yesò è ntu̧ èlemè wu bɔ̀ ghǎ aguŋ, bɔ ku̧u̧te na bɔ lèène nɨa bled la.

⁶ Yesò shu abua yɔb nê, “Bɨ̀ me ko awɨ̧ mè mbààba awɨ̧ ane yis Bèfalèsiì bɔ̂ Bèsadùsiì.”

⁷ Bɔ bùꞋ me làꞋa a kètsìà wɔb shua nê, “Tà làꞋ ànəa yis anè ndɨ̀ wu ba me kɨꞋɨ bà ka nɨa bled la.”

⁸ Yesò è ko ànəa bɔ làꞋà la, tà bììte awɔb nê, “Bɨ̀a bòt kà zi èntɨ̧ɨ̧ wɨ̧ ane yaã ntsɔ̧̀, bɨ ghɨ̀ na ka me làꞋa kètsìà wɨ̧ shua nê bɨ bakà bɔ bled à?

⁹ Ètsə bɨ̧ e bele kà zìꞋì ndzààtè? Bɨ lèènè tètaãaãte bled tu tetà̧â̧ e ndɨ nɨŋ njɨ̌ bòt bètɔsì batà̧â̧ la à? Bɨ li fete bankì basòꞋa?

¹⁰ Kò bɨ lèènè tetaã tu tesà̧à̧mbe e ndɨ nɨŋ njɨ̌ bòt bètɔsì bakwì la mɨ̧̂ à? Bɨ li fete bankì basòꞋa?

¹¹ A ghɨ̀ na ka à ka kɔꞋ àtsəa yɨ̧ nê mâ ghɨ̂ e nka wua ndàꞋà ànəa bled à? Bɨ̀ me ko awɨ̧ ane yis Bèfalèsiì bɔ̂ Bèsadùsiì.”

¹² Bɔ bê nko nê tà ghɨ̂ tà kà wua ndàꞋà ànəa bled, tà wua shua wuê nê, bɔ̀ me ko awɔb ane àghɨa Bèfalèsiì nè Bèsadùsiì àa nyɨ̀Ꞌta la.

Pità shu wòt Yesò wu wùà la

¹³ ÀfɨꞋa Yesò li nga a Sìsalìà Filìpȩ la, tà bììte bɔkatè bi nê “Bòt àa shua nê Waã Wòt wu wà à?”

¹⁴ Bɔ bɨ̀ɨ̀lè nê “Bòt ko aà shua nê à wu Jɔ̌n ndzìà èdzî, èbeko e shua nê à wu Èlȩjà, èbeko e mè shua nê à wu Jèlèmìà, ka nè èbe bèa shua nê à wu ndàꞋàtɔŋ nyaꞋ Mbɔ̧ɔ̧mà kǒ la.”

¹⁵ Tà bììte a wɔb nê “È me wu awɨ̧, bɨ shu nê è ngu wàà?”

¹⁶ Simùn Pità bɨ̀ɨ̀lè nê “À wu Fɔ̧̀ wu Mbɔ̧ɔ̧mà yɔꞋ ntsà la, Waã Mbɔ̧ɔ̧mà yû̧.”

¹⁷ Yesò bê nê “Ntsɔ̧̀ wu àwɔ̀ Simùn Ba-Jɔnà. Ngu nê ànəê yaa à ka dzəa abua wɔ̀bȩ̂, a dzəa abua Tǎt am wu a ègwet la.

¹⁸ È wu ale, tsiꞋ è shu awê nê à wu Pità, maa ghɨ̌ a chɔsì am a ègwet èwu làa ane ndɨ ka è màà ngu wuê èvə è ka ko enɨ wùà la.

¹⁹ Maa ŋa nkȩte kèfɔ̧̀ Mbɔ̧ɔ̧mà abua yê. À tsia ànəê a sitsǎꞋ, ko bɔɔ tsia ayùà a ègwet, ntsɔꞋɔ ànəê a sitsǎꞋ, ko bɔɔ tsɔ̀Ꞌɔ ayùà a ègwet mɨ̧̂.”

²⁰ Yesò ghɨ̀ ale, mbɔ̂ səèŋkè ètû̧ bɔkatè bi nê bɔ̀ ka shu wòt nê ye wu Fɔ̧̀ wu Mbɔ̧ɔ̧mà yɔꞋ ntsà la.

Yesò làꞋ ànəa ngoꞋ zi nè èvə li

²¹ E buꞋu àfɨꞋa mbɔŋ e ghà nè mbì, Yesò bùꞋ me shu bɔkatè bi ndɨ yèa ghǎ a Jèlusalèm e tàꞋa ye ngoꞋ a tèkitebu bɔɔjuŋ nè bètǎt bèntsìà mèpɨ̧̀ Mbɔ̧ɔ̧mà ndɔ̀Ꞌ nè bènyɨꞋtà mbɨ̧te Musì la. Nè, bɔɔ̀ li ebùŋè àvi ka naa me wu ane èlibȩ betat yea yu̧u̧me.

²² Pità nɨa tò bɔ səèꞋtè àwɔb, tà bùꞋ me fèèle atò shua nê “ChaꞋ a Tè, Mbɔ̧ɔ̧mà ka mbɨ̧̀ɨ̧̀ne nê èwuu ayaa nè ànəê à ghɨ ane yê.”

²³ Ka Yesò ghèble avi shu abua Pità nê, “LɔꞋ a ngèt yaã à Satàn! Àà nkèla alu̧ am. Mènəè maà à mɨ̀ɨ̀tà la ka dzəa abua Mbɔ̧ɔ̧mà, è dzəè nè abua bɔbȩ.”

²⁴ ÀfɨꞋa mbɔŋ Yesò shu abua bɔkatè bi nê “Wòt me kɨ eghȩ̀ȩ̀ne ateka taã, tà sà mènəè mi ègème ŋèꞋe mbasa vi nkùŋè am.

²⁵ Wòt me baabe àtsəa zi ko taa pfə, ka wòt tà ŋà àtsəa zi ambo yaã la, naa peme.

²⁶ Wòt wua ane njɨ̀a èghɨ sitsǎꞋ ègème, mbɔ̂ nyɔ̂ zìambɔŋ tà ko nê ye vi ghàà? Kò àghɨa ko aà və betsiꞋa wòt ŋa nɨŋ nchùꞋ àtsəa zi la à?

²⁷ Waã Wòt naa li kɨꞋɨ bɔ̂ bɔntu̧ bi ane ènɨ̧ tǎt vi, etsɔꞋɔ wòt ègème ane àghɨa tà ghɨ̀ la.

²⁸ Ane nkûŋ, tsiꞋ è shu awɨ̧ nê bòt ko aa adzìꞋ yaa betsiꞋa èvə è ka nɨ awɔb kà bɔ ye Waã Wòt nkɨ̀Ꞌa nè Kèfɔ̧̀ Mbɔ̧ɔ̧mà la.”