Bìoball air-loidhne

Matìù 15 - Mundani

Èngà̧ ane mènəè bètǎt nyaꞋ
( Mk 7:1-13 )

¹ ÀfɨꞋa mbɔŋ, Bèfalèsiì ko, nè bènyɨꞋtà mbɨ̧te Musì e lɔ̀Ꞌɔ Jèlusalèm nkɨ̀Ꞌɨ̂ mbììte a Yesò nê,

² “Àghɨ yu a ghɨ̂ ka bɔkatè bê è ka wua nkùŋà mènəè bètǎt nyaꞋ ba e li sa abua ya la wu ghà à? Bɔ̀ɔ njɨ̀a èghɨjɨ kà wua shùà èbu bɔb a shua yu bòt ko àa shùà la.”

³ Yesò bɨ̀ɨ̀lè nê, “Àghɨ yu a ghɨ̂ ka bɨ gha ambo mɨ̧ ne mènəè, bɨ̀ ka wua ngɨ̀à àghɨa Mbɔ̧ɔ̧mà shu nê bɨ̀ me ghɨ̀ la wu ghà à?

⁴ Mbɔ̧ɔ̧mà li shu nê, ‘Me zəa tǎt wè bɔ̂ nyɨ̌ wè,’ mè nê, ‘Wòt làꞋ ànəa kàbɔ̀ŋ ane tǎt vi kò nyɨ̌ vi leꞋ, bɔ bùŋè atò.’

⁵ Ka è wu awɨ̧, bɨ me shu nê, ‘Wòt nɨa àghɨa tà wu enɨ tɨŋe a tǎt vi kò nyɨ̌ vi la leꞋ, è ntsiꞋi shu nê wu àyea Mbɔ̧ɔ̧mà, ko tà bakà tsi mbɔ̌ ndɨ tàa me ŋa kènuke abua tǎt vi la.’

⁶ Ale, bɨ gha ambo mènəè ndɨ̧ yɨ̧, ngwaꞋa ànəa Mbɔ̧ɔ̧mà shu nê bɨ̀ me ghɨ̀ la.

⁷ KwàꞋ bɨ̀a wàà bɨ̀a shua nê bɨ wu àghɨa kà wu yùà la! Àsayà li ndàꞋà nkûŋ zi ane yɨ̧ àfɨꞋa tà li nê Mbɔ̧ɔ̧mà laꞋnê:

⁸ ‘Bòt baa aà ngùꞋtè am wuê ane èkuube ètsəê bɔb, ka mèntɨ̧ɨ̧ mɔb ka wu ane yaã.

⁹ Bɔ tsiꞋa ngùꞋtè am àku nkàà nê bɔɔ̀ nɨa mènəè bɔbȩ nyɨ̀Ꞌta bòt mbɨ̀Ꞌɨ̀ wu mènəè Mbɔ̧ɔ̧mà.’ ”

Èghɨ aa ntsòkà wòt e mbì Mbɔ̧ɔ̧mà la
( Mk 7:14-23 )

¹⁰ Ale, Yesò tɔ ènɔ̧̂ bòt bu shu abua yɔb nê “Bɨ̀ zə à nyi àtsəa yɨ̧ ntsɔ̧̀!

¹¹ Àghɨa àa nyia a ètsəê wòt la aà kà tsòke atò, àghɨa àa ndzəa ètsəê wòt la, ka àa ntsòka tò la.”

¹² ÀfɨꞋa mbɔŋ bɔkatè tò e kɨꞋɨ̀ shu abua tò nê, “Tê à ko nê, à ghɨ ndaꞋ èngà̧ wu ale e taꞋa saa Bèfalèsiì?”

¹³ Yesò bɨ̀ɨ̀lè nê, “Tǎt am a ègwet naa tsɔꞋte àghɨ àgème tà bakà liꞋ la.

¹⁴ È wu ale, bɨ sà wɔb a si, bɔ wu bòt àghɨ àleme nkɨ enyɨꞋte beko èlu̧ la. Wòt àghɨ àleme baãaã àbu wòt àghɨ àleme ko bɔ̀ɔgème aa chɨ̧ɨ̧ a èbem èbɨ.”

¹⁵ Pità shu abua tò nê, “Shu awa lə èngà̧teme wàa.”

¹⁶ Yesò bɨ̀ɨ̀lè nê, “Bɨa mbɔŋ e yaã mbele kà bɔ èyì mbɨ̀Ꞌɨ̀ bòt koê?

¹⁷ Bɨ bakà ko nê àghɨ àa nyia ètsəê wòt, a tsè a èbem tò ndzəa lə tò nga àbȩ?

¹⁸ Èghɨ àa ndzəa ètsəê wòt la, e kɔꞋɔ nè èntɨ̧ɨ̧ tò. Àyea mbɔŋ ka àa ntsòkà wòt e mbì Mbɔ̧ɔ̧mà la.

¹⁹ Ngu nê èghɨ àa ndzəa èntɨ̧ɨ̧ wòt la ka àa ngɨ̀à tà bɔ mèmɨ̀ɨ̀te kàbɔ̀ŋ, a màmbuŋa wɔ̀bȩ̂, mànjɨa àbȩ, màpaꞋte wòt kà bɨ tò eyɔꞋ, màntsɔa, màndzia mèfà̧ àtsəa bòt, mè nè màntsoke èlen wòt.

²⁰ Eyaa wu èghɨ àa ntsòkà wòt e mbì Mbɔ̧ɔ̧mà la, mànjɨa èghɨjɨ kà shuu èbu aà kà tsòke wòt a mbì Mbɔ̧ɔ̧mà.”

Àvi kǒ tà li ndzì èntɨ̧ɨ̧ vi ane Yesò la
( Mk 7:24-30 )

²¹ Yesò lɔ̀Ꞌ abot nga àbâ àlaꞋ a Tȩê nè Sidɔ̀n.

²² ÀfɨꞋa mbɔŋ, vi Kenànȩê kǒ àlaꞋ və kɨꞋɨ̀ ŋȩ nê “Tê, Waã fɔ̧̀ Dàbid, ku tèsȩ taã. Fo kàbɔ̀ŋ nyi ane waã am waàvi tè tà wu a si ngò̧ò̧nà kwàꞋ ànyaꞋne.”

²³ Tà làꞋ ale, Yesò kà lem mbɨ̀ɨ̀lè èngǎ̧ tò. Bɔkatè tò e kɨꞋɨ̀ shù̧ù̧te atò nê “Fəa àvi wàà, tà ka tsi nkùŋà wa ŋȩ̂ àtsəa ya.”

²⁴ Yesò shu nê “Bɔ li ntsàà am wuê abua bòt Izəèlȩê bu bɔ̀ wu mbɨ̀Ꞌɨ̀ njɨ̀tsə te nyɔ la.”

²⁵ Àvi mbɔŋ zə ale, nkɨ̀Ꞌɨ̂ ntèm tènjûŋ ti a mbì Yesò nê, “Tê, tɨŋe am.”

²⁶ Yesò bɨ̀ɨ̀lè nê, “A bakà bɔ̀ŋ laꞋ nê, bɔ̀ nɨ èghɨjɨ bɔtechɨɨle màꞋà abua babə.”

²⁷ Àvi wu mè nê, “À shua nkûŋ a Tè, ka la, babə àa ngɨ̀ e me jɨ tèboꞋ tu te dzə a èbem apfəèꞋ tǎt wɔb nkwènte a si la.”

²⁸ Yesò bɨ̀ɨ̀lè nê, “À lâ ndzì èntɨ̧ɨ̧ wê ane yaã! TsiꞋ à wu mbɨꞋɨ̀ àa nkɨà la.” Yesò laꞋ ale, waã tò wu bê pem kwàꞋ àfɨꞋa mbɔŋ.

Yesò bəâ ènɔ̧̂ bòt ko

²⁹ Yesò li ndɔ̀Ꞌ abot, ntse a ngèt èlemè Galìlî nkɔꞋ nga ègwet abȩ kǒ ntsèke a si.

³⁰ Mbɨ̀Ꞌɨ̀ tà tseke la, tàꞋà ènɔ̧̂ bòt e nɨ bòt èka bɔb e ŋɔꞋte la, nè bòt àghɨ àleme, nè èbe bèa ŋɔ̧ɔ̧ma a si la nè mbûꞋtsə, fɔ̀ɔ̀lè ne bòt tèwuute èghɔ̧ tsa nyaŋ nkùŋe atò nkɨ̀Ꞌɨ̂ nɔŋe a mbì tò, tà bəa wɔb bàgème.

³¹ Ènɔ̧̂ bòt bu e ye ndɨ mbûꞋtsə te ntsiꞋa ndàꞋà, bòt bɔ̀ɔ ŋɔ̧ɔ̧ma a si la e lɔ̀Ꞌtè tsìꞋa ngȩ̀ȩ̀nà àtetsi, èka bòt e li ŋɔꞋte la, e tsiꞋi tɨ̧ɨ̧ ndɨŋndɨ̀ŋ, mè ndze ndɨ àghɨ a bòt àghɨ àleme, a ghaꞋtè la ànəa mbɔŋ a bê ntsè àwɔb, bɔ tsiꞋi me ŋa mèngùꞋte abua Mbɔ̧ɔ̧mà bòt Izəèlȩê.

Yesò jɨ̌ bòt bètɔsì bakwì
( Mk 8:1-10 )

³² ÀfɨꞋa mbɔŋ, Yesò tɔ bɔkatè bi shu abua yɔb nê, “Tèsȩte bòt bàa teà nkua am, nkàà nê, àfɨ̀Ꞌ yaa wu èlibȩ betat, bɔ̀ wu ba tò ba la kà bɔ àghɨa bɔ̀ɔ jɨ la. Maà kà kɨ esà wɔb bɔɔ ghà kâ jɨ àghɨ mbɨ̀Ꞌɨ̀ ka bɔ gha alu̧ ndzìtsə te nɨa wɔb.”

³³ Bɔkatè tò bu e biite atò nê, “Bàa nɨ èghɨjɨ nèŋǎ àlaꞋ àyuube ŋàa e jɨɨ ènɔ̧̂ bòt baa tè bɔɔ yele à?”

³⁴ Yesò mè mbììte nê, “Bɨ bɔ tètaãaãte bled tesòꞋa?” Bɔ nê, “Tètaã tesà̧à̧mbe nè bɔbɔ basə.”

³⁵ Yesò ghɨ̀ bòt bu e tsekte a si,

³⁶ tà nɨ̀ tètaãaãte bled tu tesà̧à̧mbe la, nè basə bu, ŋà mènkɔ̀ŋke abua Mbɔ̧ɔ̧mà mbɔ̂ mbòꞋte ŋǎ abua bɔkatè bi, bɔ ghàbte abua ènɔ̧̂ bòt bu.

³⁷ Wòt ègème jɨ ndzet, tè bɔkatè tò e fete èbe e bəèꞋəè la, be lu̧u̧ bankì basà̧à̧mbe.

³⁸ Bòt bɔ jɨ la bɔ wu bètɔsì bakwì, kà zi bèzi nè bɔtechɨɨle.

³⁹ ÀfɨꞋa mbɔŋ Yesò ghɨ̀ bòt bu e me ghǎ, tà nyi a èbem ànkànuꞋ nga àbâ àlaꞋ a Magadàn.

« Roimhe

Air adhart »

Lean sinn:

Ceanglaichean taic

Sanasan