Bìoball air-loidhne

Matìù 14 - Mundani

Èvə Jɔ̌n ndzìà èdzî
( Mk 6:14-29 ; Lk 9:7-9 )

¹ È li ngu àfɨꞋa mbɔŋ Elɔ̀d wu tà lè wu fɔ̧̀ àbâ àlaꞋ a Galìlî là zə àndǎ Yesò.

² Tà zə ale, shu abua bètsoêꞋ bi nê, “Mbê waa nàa nè ngu Jɔ̌n ndzìà èdzî tà yu̧u̧me la. Eyaa wu àghɨ yu a ghɨ̂ ka tà me ghɨ̀ tèwuute ènəê taà la.”

³ Elɔ̀d ko nê ye li ngɨ̀ bɔ baãaã Jɔ̌n nkùùle atò è maꞋa fȩ ambo Èlɔdìà, vi wanyɨ tò Filìb.

⁴ Ngu ndɨ Jɔ̌n li shu abua tò nê mbɨ̧ tɔb te bakà bɨ̧̀ɨ̧̀ne nê tà fǎ Èlɔdìà abua wanyɨ vi la.

⁵ Elɔ̀d li ngua nkɨ ebùŋe atò, ka me bɔɔ banɔ̧̀, nkàà nê bɔ li ngua nɨ̀a Jɔ̌n nê wu ndàꞋàtɔŋ Mbɔ̧ɔ̧mà.

⁶ Àlia bɔ li mbia Elɔ̀d la à kɨꞋɨ, tà kàꞋà èpà̧ enɨ ku̧u̧te àlia mbɔŋ, waã Èlɔdìà waàvi mbene a mbì Elɔ̀d nè bègɨ̧̀ bi, a taꞋa bɔ̌ Elɔ̀d

⁷ tè tà zì nkà̧ nê waã wu màà ndò̧a wuê ghà leꞋ ko yea ŋa.

⁸ Nyɨ̌ tò tɔɔte àtsəa tò tà shu abua Elɔ̀d nê, “Ŋa àtsəa Jɔ̌n ndzìà èdzî a èbem ankì abua am afɨ̀Ꞌ yaa.”

⁹ Fɔ̧̀ zə ale, a taꞋa saa tò, ka ndɨ̀ wu tà ghɨ̂ ngɨ̀ tè ndzì nkà̧ a mbì bègɨ̧̀ bi la, tà shu nê bɔ̀ ŋa àghɨa tà lo̧o̧ la.

¹⁰ Tà tsà bòt bɔ ghà a lob tèfȩ ndòo àtsəa Jɔ̌n,

¹¹ ndzì a èbem ankì nkɨ̀Ꞌɨ̂ ŋa abua waàvi wu, tà nɨŋ ngà ŋa abua nyɨ̌ vi.

¹² Bɔkatè Jɔ̌n e kɨꞋɨ̀ mpàa àkènkwèn nɨŋ ngà ntuê.

Yesò jɨ̌ bòt bètɔsì batà̧â̧
( Mk 6:30-44 ; Lk 9:10-17 ; Jn 6:1-14 )

¹³ AfɨꞋa Yesò zə ànəê yaa la, tà lɔꞋɔ abot nyi a èbem ànkànuꞋ, ngà àdziꞋa ko zìa ndziꞋne. Bòt ezə nê tà lɔ̀Ꞌ te ngà, sà tèpfətèlaꞋ tɔb kuŋe atò a èka.

¹⁴ Yesò me dzəâ a èbem ànkànuꞋ yu, ndzè taꞋà ènɔ̧̂ bòt bu, tèsȩ tɔb te kua tò, tà bùꞋ me bə bòt àghɔ̧ bèa a kètsìà wɔb la.

¹⁵ È tseke tè ngu àfɨꞋa nyèmtèsi, bɔkatè tò e kɨꞋɨ̀ shu abua tò nê, “Eyaa wu àdziꞋa kà ye bòt, àfɨꞋa mè ngà, è wu ale à ghɨ̀ bòt baa e taate nga a èbem èpfəè njù̧ù̧te èghɨjɨ bɔb.”

¹⁶ Yesò bɨ̀ɨ̀lè nê “Bɔ bakà bɔ ndɨ bɔ̀ɔ gha adzìꞋ la, bɨ̀ambɔŋ bɨ̀ ŋa àghɨ bɔ̀ jɨ.”

¹⁷ Bɔ shu abua tò nê, “NdàꞋ àghɨa ba bɔ adzìꞋ yaa la wu tètaãaãte bled tetà̧â̧ nê basə babe.”

¹⁸ Yesò shu abua yɔb nê “Bɨ̀ nɨŋ nkɨ̀Ꞌɨ̂ ŋǎ abua am.”

¹⁹ Bɔ̀ nɨŋ bɔ̀ kɨꞋɨ, tà ghɨ̀ bòt bu e tsekte a si a ègwet mèfəèꞋ, tà nɨ̀ tètaãaãte bled tu tetà̧â̧ la nè basə bu babe la, ndɔ̀kè àvi ndɨ̀ŋkè ègwet ŋà mènkɔ̀ŋke abua Mbɔ̧ɔ̧mà, mbɔ̂ mbòꞋte bèbled bu ŋa abua bɔkatè bi, bɔ ghàbte abua bòt bu.

²⁰ Wòt ègème jɨ ndzet. Bɔkatè bu e fetè èbe be bəèꞋəè la be lu̧ bankì ntsɔ̀b babe.

²¹ Bòt bɔ jɨ la e wu mbɔ̀ŋè bètɔsì batà̧â̧, kà zi bèzi nè bɔtechɨɨle.

Yesò ghȩ̀ȩ̀nè a ègwet mèleb
( Mk 6:45-52 ; Jn 6:15-21 )

²² ÀfɨꞋa mbɔŋ Yesò ghɨ̀ bɔkatè bu e nyi a èbem ànkànuꞋ nga a mbì tò agua èlemè àko zia, tà tsiꞋi ngɨ̀ ènɔ̧̂ bòt bu e taatè.

²³ Bòt bu e taatè ale, tà kɔꞋ nga a ègwet abȩ zia ndziꞋne etsàꞋte a Mbɔ̧ɔ̧mà. Nyèm tseke tè me fene, tà bèle abot zia ndziꞋne.

²⁴ È me wu àfɨꞋa mbɔŋ ànkànuꞋ yu a ghà tè tsìꞋi tea èbem èlemè. Èfu mèleb e me dèbè ànkànuꞋ yu àbâ abà, nkàà nê àfeme àkekweelè a li ngua ŋwèèlà àyùà ntsàà akwèn.

²⁵ ÈtsəꞋ e me tsi, Yesò me ghȩ̀ȩ̀ne a ègwet *èdzî nkɨ̀Ꞌa ekwene ane yɔb.

²⁶ Bɔkatè bu e ye atò ngȩ̀ȩ̀nà a ègwet mèleb la, ènyit yɔb e pfə, bɔ ŋȩ ane kèbɔa nê, “Wu mpfəà!”

²⁷ Ka Yesò shu abua yɔb kwàꞋ àfɨꞋa mbɔŋ nê “Bɨ̀ baãaã mèntɨ̧ɨ̧ mɨ̧! Wu mmɔ̌, bɨ̀ ka mbɔ̀a.”

²⁸ Pità shu abua tò nê, “Tê, è wu àwɔ̀, à ghɨ̀ e ngȩ̀ȩ̀ne a ègwet mèleb maà nkɨ̀Ꞌɨ̂ kwène ane yê.”

²⁹ Yesò shu abua tò nê, “KɨꞋɨ.” Ale, Pità dzə a èbem ànkànuꞋ yu mbùꞋ me ghȩ̀ȩ̀ne a ègwet mèleb mu eghǎ kwene ane tò.

³⁰ Ka àfɨꞋa tà ye àfeme àkekweelè yu la, tà bɔ̀a tè mbùꞋ me mala nga a èbem mèleb mu tè ntsìꞋi ŋȩ nê “Tê, tɨŋe am!”

³¹ Yesò bê tsà àbu azi mbà̧aã tò, mbɔ̂ shu abua tò nê “Àwɔ̀ waa kà neete ezǐ èntɨ̧ɨ̧ wê ane yaã la, à ghɨ̀ na ka màkè ànəa mâ shu la à?”

³² Bɔ̂ Pità e nyi a èbem ànkànuꞋ yu, àfeme yu a loà,

³³ bòt bu a èbem ànkànuꞋ yu la e wùꞋte atò me shu nê, “Ane nkûŋ, à wu Waã Mbɔ̧ɔ̧mà.”

Yesò bəâ bòt àghɔ̧ a Gènesalèt
( Mk 6:53-56 )

³⁴ Mbɨ̀Ꞌɨ̀ bɔ ntû̧ èlemè la, bɔ kwene a si Gènesalèt.

³⁵ Mbɨ̀Ꞌɨ̀ bòt àdziꞋa mbɔŋ e ye nê wu Yesò la bɔ tsɔ̀tè ntu̧tsə a èdzìꞋ ègème a ngèt abot, bòt e nɨ bòt èghɔ̧ bàgème nɨŋ nkɨ̀Ꞌɨ̂ abua tò,

³⁶ è shù̧ù̧te atò nê tà tsiꞋ bɔ lem mbà̧à̧te ka wuê ntseit ndǐ tò. Ngɨ̀ ale wòt ègème tà bà̧à̧te àtsəa ndǐ tò la pem.

« Roimhe

Air adhart »

Lean sinn:

Ceanglaichean taic

Sanasan