Lûm 8 - Mundani

Mèntsèke Fo Mbɔ̧ɔ̧mà nàa ŋǎ la

¹ Ale, ndɔ̀ Mbɔ̧ɔ̧mà te ntsě adù̧ bòt bu bɔ̀ tsiꞋi àghɨ yeamɔꞋ nè Yesò Klistò la àfɨ̀Ꞌ yaa.

² Mbɨ̧ Fo Mbɔ̧ɔ̧mà yu nàa ngɨ̀à wòt bɔ̌ mèntsèke fi, ndɨ̀ wu tà tsìꞋi àghɨ yeamɔꞋ nè Yesò Klistò la, è tsì mbɨ̧ yu a ègwet laã nàa ngɨ̀à e ngɨa kàbɔ̀ŋ, è mè nɨa èvə nkɨ̀Ꞌa adù̧ yaã la.

³ Mbɔ̧ɔ̧mà li ngɨ̀ àghɨa mbɨ̧ li è kà wu ko ghɨ̌, ndɨ̀ wu bɔbȩ àa njùa, bɔ̀ ka wu e ghɨ̀ àghɨa nàa shua la, ntsàà waã vi tà kɨꞋɨ nè mbɨ̧̀ ènyit nàa mbɨ̀Ꞌɨ̀ ye bɔbȩ bu bɔ̀ɔ̀ ngɨ̀a kàbɔ̀ŋ la, mpfə mbɨꞋɨ̀ nkɔ̀Ꞌ èpɨ̧̀. Tà pfə ale, Mbɔ̧ɔ̧mà tsòkè mètàŋ mu kàbɔ̀ŋ è bɔ adù̧ wɔ̀bȩ̂ la.

⁴ Tà li ngɨ̀ àyaa mbɨ̀Ꞌɨ̀ baa me koa ngɨ̀à èghɨ ntsɔ̧̀ bu ègème mbɨ̧ Mbɔ̧ɔ̧mà nàa shuà nê bà me ghɨ̀ la, ndɨ̀ wu baa tsiꞋa ntsèka mbɨ̀Ꞌɨ̀ Fo Mbɔ̧ɔ̧mà nàa nkɨà la, baa kà tsi ngua ntsèka mbɨ̀Ꞌɨ̀ mbɨ̧te ènyit ta tèa nkɨà la.

⁵ Bòt bu bɔ̀ɔ ntsèka mbɨ̀Ꞌɨ̀ mbɨ̧̀ ènyit kɨa la, aà mɨ̀ɨ̀tà wuê ànəa èghɨ bu mbɨ̧te ènyit tɔb tèa nkɨà la. È bu bɔ̀ɔ ntsèka mbɨ̀Ꞌɨ̀ Fo Mbɔ̧ɔ̧mà kɨa la, e mɨ̀ɨ̀tà wuê ànəa èghɨ bu Fo Mbɔ̧ɔ̧mà nàa nkɨà la.

⁶ Wòt me mɨ̀ɨ̀tè wuê ànəa èghɨ mbɨ̧̀ ènyit nàa nkɨà la, ko tàa pfə. È we tàa mɨ̀ɨ̀tà ànəa èghɨ bu Fo Mbɔ̧ɔ̧mà nàa nkɨà la, naa bɔ mèmpème nè àlàŋkà èntɨ̧ɨ̧.

⁷ Wòt tàa mɨ̀ɨ̀tà wuê ànəa èghɨ mbɨ̧̀ ènyit nàa nkɨà la, wu wɔ̀mbù̧ Mbɔ̧ɔ̧mà. Tàà kà ghɨ̀ àghɨa mbɨ̧ Mbɔ̧ɔ̧mà nàa shua la, ane nkûŋ betsiꞋa tà kà bê nko nɔ̀ŋè yùà.

⁸ BetsiꞋa bòt bu bɔ̀ɔ ndzəa wuê ànəa mbɨ̧̀ tɔb te shua la, è ka ko ngɨ̀ àghɨa àa mbɔ̀ a Mbɔ̧ɔ̧mà la.

⁹ Ka bɨa kà ghɨ mbɨꞋɨ̀ mbɨ̧te ènyit tɨ̧ tèa shua la, bɨa ngɨ̀à wuê mbɨ̀Ꞌɨ̀ Fo Mbɔ̧ɔ̧mà nàa shua la, na Fo Mbɔ̧ɔ̧mà me tseke ane yɨ̧ la. Wòt bakà bɔ Fo Yesò Klistò ane zi, ko tà ntsě wòt tò.

¹⁰ Ka Yesò Klistò wu a èntɨ̧ɨ̧ wòt, ko tàa wu yû̧, nkàà nê Mbɔ̧ɔ̧mà nɨa to mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li la. Àghɨa àa pfə la wu wuê mbɨ̧̀ ènyit tò, nkàà kàbɔ̀ŋ wu tàà ngɨ̀à la.

¹¹ Fo Mbɔ̧ɔ̧mà wu tà li njù̧ù̧me a Yesò la wu ane yɨ̧, ko Mbɔ̧ɔ̧mà wu tà li njù̧ù̧me a Yesò Klistò la, naa li nɨ Fo zi yu nàa ntsèka ane yɨ̧ la, e ghɨ̌ mbɨ̧te ènyit tɨ̧ tu tèa mpfəèa la, tea yu̧u̧me mɨ̧̂.

¹² È wu ale, bɔnyɨ bɔ̧, àghɨa ko aà və baà bɔ ndɨ bàa ghɨ̀ la, ka è kà wu nê bàà me tseke mbɨ̀Ꞌɨ̀ mbɨ̧te ènyit ta tèa nkɨà nê bàà me ghɨ̀ la.

¹³ Wòt me tseke mbɨ̀Ꞌɨ̀ mbɨ̧̀ ènyit kɨa la, ko tàa pfə. Ka wòt nɨa mètàŋ Fo Mbɔ̧ɔ̧mà ndììma èghɨ kàbɔ̀ŋ bu mbɨ̧̀ ènyit tò nàa nkɨà la, ko taa bɔ mèmpème.

¹⁴ Bòt bu bàgème bɔ̀ɔ ngɨ̀à mbɨ̀Ꞌɨ̀ Fo Mbɔ̧ɔ̧mà nàa shua la wu bɔ̧ Mbɔ̧ɔ̧mà.

¹⁵ Fo yu Mbɔ̧ɔ̧mà li ŋa abua yɨ̧ la bakà ghɨ awɨ̧ ane èbùꞋ, e ghɨ̌ bɨa me bɔa, ka tà ŋa awɨ̧ Fo è ghɨ̌ bɨ tsiꞋi bɔ̧ tò la. Eyaa wu lə bàa ngɨ̀ bàà dɨa bà tɔ Mbɔ̧ɔ̧mà, baa nê, “Tè leꞋ! Tǎt wa leꞋ!”

¹⁶ È wu Fo Mbɔ̧ɔ̧mà èfɔte ne àghɨa àa mèntɨ̧ɨ̧ ma la, shua nê ba wu bɔ̧ Mbɔ̧ɔ̧mà la.

¹⁷ Ndɨ̀ wu bà wu bɔ̧ Mbɔ̧ɔ̧mà la, baa li bɔ èghɨ ntsɔ̧̀ bu tà nɔ̀ŋe abua bòt bi la, mè ngu fɔte nê Yesò Klistò èbɔ èghɨ bu Mbɔ̧ɔ̧mà nɔ̀ŋe abua tò la. Mbɨ̀Ꞌɨ̀ bàa ndzèa ngoꞋ mbɨ̀Ꞌɨ̀ Yesò li ndze la, baa li bɔ ènɨ̧ tò mɨ̧̂.

Ènɨ̧ wu bàa nchɨ̀Ꞌà la

¹⁸ Mâ mɨɨtè nê betsiꞋa bàà ka fɨꞋnè ngoꞋ yu baa yea àfɨ̀Ꞌ yaa la ane ènɨ̧ wu bɔ̀ɔ li nyɨ̀Ꞌte abua ya la.

¹⁹ Èghɨ bu ègème Mbɔ̧ɔ̧mà ghɨ̀ la aa ndâ nchɨ̀Ꞌà àli yu Mbɔ̧ɔ̧mà nàa nyɨꞋte bɔ̧ bi la.

²⁰ Èghɨ bu Mbɔ̧ɔ̧mà li ngɨ̀ la e li è ka wu àghɨa e wu wu la, è bɔ̂ è ka wu èghɨ mbɔŋ ka e ghɨ̀ ale la. Wu Mbɔ̧ɔ̧mà ka tà li ngɨ̀ nê è wu ale la. Tà li ngua nkɨà nê èghɨ mbɔŋ è me chɨ̀Ꞌɨ̀, wuê chɨ̀Ꞌɨ̀,

²¹ nkàà nê taa li tsǐ èghɨ bu ègème tà li ngɨ̀ la a èbem ngoꞋ yu nàa ghɨ̌ aa fì la, mbɨ̀Ꞌɨ̀ ghɨ̌ aa baka tsi fì, e bɔ ènɨ̧ wu e ghe, tà nɔ̀ŋe abua bɔ̧ bi la mɨ̧̂.

²² Baà ko nê èghɨ Mbɔ̧ɔ̧mà ghɨ̀ la ègème aa ndzea ngoꞋ, ngèꞋà mbɨ̀Ꞌɨ̀ àvi tàa ndù̧ù̧ta la, e kɨꞋɨ dzə àfɨ̀Ꞌ yaa.

²³ È ntsě wuê ndàꞋà èghɨ bu tà li ngɨ̀ la ka àa ngèꞋà la, bàa wu Mbɔ̧ɔ̧mà ŋa Fo zi abua ya mbɨ̀Ꞌɨ̀ àghɨa mbì ane èghɨ bu tà nɔ̀ŋe abua bòt bi la, aà ngèꞋà a mèntɨ̧ɨ̧ ma mɨ̧̂. Baà ngɨ̀à ale mbɨ̀Ꞌɨ̀ bàa nchɨ̀Ꞌɨ̀ àfɨ̀Ꞌ yu Mbɔ̧ɔ̧mà nàa ghɨ̌ ba tsiꞋi ngule bɔ̧ tò, elùùla ngoꞋ yu àdziꞋ yaa la, e ghɨ̌ mbɨ̧te ènyit ta tea peme la.

²⁴ ÀfɨꞋa baa li pem la, baa li ndzaŋe wua nchɨ̀Ꞌà èghɨ bàa. Wòt bɔ àghɨa tàa nchɨ̀Ꞌà la, lə kǒ tàa mě me chɨ̀Ꞌɨ̀ la ka tsi nguê. Wòt wu tàa nchɨ̀Ꞌà àghɨa tà ye tê ndɔ̀Ꞌ la wu wàà?

²⁵ Ka bàa me chɨ̀Ꞌɨ̀ àghɨa bàà baka ye la, ko baa bɔɔle awa ka me chɨ̀Ꞌɨ.

²⁶ Fo Mbɔ̧ɔ̧mà nàa ntɨ̀ŋa awa mɨ̧̂ àfɨꞋa bàa njùa la. Bàa ngɨ̀ bàà baka ko ndɨ baa wu tsàꞋte Mbɔ̧ɔ̧mà la, Fo Mbɔ̧ɔ̧mà me tɨŋe awa ndɨ̀à mènəè ma abua Mbɔ̧ɔ̧mà ngèꞋà ane èlɨ betsiꞋa wòt kà ko shu la.

²⁷ Mbɔ̧ɔ̧mà wu tàa ndzea àghɨ àgème àa èntɨ̧ɨ̧ wòt la, è ko àghɨa àa èntɨ̧ɨ̧ Fo Kèfə la, nkàà nê Fo Mbɔ̧ɔ̧mà nàà ndɨ̀à mènəè bòt Mbɔ̧ɔ̧mà abua tò mbɨ̀Ꞌɨ̀ Mbɔ̧ɔ̧mà kɨa la.

²⁸ Baà ko nê Mbɔ̧ɔ̧mà nàa ngɨ̀à àghɨa àgème wuê ane ntsɔ̧̀ bòt bu bɔ̀ɔ nkɔ̀ŋkà tò la, bòt bu tà tɔ awɔb mbɨ̀Ꞌɨ̀ tà li nɔ̀ŋè la.

²⁹ Bòt bu Mbɔ̧ɔ̧mà li mbele àfɨꞋa tsa ndà la, tà li nɔ̀ŋè nê bɔ̀ wu mbɨꞋɨ̀ waã vi nàa la, mbɨ̀Ꞌɨ̀ e ghɨ̌ taa wu waã mbì ayɔɔ bɔnyɨ nyaŋ.

³⁰ Tà ghɨ̀ ale, mè ntɔ bòt bu tà li mbele àfɨꞋa tsa nɔ̀ŋè nê bɔɔ li wu mbɨꞋɨ̀ waã vi la. Tà tɔ ale ngɨ̀ bɔ tsiꞋi bòt bɔ tɨ̧ɨ̧ ndɨŋndɨ̀ŋ a mbì tò la. Tà ghɨ̀ ale, mè ngɨ̀ bòt mbɔŋ e bɔ ènɨ̧ wu tà bɔ la.

Yesò nyɨꞋte èkɔŋ Mbɔ̧ɔ̧mà

³¹ Bàà wu anè laꞋ nê ghǎ ane ayaa? Mbɔ̧ɔ̧mà wu nè nà, ko wòt wu betsiꞋa tà ghɨ̀ àghɨ ane ya la wu wàà?

³² Tè tò wu tà li tà kà shuulè waã vi, ŋa tò nê tà pfə ambo ya bàgème la, ka mèe ŋa awa èghɨ ko tsa mbɨ̀Ꞌɨ̀ tà ŋa waã vi la à?

³³ Wòt wu tàa li zǐ ànəê àtsəa bòt bu Mbɔ̧ɔ̧mà làà la wu wàà? Wu Mbɔ̧ɔ̧mà zìambɔŋ ka tàa shua nê wòt tɨ̧ɨ̧ ndɨŋndɨ̀ŋ a mbì li la.

³⁴ Wòt wu tàa laꞋnê ànəa a li àtsəa wòt Mbɔ̧ɔ̧mà la wu wàà? Yesò Klistò wu tà li mpfə, Mbɔ̧ɔ̧mà yù̧ù̧me atò ngɨ̀ tà tseke àbâ àbualu̧ atò a ègwet la, ka lâ ngu wòt tàa ndɨ̀à mènəè ma abua Mbɔ̧ɔ̧mà la.

³⁵ Wòt wu tàa ghɨ̌ Yesò Klistò naa baka tsi nkɔ̀ŋkè àwa la wu wàà? Wu ngoꞋ, kò ngɨ̧̀ɨ̧̀nè, kò mànkɨa àtsəa wòt enɨ, kò èchɨɨ, kò màntseka ka ye ndǐ ekwaãaã, kò màntseka nùka èvə, kò nyi bɔ̀ɔ nɨ bùŋe wòt la à?

³⁶ A wu mbɨ̀Ꞌɨ̀ bɔ shɨ a èbem Àkata Mbɔ̧ɔ̧mà la nê, “Baa nùka èvə àli àgème ambo yè, bɔ nɨa awa wuê mbɨ̀Ꞌɨ̀ njɨ̀te bɔ̀ɔ bùŋè la.”

³⁷ Àghɨ a ntsě. Èghɨ bàà aà mbàta ngɨ̀à ane ya ale, ka baa bɔ̂ ndâ ntsè èbùà ègème, nkàà Yesò wu tà kɔ̀ŋkè awa la.

³⁸ Mâ lâ nko nê betsiꞋa èvə, kò màngua yu̧, kò bɔntu̧ Mbɔ̧ɔ̧mà, kò fo tu a ègwet te bɔ àtɔŋ nè mètàŋ la, kò èghɨ àa àfɨ̀Ꞌ yaa la, kò èbe nga kɨꞋɨ la leꞋ,

³⁹ kò ngɔ̀ŋ yu a ègwet la, kò ye si leꞋ, kò àghɨa ko tsa ane èghɨ bu ègème Mbɔ̧ɔ̧mà ghɨ̀ la leꞋ, à ka tsì èkɔŋ Mbɔ̧ɔ̧mà bɔ ane ya nkàà Yesò Klistò Lefɨ̀Ꞌ wa la.