Lûm 7 - Mundani

Àghɨa bɔ nɨ ndzɔꞋɔ fɨ̀Ꞌne adù̧ la

¹ Bɔnyɨ bɔ̧, e ngua ndàꞋà abua bòt bu bɔ ko ànəa mbɨ̧ nàa shua la. Bɨ lâ nko nê mbɨ̧ nàà nkùùla wòt wuê àfɨꞋa ŋut bele yû̧ la.

² A wua shua nê, mbɨ̧ nàà nkùùla àvi a lob lu̧ vi wuê mbɨ̀Ꞌɨ̀ lu̧ tò bele yû̧ la, ka lu̧ tò è pfə, àghɨa àa baãaã atò la à ka tsi ngu.

³ Ka tà sà lu̧ vi tà bele yû̧ la ngà ngu bɔ̂ wòt tsa, ko bɔɔ me tɔ atò ane àvi tàa njɨ̀a àbȩ la. Ka lu̧ tò è pfə, mbɨ̧ mbɔŋ ka tsi nkùùle atò. Tà yɔꞋɔ wòt tsa, è kà wu àbȩ tà jɨa la.

⁴ Bɔnyɨ bɔ̧, eyaa bê ngu ndɨ àa ane yɨ̧ la. Yesò Klistò li mpfəè ale, a wu nè bɨ pfə ayɨ̧ mɨ̧̂ ane ànəa mbɨ̧ mbɨ̀Ꞌɨ̀ bɨ̀a tsiꞋi bòt wòt tsa. Ŋut wu wòt wu Mbɔ̧ɔ̧mà li njù̧ù̧me atò, mbɨ̀Ꞌɨ̀ e ghɨ̌ bɨa tsiꞋi bòt bɔ̀ɔ ntsèka ngɨ̀à àghɨa àa mbɔ̀ a Mbɔ̧ɔ̧mà la.

⁵ È li ngu afɨꞋa bàa ntsèka mbɨ̀Ꞌɨ̀ mbɨ̧te ènyit ta tèa nkɨà la, mbɨ̧ lɔ̀kte a kàbɔ̀ŋ wu a mbɨ̧̀ ènyit ya la, tè èghɨ bàa ngɨ̀à la e nɨ èvə nɨŋ nkɨ̀Ꞌɨ̂ adù̧ ya.

⁶ Mbɨ̧ nàà ka tsi nkùùle awa afɨ̀Ꞌ yaa, nkàà nê baa li mpfə ndùùlà àghɨ yu a li mbà̧aã awa mbɨ̀Ꞌɨ̀ bɔtefȩ la. Baà tsiꞋa ngɨ̀à wuê àghɨa alu̧ fi wu Fo Mbɔ̧ɔ̧mà nàa nyɨ̀Ꞌta awa la nàa nkɨa la. Baà ka tsi ndzə ànəa alu̧ nyaꞋ wu bɔ li shɨ a èbem àkata mbɨ̧ la.

Mbɨ̧ nè kàbɔ̀ŋ

⁷ Tè e ngua anè shua nê mbɨ̧ wu àghɨa kàbɔ̀ŋ? ChaꞋ, a ntsě ale. Mbɨ̧ ntsě àghɨa kàbɔ̀ŋ. Mbɨ̧ li ngɨ̀ ale è kà wuê, ko e mbakà ko àghɨa kàbɔ̀ŋ wu yùà la. Mbɨ̧ li ngɨ̀ ale è kà shu laꞋnê, “À ka me kɨ nê àghɨa wòt tsa a wu wu a ye”, ko e mbakà ko laꞋ nê mànkɨa nê àghɨa wòt tsa a wu wu a yaã wu kàbɔ̀ŋ.

⁸ Kàbɔ̀ŋ e nɨ èlu̧ ane mbɨ̧, ndɔ̀ktè ènyit yaã ngɨ̀ e me kɨ me ghɨ̌ èbɨꞋte ènəê kàbɔ̀ŋ ègème. Mbɨ̧ nàa mbakà wuê kàbɔ̀ŋ kà bɔ mètàŋ.

⁹ È li ngua afɨꞋa è mbaka ko àghɨa mbɨ̧ kɨa la, e ngua am ntsɔ̧̀, èntɨ̧ɨ̧ am è ka wua fèèlà am ane àghɨa ko. Ka afɨꞋa mâ ko mbɨ̧ la, e ntsiꞋi me kɨ ghɨ̌ wuê a kàbɔ̀ŋ, tè è ghɨ̀ e mpfə.

¹⁰ Ndâ mbɨ̧ yu Mbɔ̧ɔ̧mà li ŋa mbɨ̀Ꞌɨ̀ maa bɔ mèmpème la, è tsiꞋi nɨ èvə nɨŋ nkɨ̀Ꞌɨ̂ adù̧ yaã.

¹¹ Kàbɔ̀ŋ è nɨ èlu̧ a èbem mbɨ̧ è fɨ̀te am, ngɨ̀ e mpfə.

¹² Ale, mbɨ̧ wu àghɨa ntsɔ̧̀, ànəa ègème Mbɔ̧ɔ̧mà shu la a mè nkùꞋ, mè me bɔ̌.

¹³ Tè àa ně ngua shua nê àghɨa ntsɔ̧̀ a nɨ èvə nkɨ̀Ꞌɨ̂ adù̧ yaã? ChaꞋ, a ntsě ale. È li ngu kàbɔ̀ŋ è nɨ àghɨa ntsɔ̧̀ ka ngɨ̀ èvə e kɨꞋɨ̀ adù̧ yaã la. Kàbɔ̀ŋ li nɨ mbɨ̧, è wu àghɨa ntsɔ̧̀ la ngɨ̀ èvə e kɨꞋɨ̀ adù̧ yaã mbɨ̀Ꞌɨ̀ bɔɔ ye ngule àghɨa kàbɔ̀ŋ wu yùà la. Ale, mbɨ̧ ghɨ̀ bɔ paa ndze ndɨ kàbɔ̀ŋ nàà mbɨ̀a la.

Èbet àa èntɨ̧ɨ̧ wòt la

¹⁴ Baà ko nê mbɨ̧ yaa dzəa abua Mbɔ̧ɔ̧mà, ka e ngu wuê wɔ̀bȩ̂, mè ngu àbùꞋ abua kàbɔ̀ŋ.

¹⁵ E mbakà ko ndɨ màa ngɨ̀à mɔ̧ ne mènəè la, nkàà nê maa kà ghɨ àghɨa màa nkɨ e ghɨ̀ la, maà ngɨ̀à wuê àyea màa mpààbà e ghɨ̀ la.

¹⁶ E ngu anè me ghɨ̀ wuê àghɨa màa ka kɔ̀ŋkè e ghɨ̀ la, ko mâ bɨ̧ɨ̧nè nê mbɨ̧ wu àghɨa ntsɔ̧̀.

¹⁷ Ale, è te ntsě mmɔ̌ ngɨ̀à èghɨ bàà la, wu kàbɔ̀ŋ wu a èntɨ̧ɨ̧ am la ka ŋwèèlà am e ngɨ̀à la.

¹⁸ Mâ ko nê àghɨa ntsɔ̧̀ àko a ntsě ane yaã mmɔ̌ wɔ̀bȩ̂. Maà nkɔ̀ŋkà a màngɨa ntsɔ̧̀, ka è nka wua nkòâ ngɨ̀à wùà.

¹⁹ Maà kà ghɨa ntsɔ̧̀ wu màa nkɔ̀ŋkà e ghɨ̀ la, mbɔ̂ me ghɨ̀ wu a kàbɔ̀ŋ wu màa ka kɔ̀ŋke e ghɨ̀ la.

²⁰ E ngu anè me ghɨ̀ àghɨa màa ka kɔ̀ŋke e ghɨ̀ la, ko è ntsě mmɔ̌ ka ngɨ̀à la, wu kàbɔ̀ŋ wu a èntɨ̧ɨ̧ am la ka ŋwèèlè am e ngɨ̀à la.

²¹ Ale, mâ ye nê a tsiꞋi wuê mbɨ̀Ꞌɨ̀ wu mbɨ̧ nàa mbà̧aã am la, nê màa ngɨ̀ è me kɨ ghɨa ntsɔ̧̀, è wu wuê kàbɔ̀ŋ ka nkɔ̀Ꞌa a mbì la.

²² Maà ndâ nkɔ̀ŋkà mbɨ̧ Mbɔ̧ɔ̧mà a èbem èntɨ̧ɨ̧ am.

²³ Ka e mbɔ̂ me ye mbɨ̧ ko tsa a mbɨ̧̀ yaã nàa nùà nê è ka ngɨ̀ àghɨa mbɨ̧ yu èntɨ̧ɨ̧ am la nàa nkɔ̀ŋkà e ghɨ̀ la. Mbɨ̧ mbɔŋ a mbɨ̧̀ yaã la è ghɨ̌ e ntsiꞋi àbùꞋ abua kàbɔ̀ŋ wu ane yaã la.

²⁴ Wòt chɨ̀ŋkè mbɨ̀Ꞌɨ̀ mmɔ̌! Wòt wu tàa tsǐ am a èbem mbɨ̧̀ ènyit yaa nàa ŋwèèlà am ntsàà wuê a èbem èvə la wu wàà?

²⁵ Mâ kɔ̀ŋke a Mbɔ̧ɔ̧mà nê wu Yesò Klistò Lefɨ̀Ꞌ wa ka betsiꞋa tà ghɨ̀ ba pem la. Ale, ane abà ako màa ngɨ̀ e me kɨ ghɨ àghɨa mbɨ̧ Mbɔ̧ɔ̧mà kɨa la a èntɨ̧ɨ̧ am, ayea ko nè abà e me ghɨ wuê a kàbɔ̀ŋ wu mbɨ̧̀ yaã nàa nkɨà la.