Lûm 6 - Mundani

Baà tu̧ a kàbɔ̀ŋ mbɨ̀Ꞌɨ̀ me tseke ane mèntsèke fi nè Yesò

¹ Bà wu anè e laꞋ nê ghàà? Tè bàa me ghɨa kàbɔ̀ŋ ngà wuê nè mbì mbɨ̀Ꞌɨ̀ Mbɔ̧ɔ̧mà naa me nyɨꞋta ntsɔ̧̀ vi abua ya nɨ̀a ngà nè mbì?

² BetsiꞋa à ka wu ale! Bàa wu bàà tsiꞋi mbɨ̀Ꞌɨ̀ bèmpfəà tè kàbɔ̀ŋ kà tsi mbɔ̀ mètàŋ a ègwet la la, bàa ghɨ̀ na e mě me ghɨa kàbɔ̀ŋ à?

³ Bɨ bakà ko laꞋ nê bàa wu bàgème bɔ li ndzì awa a èdzî ane èlen Yesò Klistò la, e li mpfə ne tò mbɨ̀Ꞌɨ̀ bɔ zì awa a èdzî la?

⁴ Ale, bɔ li ntu awa baa tò ba nɔ̂, afɨꞋa bɔ zì awa a èdzî la ale, a wu nê ba li mpfə baa tò ba. A li ngu anè mbɨ̀Ꞌɨ̀ ba tsiꞋi e mě me tseke ane mèntsèke fi, wuê mbɨ̀Ꞌɨ̀ Yesò Klistò li njù̧ù̧me ane ènɨ̧ Tǎt wa Mbɔ̧ɔ̧mà la.

⁵ Baa tsiꞋi àghɨ yeamɔꞋ nè tò, mpfəè mbɨꞋɨ̀ tà li mpfə la, ko baa li mě yu̧u̧me wuê mbɨ̀Ꞌɨ̀ Yesò li njù̧ù̧me la.

⁶ Baa ko nê mènəè nyaꞋ ma è pfə nè Yesò Klistò a mbɨ̧̀ mbasa, mbɨ̀Ꞌɨ̀ tsòke àghɨ yu àa ŋwèèlà mbɨ̧̀ ta te ghɨa kàbɔ̀ŋ la, mbɨ̀Ꞌɨ̀ baa baka tsi ngu èbùꞋ abua kàbɔ̀ŋ.

⁷ Wòt nàa ngɨ̀ tà pfə, kàbɔ̀ŋ kà tsi mbɔ̀ mètàŋ a ègwet tò.

⁸ Ka è wu nê ba li mpfə ne Yesò Klistò, ko baa ko nê baa li wu yû̧ nè tò.

⁹ Baa ko nê ndɨ̀ wuê Mbɔ̧ɔ̧mà li njù̧ù̧me Yesò Klistò a èbem èvə la, tà ka li tsi e mě epfə a. Èvə è ka tsi mbɔ̀ mètàŋ a ègwet tò.

¹⁰ Tà li mpfə ale, a wu nê tà bê mpfə ngò̧ yemɔ̀Ꞌ nkàà kàbɔ̀ŋ. Mè njù̧ù̧me ale nko nê ye tsiꞋa ntsèka e me ŋa kènuke wuê abua Mbɔ̧ɔ̧mà.

¹¹ Bɨ̀ nɨ àwɨ̧ mɨ̧̂ mbɨ̀Ꞌɨ̀ bèmpfəà ane màngɨa kàbɔ̀ŋ, mè nɨ àwɨ̧ mbɨ̀Ꞌɨ̀ bòt yu̧ a màngɨa àghɨa Mbɔ̧ɔ̧mà kɨa la, ndɨ̀ wu bɨ̀ tsiꞋi àghɨ yeamɔꞋ nè Yesò Klistò la.

¹² È wu ale, bɨ̀ ka tsi mbɨ̧̀ɨ̧̀ne kàbɔ̀ŋ bɔ mètàŋ a ègwet mbɨ̧ tɨ̧ tu tè bele fì la, e ghɨ̌ bɨa me ghɨ̀ èbɨꞋte èghɨ bu mbɨ̧te ènyit tɨ̧ tèa nkɨà la.

¹³ Bɨ̀ ka sa èdziꞋ ènyit bɨ̧ abua kàbɔ̀ŋ, e ghɨ̀ bɨ me ghɨ èbɨꞋte èghɨ. Bɨ̀ ŋa wɨ̧ wuê abua Mbɔ̧ɔ̧mà, mbɨ̀Ꞌɨ̀ bòt bɔ dzəè a èbem èvə ntsiꞋi a èbem mèmpème la, mè ŋa mbɨ̧̀ tɨ̧ nènkèm abua Mbɔ̧ɔ̧mà mbɨ̀Ꞌɨ̀ tea me ghɨ̀ èghɨ àa mbɔ̀ la.

¹⁴ Bɨ te ntsě èbùꞋ abua kàbɔ̀ŋ, ndɨ̀ wu è te ntsě mbɨ̧ ka nàa mbà̧aã awɨ̧ la. Àghɨa mbà̧aã awɨ̧ àfɨ̀Ꞌ yaa la tsiꞋi ntsɔ̧̀ Mbɔ̧ɔ̧mà.

ÈbùꞋ a màngɨa ntsɔ̧̀

¹⁵ Tè àa wu naa? Tè baa me ghɨ̀ wuê a kàbɔ̀ŋ ndɨ̀ wu è te ntsě ànəa mbɨ̧, è tsìꞋi wuê ànəa ntsɔ̧̀ Mbɔ̧ɔ̧mà la? BetsiꞋa à ka wu ale!

¹⁶ Bɨ bakà ko nê wòt nàa ngɨ̀ tà ŋa avi abua wòt mbɨ̀Ꞌɨ̀ àbùꞋ, a màndzəa tò, tà tsìꞋi àbùꞋ a ŋut wu tàa ndzəa tò la à? Tàa ngɨ̀ tà tsìꞋi àbùꞋ a màngɨa kàbɔ̀ŋ, kàbɔ̀ŋ wu nàa ghɨ̌ taa pfə la, kò àyea àa ndzəa Mbɔ̧ɔ̧mà, àa ghɨ̌ taa tsiꞋi wòt tà tɨ̧ɨ̧ ndɨŋndɨ̀ŋ e mbì Mbɔ̧ɔ̧mà la leꞋ.

¹⁷ Mâ kɔ̀ŋke a Mbɔ̧ɔ̧mà nê, bɨ̀a wu bɨ̀ le yaã ngu èbùꞋ a màngɨa kàbɔ̀ŋ la, e li mbɨ̧̀ɨ̧̀ne mènəè nkûŋ mu bɔ li nyɨ̀Ꞌte awɨ̧ la nè èntɨ̧ɨ̧ wɨ̧ wemɔꞋ.

¹⁸ Mbɔ̧ɔ̧mà tsì àwɨ̧ a èbem mètàŋ kàbɔ̀ŋ, bɨ tsiꞋi èbùꞋ tà nɨ awɨ̧ mbɨ̀Ꞌɨ̀ bòt bɔ tɨ̧ɨ̧ ndɨŋndɨ̀ŋ a mbì li la.

¹⁹ E ngua nɨa èghɨ ngɔ̀ŋ ka fɨ̀Ꞌnà mènəè maa, ndɨ̀ wu bɨ̀ bela ndzèa mènəè mbɨ̀Ꞌɨ̀ bɔbȩ la. Bɨ̀ le yaã ŋa wɨ̧ mbɨ̀Ꞌɨ̀ èbùꞋ abua kàbɔ̀ŋ, me ghɨ̌ èbɨꞋte èghɨ nè mènəè kàbɔ̀ŋ, è wu ale bɨ̀ ŋa awɨ̧ mbɨ̀Ꞌɨ̀ èbùꞋ a èlɨ mbɔŋ a màngɨa èghɨ bu àà mbɔ̀ a Mbɔ̧ɔ̧mà la, mè me tseke mbɨ̀Ꞌɨ̀ bòt Mbɔ̧ɔ̧mà e bɔ ndɨ bɔ̀ɔ me tseke la.

²⁰ È li ngu àfɨꞋa bɨ̀ wu èbùꞋ a màngɨa kàbɔ̀ŋ la, àghɨa ko à ka wuê àa ŋwèèlè àwɨ̧ bɨa tsiꞋi bòt bɔ tɨ̧ɨ̧ ndɨŋndɨ̀ŋ e mbì Mbɔ̧ɔ̧mà la.

²¹ Àbȩ̀ yu bɨ̀ le wua mbɔ a màngɨa èghɨ bu bɨ tsiꞋa mbɔ àtsəa kɔꞋɔ adù̧ àfɨ̀Ꞌ yaa la wu ghàà? Èghɨ mbɔŋ aa ŋa èvə.

²² Ka àfɨ̀Ꞌ yaa Mbɔ̧ɔ̧mà tsì àwɨ̧ a èbem kàbɔ̀ŋ, bɨ tsiꞋi èbùꞋ tò la, àbȩ̀ yɨ̧ wu àghɨ yu a ghɨ̂ bɨ tsiꞋa ngɨ̀à wuê èghɨ bu àa mbɔ̀ Mbɔ̧ɔ̧mà, àa ghɨ̌ bɨa li bɔ mèmpème kàlìà la.

²³ Àbȩ̀ a kàbɔ̀ŋ wu èvə, ka àghɨa Mbɔ̧ɔ̧mà nàa ŋa mbɨ̀Ꞌɨ̀ tà kɔ̀ŋkè la wu mèmpème kàlìà, ndɨ̀ wu bàà tsiꞋi àghɨ yeamɔꞋ nè Yesò Klistò Lefɨ̀Ꞌ wa la.