Lûm 16 - Mundani

Pɔ̂l tsàꞋtè bòt ko a Luêm

¹ E nkɨ shu awɨ̧ nê Fobè wanyɨ wa waàvi wu è wu dikɨ̀n a chɔsì wu a Sènkliyà la wu wòt ntsɔ̧̀.

² Bɨ̀ sèe atò mbɨ̀Ꞌɨ̀ wòt Yesò, ane èlɨ bòt Mbɔ̧ɔ̧mà àa sèe bɔnyɨ bɔb la, mè ŋa tò àghɨa àgème tàa nkɨ̀ŋkà la, nkàà nê tà taꞋa tɨŋe bòt nyaŋ, è fɔ̀ɔ̀lè am.

³ Bɨ̀ tsàꞋta Plìsilà bɔ̂ Àkwilà, è wu bòt baa tò ba àa fàꞋà nɔ̂ abua Yesò Klistò la.

⁴ Bɔ li ntsìꞋa nkɨ epfə ambo yaã. E ntsě wuê ndàꞋà mmɔ̌ màa ŋa mènkɔ̀ŋke abua yɔb ane àghɨa bɔ li ngɨ̀ ane yaã la, bèchɔsì bòt kà wu Bèjuê bu bàgème aà ŋa mènkɔ̀ŋke abua yɔb mɨ̧̂.

⁵ Bɨ̀ tsàꞋte bòt chɔsì bu bɔ̀ɔ mbù̧ù̧ta a lob yɔb la mɨ̧̂. Bɨ̀ tsàꞋtè ngule shu̧ yaã Èpanetùs. Wu wòt mbì tà li ndzì èntɨ̧ɨ̧ vi ane Yesò Klistò àlaꞋ a Esìà la.

⁶ Bɨ̀ tsàꞋte Màlià wu tà taꞋa fàꞋa abua yɨ̧ la.

⁷ Bɨ̀ tsàꞋte Àndòlonikùs bɔ̂ Junìàs, è wu bòt àlaꞋ bɔ̧, bàà tò ba e li ngua tèfȩ nɔ̂ la. Bòt e ko awɔb ntsɔ̧̀ ayɔɔ bɔntu̧ Yesò Klistò, bɔ mè ngu bòt bɔ li mbɨ̀ ndzì mèntɨ̧ɨ̧ mɔb ane Yesò ka maa zì èwɔ̧ la.

⁸ Bɨ̀ tsàꞋtè Ampliyatùs, ngule shu̧ yaã ane Yesò.

⁹ Bɨ̀ tsàꞋtè Yubanùs, è wu wòt bàa tò ba àa fàꞋà abua Yesò Klistò nɔ̂ la, mè ntsàꞋtè ngule shu̧ yaã Stachis.

¹⁰ Bɨ̀ tsàꞋte Apelès wu tà lâ nyɨ̀Ꞌte nê yeà ndzəèa Yesò Klistò la. Bɨ̀ tsàꞋte bòt lob Alistobulùs.

¹¹ Bɨ̀ tsàꞋte Èlodìon wòt àlaꞋ am. Bɨ̀ tsàꞋte bɔnyɨ ba bòt Yesò Klistò bu, è wu bòt lob Nàsisùs la.

¹² Bɨ̀ tsàꞋte Tȩ̀fenà bɔ̂ Tȩ̀fosà, è wu bòt bɔ̀ɔ fàꞋà abua Yesò Klistò la. Bɨ̀ tsàꞋtè ngule shu̧ yaã Pesìs wu tàa ndâ fàꞋa abua Yesò Klistò la.

¹³ Bɨ̀ tsàꞋte Lufùs wu Mbɔ̧ɔ̧mà tɔ atò a màfaꞋa abua Tè Yesò, bɔ̂ nyɨ̌ vi wu, tà wu nyɨ̌ am mɨ̧̂ la.

¹⁴ Bɨ̀ tsàꞋte Àsinklitùs bɔ̂ Flegòn nè Emès nè Pàtèlobàs, nè Emàs mè nè bɔnyɨ ba bu bɔ̀ wu bɔ̂ tò ba nɔ̂ la.

¹⁵ Bɨ̀ tsàꞋte Fìlologùs nè Julià nè Nelùs bɔ̂ wanyɨ vi waàvi, nè Olimpàs mè nè bòt Mbɔ̧ɔ̧mà bu bàgème bɔ̀ wu bɔ̂ tò ba la.

¹⁶ Bɨ̀ taꞋa bɔnyɨ bɨ̧ ntsàꞋte àwɔb mbɨ̀Ꞌɨ̀ bòt Mbɔ̧ɔ̧mà. Bèchɔsì Yesò Klistò bàgème beà ntsàꞋtà àwɨ̧.

Pɔ̂l èlià è shu èghɨ bɔ̀ɔ me ghɨ̀ la

¹⁷ Bɔnyɨ bɔ̧, e ngua shù̧ù̧ta wɨ̧ nê bɨ̀ me ko awɨ̧ ane bòt bu bɔ̀ɔ ndzìà àghàbtè a kètsìà wɨ̧, ntàa bòt, mè nyɨ̀Ꞌta èghɨ ko tsa kà wu èghɨ bu bɔ li nyɨ̀Ꞌte awɨ̧ la. Bɨ̀ ka mbɔ̀ àghɨa ko a màngɨa nê èwuu bòt mbɔŋ.

¹⁸ Èwuu bòt mbɔŋ è ka faꞋa abua Yesò Klistò Lefɨ̀Ꞌ wa, bɔ fàꞋà wuê abua tèbêm tɔb. Bɔɔ nɨa mèngǎ̧ ntsɔ̧̀ nè àvəèəèlè fɨ̀ta bòt bu bɔ̀ɔ ka kwaꞋte mènəè ntsɔ̧̀ la.

¹⁹ Wòt ègème è zə ndɨ bɨ̀a ngɨ̀à àghɨa Ntu̧ Ntsɔ̧̀ Mbɔ̧ɔ̧mà shu la, tè a taꞋa bɔ̀ am mɨ̧̂. Maà nkɨà nê bɨ̀ bɔ èyì a mànkoa àghɨa àa mbɔ̀ la, mè ngu mbɨ̀Ꞌɨ̀ bòt kà ko àghɨ a màngɨa kàbɔ̀ŋ.

²⁰ Mbɔ̧ɔ̧mà wu tàa ngɨ̀à baa bɔ àlàŋkè la, bele yàŋe tsòkè mètàŋ Satàn, e ghɨ̌ tàa tsiꞋi a èten lɨ̧̂. Maà ntsàꞋtà nê Yesò Klistò Lefɨ̀Ꞌ wa nyɨꞋte a ntsɔ̧̀ vi abua yɨ̧.

²¹ Tɔ̀màtià wu baa tò àa fàꞋà nɔ̂ la nàà ntsàꞋtà awɨ̧, bɔ̂ Lusiɔ̀s nè Jasɔ̀n mè nè Sòsipatà, è wu bòt àlaꞋ bɔ̧ la.

²² Mmɔ̌ Tetiùs wu mâ shɨ letà waa abua Pɔ̂l la, maà ntsàꞋtà àwɨ̧ mbɨ̀Ꞌɨ̀ wanyɨ wɨ̧ ane Mbɔ̧ɔ̧mà.

²³ Gayɔ̀s wu màa ntsèka a lob tò la nè bòt chɔsì bàgème bɔ̀ɔ mbù̧ù̧tà a lob tò la aà ntsàꞋtà àwɨ̧. Èlastùs wu tà wu wòt tàa mpàŋa èkab àpfəèà nɨ̧ yaa la bɔ̂ wanyɨ wa Kwatùs aà ntsàꞋtà àwɨ̧. [

²⁴ Maà ntsàꞋtà nê Yesò Klistò Lefɨ̀Ꞌ wa nyɨꞋte a ntsɔ̧̀ vi abua yɨ̧ bɨ̀agème. Àmèn.]

Pɔ̂l lìa nè mèngùꞋte abua Mbɔ̧ɔ̧mà

²⁵ Bàa ŋa mèngùꞋte abua Mbɔ̧ɔ̧mà! Tà bɔ mètàŋ e ghɨ̌ bɨa me kweele mbɨ̀Ꞌɨ̀ Ntu̧ Ntsɔ̧̀ nàa shua la. Ntu̧ Ntsɔ̧̀ mbɔŋ wu ntu̧ yu màa ndàꞋà ane ànəa Yesò Klistò la, è wu nkûŋ yu bɔ li bɔ̀ ka ko ànəa yùà ane mèngùꞋ nyaŋ è tsè la.

²⁶ Nkûŋ mbɔŋ è pùùla ayaã àfɨ̀Ꞌ yaa ane àghɨ a bèndàꞋàtɔŋ Mbɔ̧ɔ̧mà e li shɨŋ la. Mbɔ̧ɔ̧mà wu tà wu ane àlia nè àlia la è shu nê èlaꞋ ègème e ko, mbɨ̀Ꞌɨ̀ bòt bàgème aa bɨ̧ɨ̧ne ànəa tà shu la, e me zə atò.

²⁷ Wu ndàꞋà Mbɔ̧ɔ̧mà tà bɔ èyì la. MèngùꞋte wu abua tò ane àlia nè àlia, nkàà àghɨa Yesò Klistò li ngɨ̀ la! Àmèn.