Lûm 14 - Mundani

Bɨ̀ ka me tsǐ mpəəte bɔnyɨ bɨ̧

¹ Bɨ̀ baãaã wòt tà bakà zìꞋì nkwèèle ane mènəè Mbɔ̧ɔ̧mà la ntsɔ̧̀, bɨ̀ ka me buꞋu ètsə bɨ̧ ane àghɨa tà wu ghɨ̌, ko baka ghɨ̀ la leꞋ.

² Èntɨ̧ɨ̧ wòt kǒ tà zi ane Yesò la aà ngɨ̀à tà jɨa àghɨ àgème, ka wòt è we tò nè èntɨ̧ɨ̧ ane Yesò è bela njùa la me jɨ wuê mbɨ̀btsə.

³ Wòt wu tàa njɨ̀a àghɨ àgème la ka me waa wòt wu kà wua njɨ̀a la, wòt wu tàa njɨ̀a wuê mbɨ̀btsə la ka mè me tsi mpəèəète wòt wu tàa njɨ̀a àghɨ àgème la, nkàà nê Mbɔ̧ɔ̧mà nɨ atò mbɨ̀Ꞌɨ̀ wòt vi.

⁴ À wu wà e me bàŋe wafàꞋ wòt tsa à? Wu Mbɔ̧ɔ̧mà tò ka tàa shu laꞋnê tà ghɨ ntsɔ̧̀ kò kàbɔ̀ŋ leꞋ la. Taa tɨ̧ɨ̧, nkàà nê Tǎt wa Mbɔ̧ɔ̧mà bɔ mètàŋ e ghɨ̌ taa tɨ̧ɨ̧.

⁵ Wòt kǒ nàa ngɨ̀ tà me nɨ àlia ko nê wu àlia nɨ̧, ka wekǒ me nɨ èli ègème nê aà ndɨŋndɨ̀ŋ. Ka tsiꞋ waa waa lâ nko nê àyea àa èntɨ̧ɨ̧ vi la wu ndɨ a bɔ ndɨ àa wu la.

⁶ Wòt tàa nɔ̀ŋà àlia ko mbɨ̀Ꞌɨ̀ àlia nɨ̧ la wua nɔ̀ŋà nkùkta Lefɨ̀Ꞌ. Wòt tàa njɨ̀a àghɨ kà wòt tsa wua njɨ̀a la mè ngua njɨ̀a nkùkta Lefɨ̀Ꞌ, ndɨ̀ wu tà kɔ̀ŋka Mbɔ̧ɔ̧mà adù̧ la. Wòt tà meè ntu̧u̧ e jɨ àghɨ la, wua ntù̧a nkùkta Lefɨ̀Ꞌ, mè nkɔ̀ŋkà Mbɔ̧ɔ̧mà adù̧.

⁷ Wòt kǒ ane ya tàa ntsèka àtsəa zi la è ntsě, wòt kǒ ane ya tàa mè mpfəa ambo zi la ka wuê.

⁸ Baa me tseke ko baa wua ntsèka abua Lefɨ̀Ꞌ, mè mpfəèa, ko baa pfəa abua tò. Ale, kò baa wu yû̧, kò baa pfə leꞋ, ko baa wu abua Lefɨ̀Ꞌ.

⁹ Yesò Klistò li mpfə mè njù̧ù̧me, mbɨ̀Ꞌɨ̀ wu Tǎt abua bòt bɔ pfəꞋte la nè bòt bɔ̀ bele be yû̧ la.

¹⁰ À ghɨ̀ na ka me tsǐ mpəəte wanyɨ wè à? À ghɨ̀ na mè me waa wanyɨ wè à? À ka ngɨ̀ ale ndɨ̀ wu bàagème àa li tɨ̧ɨ̧ a mbì èsaꞋa Mbɔ̧ɔ̧mà la.

¹¹ A wu mbɨ̀Ꞌɨ̀ àkata Mbɔ̧ɔ̧mà a shu la nê, “Lefɨ̀Ꞌ laꞋnê, mbɨ̀Ꞌɨ̀ màa və la, bòt bàgème aa li teme tènjûŋ tɔb a mbì laã wòt ègème mè ngu laꞋa ane ètsəê vi nê e ngu Mbɔ̧ɔ̧mà.”

¹² Ale, waa waa ane ya naa li shu ànəa àghɨa àgème ye ghɨ̀ la abua Mbɔ̧ɔ̧mà.

¹³ Mbɨ̀Ꞌɨ̀ àa anè la à ka ntsì mpəəte wanyɨ wè, ka la nɔ̀ŋe a èntɨ̧ɨ̧ wê nê à ka ghɨ̀ àghɨa àa ghɨ̌ wanyɨ wè nàa sèmne ko e kwene a èbem kàbɔ̀ŋ la a.

¹⁴ Mâ lâ nko, ndɨ̀ wu è ntsiꞋi àghɨ yeamɔꞋ nè Yesò Lefɨ̀Ꞌ la nê àghɨa jɨ ako àa mbɨ̀a a mànjɨa la a ntsě, ka wòt yèa nê àghɨa ko bɔ̀ɔ njɨ̀a la wu àghɨa kàbɔ̀ŋ, mbɔ̂ njɨ, ko wu kàbɔ̀ŋ tà ghɨ̀ la.

¹⁵ Àghɨa àa njɨ̀a la a wu sɔ̀ɔ̀be èntɨ̧ɨ̧ wanyɨ wè, ko à kà tsi ngɨ̀à ane èkɔŋ. À ka ngɨ̀ àghɨa àa njɨ̀a la, a tsòkè wanyɨ wè wu Yesò Klistò li mpfə ambo tò la.

¹⁶ Ale, à ka ngɨ̀ àghɨa àa mbɔ̀ abua ye la, a bɔ èlen kàbɔ̀ŋ abua bòt ko.

¹⁷ Ànəa nɨ̧ a kèfɔ̧̀ Mbɔ̧ɔ̧mà ntsě mànjɨa èghɨjɨ, kò mànua leꞋ, wu màngɨa àghɨa Mbɔ̧ɔ̧mà kɨa la, nè màntseka ane àlàŋkè nè bòt, mè nè màngua ane mèngùꞋte, è wu èghɨ Fo Kèfə nàa ŋa la.

¹⁸ Wòt tàa fàꞋà abua Yesò Klistò a èlɨ̀ waa la, wu wòt èntɨ̧ɨ̧ Mbɔ̧ɔ̧mà àa mbɔ̀ ane tò la, bɔbȩ e mè ngu me làꞋa a ntsɔ̧̀ adù̧ tò.

¹⁹ Ale, bàà me nyɔ̀Ꞌte àfɨ̀Ꞌ àgème ndzèa nê baa ngɨ̀à àghɨa àa me ghɨ̌ baa tseka ane àlàŋkè nè bɔnyɨ ba la, nè àghɨa àa me tɨŋe bɔnyɨ ba bɔ tsəa ane alu̧ Mbɔ̧ɔ̧mà la.

²⁰ À ka ngà ambo èghɨjɨ ntsòkè àfaꞋa Mbɔ̧ɔ̧mà. Wu nkûŋ nê àghɨa ko wòt nàa shɨ̀kà a mànjɨa la a ntsě, ka aà kàbɔ̀ŋ abua wòt tàa jɨ àghɨa àa ghɨ̌ wanyɨ tò naa fà̧ ànəê a mbì Mbɔ̧ɔ̧mà la.

²¹ Wu ànəa ntsɔ̧̀ e tseke ka kwele nyà̧, kò nu mèlùꞋ, kò àghɨa ko tsa leꞋ, àa ghɨ̌ wanyɨ wè naa kwene la.

²² Nɔ̀ŋe àghɨa àa èntɨ̧ɨ̧ wê ane ànəa èghɨ bàa la a kètsìà wɨ̧ bɨ Mbɔ̧ɔ̧mà. Ntsɔ̧̀ wu wòt wu èntɨ̧ɨ̧ tò àa ka feele atò ane àghɨa tà ye nê wu ntsɔ̧̀ la.

²³ Wòt me jɨ àghɨ me màkè, ko Mbɔ̧ɔ̧mà naa fèèle atò, nkàà nê tà ko nê Mbɔ̧ɔ̧mà bakà bɨ̧̀ɨ̧̀ne àghɨa yè ghɨa la. Wòt ghɨ̀ àghɨa tà bakà lâ nko a èntɨ̧ɨ̧ vi nê Mbɔ̧ɔ̧mà bɨ̧ɨ̧ne la, ko wu kàbɔ̀ŋ.