Lûm 13 - Mundani

Bɨ̀ me zə bòt bu bɔ̀ɔ mbà̧aã àlaꞋ la

¹ Wòt ègème bɔ ndɨ tàa me zə bòt gɔbmèn bu bɔɔ mbà̧aã àlaꞋ la. Bòt ko bɔ̀ɔ mbà̧aã àlaꞋ kà Mbɔ̧ɔ̧mà bɨ̧̀ɨ̧̀ne la be ntsě, wu Mbɔ̧ɔ̧mà ka tà tsia bòt bu bɔ̀ɔ mbà̧aã àlaꞋ la.

² Ale, wòt tu̧a zə bòt bu bɔ̀ɔ mbà̧aã àlaꞋ la, tà ko nê ye tu̧u̧ àghɨa Mbɔ̧ɔ̧mà tsia la, mbɔ̂ bòt bɔ ghɨ̀ ale la e wua ntɔ ngoꞋ adù̧ yɔb.

³ Bòt bu bɔ̀ɔ mbà̧aã èlaꞋ la e ntsě abot mbɨ̀Ꞌɨ̀ e ghɨ bòt bu bɔ̀ɔ ngɨ̀a ntsɔ̧̀ la aa me bɔa, wu bòt bu bɔ̀ɔ ngɨ̀a kàbɔ̀ŋ la ka bɔ̀ɔ me bɔa la. Àà nkɨ me tseke kâ wua mbɔ̀a wòt wu tàa mbà̧aã àlaꞋ la à? Ale, me ghɨ̀ wuê mènəè ntsɔ̧̀ mbɨ̀Ꞌɨ̀ tàa me làꞋa a ntsɔ̧̀ adù̧ ye,

⁴ nkàà nê tà wu wɔ̀fàꞋ Mbɔ̧ɔ̧mà tàa faꞋa ane ntsɔ̧̀ wê la. Ka à ghɨa kàbɔ̀ŋ à me bɔa, nkàà nê, mètàŋ mu bɔ ŋa abua tò la è ntsě àku. Tà wu wɔ̀fàꞋ Mbɔ̧ɔ̧mà a mànɔŋa ntsǒ Mbɔ̧ɔ̧mà adù̧ bòt bu bɔ̀ɔ ngɨ̀a kàbɔ̀ŋ la.

⁵ Ale, wòt bɔ ndɨ tàa me zə bòt bu mbà̧aã àlaꞋ la, è ka ngu nê tà bɔa wuê ntsǒ Mbɔ̧ɔ̧mà, ka tsiꞋ à wu nê a èntɨ̧ɨ̧ tò tà ko nê wu àghɨa ye bɔ ndɨ yèa ghɨ̀ la.

⁶ Eyaa wu lə yu bɨ̀a ŋa èkab taksì la mɨ̧̂, nkàà nê bòt bu mbà̧aã àlaꞋ la wu bɔfàꞋ Mbɔ̧ɔ̧mà mbɨ̀Ꞌɨ̀ bɔ̀ɔ ngɨ̀à àfaꞋa mbɔŋ la.

⁷ Ŋa àghɨa à bɔ ndɨ àa ŋa abua yɔb la. Ŋa èkab bètaksì tsa tsa abua bòt à bɔ ndɨ àa ŋa la, mè me kukte bòt à bɔ ndɨ àa kukte awɔb la.

Bòt è me kɔ̀ŋkè bɔnyɨ bɔb

⁸ À ka mbèà njû wòt a èbèm lê, kà wu wuê ndɨ àa me kɔ̀ŋke waa waa la, nkàà nê wòt tàa nkɔ̀ŋkà wanyɨ vi la è ghɨ̀ àghɨa mbɨ̧ kɨà la.

⁹ Mbɨ̧tsə tê shu nê, “Wòt ka me jɨ àbȩ, wòt ka mbùŋè wòt, wòt ka ntsɔŋ, wòt ka me kɨ nê àghɨa wòt tsa a wu wu azi.” Mènəè maa nè me kǒ tsa ègème wu a èbem ànəa yaa yeamɔꞋ la nê, “Me kɔ̀ŋkè wanyɨ wè mbɨ̀Ꞌɨ̀ àwɔ̀ mbɔŋ.”

¹⁰ Wòt me kɔ̀ŋkè wanyɨ vi ko tà ka ghɨa kàbɔ̀ŋ ane tò a. Ale, wòt nàa me kɔ̀ŋkè wanyɨ vi tà wua ngɨ̀à àghɨ àgème mbɨ̧ kɨà la.

¹¹ Bɨ̀ me ghɨ̀ àyaa nkoa mɨ̧̂ nê bɨ ko èwuu àfɨꞋa bɨ̀ wu adù̧ la. ÀfɨꞋa bɨ bɔ ndɨ bɨ̀a lɔ̀Ꞌɔ a si mbɨ̀Ꞌɨ̀ bòt bɔ ku̧u̧te awɔb la, a kuêꞋ. ÀfɨꞋa bàa bɔ mèmpème la a kɨꞋɨ tê ngu a ngèt ya àfɨ̀Ꞌ yaa tè ntsè ndɨ à le wuê àfɨ̀Ꞌ yu baa li mbùꞋ ndzì mèntɨ̧ɨ̧ ma ane Yesò la.

¹² A bê ntsìꞋi mbɨ̀Ꞌɨ̀ ètsəꞋ e tsi tè àbȩ a bùꞋ me ghaꞋte. È wu ale, bàà waꞋa èbɨꞋte èghɨ bu bàa ngɨ̀à a èbem ndzěm la, mè ngwèè àwa nè èghɨ èbet mbɨ̀Ꞌɨ̀ etaŋke a mànua a èbem èkaꞋà.

¹³ Bàà me ghɨ̀ mènəè ma ane ndɨ è wu wu la, mbɨ̀Ꞌɨ̀ bòt bɔ̀ɔ ntsèka a èbem èkaꞋà la. Bàà ka me jɨ mèpǎ̧ màpaꞋta àbɨ̧, kò nùa mbea leꞋ, bàà ka me jɨ àbȩ kò ngɨ̀à èbɨꞋte mènəè leꞋ, bàà ka me nù èbet kò ngòꞋna bòt leꞋ.

¹⁴ Ka bɨ̀ wèà àwɨ̧ nè mààlà Yesò Klistò Lefɨ̀Ꞌ, bɨ̀ ka me mɨ̀ɨ̀tè èghɨ mbɨ̧̀ ènyit, e me ghɨ̀ àghɨa è kɨa la.