Lûm 1 - Mundani1 Letà Pɔ̂l wɔ̀fàꞋ Yesò Klistò, Mbɔ̧ɔ̧mà lè tɔ nê tà me tsɔ̀te Ntu̧ Ntsɔ̧̀ yu è dzə abua zi la. 2 Mbɔ̧ɔ̧mà li ndzaŋe kàꞋa ànəa Ntu̧ Ntsɔ̧̀ yaa, bèndàꞋàtɔŋ tò e shɨ a èbem Àkata tò. 3 Ntu̧ Ntsɔ̧̀ Mbɔ̧ɔ̧mà wua ndàꞋà ànəa Waã tò wu bɔ le mbi mbɨ̀Ꞌɨ̀ wɔ̀bȩ̂ a èbem àndǎ̧ a fɔ̧̀ Dàbid la. 4 Enɨ nyɨꞋte nê tà wu Waã Mbɔ̧ɔ̧mà, Mbɔ̧ɔ̧mà nɨ mètàŋ mi è ghe la, njù̧ù̧me atò a èbem èvə. Waã tò mbɔŋ wu Tǎt wa Yesò Klistò. 5 Mbɔ̧ɔ̧mà li ntsè ane Yesò nɨa ntsɔ̧̀ vi ngɨ̀ am ane wantu̧ Yesò, mbɨ̀Ꞌɨ̀ maa me ghaãaã ane èlen Yesò ndàꞋà èngǎ̧ tò abua bòt èlaꞋ ègème, mbɨ̀Ꞌɨ̀ bɔɔ bɨ̧ɨ̧ne èngǎ̧ mbɔŋ, e tsiꞋi me zə wuê atò. 6 Fɔɔle awɨ̧ wu bɨ̀ wu ayɨ̧ ayɔɔ bòt bu Mbɔ̧ɔ̧mà tɔ awɔb nê bɔ̀ wu bòt Yesò Klistò la. 7 Tà shɨ abua bòt Mbɔ̧ɔ̧mà bu bàgème a Luêm, Mbɔ̧ɔ̧mà nàa nkɔ̀ŋkà àwɔb mè ntɔ awɔb ane bòt bi la. Maà shù̧ù̧ta Tǎt wa Mbɔ̧ɔ̧mà bɔ̂ Yesò Klistò Lefɨ̀Ꞌ nê bɔ̀ nyɨꞋte a ntsɔ̧̀ wɔb abua yɨ̧, ngɨ̀ bɨ̀ bɔ àlàŋkè a mèntɨ̧ɨ̧ mɨ̧. Pɔ̂l kɔ̀ŋke a Mbɔ̧ɔ̧mà 8 Maà mbɨ̌ kɔ̀ŋke a Mbɔ̧ɔ̧mà am ane èlen Yesò Klistò ane yɨ̧ bɨ̀agème, ane ndɨ bòt a èdziꞋ ègème aà ndàꞋà ndɨ bɨ zi mèntɨ̧ɨ̧ mɨ̧ ane Yesò Klistò la. 9 Mbɔ̧ɔ̧mà wu mâ ŋa am nènkèm abua tò a mànstsɔta Ntu̧ Ntsɔ̧̀ waã tò la, è koê nê ànəa e ndàꞋà la wu nkûŋ nê, màa ngɨ̀ e me tsàꞋte atò àfɨ̀Ꞌ àgeme e me làꞋà ànəa yɨ̧ abua tò, 10 è shua nê tà ghàꞋa èlu̧, ko maa yaa kɨꞋɨ àfɨ̀Ꞌ yaa e ye awɨ̧. 11 Maa ndâ nkɨ e kɨꞋɨ ye awɨ̧ mbɨ̀Ꞌɨ̀ nyɨꞋte awɨ̧ mènəè Mbɔ̧ɔ̧mà kǒ, bɨa me kweele ane èntɨ̧ɨ̧ wɨ̧ wu bɨ zi ane Yesò la. 12 E nkɨ kɨꞋɨ e ye awɨ̧ mbɨ̀Ꞌɨ̀ èntɨ̧ɨ̧ wɨ̧ wu bɨ zi ane Yesò la aa zǐ èntɨ̧ɨ̧ am, è wɔ̧ wu ane tò la aa zǐ mèntɨ̧ɨ̧ mɨ̧. 13 Bɔnyɨ bɔ̧, bɨ̀ ko nê mâ taŋke ngò̧ nyaŋ nê e nkɨ kɨꞋɨ e ye awɨ̧ (ka àghɨa ko a kele am e kɨꞋɨ e dzə àfɨ̀Ꞌ yaa). E nkɨ kɨꞋɨ mbɨ̀Ꞌɨ̀ ghɨ̌ bòt ko aa zì mèntɨ̧ɨ̧ mɔb ane Yesò, mbɨ̀Ꞌɨ̀ mâ ghɨ̌ ayɔɔ bòt kà wu Bèjuê a èdzìꞋ èko la. 14 Eyaa wu àfaꞋa mâ bɔ ndɨ màa faꞋa abua bòt bàgème la. Abua bòt àghɨ ayɔb a ghaꞋa la, nè èbe kà ayɔb a ghaꞋà, nè bòt bɔ ko àkatè la, nè èbe kà koê. 15 Eyaa wu lə màa ndâ nkɨ tsɔ̀te Ntu̧ Ntsɔ̧̀ yaa mɨ̧̂ abua yɨ̧ wu a Luêm la. 16 Maà kà bɔ àtsəa kɔꞋɔ a ane Ntu̧ Ntsɔ̧̀ Mbɔ̧ɔ̧mà, nkàà nê, wu mètàŋ Mbɔ̧ɔ̧mà màa nɨa ntsɔ̀tà Ntu̧ Ntsɔ̧̀ yu nàa ngɨ̀à waa waa tà zi èntɨ̧ɨ̧ vi ane Yesò la peme la, ebùꞋu ane Bèjuê bu èngǎ̧ mbɔŋ e li mbɨ̀ abua yɔb la, eghǎ wu ane bòt kà wu Bèjuê. 17 Ntu̧ Ntsɔ̧̀ Mbɔ̧ɔ̧mà nàà nyɨ̀Ꞌta ndɨ Mbɔ̧ɔ̧mà nàa nɨa wòt mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li la, è wu wòt wu tà zi èntɨ̧ɨ̧ vi ane waã tò Yesò Klistò tè èlu̧ tsa è ka tsi ngu la. Bɔ shɨ a èbem Àkata Mbɔ̧ɔ̧mà nê, “Wòt tà zi èntɨ̧ɨ̧ vi ane Mbɔ̧ɔ̧mà, tè Mbɔ̧ɔ̧mà nɨa tò mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li la, naa li wu ane àlia nè àlia.” Wòt ègème tsiꞋi wòt kàbɔ̀ŋ e mbì Mbɔ̧ɔ̧mà 18 Mbɔ̧ɔ̧mà è tse a ègwet me nyɨꞋte ndɨ yèa ntsòa ane bòt bàgème bɔ tu̧u̧ zə atò, me ghɨ wuê kàbɔ̀ŋ, tè kàbɔ̀ŋ mbɔŋ kele bòt, bɔ̀ ka tsi nko nkûŋ la. 19 BetsiꞋa waa waa ko àghɨa Mbɔ̧ɔ̧mà wu yùà la, ndɨ̀ wu Mbɔ̧ɔ̧mà zìambɔŋ è nyɨꞋte abua yɔb la. 20 EbuꞋu tea àfɨꞋa Mbɔ̧ɔ̧mà li ngɨ̀ ngɔ̀ŋ la, tàa ngɨ̀à àfɨ̀Ꞌ àgème bòt e yea nê tà wu Mbɔ̧ɔ̧mà, mè ndzea nê mètàŋ tò nàa kà lìà. Bɔ li ngu ko ye nê tàa və ane èghɨ tà ghɨ̀ la. Ale, àghɨa ko bɔ̀ɔ mě nɨ ghɨ̌ te gha àku la a ntsě. 21 Bɔ li mbàte nko nê Mbɔ̧ɔ̧mà nàà və, ka bɔ̀ ka ŋa kènuke abua tò mbɨ̀Ꞌɨ̀ Mbɔ̧ɔ̧mà, bɔ̀ ka mě nkɔ̀ŋkè atò ane àghɨa tà ghɨ̀ la. Ale, mèmɨ̀ɨ̀te mɔb è tsìꞋi àku, bɔ̀ ka meè nko àghɨa Mbɔ̧ɔ̧mà li ngua nkɨa nê bɔ̀ ko la. 22 Bɔ batè me tseka shua nê bɔ wu bòt èyì, ka mbɔ̂ ntsìꞋi èkèghɨ̧̀. 23 Bɔ sà ènɨ̧ Mbɔ̧ɔ̧mà wu tà wu ane àlia nè àlia la, ntsiꞋi me kukte wuê èghɨ bɔ̀ ghɨ̀ e efəə wɔ̀bȩ̂ nè banyaãbàꞋ, mèè nè banyà̧ bèa ntsèka e a èbem mèleb mè ntsèka aguŋ la. 24 Mbɔ̧ɔ̧mà ye ale, sà àwɔb nê bɔ̀ me ghɨ̌ èbɨꞋte èghɨ bu bɔ zì mèntɨ̧ɨ̧ mɔb adù̧ la, bɔ tsiꞋa ngɨ̀à mènəè àtsəa kɔꞋɔ a kètsìà wɔb bɔ̀ɔmbɔŋ. 25 Mbɔ̧ɔ̧mà li ngɨ̀ anè nkàà nê bɔ waꞋa nkûŋ yu ane Mbɔ̧ɔ̧mà la, ntsiꞋi me kùŋè àghɨa àfɨte. Nko nê bɔ sa a Mbɔ̧ɔ̧mà wu tà ghɨ àghɨ àgème la, ntsiꞋi me kukte èghɨ bu tà ghɨ̀ la, bɔ wu me wùꞋtè wuê a Mbɔ̧ɔ̧mà wu tà wu ane àlia nè àlia la. Àmèn. 26 Àyaa a ghɨ̀ Mbɔ̧ɔ̧mà sà àwɔb nè bɔ̀ me ghɨ̀ wuê èbɨꞋte èghɨ bu àa ŋa àtsəa kɔꞋɔ bɔ zì mèntɨ̧ɨ̧ mɔb adù̧ la. Bèzi bɔb e sà mbâ̧tsə ntsìꞋa nɔ̀ŋkà nè bèzi ko. 27 Mbâ̧tsə te me ghɨ̀ wuê a èlɨ̀ mbɔŋ mɨ̧̂, sà bèzi ntsìꞋa nkɨà wuê mbâ̧ tè ko, ngɨ̀à mènəè àtsəa kɔꞋɔ, nɔ̀ŋkà nè mbâ̧ tè ko. Mbɨ̀Ꞌɨ̀ bɔ̀ɔ ngɨ̀à ale la, Mbɔ̧ɔ̧mà me zì àwɔb a èbem ngoꞋ è wu àbȩ̀ àfaꞋa kàbɔ̀ŋ yɔb la. 28 Ndɨ̀ wu bòt mbɔŋ e tu̧u̧ zì mèntɨ̧ɨ̧ mɔb ane mènəè nkûŋ mu nàa nyɨ̀Ꞌta wòt Mbɔ̧ɔ̧mà wu wùà la, Mbɔ̧ɔ̧mà sà àwɔb bɔ tsiꞋi zì mèntɨ̧ɨ̧ mɔb ane èbɨꞋte èghɨ àa ŋa àtsəa kɔꞋɔ la. 29 Ale, mèntɨ̧ɨ̧ mɔb lu̧u̧ ne tèwuute èbɨꞋte ènəê ègème, kàbɔ̀ŋ nè mànkɨa nè èghɨ bòt tsa e wu tsiꞋi bɔb, mè nè màmɨɨta wuê a kàbɔ̀ŋ ane bòt ko. Mèntɨ̧ɨ̧ mɔb è lu̧u̧ ne ghòꞋnà, bɔ mè ngu bèlɨ̧̀, me tseka nùà bòt, fɨ̀ta bòt, mɨ̀ɨ̀tà wua kàbɔ̀ŋ ane bòt, ndàꞋa kàbɔ̀ŋ ane tèlente bòt. 30 Ntsòkà tèlente bòt, mpààbà a Mbɔ̧ɔ̧mà, ntsò̧ò̧tà bòt, ŋèꞋa tèkwȩ tɔb a ègwet, shua nê bɔ ghe. Bɔ mè me ntsèka mɨ̀ɨ̀tà wuê balu̧ fi a màngɨa kàbɔ̀ŋ, bɔ̀ ka wua ndzəa bètǎt bɔb bɔ̂ bènyɨ̌ bɔb. 31 Bɔɔ ngɨ̀à mbɨ̀Ꞌɨ̀ èkèghɨ̧̀, bɔ̀ ka wua shua ànəê, ngɨ̀à a èlɨ mbɔŋ, mè me ghɨ̧̀ɨ̧̀ne bòt kà wua nkua tèsȩ. 32 Bɔ batè nko ànəa Mbɔ̧ɔ̧mà shu la nê bɔ bɔ̂ ndɨ bɔ̀ɔ bùŋe bòt bɔ̀ɔ ngɨ̀à èwuu èghɨ mbɔŋ la, ka bɔ̀ wua ngɨ̀à wuê ndàꞋà bùà, bɔ me wùꞋta fɔ̀ɔ̀la bòt bu bɔ̀ɔ ngɨ̀à èwuu èghɨ mbɔŋ la mɨ̧̂. |
© 2006, Cameroon Association for Bible Translation and Literacy