Lûk 6 - Mundani

Èngà̧ ane àliapfəèa Bèjuê

¹ È li ngu ane àliapfəèa Bèjuê ako, Yesò lɔ̀Ꞌ me tsě a èbem mbȩte bɔ liꞋi èwuu ntsəètè ko la, bɔkatè tò e bùꞋ me fààte ntsəè tu fɨ̀klâ àbu bɔb nkwèla.

² Bèfalèsiì ko e shu abua Yesò nê, “Ye àghɨa bɔkatè bê e ghɨ̀à, è wu àghɨa bɔ̀ɔ ka ghɨ àliapfəèa Bèjuê la.”

³ Yesò bɨ̀ɨ̀lè nê “Bɨ te bakà etɔ zə àghɨa fɔ̧̀ Dàbid bɔ̂ bòt bi e li ngɨ̀ àfɨꞋa ndzìtsə te li ngua nkua awɔb la?

⁴ Ka tà li nyi a èbem lob nɨ̧ Mbɔ̧ɔ̧mà bɔ̂ bòt bi nkwèle a bled wu bɔ tɔ èlen Mbɔ̧ɔ̧mà adù̧ la à? Bɔɔ̀ nkwèla ale è kà wu àghɨa mbɨ̧ ta te bɨ̧ɨ̧nè nê wòt tsa kà wu ntsìà mèpɨ̧̀ Mbɔ̧ɔ̧mà ghɨa la.”

⁵ Yesò lìà nê “Waã Wòt wu wòt tà bɔ àtɔŋ a ègwet àliapfəèa Bèjuê la.”

Wòt kǒ àbu atò a li mpfə la

⁶ È li ngu ane àliapfəèa Bèjuê ako, Yesò gha a lob Mbɔ̧ɔ̧mà me nyɨꞋte èngǎ̧ Mbɔ̧ɔ̧mà. Wòt kǒ wu abot àbualu̧ atò a pfə la.

⁷ BènyɨꞋtà mbɨ̧te Musì nè Bèfalèsiì e me lɨ̀ŋke atò eye nê kò taa bə wòt ane àliapfəèa Bèjuê mbɔŋ, mbɨ̀Ꞌɨ̀ bɔɔ laꞋnê tà fǎ̧ mbɨ̧ leꞋ.

⁸ Ka Yesò è ko mèmɨ̀ɨ̀te mɔb shu abua wòt wu nê, “KɨꞋɨ ntɨ̧ɨ̧ àdzìꞋ yaa.” Tà lɔ̀Ꞌɔ a si ntɨ̧ɨ̧ abot.

⁹ Yesò shu abua yɔb nê, “TsiꞋ è mbììte awɨ̧, mbɨ̧ ta te laꞋnê bà me ghɨ̀ na ane àliapfəè yaa? Nê bà ghɨ̀à kàbɔ̀ŋ, kò ntsɔ̧̀ à?” Nê, bà bə wòt kò ba bùŋe leè?

¹⁰ Yesò me lɨ̀ŋkè àwɔb bàgème shu abua tò nê, “Nyààbè àbu ayê.” Tà nyààbè àbu azi yu, a bê nkwèèle.

¹¹ Bɔ tsènè ntso, ntsìꞋi me làꞋa a kètsìà wɔb ane àghɨa bɔ̀ɔ ghɨ̌ adù̧ Yesò la.

Yesò làà bɔntu̧ bi ntsɔ̀b babe

¹² Ane èli ngaa Yesò kɔꞋ nga a ègwet èkù̧ù̧nè etsàꞋte a Mbɔ̧ɔ̧mà, ngà me tsàꞋtè tê ètsəꞋ e tsi.

¹³ ÈtsəꞋ è tsi ale, tà tɔ bɔkatè bi, ndàà bòt ntsɔ̀b babe me tɔ awɔb ane bɔntu̧ bi.

¹⁴ Simùn wu Yesò li ngua ntɔ nê Pità la bɔ̂ wanyɨ vi Andùlù, Jimsì bɔ̂ Jɔ̌n, Filìb bɔ̂ Bàtòlomiò,

¹⁵ Màtìù bɔ̂ Tɔmasì, Jimsì waã Alfeɔ̀ nè Simùn wu tà lè taꞋa wua nùà mènəè àlaꞋ la,

¹⁶ Judàs waã Jimsì, ka nè Judàs Iskaliòt wu tà li ndɔ̀Ꞌ fɨ̧̀ɨ̧̀na Yesò la.

Yesò me nyɨꞋta mè mbəa bòt

¹⁷ Yesò chu a ègwet èku̧u̧nè nè bɔntu̧ bu ntɨ̧ɨ̧ àdzìꞋa si tètoêꞋ, nè taꞋà ènɔ̧̂ bɔkatè bi nè taꞋà ènɔ̧̂ bòt bɔ dzəè a èdziꞋ ègème a Jùdià nè Jèlusalèm fɔɔle nè bòt bɔ dzəa Tȩê bɔ̂ Sidɔ̀n, è wu èpfəè nɨ̧ a ngèt *èdzî la.

¹⁸ Bɔ li ngua nkɨ̀Ꞌa ezə èngǎ̧ Yesò taa mě bə èghɔ̧ bɔb. Bòt fote kàbɔ̀ŋ tèa ane yɔb la, e kɨꞋɨ̀ mɨ̧̂ tà bə awɔb bàgème.

¹⁹ Bòt bàgème e li ngua nkɨ ebaãaãte atò, nkàà ndɨ mètàŋ nàa ndzəa ane tò mbə awɔb bàgème la.

MèngùꞋte nè tèsȩ

²⁰ Yesò lɔ̀kè àvi shu abua bɔkatè bi bu nê, “Ntsɔ̧̀ wu bɨ̀a bòt mbuŋ, kèfɔ̧̀ Mbɔ̧ɔ̧mà wu abua yɨ̧.

²¹ Ntsɔ̧̀ wu bɨ̀a wu ndzìtsə tèa nkua wɨ̧ àfɨ̀Ꞌ yaa la, bɨa li jɨ te yele. Ntsɔ̧̀ wu bɨ̀a wu bɨ̀a ndɨ̀à àfɨ̀Ꞌ yaa la, bɨa li tsoꞋo.

²² Ntsɔ̧̀ wu bɨ̀a wu bòt aa mpààbà àwɨ̧, ntsìà àwɨ̧ ayɔɔ, ntsɔ̧̀ɔ̧̀tà àwɨ̧, mè shua nê bɨ wu bòt kàbɔ̀ŋ, nkàà ndɨ̀ wu bɨ̀a nkùŋà Waã Wòt la.

²³ “Bɨ̀ ben ngùꞋtè àwɨ̧, nkàà nê Mbɔ̧ɔ̧mà paŋe taꞋà àbȩ̀ abua yɨ̧ a ègwet. Bɨ̀ ko nê eyaa wu ndɨ bètǎt nyaꞋ bɔb e li ngɨ ane bèndàꞋàtɔŋ nyaꞋ Mbɔ̧ɔ̧mà la.

²⁴ Aa li bɨ̀a awɨ̧, bɨ̀a wu bɨ̀ wu bòt èghɨ nyaŋ àfɨ̀Ꞌ yaa la, bɨ bɔ mèntsèke lèyu mɨ̧ tè ndɔ̀Ꞌ.

²⁵ Aa li bɨ̀a awɨ̧, bɨ̀a wu bɨ̀a njɨ̀a àfɨ̀Ꞌ yaa ndzèla la, bɨa li tseke ndzìtsə. Aa li bɨa awɨ̧, bɨ̀a wu bɨ̀a ntsòꞋa ngùꞋtà àwɨ̧ àfɨ̀Ꞌ yaa la, bɨa li lù èvə me dɨ̀ mèsi.

²⁶ Aa li bɨa awɨ̧, àfɨꞋa bòt bàgème bɔ̀ɔ ndàꞋà ntsɔ̧̀ ane yɨ̧ la, nkàà nê, bètǎt nyaꞋ bɔb e li shu èwuu ènəê baa adù̧ bòt bu bɔ̀ le shu nê bɔ wu bèndàꞋàtɔŋ Mbɔ̧ɔ̧mà kà wu bùà la.

Bòt è me kɔ̀ŋkè bɔmbù̧ bɔb

²⁷ “Ka maà shua wɨ̧ wu bɨ̀a ndzəèa am la nê, bɨ̀ me kɔ̀ŋke bɔmbù̧ bɨ̧, ngɨa ntsɔ̧̀ abua bòt bu bɔ̀ɔ ka kɨ eye awɨ̧ la.

²⁸ Bɨ̀ lɔ̀ɔ̀le bòt bu bɔ̀ɔ ndzìà ndɔ̀tsə àtsə bɨ̧ la, mè ntsàꞋtè a Mbɔ̧ɔ̧mà ane bòt bu bɔ̀ɔ ngɨ̧̀ɨ̧̀nà àwɨ̧ la.

²⁹ Wòt dèbè ngòꞋ yê, à ghèble yekǒ tà dèb mɨ̧̂. Wòt nɨ ndǐmàꞋa yê, à tsiꞋ tà paa ye èten nɨŋ.

³⁰ Wòt lò̧o̧ àghɨ abua yê à ŋa abua tò. Wòt nɨ àghɨa è wu àyê la, à ka tsi mbììtê.

³¹ Ghɨ̌ abua bòt ko wuê ndɨ àa nkɨà nê bɔ̀ ghɨ̌ abua yê la.

³² “Bɨ me kɔ̀ŋkè wuê bòt bu bɔ̀ɔ nkɔ̀ŋkà àwɨ̧ la, ko àbȩ̀ yɨ̧ wu ghà à? Ka wuê bòt kàbɔ̀ŋ aà nkɔ̀ŋkà bòt bɔ̀ɔ nkɔ̀ŋkà àwɔb la.

³³ Bɨ me ghɨa ntsɔ̧̀ wuê ane bòt bu bɔ̀ɔ ngɨ̀à a ntsɔ̧̀ abua yɨ̧ la, ko àbȩ̀ yɨ̧ wu ghà à? Ka wuê bòt kàbɔ̀ŋ aa ngɨ̀à wuê a èlɨ mbɔŋ.

³⁴ À me fu àghɨ wuê abua wòt à ko nê taa li vəèəè la, à ko nê ànəa ntsɔ̧̀ yu à ghɨ̀ la wu ghà à? Ka wuê bòt bu bɔ̀ɔ ngɨ̀à kàbɔ̀ŋ la bɔɔ ngɨ̀à wuê a èlɨ mbɔŋ abua bɔnyɨ bɔb bu bɔ̀ɔ li vəèəè èkab mbɔŋ la.

³⁵ Àghɨa bɨ bɔ ndɨ bɨ̀a me ghɨ̀ la wu nê, bɨ̀ me kɔ̀ŋke bɔmbù̧ bɨ̧ mè ngɨ̀a ntsɔ̧̀ abua yɔb; à fù wòt àghɨ à ka me chɨ̀Ꞌɨ̀ taa vəâ. Bɨ ghɨ̀ ale, ko bɨa li ebɔ taꞋa àbȩ̀, abua Mbɔ̧ɔ̧mà e mě wu ngule bɔ̧ Mbɔ̧ɔ̧mà Àtsèàngɔ̀ŋ. Ngu nê tàà ngɨ̀à a ntsɔ̧̀ abua bòt kàbɔ̀ŋ nè bòt bu bɔ̀ɔ ka ŋa mènkɔ̀ŋke abua tò la.

³⁶ Bɨ̀ me ku tèsȩte bòt mbɨ̀Ꞌɨ̀ Tǎt wɨ̧ Mbɔ̧ɔ̧mà nàa nkùa tèsȩte bòt la.

À ka me zəâ èfaãnəè wòt

³⁷ “À ka me zəâ èfaãnəè bòt mbɨ̀Ꞌɨ̀ Mbɔ̧ɔ̧mà li ndzəèəè è bê mɨ̧̂; à ka nê à ye wòt à bɨ mbɨ̀Ꞌɨ̀ Mbɔ̧ɔ̧mà li nê àyê a bɨ mɨ̧̂; waꞋa kàbɔ̀ŋ bòt mbɨ̀Ꞌɨ̀ Mbɔ̧ɔ̧mà naa li waꞋa è bê mɨ̧̂.

³⁸ Bɨ ŋa èghɨ abua bòt ko, ko Mbɔ̧ɔ̧mà naa li ŋa abua yɨ̧ mɨ̧̂. Taa kwèꞋnè àghɨa bɨ ŋa la aa taꞋa yaãaã te me bəèꞋtè awɨ̧. Àghɨa bɨa nɨa fɨ̀Ꞌà àghɨ ŋa abua bòt la, wu yùà yu tàa nɨ fɨꞋɨ eŋa abua yɨ̧ la.”

³⁹ Yesò mè shu awɔb èngà̧teme nê, “BetsiꞋa wòt àghɨ àleme baãaã abua wekǒ nê ye kɨ enyɨꞋte atò èlu̧? Tà ghɨ̀ ale ko bɔ̀ɔgème è ka chɨ̧ɨ̧ a èbem èbɨ a?”

⁴⁰ Wakatè bakà tsea nyɨꞋtà vi, ka àfɨꞋa tà paa àkatè azi la, tà tsìꞋi mbɨ̀Ꞌɨ̀ nyɨꞋtà vi wu mɨ̧̂.

⁴¹ À ghɨ̀ na ka me ko ndzea wuê alààte kèsaabe àyɨt a èghɨ wanyɨ wè, nè ndɨ à bɔ taꞋà mpɨ̀ŋ èwȩ a lê nè èghɨ la à?

⁴² À ghɨ̀ na me shu abua wanyɨ wè nê tà tsiꞋ yè tsì kèsaabe àyɨt fu a èghɨ tò la, nè ndɨ à bɔ taꞋà mpɨ̀ŋ a lê nè èghɨ la à? Àwɔ̀ wu àa shua nê ye wu àghɨa kà wu yùà la, bɨa ntsì mpɨ̀ŋ yu a èghɨ lê la mbɨ̀Ꞌɨ̀ e ko ye èdziꞋ ntsɔ̧̀ etsì alaate àyɨt yu a èghɨ wanyɨ wè la.

Àyɨt nè tètaãaã ti

⁴³ “Àyɨt a ntsɔ̧̀ aà kà kɔɔle tètaãaãte kàbɔ̀ŋ, àyɨt a kàbɔ̀ŋ à ka mě ngua nkɔ̀ɔ̀la tètaãaãte ntsɔ̧̀.

⁴⁴ Àà nkòa àyɨt ane tètaãaãte tàa nkɔ̀ɔ̀la la. Nkàà nê bɔɔ kà kaabe bèteshɨndɨk a èbem àdzɔ̧, bɔ̀ ka wua nkààba àgu̧u̧me a ègwet àlô̧.

⁴⁵ Wòt ntsɔ̧̀ nàà nyɨ̀Ꞌta ntsɔ̧̀ vi ane èghɨ ntsɔ̧̀ bu a èntɨ̧ɨ̧ tò la, wòt kàbɔ̀ŋ me nyɨꞋta kàbɔ̀ŋ vi ane èghɨ kàbɔ̀ŋ bu a èntɨ̧ɨ̧ tò la. Ètsəê wòt aà ndàꞋà wuê àghɨa àa èbem èntɨ̧ɨ̧ tò la.

Bèmbɔ̧a lob babe

⁴⁶ “Ghǎ ghɨ̂ bɨ me tɔ am nê, ‘Tê, Tê,’ ka bɨ̀ ka wua ngɨ̀à àghɨa màa shuà la à?

⁴⁷ Waa waa tà kɨꞋɨ̀ ndzəè mèngǎ̧ mɔ̧ ndɔ̀Ꞌ ngɨ̀ mbɨ̀Ꞌɨ̀ nàa shua la, maa nyɨꞋte ndɨ tàa la.

⁴⁸ Tà wu mbɨ̀Ꞌɨ̀ wòt tà me kuule lob zi ntu si mbɔ̧̀ àtetsi a ègwet èwu la. Èdzî e tsekè tè ndu̧ nkɔꞋ ndèbè lob yu, ka è kà bentè, nkàà ndɨ tà lè bɔ̧ɔ̧ àtetsi ntsɔ̧̀ la.

⁴⁹ Ka waa waa tà zə mèngǎ̧ mɔ̧ tà kà ghɨ mbɨ̀Ꞌɨ̀ nàa shua la, wu mbɨ̀Ꞌɨ̀ wòt tà lè kuule lob zi kà bê mbɔ̧̀ àtetsi la. Èdzî e tsekè tè ndu̧ nkɔꞋ ndèbè lob mbɔŋ è bê nkwèà nchu a si kà tàktè tè ndàŋkè a si.”