Lûk 3 - Mundani

Jɔ̌n ndzìà èdzî tàŋke èlu̧ abua Yesò

^1-2 È li ngu àfɨꞋa Tìbeliùs Sisà wu empelɔ̀ ane èngùꞋ èghem ntsɔ̀b yetà̧â̧ la, Pontìùs Pȩlèt wu gɔvanɔ̀ bòt Jùdià, Elɔ̀d wu àtsəa bòt Galìlî, Filìb wanyɨ Elɔ̀d wu àtsəa bòt Ituleà bɔ̂ Tìlàkonitìs, Lìsanìà wu àtsəa bòt Àbilenè, mbɔ̂ Anàs bɔ̂ Kefàs è wu ètsə bèntsìà mèpɨ̧̀ a èbem lob nɨ̧ Mbɔ̧ɔ̧mà. AfɨꞋa ngaa yu, Jɔ̌n waã Zàkàleyà zə èngǎ̧ Mbɔ̧ɔ̧mà àbâ àlaꞋ àyuube.

³ Ale, tà bùꞋ me ghȩ̀ȩ̀ne tèpfəte èlaꞋ tu a ngèt èdzî Jodàn la ntsɔ̀tà nê, “Bɨ̀ waꞋa mènəè kàbɔ̀ŋ mɨ̧, nkɨ̀Ꞌɨ̂ bɔ̀ zì àwɨ̧ a èdzî, mbɨ̀Ꞌɨ̀ taa waꞋa mènəè kàbɔ̀ŋ mu bɨ̀à ngɨ̀à la.”

⁴ Mbɨ̀Ꞌɨ̀ bɔ shɨ a èbem àkatè ndàꞋàtɔŋ Mbɔ̧ɔ̧mà, Àsayà la, “Wòt kǒ nàa ŋȩ̀a àbâ àlaꞋ àyuube shua nê, ‘Bɨ̀ nèètè èlu̧ abua Lefɨ̀Ꞌ, ndɔ̀ktè alu̧ tò è tɨ̧ɨ̧ ndɨŋndɨ̀ŋ.’

⁵ Bɔ̀ lu̧u̧ne èfuꞋ ègème, Sàŋkè tèku̧u̧nè bɔ̂ tèbȩtsə tègème a si. Ngɨ̀ èŋɔꞋte balu̧ bè tɨ̧ɨ̧ ndɨŋndɨ̀ŋ, Àtia balu̧ àgème à tsɔꞋte.

⁶ Bɨ̀ ghɨ̀ ale, mbɨ̀Ꞌɨ̀ bòt bàgème aa ye ndɨ Mbɔ̧ɔ̧mà nàa ghɨ̌ bòt bi aa peme la.”

⁷ Banɔ̧̀ e ghɨ ale me kùŋe a Jɔ̌n wu nê, tà zì àwɔb a èdzî. Tà shu abua yɔb nê “KwàꞋ bɨ̀a àndǎ̧ nyaãtekàbɔ̀ŋ, waa kɨɨte awɨ̧ nê bɨ̀ lùùla ntsǒ Mbɔ̧ɔ̧mà yu tàa ngà ètsàà la à?

⁸ Bɨ̀ ghɨ èghɨ bu àa nyɨ̀Ꞌta nê, bɨ waꞋa mènəè kàbɔ̀ŋ mɨ̧ la. Bɨ̀ ka mbùꞋ me ŋeꞋe awɨ̧ a ègwet è shua nê, bɨ̀ ka ghɨ̀à èlɨ waa nkàà ndɨ Abàlàghâm wu tǎt nyaꞋ wɨ̧ la a. TsiꞋ e shua wɨ̧, Mbɔ̧ɔ̧mà è bɔ ètɨ̧̂ egheble àti yàa e ghɨ̌ aa tsiꞋi bòt àndǎ̧ Abàlàghâm.

⁹ Bɨ wu mbɨ̀Ꞌɨ̀ èyɨt bu adzà̧ wu a tèghàŋtsə ekòꞋo dèbe a si la. Àyɨt yu àa ka kɔ̀ɔ̀le tètaãaãte ntsɔ̧̀ la, bɔ̀ɔ kòꞋo ayùà emàꞋa a èbem èwet.”

¹⁰ Tà shu ale, bòt bu e biite atò nê, “Bà ghɨ̀ naà?”

¹¹ Tà bɨ̀ɨ̀lè nê, “Wòt bɔ ndǐtemàꞋa tebe, tà ŋa yemɔ̀Ꞌ abua wòt kà bɔ ka yemɔ̀Ꞌ. Wòt bɔ èghɨjɨ, tà ghàbtè abua bòt ndzìtsə.”

¹² Tà shu ale, bèfetà èkab taksì èko bɔ kɨꞋɨ̀ bɔɔ zì àwɔb a èdzî la, e biite a Jɔ̌n wu nê, “Tê, bàa ghɨ̀ naà?”

¹³ Tà shu abua yɔb nê, “Ko mbɨ̀Ꞌɨ̀ bɨ̀ nɨ èkab e tsè ndɨ bɔ shu awɨ̧ la.”

¹⁴ Bèshujà ko e biite atò nê, “È me wu awa lu̧à? Bàa ghɨ̀ naà?” Tà shu abua yɔb nê, “Ko mbɨ̀Ꞌɨ̀ bɨ̀ ŋwèèlè wòt ndzì mèfà̧ àtsə atò, mbɨ̀Ꞌɨ̀ efàa èkab abua tò. Bɨ̀ yele èkab àfàꞋ yɨ̧.”

¹⁵ Bɔ zə èngǎ̧ Jɔ̌n waa ale mbùꞋ me mɨ̀ɨ̀te nê, kò tà wu Fɔ̧̀ wu Mbɔ̧ɔ̧mà li ndzɔꞋ etsàà la leꞋ, nkàà nê bɔ li ndzaŋe wua nchɨꞋa ŋut.

¹⁶ Jɔ̌n shu abua yɔb bàgème nê, “Maà ndzìà wɨ̧ a èdzî, ka wòt wu nkɨ̀Ꞌa la taꞋa tsě am nyaŋ. E mbakà lem nkùꞋ wòt tàa ŋɔꞋne a si eyààte mèliꞋ gubte tò la. Taa tsiꞋi me zǐ Fo Kèfə ane yɨ̧ nè èwet.

¹⁷ Ankì tò wu abua tò, tàa nɨ foa ntsəè ti la. Taa foa ntsəè tu, efete nɔ̀ŋe a ète li, ka è me wu èfaa, tà maꞋa a èbem èwet kà wu li elema.”

¹⁸ Ale, Jɔ̌n tsɔ̀tè Ntu̧ Ntsɔ̧̀ yu ane tèkɔttsə nyaŋ abua bɔbȩ, ŋwètè àwɔb nê bɔ̀ kubte mènəè kàbɔ̀ŋ mɔb.

¹⁹ Ka Jɔ̌n ŋȩ̀te a Elɔ̀d wu tà wu gɔvanɔ̀ la, nkàà ndɨ tà fǎ Èlɔdìà vi wanyɨ vi, mè ngɨ̀ mènəè kàbɔ̀ŋ kǒ nyaŋ la.

²⁰ Ale, Elɔ̀d paa ngɨ̀ ànəa a bɨɨ te ntsè èbeko la, ndzì a Jɔ̌n a tèfȩ.

Bɔ zì a Yesò a èdzî

²¹ Èli ngu ane àli ako Jɔ̌n me zǐ bòt a èdzî bàgème tè tà paa, Yesò kɨ̀Ꞌɨ̂ taa zǐ atò a èdzî mɨ̧̂. Mbɨ̀Ꞌɨ̀ bɔ zia Yesò a èdzî tà me tsàꞋtà Mbɔ̧ɔ̧mà la, ègwet e ghaꞋà,

²² Fo Kèfə chu a ègwet tò mbɨ̀Ꞌɨ̀ baba. Bɔ zə àtɔŋ Mbɔ̧ɔ̧mà a ègwet a nê, “À wu waã èkɔŋ am; èntɨ̧ɨ̧ e taꞋa wua mbɔ̀ ane yê.”

Bètǎt nyaꞋ Yesò

²³ Yesò lè wu mbɔ̀ŋè èngùꞋ èghem yetat àfɨꞋa tà bùꞋ me nyɨꞋte banɔ̧̀ mènəè Mbɔ̧ɔ̧mà la. Yesò li ngu waã Jòsêb mbɨ̀Ꞌɨ̀ bòt e li nko la. Jòsêb wu li ngu waã Eli.

²⁴ Eli wu waã Matat, Matat wu waã Levì, Levì wu waã Melkì, Melkì wu waã Janȩ, Janȩ wu waã Jòsêb,

²⁵ Jòsêb wu waã Màtatìà, Màtatìà wu waã Amɔ̀s, Amɔ̀s wu waã Nàum, Nàum wu waã Eslì, Eslì wu waã Nagȩ,

²⁶ Nagȩ wu waã Maat, Maat wu waã Màtatìà, Màtatìà wu waã Semèn, Semèn wu waã Josek, Josek wu waã Jodà,

²⁷ Jodà wu waã Joanà, Joanà wu waã Lesà, Lesà wu waã Zèlubàbèl, Zèlubàbèl wu waã Shealtiel, Shealtiel wu waã Nelì,

²⁸ Nelì wu waã Melkì, Melkì wu waã Adì, Adì wu waã Kosam, Kosam wu waã Èlmadàm, Èlmadàm wu waã El,

²⁹ El wu waã Joshùà, Joshùà wu waã Eliezà, Eliezà wu waã Jolìm, Jolìm wu waã Matat, Matat wu waã Levì,

³⁰ Levì wu waã Simiòn, Simiòn wu waã Judà, Judà wu waã Jòsêb, Jòsêb wu waã Jonam, Jonam wu waã Èliakìm,

³¹ Èliakìm wu waã Mèleà, Mèleà wu waã Mèna, Mèna wu waã Màtata, Màtata wu waã Natàn, Natàn wu waã Dàbid,

³² Dàbid wu waã Jesì, Jesì wu waã Obèd, Obèd wu waã Boà, Boà wu waã Sàlemun, Sàlemun wu waã Nashòn,

³³ Nashòn wu waã Àminadàb, Àminadàb wu waã Amìn, Amìn wu waã Ànì, Ànì wu waã Eslɔ̀n, Eselɔ̀n wu waã Pelèz, Pelèz waã Judà,

³⁴ Judà wu waã Jàkɔ̂b, Jàkɔ̂b wu waã Asàk, Asàk wu waã Abàlàghâm, Abàlàghâm wu waã Tela, Tela wu waã Naɔ,

³⁵ Naɔ wu waã SeluꞋ, SeluꞋ wu waã Leo, Leo wu waã PeleꞋ, PeleꞋ wu waã Ebà, Ebà wu waã Shelà,

³⁶ Shelà wu waã Kenàn, Kenàn wu waã Alfazà, Alfazà wu waã Shêm, Shêm wu waã Noà, Noà wu waã Lamèk,

³⁷ Lamèk wu waã Mètuselà, Mètuselà wu waã Enɔ̀k, Enɔ̀k wu waã Jalè, Jalè wu waã Màghalalè, Màghalalè wu waã Kenàn,

³⁸ Kenàn wu waã Enò, Enò wu waã Sêt, Sêt wu waã Adàm, Adàm wu tà lè wu Waã Mbɔ̧ɔ̧mà la.