Lûk 20 - Mundani

Èngà̧ ane àtɔŋ Yesò

¹ È li ngu ane àli ako Yesò wu a èbem lob nɨ̧ Mbɔ̧ɔ̧mà nyɨ̀Ꞌta bòt mè ntsɔ̀tà Ntu̧ Ntsɔ̧̀ Mbɔ̧ɔ̧mà. Bètǎt bèntsìà mèpɨ̧̀ Mbɔ̧ɔ̧mà, nè bènyɨꞋtà mbɨ̧te Musì nè bɔɔjuŋ Bèjuê, e kɨꞋɨ̀

² shu abua tò nê, “Shu awa àdziꞋa à nɨ̀a àtɔŋ yàa àa nɨ̀a ngɨ̀à èghɨ bàa la. Shu awa wòt tà ŋa awê àtɔŋ ngaa la.”

³ Yesò bɨ̀ɨ̀lè nê, “Maa biite awɨ̧ èngà̧ mɨ̧̂. Bɨ̀ tsɔꞋɔ wùà,

⁴ wàa ka tà li ntsàà a Jɔ̌n nê tà me zǐ bòt a èdzî la à? È li ngu Mbɔ̧ɔ̧mà kò wuê bɔbȩ à?”

⁵ Bɔ bùꞋ me kààne a kètsìà wɔb shua nê “Bàa laꞋnê ghà à? Ba wu anè nê ‘Mbɔ̧ɔ̧mà’ ko taa biite awa nê, ‘À wu ale ghǎ a ghɨ̀ ka bà ka bɨ̧ɨ̧ne èngǎ̧ tò à?’

⁶ Ka ba shua nê, abua bɔbȩ, ko ènɔ̧̂ bòt baa aa temte awa, nkàà nê bɔ bɨ̧ɨ̧ne nê Jɔ̌n li ngu ndàꞋàtɔŋ Mbɔ̧ɔ̧mà.”

⁷ Ale, bɔ tsɔꞋɔ èngǎ̧ Yesò nê “Baa bakà ko.”

⁸ Tà shu abua yɔb nê “Ale betsiꞋa è nka shua wɨ̧ àdziꞋa mâ nɨ àtɔŋ ka me ghɨ̌ èghɨ bàa la.”

Èngà̧teme ane bèlentà mbȩ

⁹ Yesò ghɨ̀ ale, shu bòt bu èngà̧teme waa nê, “Wòt ko li ndɔ̀Ꞌ ndìꞋi èyɨt vȩn a mbȩ zi, ŋǎ abua bòt bɔ me faꞋa la, mbɔ̂ ndzəè ngà àvi a lèghȩ̀ȩ̀nè seè.

¹⁰ AfɨꞋa màfuꞋa èghɨ a kuêꞋ, tà tsàà àbùꞋ àzi nê, tà ghǎ abua bòt bu fàꞋa a èbaꞋ li la, nɨ èbi nè èghɨ. Tà ghà bòt ngaa e lene atò mbɔ̂ èfəè atò tà gha èbu fə.

¹¹ Tǎt èbaꞋ lu mè ntsàà àbùꞋ a tsa, bèŋût e mè ndene atò mbɔ̂ ngɨ̧̀ɨ̧̀nè atò, èfəè atò tà gha èbu fə.

¹² Tǎt èbaꞋ lu mè ntsà àbùꞋ akwèn, bɔ zì tèfɨŋtsə ane tò mɨ̧̂, mbɔ̂ màꞋà atò àbȩ.

¹³ “Tǎt èbaꞋ lu me ye tê nê, ‘Maa ghɨ̌ na à? Maa tsàa kwàꞋ waã èkɔŋ am, ateko bɔɔ kà̧aã me bɔa tò.’

¹⁴ “Mbɨ̀Ꞌɨ̀ bɔfàꞋ bu e ye waã ngaa la, bɔ me làꞋ a kètsìà wɔb nê, ‘Eyaa wu waã tǎt èbàꞋ lu. Bɨ̀ kɨꞋɨ bà bùŋe atò mbɨ̀Ꞌɨ̀ jɨ èbàꞋ mbɔŋ!’

¹⁵ Ale, bɔ bê màꞋà atò àbȩ akwèn mbȩ yu, mbùŋè atò.” Yesò bɔ̂ mbììte bòt bu nê, “Bɨ mɨɨtè nê, wòt wu tà bɔ èbaꞋ laa la nàa ghɨ̌ èghà ane bɔfàꞋ bu à?”

¹⁶ “Ŋut naa kɨꞋɨ ebùŋe bɔfàꞋ bu, èbɔ ŋa èbaꞋ lu abua bɔfàꞋ tsa.” Bòt bu è zə ale nê, “Mbɔ̧ɔ̧mà ka mbɨ̧̀ɨ̧̀ne a wu ale.”

¹⁷ Yesò me lɨ̀ŋke àwɔb tè nê, “Èngǎ̧ Mbɔ̧ɔ̧mà è shua nê ghàà? ‘Èti lu bèmbɔ̧ɔ̧ lob e li ngwaꞋ nê wu èti kàbɔ̀ŋ la, wu lùà ka e tsiꞋi ngule èti tɔ̀Ꞌɔ̀ lob la.’

¹⁸ Wòt tà kwene a ègwet èti làa la, tàa bəꞋte atem atem, ka èti ngaa è kwene a ègwet wòt ko aa ŋèꞋne atò.”

Ànəa èkab taksì

¹⁹ BènyɨꞋtà mbɨ̧te Musì nè bètǎt bèntsìà mèpɨ̧̀ Mbɔ̧ɔ̧mà è lɔ̀Ꞌɔ àfɨꞋa mbɔŋ me kɨ ebaãaã a Yesò, nkàà nê tà làꞋa èngà̧teme wu ŋa abua yɔb. Ka mbɔ̂ ngɨ̀ ale me bɔa bòt bu.

²⁰ Ale, bɔ me chɨ̀Ꞌɨ̀ ngule àfɨꞋa bɔ̀ɔ baãaã atò e ŋa abua gɔvanɔ̀ la. Bɔ ŋa àbu akwèn abua bòt ko nê bɔ gha ngɨ̀ mbɨ̀Ꞌɨ̀ bɔ̂ Yesò ba e bakà bɔ ànəê, mbɨ̀Ꞌɨ̀ Yesò me làꞋa, bɔ ye ànəa bɔ̀ɔ zǐ àtsə atò enɨ ghɨ̌ bɔ̀ɔ mbà̧aã atò adù̧ la.

²¹ Bòt bu e biite a Yesò nê, “NyɨꞋtà, ba ko nê èghɨ àa shua mè nyɨ̀Ꞌta la wu nkûŋ. À kà wua njùta ànəa bòt àa ndàꞋà la, ka mbɔ̂ me nyɨꞋte bòt nkûŋ ndɨ Mbɔ̧ɔ̧mà nàa nkɨà nê bòt è wu la.

²² Shu awa, tè mbɨ̧ ta tê bɨ̧ɨ̧nè nê bà me ŋa èkab taksì abua Sisà kò wu nê bà ka ŋa à?”

²³ Ka Yesò tuꞋa yuŋ wɔb ntsɔ̀Ꞌɔ èngà̧ wu nê,

²⁴ “Bɨ̀ nyɨꞋte am àkwȩkab.” Tà biite awɔb nê “Àtsə yàa nè èlen làa adù̧ la wu ayea wàà?” Bɔ bɨ̀ɨ̀lè nê “Àtsəa Sisà.”

²⁵ Ale, Yesò shu abua yɔb nê “Bɨ̀ ŋa àghɨa è wu àyea Sisà la abua tò, ŋà àghɨa è wù àyea Mbɔ̧ɔ̧mà la abua Mbɔ̧ɔ̧mà.”

²⁶ Bòt ngaa e ghɨ̀ ale, bɔ ka ye àghɨa Yesò fà̧aã a mbì bòt bu abot betsiꞋa bɔ nɨŋ mbà̧aã atò la. Ale, a taꞋa tsè àwɔb, bɔ̀ ka tsi mbɔ̌ ànəa bɔ̀ɔ shu ane àbɨ̀t yu Yesò ŋa la.

Èngà̧ ane ànəa mànju̧u̧ma

²⁷ Bèsadùsiì ko, bòt bu bɔ̀ɔ shua nê betsiꞋa wòt kà pfə mè njù̧ù̧me la, e kɨ̀Ꞌɨ̂ ndze a Yesò mbììte atò nê,

²⁸ “NyɨꞋtà, Musì li shu nê, Wòt pfəa kà bi bɔ̧, wanyɨ tò bɔ ndɨ tàa nɨ nempfə wu mbɨ̀Ꞌɨ̀ ebi bɔ̧ abua wanyɨ vi wu tà pfə la.

²⁹ Bòt ko basà̧à̧mbe e li ngu bɔ̧ wòt wemɔ̀Ꞌ. We mbì yɔ̀Ꞌɔ̀ vi vi mpfəè ka bɔ bɔ̧.

³⁰ Wòt kwèn tò nɨ a nempfə wu,

³¹ wòt kwen we mbɔŋ mè nɨŋ àvi wu, a mè ntsè wu a èlɨ̀. Ànəê yaa a li ndzè àwɔb bɔ̀ɔsà̧à̧mbe bàgème, bɔ pfəꞋte kà ye wòt tà bi waã bɔ̂ àvi wu la.

³² A li ngà me lìa, àvi wu pfə azi mɨ̧̂.

³³ Naa li ngu ane àlia bèmpfəà be yu̧u̧me la, àvi mbɔŋ wu vi wà ane yɔb wu basà̧à̧mbe la à? Bɔ̀ɔgème e li ndzɔ̀Ꞌɔ atò.”

³⁴ Yesò bɨ̀ɨ̀lè èngǎ̧ wɔb nê, “Bòt ngɔ̀ŋ yaa àfɨ̀Ꞌ yaa la, aà ndzɔ̀Ꞌa,

³⁵ Ka mbâ̧ tu nè bèzi bu bɔ kùꞋu be bɔ̀ɔ li lɔ̀Ꞌɔ eyu̧u̧me e tseke àfɨ̀Ꞌ yu nga ekɨꞋɨ la, è ka li lɔ̀Ꞌɔ tsi yɔꞋɔ a.

³⁶ Bɔɔ li tsiꞋi mbɨ̀Ꞌɨ̀ bɔntu̧ Mbɔ̧ɔ̧mà kà wu li pfə. Bɔ wu bɔ̧ Mbɔ̧ɔ̧mà nkàà nê bɔ yu̧u̧me ayɔɔ bèmpfəà.

³⁷ Musì li nyɨ̀Ꞌte nê, bèmpfəà beà njù̧ù̧mâ mbɔ mèmpème. A èbem adzìꞋ yu tà làꞋa ànəa èwet wu è li ngua nkòòlâ ane abàꞋ wu la tà shu nê, Mbɔ̧ɔ̧mà wu ‘Mbɔ̧ɔ̧mà Abàlàghâm, Mbɔ̧ɔ̧mà Asàk nè Mbɔ̧ɔ̧mà Jàkɔ̂b.’

³⁸ Tà wu Mbɔ̧ɔ̧mà bòt yu̧, tà ntsě Mbɔ̧ɔ̧mà bèmpfəà. Nkàà nê, aa abua tò, bòt bàgème bɔ zi mèntɨ̧ɨ̧ mɔb ane tò la e wu bòt yu̧.”

³⁹ BènyɨꞋtà mbɨ̧te Musì ko bɔ wu abot la e nê, “NyɨꞋtà, à bɨ̀ɨ̀le ntsɔ̧̀.”

⁴⁰ Ale, wòt kà tsi mè nyɔꞋte a màmbiite atò èngà̧ ko tsa.

Ànəa Fɔ̧̀ wu Mbɔ̧ɔ̧mà li ndzɔꞋ ntsà la

⁴¹ Yesò bììte awɔb nê “Bɔ ghɨ̀ na ka me shu nê Fɔ̧̀ wu Mbɔ̧ɔ̧mà li ndzɔꞋ etsàà la naa li wu wòt àndǎ̧ fɔ̧̀ Dàbid à?

⁴² Dàbid zìambɔŋ è shu a èbem Àkata Mèkù̧ nê, ‘Mbɔ̧ɔ̧mà Lefɨ̀Ꞌ li shu abua Lefɨ̀Ꞌ am nê, Tseke àbâ àbualu̧ am

⁴³ tè e ŋà èlu̧ à tsite èka bê a ègwet bɔmbù̧ bê.’

⁴⁴ Fɔ̧̀ Dàbid wu tɔ atò ane tǎt vi, tà ghɨ̀ na ka ntsiꞋi wòt àndǎ̧ Dàbid à?”

Yesò làꞋ ànəa bènyɨꞋtà mbɨ̧te Musì

⁴⁵ Mbɨ̀Ꞌɨ̀ bòt bu bàgème è wua njùta mènəè Yesò shua la, tà ghèble avi shu abua bɔkatè bi nê,

⁴⁶ “Bɨ̀ me ko awɨ̧ ane bènyɨꞋtà mbɨ̧te Musì. Bɔ taꞋa wua nkɔ̀ŋkà me kwaãaã mèmǎ̧ mɔb ngȩ̀ȩ̀nà, mè ntàꞋa wua nkɔ̀ŋkà bòt aa me tsàꞋtè àwɔb mè nkùkte awɔb àsà̧aã tèwentsə. Bɔ̀ɔ ngɨ̀ bɔ gha èdziꞋi mèpà̧, bɔ̂ lobte Mbɔ̧ɔ̧mà bɔ me kɨ wu ètɨ̧ ntsɔ̧̀ ka tseke a ègwet.

⁴⁷ Mbɔ̂ ngu bɔ̀ɔ̀ba bɔ̀ɔ ngɨ̀ɨ̀la bènempfə fàà èghɨ bɔb, mbɔ̂ ndɔ̀Ꞌ me tsàꞋta Mbɔ̧ɔ̧mà ndà̧à̧nà mbɨ̀Ꞌɨ̀ enɨ èvəèəèlè àghɨ a bòt la. Bɨ̀a li bɔ ngoꞋ è tsě ye bòt bàgème la.”