Lûk 10 - Mundani

Yesò tsàà bɔkatè bi èghem yesà̧à̧mbe ntsɔ̀b babe àbȩ

¹ Yesò Lefɨ̀Ꞌ li ntsèke tè ndàà bɔkatè ko èghem yesà̧à̧mbe ntsɔ̀b babe nɨŋ nkwèꞋnè ane bɔkatè bi bu èghem ntsɔ̀b babe la. Tà ghɨ̀ ale, ntsàà àwɔb babe babe a mbì, a èpfəè nɨ̧ ègème nè èdziꞋ ègème tà bɔ̂ ndɨ yèa ghǎ la,

² mbɔ̂ shu abua yɔb nê, “Èghɨjɨ e lu̧ a èbem mbȩ ka bòt bɔ̀ɔ fùꞋù la e me koo. È wu ale, bɨ shu̧u̧te a Tǎt mbȩ nê tà tsàa bòt bɔ̀ɔ fùꞋù la a èbem mbȩ zi.

³ Bɨ̀ ghǎ, e ngua ntsàà àwɨ̧ mbɨ̀Ꞌɨ̀ bɔɔnjɨ̀ a kètsìà ngwitenyà̧.

⁴ Mbɨ̀Ꞌɨ̀ bɨa ngà la, wòt ka mbèà ka wuê ntaꞋ, ka wuê ambè, eghǎ dzəâ ane gùbtsə. Bɨ̀ ka ntsòkè àfɨ̀Ꞌ nyaŋ a màntsaꞋta wòt alu̧.

⁵ “Bɨ nyi a lob wòt, ànəa mbì bɨ bɔ̂ ndɨ bɨ̀a shu la wu nê, ‘Àlàŋkè à wu a lob ŋàa.’

⁶ Wòt àlàŋkè wu a lob və, ko mèntsàꞋte àlàŋkè mɨ̧ naa tèꞋa nè tò. Mbə wòt àlàŋkè bakà wuê, ko mèntsàꞋte àlàŋkè mɨ̧ naa kua akwèn ekɨꞋɨ abua yɨ̧.

⁷ Bɨ bɔ̂ ndɨ bɨ̀a tseke a lob ngaa e me jɨa mè nua àghɨ àgème bɔ ŋa abua yɨ̧ la, nkaa nê wɔ̀fàꞋ ègème è bɔ̂ ndɨ tàa bɔ àbȩ̀ ane àfàꞋ àzi la. Bɨ̀ ka me ghȩ̀ȩ̀ne nembuꞋ, nyia a lob yaa ndzəèà nyia àzia.

⁸ “Àpfəèa nɨ̧ àgème bɨ gha bòt àpfəè və e tsɔꞋɔ mètsələèꞋ mɔb abua yɨ̧ la, bɨ jɨ àghɨa àgème bɔ ŋa abua yɨ̧ la,

⁹ mbəâ bòt àghɔ̧ àpfəè və, è shu abua bòt nê, ‘Kèfɔ̧̀ Mbɔ̧ɔ̧mà kɨꞋɨ̀ tê ntsìꞋi a ngèt yɨ̧’.

¹⁰ Ka bɨ̀ me ghɨ̌ tê nga àpfəèà nɨ̧ ako, bòt àpfəè və e tu̧ etsɔꞋɔ mètsələèꞋ mɔb abua yɨ̧, bɨ ghǎ a kètsìà àpfəè mbɔŋ kwàꞋ èbùꞋ alu̧, shu abua yɔb nê,

¹¹ ‘Ba yò ka wuê àbeb àpfəè àyɨ̧ a nyî ane èka ba la, dèbe kwèn ta ŋa abua yɨ̧. Ka bɨ̀ ko nê kèfɔ̧̀ Mbɔ̧ɔ̧mà ekɨꞋɨ̀ tê ntsìꞋi a ngèt yɨ̧.’

¹² TsiꞋ è shu awɨ̧ nê, Mbɔ̧ɔ̧mà nàa li kù tèsȩte bòt Sodòm nè Gòmolà tè ntsè ndɨ tàa ku e te bòt èpfəè mbɔŋ la.

Èpfəâ kà bɨ̧ɨ̧ne a Yesò

¹³ “Aa li bɨa wɨ̧ bɨ̀a bòt Kolazìn, aa li bɨa wɨ̧ bɨ̀a bòt Bèsedà! Bɔ li ngɨ̀ ale ngɨ̀ tèwuute ènəê taà bɔ ghɨ a kètsìà wɨ̧ la àlaꞋ a bòt Tȩê nè Sidɔ̀n ko bɔ li dzaŋe kwaã epfəə, mè fəèꞋəè muttsə ane yɔb, enɨ nyɨꞋte nê bɔ waꞋa mènəè kàbɔ̀ŋ mɔb.

¹⁴ Ka Mbɔ̧ɔ̧mà naa li ku tèsȩte bòt Tȩê nè Sidɔ̀n àlia taa li saꞋa ngɔ̀ŋ la, te tsě ndɨ tàa ku tɨ̧ la.

¹⁵ È me ewu awɨ̧ bɨa bòt Kàpenàwuêm! Bɨ li mbàte ngua nkɨ ŋeꞋe awɨ̧ bɨ̀ambɔŋ etsàà a ègwet, ka tsiꞋ è shu awɨ̧ nê bɔɔ li shuke awɨ̧ a si etsǎ àlaꞋ a bèmpfəà.”

¹⁶ Yesò shu abua bɔkatè bi nê, “Wòt me zə awɨ̧, tà wua ndzəa am, we tà teme kwèn zi ŋǎ abua yɨ̧ la, wua ntèma kwèn zi ŋǎ abua am, wòt tà teme kwèn zi ŋǎ abua am la, wua ntèma kwèn zi ŋǎ abua wòt wu tà tsàà am la.”

Bòt bu èghem yesà̧à̧mbe ntsɔ̀b babe la e kua

¹⁷ Mbɨ̀Ꞌɨ̀ bòt bu èghem yesà̧à̧mbe ntsɔ̀b babe e ghà te nkùà la, bɔ wùꞋtè àwɔb, è shu abua Yesò nê, “Tê, ka wuê fote kàbɔ̀ŋ te wua ŋǎ bòt ngoꞋ la, te zə awa ndzəè ane bòt mbɨ̀Ꞌɨ̀ ba ŋwète a mbɨ̧̀ tɔb shu abua yɔb nê, tè dzəa ane bèŋût ane èlen lê la.”

¹⁸ Yesò bɨ̀ɨ̀lè nê, “E ndɨ ndzě ndɨ Satàn lɔ̀Ꞌɔ a ègwet mbɨ̀ŋkê nkwen mbɨꞋɨ̀ èfâŋ la.

¹⁹ Bɨ̀ zə. Mâ ŋa awɨ̧ mètàŋ bɨ̀a nɨ eghȩ̀ȩ̀ne a ègwet nyaãtekàbɔ̀ŋ bɔ̂ ènkàfuŋ, nè èghɨ kekweelè wɔ̀mbù̧ Mbɔ̧ɔ̧mà enɔ̀ŋè ntà̧ àwɨ̧ la, mbɔ̂ betsiꞋa àghɨ ane èghɨ bàa à ka zi àlɔꞋ ane yɨ̧.

²⁰ Ka, bɨ̀ ka ngùꞋtè àwɨ̧ ndɨ fote kàbɔ̀ŋ tèa ndzəèà awɨ̧ la, bɨ̀ wùꞋte àwɨ̧ wuê ndɨ Mbɔ̧ɔ̧mà shɨ tèlen tɨ̧ a èbem àkatè àzi a ègwet la.”

Yesò wùꞋtè àvi

²¹ AfɨꞋa mbɔŋ Fo Kèfə ghɨ̀ èntɨ̧ɨ̧ Yesò e lu̧u̧ nê mèngùꞋte, Tà nê, “Tê, Fɔ̧̀ ègwet nè sitsǎꞋ leꞋ, mâ kɔ̀ŋke àwê na à lô̧ èghɨ bàa abua bòt èyì nè bòt àkatè, mbɔ̂ nyɨ̀Ꞌte abua bòt kà ko èdziꞋ la. Oò Tê, à li ngɨ̀ àyaa ane mènkɔ̀ŋke mê, mè nè ndɨ àa bɔ̀ àwê la.

²² “Tǎt am è ŋa èghɨ ègème abua am. Wòt kǒ tà lâ ko àghɨa waã wu yùà kà wu tǎt tò la è ntsě; wòt kǒ tà meè ndâ ko a tǎt waã kà wuê waã mbɔŋ la ka wuê, nè bòt waã wu è kɔ̀ŋkè nê bɔ̀ ko atò la.”

²³ Yesò ghɨ̀ ale, ngèble avi ntsèmtè abua bɔkatè bi nê, “Bɨ wu bòt èsi ntsɔ̧̀, ndɨ̀ wu bɨ ye àghɨa bɨ ye la.

²⁴ Ane nkûŋ, tsiꞋ è shu awɨ̧ nê, bèndàꞋàtɔŋ Mbɔ̧ɔ̧mà nyaŋ, nè bèfɔ̧̀ e li ngua ntsènà è nkɨ eye àghɨa bɨ̀a ndzèa la ka bɔ̀ ka ye, mè nkɨ ezə àghɨa bɨ̀a ndzəèa la, ka bɔ̀ ka zə.”

Èngà̧teme adù̧ wòt ntsɔ̧̀ Sàmalìà

²⁵ NyɨꞋtà mbɨ̧te Musì ko li nkɨ̀Ꞌɨ̂ me kɨ etaãaãte a Yesò, mbììte atò nê, “NyɨꞋtà, betsiꞋa e ngɨ̀ nà ka mbɔ̀ mèmpème kàlìà à?”

²⁶ Yesò mè mbììte atò nê, “Àkata mbɨ̧te Musì a nyɨꞋte nê ghà à? Àa ngɨ̀ à tɔ ale à shu nê ghà à?”

²⁷ NyɨꞋtà wu bɨ̀ɨ̀lè nê, “Me kɔ̀ŋke a tǎt wè Mbɔ̧ɔ̧mà nè èntɨ̧ɨ̧ wê ègème, ŋǎ wê nènkèm abua tò, nè mètàŋ mê ègème, mè me mɨ̀ɨ̀tè wuê atò, mbɔ̂ me kɔ̀ŋkè wanyɨ wè mbɨ̀Ꞌɨ̀ àwɔ̀ mbɔŋ.”

²⁸ Yesò shu abua tò nê, “À làꞋa nkûŋ yê.” Mbɔ̂ mè shu abua tò nê, “Ghǎ ngɨ̀ mbɨ̀Ꞌɨ̀ à shu la, ko aa bɔ mèmpème kàlìà.”

²⁹ Tà shu ale, nyɨꞋtà mbɨ̧te Musì wu me kɨ enyɨꞋte nê èngǎ̧ vi e lâ mbɔ̀ lə, ale tà mè mbììta Yesò nê, “Wanɔ̧ wu wà à?”

³⁰ Enɨ bɨ̀ɨ̀le èngǎ̧ tò, Yesò nê, “Wòt ko le lɔ̂Ꞌ ndzəè àpfəèà nɨ̧ a Jèlusalèm me chua nga a Jèlikò. Nchu alu̧, bètsɔŋ e baãaã atò, ntsì ndìte tò shù̧u̧ atò tè tà tsìꞋi we pfəâ, mbɔ̂ sa atò ngà àwɔb.

³¹ Àfɨ̀Ꞌ a me wu, ntsìà mèpɨ̧̀ Mbɔ̧ɔ̧mà kǒ me chua ntsèà alu̧ ngaa, ndzě wòt ngaa, ntù̧ èlu̧ ntsiꞋi chu ntsè nè àbà zia.

³² Wòt àndǎ̧ Levì ko chu wuê a èlɨ mbɔŋ ndzə a mbɨ̧̀ ŋut, ntɨ̧ɨ̧ ndzě atò, mbɔ̂ mè ntù̧ alu̧ ntsè me chua nga aba tsa.

³³ Ka wòt Sàmalìà kǒ, tàa ngȩȩna alu̧ ngaa la, kɨꞋɨ̀ nkwene ane ŋut. Mbɨ̀Ꞌɨ̀ tà ye atò la, tèsȩte ŋut te taꞋa ku atò,

³⁴ tà gha adzìꞋa ŋut nɔ̀ŋkè la, ntsəètè mèlùꞋ kèkweelè ane tèfɨŋke tò, mbɔ̂ mè ndzì mèwet adù̧. Mbɨ̀Ꞌɨ̀ tà zì la, tà kùùlè tèfɨŋ tu mbɔ̂ ŋèꞋe atò ntsia a ègwet loà vi, nɨ atò ngà nɔŋe a lob bòt lèghȩ̀ȩ̀nè aa ndzèta a èbèm la, me lɨ̀ŋke atò.

³⁵ ÈtsəꞋ e tsi, tà ghaꞋa ambè vi ntsì èkwȩkab bebe ŋǎ abua mbaabà lob bòt lèghȩ̀ȩ̀nè yu mbɔ̂ shu abua tò nê, ‘Me lȩ̂ atò tè e nga nkua. Èkab wu e tsiꞋa nkòa, ko àfɨꞋa màa kua la, maa vəèəè àghɨa à nkweꞋnè ntsòke ane tò la abua yê.’ ”

³⁶ Yesò me paate èngǎ̧ vi mbììte atò nê, “Ane mèmɨ̀ɨ̀te mê, wàa ane bòt baa batat la le ghɨ̂ mbɨ̀Ꞌɨ̀ ngule wanyɨ wòt wu bètsɔŋ è le baãaã atò la à?”

³⁷ NyɨꞋtà mbɨ̧te Musì wu bɨ̀ɨ̀lè èngǎ̧ Yesò nê, “Wu wòt wu tà lè nyɨꞋte a ntsɔ̧̀ abua ŋut la.” Yesò bɔ̂ mè shu abua tò nê, “E bùꞋ àfɨ̀Ꞌ yaa ghǎ me ghɨ̌ a èlɨ̀ ngaa.”

Yesò ghà e mùa Màta bɔ̂ Màlià

³⁸ Mbɨ̀Ꞌɨ̀ Yesò bɔ̂ bɔkatè bi è bela ngȩ̀ȩ̀nà la, Yesò kɨꞋɨ̀ ndzəè àpfəè ako, àvi ko bɔ̀ɔ ntɔ atò nê Màta la tsɔꞋɔ lob zi abua tò.

³⁹ Màta ko nê ye bɔ wanyɨ vi kǒ èlen tò wu Màlià la. Màlià mbɔŋ kɨꞋɨ̀ ntsèke a ngèt èka Yesò me yute mènəè tàa nyɨ̀Ꞌta la.

⁴⁰ Èntɨ̧ɨ̧ Màta e bùꞋ me bɨɨ ngu ndɨ àfàꞋ a yaãaã abua tò zìa zìa la. Ale, tà kɨꞋɨ̀ shu abua Yesò nê, “Tê Yesò, à mɨɨtè nê wu ntsɔ̧̀ nê wanɔ̧ sà am nê, è me fàꞋa mmɔ̌ ndziꞋne? Shu abua tò nê tà kɨꞋɨ ntɨ̀ŋe am.”

⁴¹ Yesò tɔ atò nê, “Màta, Màta leꞋ, aà ŋǎ awê ngoꞋ ane èghɨ nyaŋ.

⁴² Ka ndàꞋ àghɨ yeamɔꞋ aa və à bɔ ndɨ à ghɨ̂ ngu me ŋa awê ngoꞋ adù̧ la. Màlià lȩ̀ àghɨa ntsɔ̧̀ mbɔŋ. BetsiꞋa bɔ̀ ka lɔꞋ àlia nɨ àyùà abua tò.”