Jimsì 5 - Mundani

Nkɨ̀a abua bòt èkab

¹ Bɨ̀a bòt èkab bɨ̀ zə, bɨ̀ me shùù mèsi mè ndɨ̀à nkàà nê bɨa li ye taꞋa ngoꞋ.

² Èghɨ èkab bɨ̧ e bɨ, èsoꞋo e mè nkwèle ndǐ tɨ̧.

³ Àwèlàka a baãaã èkab wɨ̧. Àwèlàka mbɔŋ a nyɨꞋtè àlȩê ndɨ àa tô̧ nyaãte ènyit tɨ̧ wuê mbɨ̀Ꞌɨ̀ èwet àa ntò̧à àghɨ la. Bɨ fete èkab nɔŋe àfɨ̀Ꞌ yaa ngɔ̀ŋ tsìꞋa nkɨ elìà la.

⁴ Bɨ̀ ye na bòt bu bɔ li faꞋa a mbȩ tɨ̧, bɨ fɨte awɔb ntu̧ eŋa èkab wɔb la àa ŋȩ̀a ndɨ̀à ane àghɨa bɨ ghɨ̀ la. Bòt mbɔŋ e dɨ̀ tê Mbɔ̧ɔ̧mà Àtsèàngɔ̀ŋ zəè àtɔŋ yɔb.

⁵ Bɨ tseke a sitsǎꞋ ntsɔ̧̀, mè me ghɨ̀ mbɨ̀Ꞌɨ̀ èntɨ̧ɨ̧ wɨ̧ e kɔ̀ŋkè la. Bɨ jɨ te fàŋkê ntsìꞋi mbɨ̀Ꞌɨ̀ mpɔ̀ŋtsə nchɨ̀Ꞌà àlia bɔ̀ɔ wààlè àwɔb la.

⁶ Bɨ saꞋa wòt kà fâ̧ ànəê nê tà kwen, mbuŋe atò, tà kà lem mbɔ̀ èlu̧ tàa ŋwèèle etu̧u̧ la.

Mànkuula èntɨ̧ɨ̧ nè màntsaꞋta Mbɔ̧ɔ̧mà

⁷ Bɔnyɨ bɔ̧, bɨ̀ kuule mèntɨ̧ɨ̧ mɨ̧ tè Yesò li nkɨ̀Ꞌɨ̂. Bɨ̀ ye ndɨ wòt tàa faꞋa a mbȩ la nàa ngɨ̀ tà kùùle èntɨ̧ɨ̧ vi nchɨ̀Ꞌ tè èghɨjɨ tò e ghɨ̀ nkwèèlê nkùꞋ a màfuꞋa la. Tàa ngɨ̀ tà chɨ̀Ꞌ tè mbɨ̀ŋ mbì lu, èye kwèn mè ndi ndu.

⁸ Bɨ̀a mbɔŋ è kuule mèntɨ̧ɨ̧ mɨ̧ mɨ̧̂. Bɨ̀ taŋke mèntɨ̧ɨ̧ mɨ̧ nkàà nê, àfɨꞋa Yesò nàa kɨꞋɨ la aà nkùꞋà.

⁹ Bɔnyɨ bɔ̧, bɨ̀ ka me lèmtè bɔnyɨ bɨ̧ mbɨ̀Ꞌɨ̀ ka Mbɔ̧ɔ̧mà sàꞋà wɨ̧ nê bɨ kwen. Tòà wu tàa sàꞋa la, è kɨꞋɨ tê ntsìꞋi a ètsələèꞋ.

¹⁰ Bɔnyɨ bɔ̧, bɨ̀ ku̧u̧te bèndàꞋàtɔŋ Mbɔ̧ɔ̧mà bu bɔ li ngua ndaꞋa ane èlen tò la, nɨ̀a wɔb mbɨ̀Ꞌɨ̀ àlȩê bòt bu bɔ li nkùùle mèntɨ̧ɨ̧ mɔb, ndzě ngoꞋ la.

¹¹ Baa nɨa wɔb nê bɔ wu bòt mèngùꞋte, nkàà nê bɔ li nkùùle mèntɨ̧ɨ̧ mɔb tè ngà ndìà. Bɨ zə ndɨ Job li nkùùle èntɨ̧ɨ̧ vi la, mè nko ndɨ a li ngà me lìà Mbɔ̧ɔ̧mà lɔɔle atò la, nkàà nê Mbɔ̧ɔ̧mà taꞋa wua nkua tèsȩ, tà kà meè ngua nkɔ̀ŋkà nê wòt ye ngoꞋ.

¹² Bɔnyɨ bɔ̧, ànəa ko a tɨ̧ɨ̧ a mbì la wu nê, wòt me kàꞋà wòt ànəê, tà ka ndzì nkà̧ ka wuê ane ègwet, kò ane sitsǎꞋ leꞋ, tà ka ndzì nkà̧ ka wu ane àghɨa ko tsa. Wòt bɨ̧̀ɨ̧̀ne ànəê, tà ko yê bɨ̧ɨ̧nè, wòt tu̧ ànəê, tà ko nê ye tu̧, mbɨ̀Ꞌɨ̀ ka Mbɔ̧ɔ̧mà sàꞋà wɨ̧ nê bɨ fâ̧.

¹³ Wòt wu ane yɨ̧ tàa ndzèa ngoꞋ la, tà tsaꞋte a Mbɔ̧ɔ̧mà, èwe èntɨ̧ɨ̧ to aa mbɔ̀ la, ta kɔ̧ mètsəkù̧ nɨŋ ngùꞋtà Mbɔ̧ɔ̧mà.

¹⁴ Wòt wu ane yɨ̧ tàa ngò̧ò̧nà la, tà tɔ bɔɔjuŋ a chɔsì bɔ kɨꞋɨ̀ ntsàꞋta Mbɔ̧ɔ̧mà àtsəa tò, bɔ̀ me tsàꞋtè ale, bɔ me zì mèwet ane tò ane èlen Yesò Klistò.

¹⁵ Bɔ me tsàꞋte ale, ndzì èntɨ̧ɨ̧ wɔb ane Mbɔ̧ɔ̧mà ko aa ghɨ̌ ngò̧ò̧nà wu naa kweele. Bɔ ghɨ ale ko Mbɔ̧ɔ̧mà naa lɔ̀ke atò, e mèe waꞋa a kàbɔ̀ŋ tò, na è wu nê tà ghɨ̀à kàbɔ̀ŋ la.

¹⁶ È wu ale, bɨ̀ me shu mènəè kàbɔ̀ŋ mɨ̧ abua bɔnyɨ bɨ̧, mè ntsàꞋta Mbɔ̧ɔ̧mà àtsəa waa waa mbɨ̀Ꞌɨ̀ ekweele. Wòt wu tà tɨ̧ɨ̧ ndɨŋndɨ̀ŋ e mbì Mbɔ̧ɔ̧mà la nàa ngɨ̀ tà tsàꞋte atò, mèntsàꞋte mu bɔ mètàŋ, ànəa tà kɨa la a bê mè ngu wuê yùà.

¹⁷ Èlȩjà li ngu wɔ̀bȩ̂ wuê mbɨ̀Ꞌɨ̀ bàa. Tà li ndâ ntsàꞋta Mbɔ̧ɔ̧mà nè èntɨ̧ɨ̧ vi wemɔꞋ nê mbɨ̀ŋ ka ndu, èngùꞋebȩ yetat nè àbà e me tsě, kètabe mbɨ̀ŋ kè ka chɨ̧ a si.

¹⁸ Tà mè ntsàꞋta Mbɔ̧ɔ̧mà, ègwelebuule e ghaꞋà, mbɨ̀ŋ chu èghɨ ekɔɔlè a sitsǎꞋ.

¹⁹ Bɔnyɨ bɔ̧, wòt ane yɨ̧ sà alu̧ nkûŋ è nyɔ̂, wòt kǒ tsa mèè tɨ̀ŋe atò nɨ̀a tò nɨŋ nkɨ̀Ꞌɨ̀ adù̧,

²⁰ bɨ ko nê, wòt tɨŋe wòt ntsia tò a èbem mènəè kàbɔ̀ŋ, tà ko nê ye ghɨ̂ ŋut peme èvə. Àyea mbɔŋ a mè ngɨ̀ Mbɔ̧ɔ̧mà waꞋa mènəè kàbɔ̀ŋ wòt nyaŋ.

« Roimhe

Air adhart »

Lean sinn:

Ceanglaichean taic

Sanasan