Jimsì 4 - Mundani

Èkɔŋ nè sitsǎꞋ

¹ Àghɨ yu àa ngɨ̀à bɨ nùà mèbet mè ndzɔ̀à a kètsìà wɨ̧ la wu ghà à? Ka wu mèmɨ̀ɨ̀te kàbɔ̀ŋ mu nàa ŋǎ wɨ̧ ngoꞋ a èbem mèntɨ̧ɨ̧ mɨ̧ la à?

² Bɨ̀a ngɨ̀ bɨ̀ kɨ àghɨ bɨ̀ baka bɔŋ, bɨ bùŋè wòt. Bɨ̀ mee bɨ̀ ghòꞋne àghɨ bɨ̀ baka bɔŋ, bɨ me yɔ̌ mè nùà mèbet. Bɨ̀a ngɨ̀ bɨ̀ me baka bɔ àghɨ ale, è wu ndɨ bɨ̀ baka lo̧ abua Mbɔ̧ɔ̧mà la.

³ Bɨ̀a ngɨ̀ bɨ̀ lo̧ àghɨ bɨ̀ ka bɔŋ ngu nê, mènkwàꞋte mɨ̧ bakà bɔ̀ŋ, bɨ̀a ngɨ̀ bɨ wua nkɨ nɨ e ghɨ̀ àghɨa èntɨ̧ɨ̧ wɨ̧ e kɔ̀ŋkè la.

⁴ Bɨ wu mbɨ̀Ꞌɨ̀ bòt mànjɨa àbȩ. Bɨ bakà ko laꞋ nê wòt nàa me kɔ̀ŋkè èghɨ sitsǎꞋ tà tsiꞋi wɔ̀mbù̧ Mbɔ̧ɔ̧mà à? Ale, wòt me kɨ me kɔ̀ŋkè èghɨ sitsǎꞋ tà ko nê ye wu wɔ̀mbù̧ Mbɔ̧ɔ̧mà.

⁵ Kò bɨ mɨɨtè nê Àkata Mbɔ̧ɔ̧mà a làꞋà mèfà̧ à? A laꞋ nê “Fo yu Mbɔ̧ɔ̧mà zi a mèntɨ̧ɨ̧ ma la nàà kà bê nkɨ laꞋ nê àghɨa ko tsa à nyi a mèntɨ̧ɨ̧ ma.”

⁶ Mbɔ̧ɔ̧mà bê nge tàa ngɨa a ntsɔ̧̀ la. Ale, Àkata tò a laꞋnê, “Mbɔ̧ɔ̧mà nàà shuka bòt bu bɔ̀ɔ ŋèꞋa tèkwȩ tɔb a ègwet la a si, mbɔ̂ me nyɨꞋte a ntsɔ̧̀ vi abua bòt bu bɔ̀ɔ nɨ̀a wɔb a si la.”

⁷ È wu ale, bɨ zì àwɨ̧ a èten Mbɔ̧ɔ̧mà. Bɨ̀ teme kwèn tɨ̧ ŋǎ abua Satàn, ko taa lùùlà àwɨ̧.

⁸ Bɨ̀ tente awɨ̧ nga a mbɨ̧̀ Mbɔ̧ɔ̧mà, ko taa səèꞋtè àvi kɨꞋɨ a mbɨ̧̀ yɨ̧. Bɨ̀a bòt mènəè kàbɔ̀ŋ, bɨ̀ tsì èbu bɨ̧ a èbem mènəè kàbɔ̀ŋ. Bɨ̀a bòt èntɨ̧ɨ̧ tebe è shùù mèntɨ̧ɨ̧ mɨ̧.

⁹ Bɨ̀ màꞋà tèsȩtsə ane yɨ̧ me shùù mèsi mè ndɨ̀à. Bɨ̀ ka tsi ntsoꞋ, bɨ̀ tsiꞋi me dɨ̀ dɨ, bɨ̀ ka tsi ngùꞋtè àwɨ̧, bɨ̀ tsiꞋi tseke ane tèsȩtsə.

¹⁰ Bɨ̀ ŋɔꞋne a si a mbì Mbɔ̧ɔ̧mà ko taa lɔ̀kè àwɨ̧ a ègwet.

Wòt ka me saꞋa wanyɨ vi

¹¹ Bɔnyɨ bɔ̧, bɨ̀ ka me làꞋà kàbɔ̀ŋ adù̧ bɔnyɨ bɨ̧. Wòt me làꞋà kàbɔ̀ŋ adù̧ wanyɨ vi kò saꞋa atò leꞋ, tà ko nê ye wua ndaꞋa kàbɔ̀ŋ ane mbɨ̧ mè ngua saꞋa mbɨ̧ mbɔŋ. À me saꞋa mbɨ̧, à ko nê yea kà ghɨ mbɨ̀Ꞌɨ̀ mbɨ̧ mbɔŋ kɨa la, a bê nko nê ye tsiꞋa wòt tàa sàꞋa mbɨ̧ saꞋa la.

¹² Wòt nàà ndàꞋ wemɔ̀Ꞌ tàa ŋǎ mbɨ̧tsə mè sàꞋa bòt la. Ŋut wu Mbɔ̧ɔ̧mà wu betsiꞋa tà ko ŋà mèmpème abua bɔbȩ mè nko ngɨ̀ bɔ pfəꞋte la. Ale, àwɔ̀ wu sàꞋa wanyɨ wè la àa nè nko nê yè wu wàà?

¹³ Bɨ̀ zə, bɨ̀a wu bɨ̀a ngɨ̀ bɨ me shu nê, “Baa lɔ̀Ꞌɔ̀ laane kò atetsɔꞋ leꞋ eghǎ àlaꞋ yàa kò àzia leꞋ, etseke abàꞋ və ane èngùꞋebȩ eta èwen mbɨ̀Ꞌɨ̀ ebɔ èkab la.”

¹⁴ Bɨ̀a ngɨ̀ bɨ̀ me ghɨ̀ ale, bɨ̀ ka lem nko ndɨ tètsɔꞋ nàa sàꞋa wu la. Mèntsèke mɨ̧ a sitsǎꞋ ŋàa wu ghà à? Bɨ bê ngu wuê mbɨ̀Ꞌɨ̀ lèbaŋa wu wòt nàà ngɨ̀ ye, àdziꞋ me wù̧ù̧ne è kà tsi nguê la.

¹⁵ Ànəa bɨ ghɨ̂ ngu me shu la wu nê, “Mbɔ̧ɔ̧mà bɨ̧̀ɨ̧̀na ko baa tseke tê e ghɨ̌ àghɨ yàa, kò àzia leꞋ.”

¹⁶ Ka bɨa ŋèꞋe tèkwȩ tɨ̧ a ègwet, ngù̧a nkùꞋ tɨ̧, ka bɔ̂ tèkwȩ tɨ̧ ngaa bɨ ŋeꞋe a ègwet la wu ànəa kàbɔ̀ŋ.

¹⁷ Wòt koa ànəa ntsɔ̧̀ tà wu ghɨ̀ la, mbakà ghɨ̀ yùà, tà ko nê ye ghɨa kàbɔ̀ŋ.