Bìoball air-loidhne

Jimsì 2 - Mundani

Nkɨ̀a nè màndȩa mèsi bòt

¹ Bɔnyɨ bɔ̧, ndɨ̀ wu bɨ zì mèntɨ̧ɨ̧ mɨ̧ ane Yesò Klistò Lefɨ̀Ꞌ wa wu ènɨ̧ tò e ghe la, bɨ̀ ka me baãaãte bòt ndȩ̀à mèsi.

² Bà nɨŋ nê wòt kǒ kwaãaã kèmbàꞋa èkab nè ngule ndìte ntsɔ̧̀, nkɨ̀Ꞌɨ̂ àdziꞋa bɨ̀a mbù̧ù̧tà ane èlen Mbɔ̧ɔ̧mà la, wòt ntseb kwaãaã èbɨꞋte ndǐ nkɨ̀Ꞌɨ̂ àzi mɨ̧̂.

³ Bà nɨŋ nê bɨ lȩ wòt wu nè ngule ndìte ntsɔ̧̀ la shu abua tò nê, “KɨꞋɨ ntsèke a ègwet atɨ̧ waa”, mbɔ̂ shu abua wòt ntseb wu nê, “Tɨ̧ɨ̧ a si ŋu mbə à kɨ̀Ꞌɨ̂ ntsèke a ngèt èka bɔ̧.”

⁴ Bɨ ghɨ̀ ale, ko aa wua nyɨ̀Ꞌta nê, bɨa mbà̧à̧ta bòt a kètsìà wɨ̧ ndȩ̀à mèsi, mè sàꞋa bòt ane èlɨ kàbɔ̀ŋ.

⁵ Ngule bɔnyɨ bɔ̧ bɨ̀ zə, Mbɔ̧ɔ̧mà tɔ bòt bu bɔ̀ wu bòt ntseb a ngɔ̀ŋ ŋaa la, ngɨ̀ bɔ tsiꞋi ngule bòt, nkàà èntɨ̧ɨ̧ wu bɔ zi ane Yesò la, mè ngɨ̀ bɔ jɨa àbȩ̀ kèfɔ̧̀ wu tà kàꞋa bòt bu bɔ̀ɔ nkɔ̀ŋkà àvi la.

⁶ Ka bɨa ngwàa bòt ntseb, awɨ̧ bɔ̂ ngua ngɨ̧̀ɨ̧̀nà bòt èkab. Wu bɔ̀ɔ̀ba ka bɔ̀ɔ səèŋnà wɨ̧ nɨ̀a nga a èbem lob èsaꞋa la.

⁷ Tè è ntsě bɔ̀ɔ̀ba ka bɔ̀ɔ ndàꞋa kàbɔ̀ŋ adù̧ èlen Yesò Klistò lu bòt àa ntɔ awɨ̧ ane lùà la à?

⁸ È wu nê bɨà nchɨɨma ngɨ̀à àghɨa mbɨ̧ Kèfɔ̧̀ Mbɔ̧ɔ̧mà nàa shua la, mbɨ̀Ꞌɨ̀ Àkata Mbɔ̧ɔ̧mà a nyɨꞋte la nê, “Me kɔ̀ŋkè wanyɨ wè mbɨ̀Ꞌɨ̀ àwɔ̀ mbɔŋ”, ko bɨà ngɨ̀à ntsɔ̧̀.

⁹ Ka è wu nê, bɨà mbà̧à̧ta bòt ndȩ̀à mèsi, ko bɨ ghɨa kàbɔ̀ŋ, mbɨ̧te Mbɔ̧ɔ̧mà te mè mbà̧à̧ àwɨ̧ mbɨ̀Ꞌɨ̀ bòt bɔ̀ɔ mpààtà mbɨ̧tsə la.

¹⁰ Aa ale nkàà nê, wòt me ghɨ̀ àghɨa mbɨ̧tsə tègème te kɨa la, mbɔ̂ kwene ka wuê yemɔ̀Ꞌ, tà ko nê ye kwene tùà tègème.

¹¹ Mbɔ̧ɔ̧mà wu tà li nê “A ka njɨ̀ àbȩ la” li mè nê, “A ka mbùŋè wòt.” A bakà jɨ àbȩ, mbɔ̂ mbùŋè wòt, à ko nê, ye kwene mbɨ̧.

¹² Bɨa me làꞋa mè ngɨ̀à mènəè bɨ ko nê, bɔɔ li nɨ mbɨ̧ yu nàa ndzàà bòt sà la ka enɨ saꞋa awɨ̧.

¹³ Aa ale nkàà nê, Mbɔ̧ɔ̧mà naa li saꞋa bòt bu bɔ̀ɔ ka ku tèsȩ la kà ku tèsȩ. Ka bòt bu bɔ̀ɔ nkua tèsȩ la e bakà tsi mbɔ̌ ndɨ bɔ̀ɔ mèe me bɔɔ èsaꞋa Mbɔ̧ɔ̧mà la.

ÀfàꞋa èntɨ̧ɨ̧ wòt tà zi ane Mbɔ̧ɔ̧mà la

¹⁴ Bɔnyɨ bɔ̧, wòt nê ye zi èntɨ̧ɨ̧ vi ane Mbɔ̧ɔ̧mà, ka àfaꞋa tò a bakà wua nyɨ̀Ꞌta èlɨ mbɔŋ, àbȩ̀ wu ghà à? Tè betsiꞋa èntɨ̧ɨ̧ mbɔŋ e ghɨ̀ tà bɔ̀ mèmpème?

¹⁵ Bà nɨŋ nê wanyɨ wɨ̧ kǒ tà wu wòt Yesò la è kɨꞋɨ̀, tàa nkɨ̀ŋkà ndǐtsə, nè èghɨjɨ la,

¹⁶ wòt kǒ ane yɨ̧ shu abua tò nê, “Ghȩ̀ȩ̀ne ntsɔ̧̀, fo ka mbà̧à̧te awê, ndzitsə tè ka nkùà wê.” Tè tà shu ale ka mbakà ŋa èghɨ bu ŋut kɨ̀ŋkà la, tà ko nê ye ghɨ̌ ka ànəa ntsɔ̧̀ à?

¹⁷ Eyaa bê ngu wuê ndɨ wòt zìà èntɨ̧ɨ̧ vi ane Mbɔ̧ɔ̧mà, tè mbakà wua nyɨ̀Ꞌta wua ane àfàꞋ àzi, tà ko nê èntɨ̧ɨ̧ mbɔŋ wu àpfəꞋte la.

¹⁸ Wòt kǒ naa laꞋnê, “A zi èntɨ̧ɨ̧ wê ane Mbɔ̧ɔ̧mà, e me fàꞋa èfaꞋa ntsɔ̧̀.” À bɨ̀ɨ̀lè am wu nê “NyɨꞋte am èntɨ̧ɨ̧ wu à zi ane Mbɔ̧ɔ̧mà la, è nɨ èfaꞋa ntsɔ̧̀ bɔ̧ nyɨ̀Ꞌte awê èntɨ̧ɨ̧ wu mâ zi ane Mbɔ̧ɔ̧mà la.”

¹⁹ Bɨ bɨ̧ɨ̧ne nê Mbɔ̧ɔ̧mà nàà wemɔ̀Ꞌ ale nko nê bɨ ghɨ ntsɔ̧̀. Ka wuê fote kàbɔ̀ŋ tè bɨ̧ɨ̧ne ayɔb mɨ̧̂, tè me benta mbɔ̀ɔ.

²⁰ Àkèghɨ̧̀a wɔ̀bȩ̂, àà nkɨà nè è nyɨꞋte awê nê wòt zìà èntɨ̧ɨ̧ vi ane Mbɔ̧ɔ̧mà tè àfaꞋa tò a bakà wua nyɨ̀Ꞌta, èntɨ̧ɨ̧ mbɔŋ wu àku?

²¹ Ka mâ ye nê, tǎt wa Abàlàghâm li nyɨ̀Ꞌte nè ye tɨ̧ɨ̧ ndɨŋndɨ̀ŋ e mbì Mbɔ̧ɔ̧mà nkàà àfàꞋ àzi, àfɨꞋa tà li nɨ̀ waã vi Asàk nɔ̀ŋè àdziꞋa màŋa èghɨ abua Mbɔ̧ɔ̧mà, ŋa tò mbɨ̀Ꞌɨ̀ nkɔ̀Ꞌ èpɨ̧̀ la à?

²² Bɨ ye nê èntɨ̧ɨ̧ wu tà li ndzi ane Mbɔ̧ɔ̧mà la e li ngua ngȩ̀ȩ̀nà bɔ̂ èfaꞋa tò nɔ̂. Àghɨ yu tà li ngɨ̀ la a li ngɨ̀ èntɨ̧ɨ̧ wu tà li ndzi ane Mbɔ̧ɔ̧mà la e tsiꞋi àghɨ.

²³ Àyaa a li ngɨ̀ ànəa bɔ li shɨ a èbem Àkata Mbɔ̧ɔ̧mà la a wu nkûŋ nê, “Abàlàghâm li ndzì èntɨ̧ɨ̧ vi ane Mbɔ̧ɔ̧mà tà nɨ̀a tò mbɨ̀Ꞌɨ̀ wòt tàa ngɨ̀à àghɨa yèa nkɨà la,” ale bɔ tsiꞋa ntɔ atò ane shu̧ Mbɔ̧ɔ̧mà.

²⁴ Bɨ ye àfɨ̀Ꞌ yaa nê, àfaꞋa wòt aà nyɨ̀Ꞌta nê tà tɨ̧ɨ̧ ndɨŋndɨ̀ŋ e mbì Mbɔ̧ɔ̧mà kà wu wuê màndzia èntɨ̧ɨ̧ ane Yesò.

²⁵ Wu wuê a èlɨ mbɔŋ àvi wu tà li ngua njɨ̀a àbȩ la, e wu èlen tò li ngu Leghàb la li nyɨ̀Ꞌte nê ye tɨ̧ɨ̧ ndɨŋndɨ̀ŋ a mbì Mbɔ̧ɔ̧mà nkàà àghɨa tà li ngɨ̀ la. Tà li nɨ bɔntu̧ Bèjuê ndì àwɔb, ndɔ̀Ꞌ nyɨ̀Ꞌte awɔb alu̧ tsǎ bɔ tse adù̧ ndùùlà.

²⁶ Ale, mbɨ̀Ꞌɨ̀ ndɨ mbɨ̧̀ ènyit kà ye fo wu àpfəꞋte àghɨ la, wu wuê a èlɨ mbɔŋ wòt zìà èntɨ̧ɨ̧ vi ane Mbɔ̧ɔ̧mà ka mbàkà wua fàꞋà mbɨ̀Ꞌɨ̀ Mbɔ̧ɔ̧mà kɨa la èntɨ̧ɨ̧ mbɔŋ e wu àpfəꞋte mɨ̧̂ la.

« Roimhe

Air adhart »

Lean sinn:

Ceanglaichean taic

Sanasan