Bìoball air-loidhne

Jimsì 1 - Mundani

¹ Letà Jimsì wafàꞋ Mbɔ̧ɔ̧mà bɔ̂ Yesò Klistò Lefɨ̀Ꞌ, Abua bòt Mbɔ̧ɔ̧mà bu bɔ taatè me tseke a èdziꞋ èdziꞋ a ngɔ̀ŋ ŋaa la. Maà ntsàꞋtà àwɨ̧.

Màmbɔ èyì nè màndzia èntɨ̧ɨ̧ ane Mbɔ̧ɔ̧mà

² Bɔnyɨ bɔ̧, ngoꞋtsə te kwene ane yɨ̧, ka te màà ngu wuê nà leꞋ, bɨ wùꞋtè àwɨ̧,

³ nkàà nê èwuu ngoꞋte mbɔŋ tèa ngɨ̀ tè nyiꞋi èntɨ̧ɨ̧ wu bɨ zi ane Yesò la, à gha à me lìa mèntɨ̧ɨ̧ mɨ̧ kweelè.

⁴ TsiꞋ mèntɨ̧ɨ̧ mɨ̧ nèète nkweele ntsɔ̧̀ mbɨ̀Ꞌɨ̀ bɨa tsə te kùꞋu, tè àghɨa ko aa baka tsi ngua mbùa ane yɨ̧.

⁵ Wòt bùa èyì, tà lò̧o̧ abua Mbɔ̧ɔ̧mà wu tàa ŋǎ èyì abua wòt ègème la, ko tàa ŋa abua tò. Tàà kà kuꞋte àbu, tà kà wua ŋȩ̀ta.

⁶ Ka ŋut me lo̧o̧ tà bɨ̧̀ɨ̧̀ne a èntɨ̧ɨ̧ vi nê Mbɔ̧ɔ̧mà naa ŋa, tà ka me màkè, nkàà nê wòt wu tàa màkà la wu mbɨ̀Ꞌɨ̀ àtsə àyɨt àfeme àa mpàà maꞋa aba abà la.

^7-8 Àfəa wòt waa tà bɔ èntɨ̧ɨ̧ tebe, tà kà wua mbà̧aã ànəê ntɨ̧̀ɨ̧ adù̧ la ka mɨ̀ɨ̀tè nê betsiꞋa ye bɔ àghɨa ko abua Mbɔ̧ɔ̧mà.

Mbuŋ nè jandèlè

⁹ Wanyɨ wa wu tà wu wòt mbuŋ bòt e mè me waa tò la, wùꞋtè àvi na Mbɔ̧ɔ̧mà è ŋeꞋe a atò a ègwet la.

¹⁰ È wu tà wu wòt èkab la wùꞋtè àvi nê Mbɔ̧ɔ̧mà shuke atò a si, nkàà nê tà ko nê yea pfə wuê mbɨꞋɨ̀ ètesɔɔ bafəèꞋ àa ngɨ̀ e yu̧ nkwènte a si la.

¹¹ Aa ale nkàà nê nyèm nàa ngɨ̀ è chu ne àzəꞋ àkekweelè, è tò̧ bafəèꞋ mbɔŋ tè ètesɔɔ bu e yu̧ nkwènte a si tè è ka tsi ngua mbɔ̀ a màndzea. KwàꞋ ane èlɨ mbɔŋ, wu ndɨ wòt èkab nàa pfə àfɨꞋa tàa ngèèba ntsɔꞋta mènəè mi la.

Àkɨ̀kè nè mànyɔꞋta wòt

¹² Ntsɔ̧̀ wu wòt wu tàa nkùùla èntɨ̧ɨ̧ vi àfɨꞋa ngoꞋ la, nkàà nê tà kuula èntɨ̧ɨ̧ vi tè ngà ndìà ko taa bɔ mèmpème, è wu àbȩ̀ yu Mbɔ̧ɔ̧mà kàꞋa abua bòt bu bɔ̀ɔ nkɔ̀ŋkè atò la.

¹³ Wòt, kwen a èbem àkɨ̀kè tà ka nê a vi kɨ̀kà Mbɔ̧ɔ̧mà nkàà nê Mbɔ̧ɔ̧mà nàà kà kɨke wòt.

¹⁴ Ka kàbɔ̀ŋ nàà nkɨ̀kà wòt ègème àfɨꞋa àghɨa èntɨ̧ɨ̧ tò àa nkɨà la, a sə atò ndzia a si la.

¹⁵ Àghɨa ngaa a ghɨ̀ à lu̧u̧ a èntɨ̧ɨ̧ tò, è tsìꞋi dzəâ kàbɔ̀ŋ. ÀfɨꞋa kàbɔ̀ŋ ngaa ghe la, è nɨ̀ èvə nɨŋ nkɨ̀Ꞌɨ̂.

¹⁶ Ngule bɔnyɨ, bɨ̀ ka fɨte awɨ̧ bɨ̀ambɔŋ.

¹⁷ Àghɨa ntsɔ̧̀ àgème nè àghɨ àgème a ghe la àa ndzəèà nè ègwet abua Tǎt wa Mbɔ̧ɔ̧mà wu tà ghɨ mèkàꞋà mu a ègwet la. Ka tòà zìambɔŋ nàà kà kùbtê, tà kà mèe ngua ngèbla mbɨ̀Ꞌɨ̀ mèkàꞋà mbɔŋ àfɨꞋa ko e ghɨ̌ ndzěm naa kwene.

¹⁸ Tà li ndàꞋ èngǎ̧ nkûŋ vi, mbi awa ane mènkɔ̀ŋke mi nê bàa tɨ̧ɨ̧ a mbì àghɨ àgème ye ghɨ̀ la.

Bòt è me ghɨ̀ àghɨa bɔ̀ɔ ndzəèa la

¹⁹ Ngule bɔnyɨ, bɨ̀ me ku̧u̧te èngà̧ waa nê, wòt ègème me yàŋa ndzəa ànəê, ka tà ka me làꞋa kwàla, tà ka mè me tsoo kwàla.

²⁰ Aa ale nkàà nê wòt nàa me tsoo tà kà ko nyɨ̀Ꞌte mèntsèke ntsɔ̧̀ mu Mbɔ̧ɔ̧mà nàa nkɨà la.

²¹ È wu ale, bɨ waꞋa èbɨꞋte ènəê ègème nè mpàb yu è ghe a kètsìà wɨ̧ la, ŋɔ̀Ꞌne a si mbɨ̧̀ɨ̧̀ne èngǎ̧ Mbɔ̧ɔ̧mà wu tà liꞋi a mèntɨ̧ɨ̧ mɨ̧ e bɔ mètàŋ e ghɨ̌ bɨa peme la.

²² Bɨ̀ ka me fɨte awɨ̧ bɨ̀ambɔŋ ndzəèa àghɨa èngǎ̧ Mbɔ̧ɔ̧mà e shua la zə, bɨ̀ me ghɨ̀ mbɨ̀Ꞌɨ̀ e shua la.

²³ Wòt wu wòt tàa ndzəa èngǎ̧ Mbɔ̧ɔ̧mà tà kà wua ngɨ̀à àghɨa e shua la, tà ko nê ye wu mbɨ̀Ꞌɨ̀ wòt tàa ndȩ̀à èsi vi a èbem àlùgɨ̀lâ la.

²⁴ Tà ghɨ̀ tà lȩ̀ ale tà lɔꞋɔ tà me ghǎ, tà bê ndèène ndɨ èsi vi wu e ghɨ̂ ngu la.

²⁵ Ka wòt me zə wuê ngule mbɨ̧ Yesò yu è fete mbɨ̧tsə tègème la, e yu nàa ndzàà wɔ̀bȩ̂ sà la, nkù̧ù̧ta wuê yùà, tà kà zə e bê lèène, mbɔ̂ me ghɨ wuê mbɨ̀Ꞌɨ̀ è shua la, ko Mbɔ̧ɔ̧mà naa li lɔ̀ɔ̀le atò ane àghɨa tàa ngɨ̀à la.

²⁶ Wòt mɨ̀ɨ̀tè nê ye wu wòt Mbɔ̧ɔ̧mà, ka mbakà wua mbà̧aã èlɨ̧ li, tà ko nê ye fɨte avi zìambɔŋ, me tò nè mènkǒ Mbɔ̧ɔ̧mà wu àku.

²⁷ Wòt Tǎt wa Mbɔ̧ɔ̧mà nɨa tò mbɨ̀Ꞌɨ̀ wòt tà nèètè nko avi la, wu wòt tàa ntɨ̀ŋa batsi bɔ̂ bènempfə a èbem ngoꞋ tɔb, mè me baabe avi mbɨ̀Ꞌɨ̀ ngɔ̀ŋ zi a kàbɔ̀ŋ ane zi la.

« Roimhe

Air adhart »

Lean sinn:

Ceanglaichean taic

Sanasan