Bìoball air-loidhne

Jɔ̌n 9 - Mundani

Yesò bəâ wòt àghɨ àleme

¹ Mbɨ̀Ꞌɨ̀ Yesò nàa ntsèà la, tà ye wòt kǒ bɔ li me bia tò àghɨ a tò a lem la,

² ale bɔkatè tò e biite atò nê “Labȩ̀, bɔ li me bia mbê waa nè àghɨ àleme ale ngua nkàà mènəè kàbɔ̀ŋ tò, kò wuê è me tǎt tò bɔ̂ nyɨ̌ tò à?”

³ Yesò bɨ̀ɨ̀lè nê “Àghɨ a tò à ka lema nkaa kàbɔ̀ŋ tò kò èwe tǎt tò bɔ̂ nyɨ̌ tò leꞋ. A wu anè mbɨ̀Ꞌɨ̀ bòt aa ye àfaꞋa mètàŋ Mbɔ̧ɔ̧mà ane tò.

⁴ Ba bɔ ndɨ bàa fàꞋa àfaꞋa wòt wu tà tsàà am la àfɨ̀Ꞌ yaa è bèlè nengû̧ la, ndzěm nàà nkɨ̀Ꞌâ kà wòt wu tsi e ko e ghɨ̌ àghɨ.

⁵ Ane àfɨ̀Ꞌ yaa e ngu a sitsǎꞋ ŋàa ntsèka la, e ngu wòt tàa ŋǎ èkaꞋà abua bòt ngɔ̀ŋ yaa la.”

⁶ Tà làꞋ ale mbɔ̂ ntsəè mat a si, nɨŋ ntɔ̀bte ètsǎꞋ ndzɔ̀Ꞌɔ̀ àghɨ a mbê wu adù̧,

⁷ mbɔ̂ shu abua tò nê, “Ghà shùù àghɨ a ye a èbem àtɨ̀ŋ Silòàm.” Silòàm wua shua nê “Tsaa.” Ale, mbê wu ghà shùù me kɨꞋɨ ntsìꞋa ndzea èdziꞋ.

⁸ ÀfɨꞋa mbɔŋ bòt bu bɔ̀ɔ ntsèke a ngèt tò la, nè èbu bɔ zǐ wua ndzea tò ndò̧a èghɨ la e nê “Tè eyaa ntsě mbê wu tàa ntsèka tseke ndò̧a èghɨ la à?”

⁹ Bòt ko ane yɔb e nê “Wu tòà!” Èbeko e nê “ChaꞋ, è ntsě tòà, wu wòt kǒ tà fəa tò la.” Bɔ làꞋ ale mbê mbɔŋ zìambɔŋ nê, wu zia.

¹⁰ Ale, bɔ biite atò nê, “Ghǎ a ghɨ̂ ka à tsiꞋa ndzea èdziꞋ à?”

¹¹ Tà bɨ̀ɨ̀le nê, “Mbê wu bɔ̀ɔ ntɔ atò ane Yesò la è yaã ntɔ̀bte ètsaꞋ nɨŋ ndzɔ̀Ꞌɔ̀ àghɨ a am, mbɔ̂ shuê nê, ‘Ghǎ shùù a èbem àtɨ̀ŋ a Silòàm.’ Ale, e ngà shù me ko ntsìꞋa ndzea èdziꞋ.”

¹² Tà làꞋ ale bɔ biite atò nê “Mbê ngaa wu neŋàà?” Tà bɨ̀ɨ̀lè nê “E mbakà ko.”

Bèfalèsiì e me kɨ eko ndɨ tà ghɨ̂ ka mbəèa mbê wu la

¹³ Bɔ li nɨa wòt àghɨ àleme wu nɨŋ nga abua Bèfalèsiì.

¹⁴ Àli yu Yesò tɔbte ètsaꞋ wu nɨŋ ngàꞋa àghɨ tò la wu àliapfəèa Bèjuê.

¹⁵ Bèfalèsiì e mè mbììte atò ndɨ tà ghɨ̂ ka me ye èdziꞋ la. Tà shu abua yɔb nê, “Yesò è yaã ndzɔ̀Ꞌɔ̀ àghɨ am ane ètsaꞋ, ka e ngà shù ntsìꞋa ndzèa èdziꞋ.”

¹⁶ Bèfalèsiì ko è nê, “Wòt wu tà ghɨ̀ àghɨ yàa la ka dzəa abua Mbɔ̧ɔ̧mà, nkàà nê tàa mpààtà mbɨ̧te àliapfəèa ya.” Ka èbeko e nê, “BetsiꞋa wòt tà wu wòt kàbɔ̀ŋ la ghɨ̀ èwuu ènəê kà ye fɨ̀Ꞌ bàa?” Bɔ làꞋ ale ntsìꞋi a mètsəê a mètsəê.

¹⁷ Ale, bɔ mè mbììte wòt mbɔŋ nê, “Àwɔ̀ mbɔŋ àa shua nè ghà ane mbê waa tà ghaꞋa àghɨ a yê la à?” Tà bɨ̀ɨ̀lè nê, “Tà wu ndàꞋàtɔŋ Mbɔ̧ɔ̧mà.”

¹⁸ Bɔɔjuŋ Bèjuê bu e ghɨ̀ ale, bɔ̀ ka lem mbɨ̧̀ɨ̧̀ne nê àghɨ a tò a li ndem ka ndɔ̀Ꞌ ngàꞋa, tè bɔ ghà ntɔ a tǎt tò bɔ̂ nyɨ̌ tò,

¹⁹ mbììte awɔb nê, “Eyaa wu waã wɨ̧ wu bɨ laꞋnê bɔ li me bia tò tà kà wua ndzea èdziꞋ la à? Tà me wua àfɨ̀Ꞌ yaa ngɨ̀ na ka ntsìꞋa ndzea èdziꞋà?”

²⁰ Tǎt tò bɔ̂ nyɨ̌ tò e bɨ̀ɨ̀lè nê, “Ba ko nê tà wu waã wa, mè nko nê bɔ li me bia tò àghɨ a tò a lem.

²¹ Ka bà ka ko ndɨ tà ghɨ̂ ka me wu àfɨ̀Ꞌ yaa anè ntsìꞋa ndzea èdziꞋ la, bà ka mèe nko wòt tà ghaꞋa àghɨ a tò la. Bɨ̀ biite atò, taa ko shu ànəa zi zìambɔŋ. Tà tsiꞋi wɔ̀jûŋ, ”

²² Tǎt tò bɔ̂ nyɨ̌ tò aà ndàꞋà ale ngua mbɔ̀ɔ bɔɔjuŋ Bèjuê, nkàà nê bɔɔjuŋ mbɔŋ e li ndzaŋe nɔ̀ŋe nê wòt bɨ̧̀ɨ̧̀na, mè shu nê Yesò wu Fɔ̧̀ wu Mbɔ̧ɔ̧mà li ndzɔꞋ etsàà la, ko bɔɔ fəa tò a èbem lob Mbɔ̧ɔ̧mà yɔb.

²³ Eyaa wu àghɨa a li ngɨ̀ ka tǎt tò bɔ̂ nyɨ̌ tò e nê bɔ̀ biite atò nê tà tsiꞋi wɔ̀jûŋ la.

²⁴ Bɔ ghɨ̀ ale mè ntɔ wòt wu àghɨ a tò a li ndzaã ndem la, shu abua tò nê, “WùꞋte a Mbɔ̧ɔ̧mà, ba ko nê mbê waa tà bə awê la wu wòt kàbɔ̀ŋ.”

²⁵ Tà bɨ̀ɨ̀lè nê, “Kò tà wu wòt kàbɔ̀ŋ kò tà ntsě leꞋ, ko e mbakà koê; ndàꞋ ànəa mâ ko la wu nê, àghɨ a am a li ndem ka nè àfɨ̀Ꞌ yaa mâ tsiꞋa ndzea èdziꞋ.”

²⁶ Bɔ biite atò nê, “Tà yaã ngɨ̀ gha ane yê à? Tà yaã ngɨ̀ na ka ngàꞋa àghɨ a yê à?”

²⁷ Tà bɨ̀ɨ̀lè nê “Mâ shua wɨ̧ tè ndɔ̀Ꞌ ka bɨ̀ ka wua nkɨ eyute. Bɨ̀ meè nkɨ zə ghàà? Bɨa nkɨ wu bɔkatè tò mɨ̧̂?”

²⁸ Tà làꞋ ale, bɔ tsɔ̧ɔ̧te atò shu nê, “Wu àwɔ̀ ka à wu wakatè mbê waa la, è me wu awa ko ba wu bɔkatè Musì.

²⁹ Ba ko nê Mbɔ̧ɔ̧mà li ndaꞋa abua Musì, ka è me wua mbê waa ko ba bakà ko àdziꞋa tà dzəè la.”

³⁰ Mbê wu bɨ̀ɨ̀lè nê, “Ànəê yaa a bê ntsè am. Bɨ bakà ko àdziꞋa tà dzəè la, ka tà bɔ̂ ngàꞋa àghɨ a am?

³¹ Ba ko nê Mbɔ̧ɔ̧mà nàà kà yute àghɨa bòt kàbɔ̀ŋ aa ndò̧a abua tò la, ka è me wu wòt wu tàa ŋa kènuke abua Mbɔ̧ɔ̧mà mè ngɨ̀à àghɨa tàa nkɨà la, tà me yute èngǎ̧ tò.

³² Mbɨ̀Ꞌɨ̀ ngɔ̀ŋ li ndɔ̀Ꞌ mbùꞋ la bɔ te bakà zə nê wòt kǒ ghaꞋa àghɨ a wòt bɔ me bia tò a lem la.

³³ È ghɨ̀ ale, è kà wu Mbɔ̧ɔ̧mà tà tsàa a mbê waa la, ko betsiꞋa tà kà ghɨ̂ àghɨ.”

³⁴ Bɔ shu abua tò nê, “Bɔ li mbia wê kwàꞋ a èbem mènəè kàbɔ̀ŋ, ngule si àghɨ yu à ko te enyɨꞋte awa la wu ghà à?” Bɔ ghɨ̀ ale mbɔ̂ ntsi atò ayɔɔ bòt lob Mbɔ̧ɔ̧mà.

Àghɨ àleme ane mènəè Mbɔ̧ɔ̧mà

³⁵ ÀfɨꞋa Yesò zə nê bɔ fəa tò la, tà kɨ atò mbììte atò nê, “À zǐ èntɨ̧ɨ̧ wê ane Waã Wòt?”

³⁶ Tà bɨ̀ɨ̀lè nê “Wu wa tê, shu am mbɨ̀Ꞌɨ̀ maa zǐ èntɨ̧ɨ̧ am ane tò.”

³⁷ Yesò bɨ̀ɨ̀lè nê, “À yea tò tè ndɔ̀Ꞌ, wu tòa wu ndaꞋa abua yê àfɨ̀Ꞌ yaa la.”

³⁸ Tà nê, “Tê, mâ bɨ̧ɨ̧nè,” mbɔ̂ ntem tènjûŋ ti a si ngùꞋtè atò.

³⁹ Yesò shu nê “E nkɨ̀Ꞌa sitsǎꞋ ŋàa mbɨ̀Ꞌɨ̀ enyɨꞋte ndɨ bòt àa la, e ghɨ̌ bòt kà wua ndzèa èdziꞋ aa me ye, e mě ghɨ̌ àghɨa bòt bu bɔ mɨɨtè nê bɔɔ̀ ndzea èdziꞋ la aa leme.”

⁴⁰ Bèfalèsiì ko be wu a ngèt tò la e zə mbììte atò nê, “Àghɨ a ya a lem mɨ̧̂?”

⁴¹ Yesò bɨ̀ɨ̀lè nê, “Bɨ me wu ale ngu bòt àghɨ àleme ko ànəa mbɔŋ a bakà baãaã wɨ̧ e laꞋ nê bɨ ghɨa kàbɔ̀ŋ; ka ndɨ̀ wu bɨ laꞋnê bɨa ndzea èdziꞋ la, ànəa mbɔŋ a bele àtsəa yɨ̧.”

« Roimhe

Air adhart »

Lean sinn:

Ceanglaichean taic

Sanasan