Bìoball air-loidhne

Jɔ̌n 20 - Mundani

Yesò yù̧ù̧me
( Mat 28:1-8 ; Mk 16:1-8 ; Lk 24:1-12 )

¹ È li ngu àlia mbì ane nkàb, kwàꞋ a ntɔtetsɔ̌Ꞌ, Màlià Màdàlin ghà àtsəasì yu, me ye èti lu a ètsəê la è ka tsi ngu.

² Tà lùùla ngà shu abua Simùn wu èlen tò ko wu Pità la bɔ̂ wakatè wu Yesò li ntaꞋa wua kɔ̀ŋkà tò la nê, “Bɔ tsì àpfəꞋta Yesò Lefɨ̀Ꞌ a èbem èsî lu ka bà ka ko àdziꞋa bɔ nɔ̀ŋe à yùà la.”

³ Pità bɔ̂ wakatè kǒ wu e ghà àtsəasì yu.

⁴ Bɔ li ngua ndùùlà, ka wakatè kǒ wu lùùlà ntsea Pità, mbɨ̀ àtsəasì yu.

⁵ Tà bɨ̀ ale ŋɔ̀Ꞌne a si ndɨ̀ŋkè èbem èsî lu ndzě èdziꞋi ndǐ bu bɔɔ nɨŋ ndèbte àpfəꞋte Yesò la e nɔ̀ŋke la, ka tà kà nyi a èbèm.

⁶ Simùn wu èlen tò ko wu Pità la kɨ̀Ꞌɨ̂ akwene tò, ntɔɔ nyi a èbem èsî lu ndzè èdziꞋi ndǐ bu bɔɔ nɨŋ ndèbte àpfəꞋte Yesò adù̧ la e nɔ̀ŋkè la.

⁷ Mè ndzè àyu bɔɔ nɨŋ nkùùlè àtsəa tò adù̧ la azi ne àdzìꞋa.

⁸ Wakatè kǒ wu tà yaã mbɨ̀ nkɨ̀Ꞌɨ̂ àtsəasì yu la nyi ndzè àzi mɨ̧̂, mè mbɨ̧̀ɨ̧̀ne nê Yesò yu̧u̧mè.

⁹ È li me wu àfɨ̀Ꞌ yaa bɔ̀ ka ziꞋ nko ànəa àdziꞋa Àkata Mbɔ̧ɔ̧mà yu a laꞋnê Yesò naa li epfə e mě yu̧u̧me la, a shua la.

¹⁰ Ale, bɔkatè bu e wènè àdziꞋa bɔ̀ɔ ntsèka la.

Yesò sàꞋa a mbì Màlià Màdàlin
( Mat 28:9-10 ; Mk 16:9-11 )

¹¹ Bɔ me ghà ale, Màlià tɨ̧ àtsəasì yu me dɨ̌, tè ŋɔ̀Ꞌne a si elȩ̂ èbem èsî lu,

¹² me ko ndzè bɔntu̧ Mbɔ̧ɔ̧mà babe bɔ kwaã ndìte kèfə ntsèke adzìꞋ yu àpfəꞋte Yesò aa wu la. WemɔꞋ tseke àdziꞋa àtsəa Yesò aa wu la, nè wekǒ àdziꞋa èka tò aa wu la.

¹³ Bɔntu̧ Mbɔ̧ɔ̧mà bu e biite atò nê, “À dɨa gha a mè?” Tà shu abua yɔb nê, “E ndɨ̀à nê, bɔ tsì àpfəꞋte Lefɨ̀Ꞌ am ka è nka ko àdziꞋa bɔ nɔ̀ŋe yùà la.”

¹⁴ Tà làꞋ ale ngèble avi ndzě a Yesò tà tɨ̧ɨ̧ la. È li ngu Yesò ka tà kà lem nko laꞋ nê wu tòà.

¹⁵ Yesò bììte atò nê, “À dɨa gha a mè? À kɨa wàà?” Tà biite ale Màlià tsìꞋa tanda nê wu wòt wu tàa faꞋa a èbem mbȩ yu la, shu abua tò nê, “Tê, è wu nê, àpfəꞋte atò nɨ àwɔ̀, à shu am àdziꞋa à nɔ̀ŋè la, e ngà nɨŋ me ghǎ.”

¹⁶ Yesò tɔ atò nê, “Màlià!” Tà gheble avi ntɔ atò ane ndɨ̧ Ebùlù nê, “Labɔnì!” (Ngua shua nê NyɨꞋtà).

¹⁷ Yesò shu abua tò nê, “Ka mbà̧à̧te am nkàà nê e mbakà ziꞋ nkɔꞋɔ te ghǎ ekwene ane Tǎt am. Ghǎ shu abua bɔnyɨ bɔ̧ nê, e ngua nga ekwene ane Tǎt am wu tà wu Tǎt wɨ̧ mɨ̧̂ la, ye wu tà wu Mbɔ̧ɔ̧mà am mè ngu Mbɔ̧ɔ̧mà wɨ̧ la.”

¹⁸ Màlià Màdàlin ghà shu abua bɔkatè bu nê, “Mâ ye a Yesò.” Mbɔ̂ ntsɔ̀tè ntu̧ yu Yesò tsɔ̀tè la.

Yesò sàꞋa a mbì bɔkatè bi
( Mat 28:16-20 ; Mk 16:14-18 ; Lk 24:36-49 )

¹⁹ È tseke te me wu àfɨꞋa nyèmtèsi ane àlia mbɔŋ, è wu àlia mbì ane nkàb la, bɔkatè Yesò e wua lob bɔ bù̧ù̧tè ngàbtè mètsələèꞋ ntsèke a èbèm, bɔ̀ɔ mbɔ̀a Bèjuê la. Yesò pùùlà è ntɨ̧ a mbì lɔb nê, “Àlàŋkè à wu ne nɨ̧̀.”

²⁰ Tà làꞋ ale nyɨ̀Ꞌte awɔb èbu bi bɔ̂ àbâ mbɨ̧̀ àzi. Bɔkatè bu e wùꞋtè àwɔb mbɨ̀Ꞌɨ̀ bɔ ye a Yesò Lefɨ̀Ꞌ la.

²¹ Yesò mè shu abua yɔb nê, “Àlàŋkè à wu nè nɨ̧̀. Mbɨ̀Ꞌɨ̀ Tǎt am li ntsàà am a ngɔ̀ŋ la, wuê wu a èlɨ mbɔŋ mâ tsàà wɨ̧ àfɨ̀Ꞌ yaa la.”

²² Tà làꞋ ànəê yaa ale, mbɔ̂ ndzèène a ègwet lɔb, shu abua yɔb nê, “Bɨ̀ kò Fo Kèfə.”

²³ Bɨ waꞋa a kàbɔ̀ŋ wòt, ko Mbɔ̧ɔ̧mà naa waꞋa mɨ̧̂, mbə bɨ̀ baka waꞋ, Mbɔ̧ɔ̧mà kà waꞋ.

²⁴ Yesò nàà nkɨ̀Ꞌa ale Tɔmasì wu bɔ̀ɔ ntɔ atò ane wabenyì la ka wu a si. Tɔmasì waa wu wakatè ko ayɔɔ bɔkatè Yesò bu tsɔ̀b babe la.

²⁵ Tà kɨ̀Ꞌɨ̂ bɔkatè ko bu e shu abua tò nê, “Baa ye a Tè Yesò.” Bɔ shu ale, Tɔmasì nê, “E mbakà ye atò, te ye èlȩê tèfɨŋke mpì tu ane èbu tò, e mèe zì kèti fɔ̧̀ a èbem mèləèꞋə mbɔŋ, ebɔ zì àbu am àbâ mbɨ̧̀ a tò, è nka bɨ̧ɨ̧nè.”

²⁶ Nkàb è tem, bɔkatè Yesò bu e mè mbù̧ù̧te a èbem lob, Tɔmasì wu bɔ̂ tò ba mɨ̧̂. Bɔ tseke ale mbɔ̂ ngàbtè mètsələèꞋ, ka Yesò bɔ mpùùla ntɨ̧ a kètsìà yɔb nê, “Àlàŋkè a wu ne nɨ̧̀.”

²⁷ Tà làꞋ ale mbɔ̂ shu abua Tɔmasì nê, “Zì kèti fê a si ŋàa mbɔ̂ ndȩ̀ èbu bɔ̧ ndze, mè ntsàà àbu ayê mbà̧à̧te àbâ mbɨ̧̀ am. Bɨ̧ɨ̧ne, à ka tsi màkè.”

²⁸ Tɔmasì tɔ atò nê, “Lefɨ̀Ꞌ am, Mbɔ̧ɔ̧mà am!”

²⁹ Yesò nê, “À bɨ̧ɨ̧nè àfɨ̀Ꞌ yaa ambo na à ye am la à? Ntsɔ̧̀ wu bòt bu bɔ baka ye mbɔ̂ mbɨ̧̀ɨ̧̀ne la.”

Lə bɔ li shɨ̀ àkatè yaa la

³⁰ Yesò li ngɨ̀ ale, mè ntaꞋa ghɨ̀ tèwuute ènəê kà ye fɨ̀Ꞌ ko a mbì bɔkatè bi bɔ yea ènɨ̧ tò. Bɔ bakà shɨ me mbɔŋ a èbem àkatè yaa.

³¹ Ka bɔ shɨa maa mbɨ̀Ꞌɨ̀ bɨa bɨ̧ɨ̧ne nê, Yesò wu Fɔ̧̀ wu Mbɔ̧ɔ̧mà li ndzɔꞋ etsàà la, mè ndɔ̀Ꞌ ngu Waã Mbɔ̧ɔ̧mà. Bɨ bɨ̧ɨ̧nà ndzìà èntɨ̧ɨ̧ wɨ̧ ane Yesò ko taa ghɨ̌ bɨa bɔ mèmpème.

« Roimhe

Air adhart »

Lean sinn:

Ceanglaichean taic

Sanasan