Jɔ̌n 19 - Mundani

¹ ÀfɨꞋa mbɔŋ, Pȩlèt ŋǎ Yesò bɔ shu̧.

² Bèshujà bu e nɨ njɨŋtsə, mbaꞋa ntà̧ ndzi àtsəa tò, mbɔ̂ ndzì èmǎ̧ fɔ̧̀ a mbɨ̧̀ tò.

³ Bɔ ghɨ̀ ale, waa waa me kɔꞋɔ shua abua tò nê, “Àtsèà bèfɔ̧̀, Fɔ̧̀ Bèjuê!” Mbɔ̂ ntè àbu a èsi tò.

⁴ Pȩlèt mè ndzəè nga àbȩ shu abua bòt bu nê, “Bɨ̀ zə, e ntsiꞋa nɨa tò nkɨ̀Ꞌa àbȩ e tsia a mbì lɨ̧, mbɨ̀Ꞌɨ̀ bɨa ko nê, e mbakà ye ànəa kàbɔ̀ŋ ko tà ghɨ̀ la.”

⁵ Ale, Yesò dzə àbȩ, nè ntà̧ njɨŋ tu àtsəa zi nè èmà̧ fɔ̧̀ wu a mbɨ̧̀ zi. Pȩlèt shu abua bòt bu nê, “Bɨ̀ yea mbê wu.”

⁶ Mbɨ̀Ꞌɨ̀ bètǎt bèntsìà mèpɨ̧̀ Mbɔ̧ɔ̧mà bu nè bèmbaabà lob nɨ̧ Mbɔ̧ɔ̧mà e ye atò la, bɔ ŋȩ nê, “Wu̧u̧te atò a mbɨ̧̀ mbasa, wu̧u̧te atò a mbɨ̧̀ mbasa!” Pȩlèt shu abua yɔb nê, “Bɨ̀ nɨa tò bɨ̀ambɔŋ ngù̧ù̧te a mbɨ̧̀ mbasa, e mbakà ye ànəa kàbɔ̀ŋ ko tà ghɨ̀ tê è wu àyea bɔ̀ɔ bùŋe atò la.”

⁷ Bèjuê bu e mè shu abua tò nê, “Baa bɔ mbɨ̧ kǒ nàa nyɨ̀Ꞌta nê, bɔ bɔ ndɨ bɔ̀ɔ bùŋe atò nkàà nê, tàa shua nê, ye wu Waã Mbɔ̧ɔ̧mà la.”

⁸ ÀfɨꞋa Pȩlèt zə èngǎ̧ waa la, tà paa mbɔ̀ɔ,

⁹ tè mè ngwènè a èbem tsâ̧ vi mbììte a Yesò nê, “À dzəèà neŋàà?” Ka Yesò kà lâꞋ.

¹⁰ Pȩlèt shu abua tò nê, “À tu̧u̧ làꞋa abua am kèna à? À bakà ko nê, mâ bɔ mètàŋ e ghɨ̌ bɔɔ sà àwê, mè mbɔ mètàŋ e ghɨ̌ bɔɔ wu̧u̧te awê a mbɨ̧̀ mbasa à?”

¹¹ Yesò bɨ̀ɨ̀lè nê, “BetsiꞋa à kà ghɨ̌ àghɨ adù̧ yaã kà Mbɔ̧ɔ̧mà làꞋ nê, à wu ale. Ale, wòt wu tà baãaã am ŋǎ abua yê la, ghɨ ànəa kàbɔ̀ŋ tè ntsè awê.”

¹² ÀfɨꞋa Pȩlèt e zə èngà̧ waa la, tà me nyɔ̀Ꞌta nkɨà èlu̧ esǎ Yesò, ka Bèjuê bu e me ŋȩ wuê ŋȩ shua nê, “À sa mbê waa, à ko nê, ye ntsě shu̧ Empelɔ̀ Luêm. Wòt nàa ngɨ̀ tà shu mbɨ̀Ꞌɨ̀ tòa anè nê, ye wu fɔ̧̀, tà ko nê, ye tsiꞋi wɔ̀mbù̧ Empelɔ̀ Luêm.”

¹³ Mbɨ̀Ꞌɨ̀ Pȩlèt zə mèngà̧ maa la, tà nɨa Yesò ndzə àbȩ, ntsèke a ègwet àtɨ̧ a saꞋa, àdzìꞋ àko bɔ bɔ̧ɔ̧ ane àti a ko bɔ̀ɔ ntɔ ane ndɨ̧ Ebùlù nê Gabatà la.

¹⁴ Bɔɔ ngɨ̀à ale, è tsìꞋi mbɔŋe a kètsìà nèngû̧ ane àli yu bɔ̀ɔ ntàŋka ètsəꞋ aa tsi naa wu àlia èpǎ̧ Màntsea a ègwet la. Pȩlèt shu abua Bèjuê bu nê, “Bɨ̀ yea Fɔ̧̀ wɨ̧.”

¹⁵ Bɔ ŋȩ nê, “Bɔ̀ Bùŋe atò! Bɔ bùŋe atò! Bɔ wu̧u̧te atò a mbɨ̧̀ mbasa.” Pȩlèt bììte awɔb nê, “Bɨa nkɨà nê, è ngu̧u̧te Fɔ̧̀ wɨ̧ a mbɨ̧̀ mbasa à?” Bètǎt bèntsìà mèpɨ̧̀ Mbɔ̧ɔ̧mà bu e nê, “Ba bakà bɔ fɔ̧̀ tsǎ ka nè Sisà.”

¹⁶ Tà zia Yesò a tèkitebu tɔb bɔɔ ewu̧u̧te atò a mbɨ̧̀ mbasa. Ale, bɔ nɨa Yesò.

Bɔ wu̧u̧te Yesò a mbɨ̧̀ mbasa

¹⁷ Tà ŋèꞋe mbasa vi ngà àbȩ, adzìꞋ yu bɔ̀ɔ ntɔ nê àdziꞋa àghele àtsə la. Èlen àdziꞋa mbɔŋ ane ndɨ̧ Ebùlù li ngu Golgotà.

¹⁸ Bɔ wu̧u̧te atò a mbɨ̧̀ mbasa a kètsìà bòt ko babe.

¹⁹ Pȩlèt shɨ èngà̧ ko ane kèba àyɨt bɔ wu̧u̧te àtsəa mbasa wu, e me shu nê, “Yesò wòt Nazàlet, Fɔ̧̀ Bèjuê.”

²⁰ Bèjuê nyaŋ e li ntɔ èngǎ̧ ngaa, nkàà nê, àdziꞋ yu bɔ li ngù̧ù̧te Yesò la, a li ngu a ngèt àpfəèa nɨ̧ a Jèlusalèm. Bɔ li shɨ̀ àghɨa mbɔŋ ane ndɨ̧ Ebùlù, nè è ye bòt Luêm, nè ndɨ̧ bòt Glɨ̂k.

²¹ Bètǎt bèntsìà mèpɨ̧̀ Mbɔ̧ɔ̧mà e shu abua Pȩlèt nê, “À ghɨ̂ à kà wu eshɨ nê, ‘Fɔ̧̀ Bèjuê’, à ghɨ̌ ngu shɨ wuê nê, ‘Mbê waa laꞋnê, ye wu Fɔ̧̀ Bèjuê.’ ”

²² Pȩlèt bɨ̀ɨ̀lè nê, “BetsiꞋa è nka tsi nkùbte àghɨa mâ shɨ la.”

²³ Mbɨ̀Ꞌɨ̀ bèshujà bu e wu̧u̧te Yesò a mbɨ̧̀ mbasa la, bɔ nɨ ndìte tò ngàbtè ane èdzìꞋ bekwì, shujà ègème nɨ àdziꞋ yeamɔꞋ. Bɔ ghɨ̀ ale, nɨ ndǐ èten tò mɨ̧̂, è wû ndǐ bɔ teme ka zi ntsəèꞋna e buꞋu àtsə e gha dzəa lə la.

²⁴ Bèshujà bu e shu abua bɔnyɨ bɔb nê, “Bà ka saã, bàa tsiꞋi màꞋà wuê èbìt, ndzǐ wòt tàa nɨ la.” A li ngu anè, mbɨ̀Ꞌɨ̀ ghɨ̌, ànəa Àkata Mbɔ̧ɔ̧mà a shu la aa te. Bɔ li shɨŋ nê, “Bɔ li ngàbtè ndǐ taã a kètsìà wɔb, è me wu ndǐ ègwet yaã, bɔ maꞋa ane èbìt.” Eyaa bê ngu àghɨa bèshujà bu e li ngɨ̀ la.

²⁵ Mbɨ̀Ꞌɨ̀ bɔ̀ɔ ngɨ̀à ale la, nyɨ̌ Yesò bɔ̂ wanyɨ vi, nè Màlià vi Klopà, ndɔ̀Ꞌ nè Màlià Màdàlin, bɔ wu a ngèt mbasa Yesò bɔ tɨ̧ɨ̧te la.

²⁶ Yesò yea nyɨ̌ vi bɔ̂ wakatè wu tàa nkɔ̀ŋkè la bɔ tɨ̧ɨ̧te a ngèt abot la, shu abua nyɨ̌ vi nê, “Mè, eyaa wu waã wè!”

²⁷ Mbɔ̂ mè shu abua wakatè wu nê, “Eyaa wu nyɨ̌ wè.” E bùꞋu àfɨꞋa mbɔŋ me ghà ne mbì, wakatè wu nɨa tò, bɔ̂ tò e tsiꞋi me tseke nɔ̂.

Èvə Yesò

²⁸ Yesò è ko nê ànəa àgème a mî, e nɨ ghɨ̌ ànəa Àkata Mbɔ̧ɔ̧mà a shu la aa te, tà nê “Àtɔŋ am a yu̧.”

²⁹ Akɨ̀ŋ ko e wu abot nè èwuu mèlùꞋ kǒ nàa nkȩ̀ta la a èbèm. Ale, bɔ nɨ a kùcha ntsèb a èbèm mbɔ̂ ndzi àtsəa ayɨ̌t kǒ bɔ̀ɔ ntɔ ne Isɔ̀b la, nkɔ̀ke a ètsəê tò.

³⁰ Yesò sɔɔte tà nê, “A mî”, mbɔ̂ nchùŋe àtsəa zi a si mpfə.

Bɔ sɔ̀ɔ̀bè àbâ mbɨ̧̀ a Yesò

³¹ Ndɨ̀ wu àli yu li ngu àlia bɔ̀ɔ ntàŋka ètsəꞋ aa tsi naa wu àliapfəèa nɨ̧ abua Bèjuê la, Bèjuê è ka wua nkɨà nê, bòt bu è tèꞋa mbɨ̧̀ mbasa àliapfəèa yɔb, ale bɔ shu abua Pȩlèt nê, bɔ̀ bəꞋte èka bɔb, mbɨ̀Ꞌɨ̀ shuke awɔb.

³² Bèshujà bu e kɨꞋɨ mbəèꞋte èka wòt mbì, mè ntsè mbəèꞋte èka wòt kǒ wu bɔ wu̧u̧te awɔb bɔ̂ Yesò ba a mbɨ̧̀ bèmbasa la.

³³ Bɔ̀ kɨꞋɨ ane Yesò bɔ ye nê tà pfəè tê ndɔ̀Ꞌ, ale bɔ̀ ka tsi mbəèꞋtè èka tò.

³⁴ Ka shujà ko bɔ̂ nɨ èghɔŋ sɔ̀ɔ̀bè àbâ mbɨ̧̀ a tò, àlo̧ bɔ̂ mèleb a bê me dzəâ.

³⁵ Wòt tà li ndzě ndɨ mènəè maa tsèà la, è làꞋa ànəa mùà mbɨ̀Ꞌɨ̀ bɨa bɨ̧ɨ̧ne mɨ̧̂. Mènəè maa tà shu la wu nkûŋ, tà mè nko nê, ye làꞋà nkûŋ mɨ̧̂.

³⁶ Mènəè maa li ngɨ̀ anè mbɨ̀Ꞌɨ̀ ànəa bɔ shɨ a èbem Àkata Mbɔ̧ɔ̧mà la aa te. Bɔ li shɨŋ nê, “Bɔ̀ ka li bəꞋə ka wuê àkwȩ atò yeamɔꞋ a.”

³⁷ Àkata Mbɔ̧ɔ̧mà a mê shu àdziꞋa ko nê, “Bɔɔ me eye atò wu bɔ sɔ̀ɔ̀bè la.”

Bɔ tu a Yesò

³⁸ Mbɨ̀Ꞌɨ̀ mènəè maa tsè la, Jòsêb, wòt Àlimàtià kɨ̀Ꞌɨ̂ shu abua Pȩlèt nè yea nkɨ enɨ àpfəꞋte Yesò. Jòsêb waa li ngu wakatè Yesò, ka me lò̧ò̧te, nkàà nê tà li ngua mbɔ̀ɔ bɔɔjuŋ Bèjuê. Tà shu ale, Pȩlèt bɨ̧̀ɨ̧̀ne, tà ghà shuke àpfəꞋta Yesò yu nɨŋ ngà etu.

³⁹ Nìkòdemòs wu tà li ngà ètsəꞋ ndzea Yesò la li ngà bɔ̂ Jòsêb mɨ̧̂. Me ghǎ mbèà èghɨbə ko bɔ ghɨ ane tèfəꞋte məə bɔ̂ alɔ̀s la. Èghɨbə mbɔŋ li ngu mbɔ̀ŋè bèkilò èghem yetat ntsɔ̀b batat.

⁴⁰ Bɔ̂ Jòsêb enɨ ndǐ ndèbte àpfəꞋta Yesò yu nè èghɨbə bu, mbɨ̀Ꞌɨ̀ Bèjuê àa ngɨ̀à ka ntua bèmpfəà bɔb la.

⁴¹ ÀdziꞋa mbȩ ko a li ngu a ngèt adzìꞋ yu bɔ wu̧u̧te a Yesò a mbɨ̧̀ mbasa la, nè èsî fi, kà bɔ li me zi wòt a èbèm.

⁴² Ndɨ̀ wu è li ngu àli yu bɔ̀ɔ ntàŋka ètsəꞋ aa tsi naa wu àliapfəèa Bèjuê, èsî lu è mè ngu a ngèt la, bɔ zì àpfəꞋta Yesò a èbèm.