Jɔ̌n 17 - Mundani

Yesò tsaꞋta Mbɔ̧ɔ̧mà àtsəa bòt bi

¹ Mbɨ̀Ꞌɨ̀ Yesò làꞋà mèngà̧ maa la, tà lɔ̀kè àvi ndȩ̀ ègwet nê: “Tê, àfɨ̀Ꞌ yu a kuêꞋ, ghɨa bòt è ye ènɨ̧ Waã wè, mbɨ̀Ꞌɨ̀ Waã wè naa ghɨ̌ bòt aa ye ènɨ̧ wê mɨ̧̂.

² Ghɨ̀ ale nkàà nê, à ŋa atò mètàŋ a ègwet bòt bàgème, nê tà ŋa mèmpème kàlìà abua bòt bu bàgème à ŋa abua tò la.

³ Mèmpème kàlìà maa wu nê, bòt è ko awê, àwɔ̀ wu à wu ndàꞋà Mbɔ̧ɔ̧mà tà wu yû̧ la, mè nkoa Yesò Klistò wu à tsàà la.

⁴ Mâ ghɨ̂ bòt e ye ènɨ̧ wê a sitsǎꞋ, na mâ paa àfàꞋ yu à li ŋa nê è ngɨa la.

⁵ È wu ale a Tè, ghɨa àfɨ̀Ꞌ yaa è mbɔ ènɨ̧ wu a ngèt yê, è wù ènɨ̧ wu e ndi mbɔŋ ka ngɔ̀ŋ naa li ewu la.

⁶ “Mâ ghɨ̂ bòt bu à làà wɔb ayɔɔ bòt ngɔ̀ŋ ŋǎ abua am la e ko awê. Bɔ li ngu bòt bê, ka à ŋà wɔb abua am, bɔ zə èngǎ̧ wè, mbê mè mbɨ̧ɨ̧nê nè èntɨ̧ɨ̧ wɔb wemɔꞋ.

⁷ Bɔ ko àfɨ̀Ꞌ yaa nê, ànəê àgème à zi a tèkitebu taã la a dzə abua yê.

⁸ Mâ shu awɔb mènəè mu à li ndzi a tèkitebu taã la, bɔ zə mùà nɔŋe a mèntɨ̧ɨ̧ mɔb, mè nko ane nkûŋ nê, e ndzə abua yê, mè mbɨ̧̀ɨ̧̀ne nê, àwɔ̀ ka à tsàà am la.

⁹ E ntsàꞋtà àwê anè, ane ànəa bòt bu à ŋa abua am la, nkàà nê bɔ wu bòt bê. È nka tsaꞋtà ane ànəa bòt ngɔ̀ŋ.

¹⁰ Bòt bu bàgème bɔ̀ wu èbɔ̧ la, wu èbê, è bu è wù bê la mè ngu èbɔ̧. Wu bɔ̀ɔ waa ka bɔ̀ɔ nyɨ̀Ꞌta àghɨa ènɨ̧ am è wu yùà la.

¹¹ E ngu anè ntsiꞋa sà ngɔ̀ŋ yaa ekɨꞋɨ kwene ane yê, ka bɔ bɔ̂ ngu àyɔb a si nga etèꞋa a ngɔ̀ŋ ŋaa. Lefɨ̀Ꞌ, àwɔ̀ wu à tsè bètǎt bàgème la leꞋ, baabe awɔb wu à ŋa abua am la ane mètàŋ mê, è wu mètàŋ mu à ŋa abua am la, mbɨ̀Ꞌɨ̀ bɔɔ tsiꞋi àghɨ yeamɔꞋ, mbɨ̀Ꞌɨ̀ ba nè è wu àghɨ yeamɔꞋ mɨ̧̂ la.

¹² Mâ nɨ mètàŋ mu à ŋa abua am la mbààbe awɔb ane àfɨ̀Ꞌ yu maa wu ba tò ba la. Maa bà̧à̧ wɔb ntsɔ̧̀ tè wòt ane yɔb ka nyɔ̂, tè è bəa wòt wu tà bɔ ndɨ tàa nyɔ la, mbɨ̀Ꞌɨ̀ e ghɨ̌ ànəa bɔ shɨ a èbem Àkata Mbɔ̧ɔ̧mà la aa te.

¹³ “E tsiꞋi alu̧ àfɨ̀Ꞌ yaa nkɨ̀Ꞌa abua yê, mbɔ̂ mbele a sitsǎꞋ ndàꞋà mènəè maa, mbɨ̀Ꞌɨ̀ mèngùꞋte naa nèète èlu̧ a mèntɨ̧ɨ̧ mɔb, mbɨ̀Ꞌɨ̀ è lu̧u̧ a wɔ̧ la.

¹⁴ Mâ shua wɔb èngǎ̧ wê ale, bòt ngɔ̀ŋ e me pààbè àwɔb ndɨ̀ wu bɔ ntsě àghɨ yeamɔꞋ nè bòt ngɔ̀ŋ wuê mbɨ̀Ꞌɨ̀ e ntsě àghɨ yeamɔꞋ nè bòt ngɔ̀ŋ la.

¹⁵ È nka shu̧u̧ta wê nê, tsì àwɔb a èbem ngɔ̀ŋ yaa, e shu̧u̧tà wuê nê baabe awɔb mbɨ̀Ꞌɨ̀ bɔ kwene a tèkitebu Satàn Wòt Kàbɔ̀ŋ.

¹⁶ Bɔ ntsě àghɨ yeamɔꞋ nè bòt ngɔ̀ŋ yaa wuê mbɨ̀Ꞌɨ̀ mmɔ̌ mbɔŋ e ntsě àghɨ yeamɔꞋ nè bòt ngɔ̀ŋ la.

¹⁷ TsiꞋ èngǎ̧ wê wu è wu nkûŋ la è ghɨa awɔb bɔ̀ tsiꞋi mbɨ̀Ꞌɨ̀ àwɔ̀ nkûŋ nkûŋ.

¹⁸ Mbɨ̀Ꞌɨ̀ à li ntsàà am a ngɔ̀ŋ la, wu ndɨ mmɔ̌ mbɔŋ mâ tsàà wɔb a ngɔ̀ŋ la mɨ̧̂.

¹⁹ Mâ ŋa am nènkèm abua yê ambo yɔb, mbɨ̀Ꞌɨ̀ èngǎ̧ wè wu è wû nkûŋ la aa ghɨ̌ bɔɔ tsiꞋi mbɨ̀Ꞌɨ̀ àwɔ̀ nkûŋ nkûŋ.

²⁰ “È nka tsàꞋte awê anè wu ane ànəa bòt bɔ̧ baa bɔ̀ɔ ndziꞋne. E ntsàꞋtà fɔ̀ɔ̀le ane ànəa bòt bu, bɔ̀ɔ zǐ èntɨ̧ɨ̧ wɔb ane yaã nkàà ànəa bòt bɔ̧ àa shu awɔb la.

²¹ Lefɨ̀Ꞌ, e ntsàꞋtà anè mbɨ̀Ꞌɨ̀ bɔ̀ɔgème aa tsiꞋi àghɨ yeamɔꞋ wuê mbɨ̀Ꞌɨ̀ à wu àghɨ yeamɔꞋ nè nà̧ e mè ngu àghɨ yeamɔꞋ nè nè la. Ghɨa bɔ̀ wu àghɨ yeamɔꞋ nè nà mbɨ̀Ꞌɨ̀ bòt ngɔ̀ŋ aa bɨ̧ɨ̧ne nê, àwɔ̀ ka à tsàà am la.

²² Mâ ghɨ̂ bɔ bɔ èwuu ènɨ̧ wu à li ŋǎ abua am la, mbɨ̀Ꞌɨ̀ bɔɔ tsiꞋi àghɨ yeamɔꞋ mbɨ̀Ꞌɨ̀ ba nè è wu àghɨ yeamɔꞋ la.

²³ Ndɨ̀ wu è ngu àghɨ yeamɔꞋ nè nɔ̀b, à mè ngu àghɨ yeamɔꞋ nè nà̧ la, tsiꞋ bɔ̀ paa ngu àghɨ yeamɔꞋ, mbɨ̀Ꞌɨ̀ e ghɨ̌ bòt ngɔ̀ŋ aa ko nê, àwɔ̀ ka à tsàà am la, e mě ko nê àà nkɔ̀ŋkà àwɔb, mbɨ̀Ꞌɨ̀ àa nkɔ̀ŋkà am la.

²⁴ “Lefɨ̀Ꞌ, maà nkɨà nê, bòt baa à ŋa abua am la, è li nkɨ̀Ꞌɨ̂ adzìꞋ yaa e nga la, mbɨ̀Ꞌɨ̀ eye ènɨ̧ am, è wu ènɨ̧ wu à li ŋa abua am, nkàà nê à li nkɔ̀ŋkè am, ka ngɔ̀ŋ naa li ebùꞋu la.

²⁵ “Lefɨ̀Ꞌ, àwɔ̀ wu mènəè mê tɨ̧ɨ̧ ndɨŋndɨ̀ŋ la, bòt ngɔ̀ŋ e bakà ko awê, ka e mbɔ̂ nko awê, bòt bɔ̧ baa e mè nko nê, àwɔ̀ ka à tsàà am la.

²⁶ Mâ ghɨ̌ bɔ ko wòt à wu wùà la, mè ngu ghɨ̌ bɔɔ me koa nɨa ngà nè mbì, mbɨ̀Ꞌɨ̀ bɔɔ me kɔ̀ŋkà am wuê a èlɨ̀ wu àa nkɔ̀ŋkà am la, e mě ghɨ̌ maa tsiꞋi àghɨ yeamɔꞋ nè nɔ̀b.”