Bìoball air-loidhne

Jɔ̌n 16 - Mundani

¹ “E shua wɨ̧ mènəè maa ègème anè mbɨ̀Ꞌɨ̀ bɨ tsì mèntɨ̧ɨ̧ mɨ̧ ane yaã.

² Bòt aa kɨ̀ŋè àwɨ̧ a èbem lobte Mbɔ̧ɔ̧mà etsǎ àbȩ. Ane nkûŋ, àfɨ̀Ꞌ àko aa nkɨ̀Ꞌa wòt bùŋà wɨ̧ ko taa mɨ̀ɨ̀te nê ye wua nkùkta Mbɔ̧ɔ̧mà ane àghɨa ye ghɨ̀à la.

³ Bɔɔ ghɨ̧̀ɨ̧̀nè àwɨ̧ anè nkàà nê bɔ bakà li mè ko a Tǎt am, bɔ̀ ka meè nko am.

⁴ Ka e shu awɨ̧ mènəè maa mbɨ̀Ꞌɨ̀ è lɔ̀Ꞌɔ è te bɨ ku̧u̧tè nê mâ yaŋe làꞋa ànəa mùà abua yɨ̧. E ndi è nka shu awɨ̧ mènəè maa àfɨ̀Ꞌ yu bɨ li mbùꞋ me kùŋè am la, nkàà nê ba nɨ̧̀ ba e li ngu nɔ̂.

ÀfaꞋa Fo Kèfə

⁵ “E ngu anè ngà abua wòt wu tà li ntsàà am la, mbɔ̂ wòt wɨ̧ ka lem mbììte laꞋnê, ‘À ghǎ nè ŋà?’

⁶ Ka ndɨ̀ wu mâ shua wɨ̧ mènəè maa la, tèsȩ te lu̧u̧ a mèntɨ̧ɨ̧ mɨ̧.

⁷ E ngua shua wɨ̧ nkûŋ nê, è ngà, ko naa wu ànəa ntsɔ̧̀ abua yɨ̧, nkàà nê e mbakà ghà, wòt wu tàa tɨŋe awɨ̧ la ka kɨꞋɨ, ka e ngà ko maa tsǎ atò abua yɨ̧.

⁸ Taa me ghɨ̀ tê nkɨ̀Ꞌɨ̂ nyɨ̀Ꞌte bòt ngɔ̀ŋ nê bɔ fà̧ àghɨa bɔ̀ɔ mɨ̀ɨ̀tà nê kàbɔ̀ŋ wu yùà la, ndɔ̀Ꞌ fà̧ àyea bɔ̀ɔ mɨ̀ɨ̀tà nê wòt tàa ngɨ̀à àghɨa Mbɔ̧ɔ̧mà nàa nkɨà la wu wùà la, mè fà̧ ane ndɨ bɔ̀ɔ mɨ̀ɨ̀tà nê Mbɔ̧ɔ̧mà naa li saꞋa bòt la.

⁹ Taa li nyɨ̀Ꞌte nê bɔɔ ngɨa kàbɔ̀ŋ nkàà nê, bɔ bakà zi mèntɨ̧ɨ̧ mɔb ane yaã.

¹⁰ Bɔɔ li eye àghɨa màngɨa àghɨa Mbɔ̧ɔ̧mà nàa nkɨà la wu yùà la, nkàà nê, e tsiꞋa nga abua Tǎt am, kà bɨ wu tsi eye am.

¹¹ Bɔɔ li mě eye èsaꞋa Mbɔ̧ɔ̧mà nkàà nê, Mbɔ̧ɔ̧mà saꞋa wòt wu tà wu àtsəa ngɔ̀ŋ yaa la tè ndɔ̀Ꞌ.

¹² “E mbela mbɔ̌ mènəè nyaŋ màa shua wɨ̧ la, ka bɨ̀ ka wu ko enɔ̀ŋe mùà ègème àtsəa yɨ̧ àfɨ̀Ꞌ yaa.

¹³ Fo Mbɔ̧ɔ̧mà yu nàa nyɨ̀Ꞌta nkûŋ la naa me ghɨ̀ tê nkɨ̀Ꞌɨ̂, ngɨ̀ bɨ ko nkûŋ ègème è dzə abua Mbɔ̧ɔ̧mà la, nkàà nê tà kà gha elàꞋa ànəa zi zìambɔŋ. Taa làꞋà wuê ànəa ye zə la, mè shu awɨ̧ mènəè nàa li ghɨ̀ la.

¹⁴ Taa kɨꞋɨ elɔ̀kè èlen laã a ègwet, nkàà nê taa zə ànəa mâ shu la e shu awɨ̧.

¹⁵ Àghɨ àgème Tǎt am bɔ la wu àyaã. Eyaa wu lə yu mâ laꞋ nê taa zə ànəa mâ shu la, e shu awɨ̧ la.

NgoꞋ nè MèngùꞋte

¹⁶ “AdzìꞋ naa me wù̧ù̧ne bɨ̀ ka tsi ndzè am; ka àdziꞋ mè ngu me wù̧ù̧ne bɨa ye am.”

¹⁷ Tà làꞋ ale bɔkatè tò ko e biite bɔnyɨ bɔb nê, “Tàa anè nko nê ye shua ne ghàà? Tà laꞋnê, adzìꞋ naa me wù̧ù̧ne bà kà tsi ndzèa vi, ka àdziꞋ bɔ̂ ngu mèe me wù̧ù̧ne baa ye avi. Tàa mè shua nê, ‘Ye tsiꞋa nga abua tǎt vi ale nko nê ye shua nê ghà à?’

¹⁸ AdzìꞋ naa me wù̧ù̧ne wàà tà shua la wu ne ghà à? Baa bakà lem nko ànəa tà shua la.”

¹⁹ Bɔɔ ndàꞋa ale, Yesò ko na bɔ̀ kɨ ebiite avi la. Ale, tà bììtè awɔb nê, “Tè bɨ wua ndàꞋà a kètsìà wɨ̧ anè nkɨ eko ànəê yu mâ yaã shu nê, ‘AdzìꞋ naa me wù̧ù̧ne bɨ̀ ka tsi ndzè am, ka àdziꞋ bɔ̂ ngu mèe me wù̧ù̧ne bɨa ye am la à?’

²⁰ Ane nkûŋ, tsiꞋ è shua wɨ̧ nê, bɨ bele me dɨ̌ mè shùà mèsi, ka bòt ngɔ̀ŋ e bɔ̂ ngu me wùꞋtè àwɔb; mèntɨ̧ɨ̧ mɨ̧ mè ngu me bɨɨ, ka mbɔ̂ ngu elɔ̀Ꞌɔ gheble etsiꞋa mbɔ̀.

²¹ Àvi nàa ngɨ̀ tà me lu̧u̧te a me saa atò, nkàà nê àfɨꞋa tò a kuêꞋ, ka tà me ghɨ̀ tê tà bi, tà kà tsi nkù̧ù̧te nê a wua saa avi, nkàà mèngùꞋte mu nàa a èntɨ̧ɨ̧ tò nê tà bi waã vi a ngɔ̀ŋ ŋaa la.

²² Wu wuê ndɨ bɨ̀ wu ane tèsȩ àfɨ̀Ꞌ yaa la. Ka maa me ghɨ̀ tê mè ndzè àwɨ̧, mèntɨ̧ɨ̧ mɨ̧ lu̧ ne mèngùꞋte. Eyaa èwuu mèngùꞋte mu betsiꞋa wòt kà ko ntsì mùà a mèntɨ̧ɨ̧ mɨ̧ la.

²³ Àlia mbɔŋ aa li nkùꞋ bɨ̀ ka tsi mbììte ànəê nè abua am. Ane nkûŋ, tsiꞋ è shua wɨ̧ nê, àghɨ àgème bɨ lo̧ abua tǎt la, taa ŋa abua yɨ̧ ane èlen laã.

²⁴ E kɨꞋɨ dzəè àfɨ̀Ꞌ yaa bɨ bakà lo̧ àghɨa ane èlen laã. Bɨ̀ lo̧, ko Mbɔ̧ɔ̧mà naa ŋa, tê mèngùꞋte naa lu̧ a mèntɨ̧ɨ̧ mɨ̧.

²⁵ “Maa ndàꞋà mènəè maa ane mèngà̧teme, ka àfɨ̀Ꞌ àko aa me kùꞋu è nka tsi ngua ndaꞋa abua yɨ̧ ane mèngà̧teme. ÀfɨꞋa ngaa maa tsiꞋi me ghaꞋte mènəè ane ànəa Tǎt am è shua wɨ̧.

²⁶ Naa li ngu ane àlia mbɔŋ bɨ lo̧ àghɨa bɨ lo̧a la ane èlen laã. E ntsea shua abua yɨ̧ nê, maa li me lo̧ àghɨa ko abua Tǎt am ambo yɨ̧,

²⁷ nkàà nê Tǎt am yaŋe wua nkɔ̀ŋkà àwɨ̧, ndɨ̀ wu bɨ̀a mbɔŋ ekɔ̀ŋkè am, mè mbɨ̧̀ɨ̧̀ne nê e ndzəa abua tò la.

²⁸ E ndi ndzə abua Tǎt am ka nkɨ̀Ꞌɨ̂ a sitsǎꞋ, mè ngu anè ntsìꞋa sà sitsǎꞋ ewène abua tò.”

²⁹ Bɔkatè tò e shu abua tò nê, “E wu la, à tsiꞋa ngàꞋta mènəè àfɨ̀Ꞌ yaa shua wa, àà kà tsi ndàꞋ ane mèngà̧teme;

³⁰ Ba ko àfɨ̀Ꞌ yaa nê à ko èghɨ ègème, tè wòt kà lem tsi mbɔ̌ ndɨ tàa mèe me biite àwê ànəa ko kà à shu atò la. Àyaa a ghɨ̂ ba bɨ̧ɨ̧nè nê, à dzəa abua Mbɔ̧ɔ̧mà.”

³¹ Yesò bɨ̀ɨ̀lè nê, “Tè bɨ zì mèntɨ̧ɨ̧ mɨ̧ ane yaã àfɨ̀Ꞌ yaa à?

³² Àfɨ̀Ꞌ a bele kùꞋu, a bɔ̂ kùꞋ tè ndɔ̀Ꞌ, bɨ̀a lùùlà am bàgème e ghǎ a èpfəè bɨ̧ tè maa tsiꞋi mmɔ̌ ndziꞋne la, ka è nka wu mmɔ̌ ndziꞋne nkàà nê e ngu ba Tǎt am.

³³ “E shu awɨ̧ mènəè maa ègème mbɨ̀Ꞌɨ̀ bɨa bɔ àlàŋkè a mèntɨ̧ɨ̧ mɨ̧ ndɨ̀ wu ba nɨ̧̀ ba è tsiꞋi àghɨ yeamɔꞋ la. Ngɔ̀ŋ naa ghɨ̌ bɨa ye ngoꞋ kèkweelè. Ka mèntɨ̧ɨ̧ mɨ̧ ka mbèntê nkàà nê mâ nù tè ntsòkè mètàŋ ngɔ̀ŋ yaa.”

« Roimhe

Air adhart »

Lean sinn:

Ceanglaichean taic

Sanasan