Bìoball air-loidhne

Gàlashìà 6 - Mundani

Nɨ ànəa wanyɨ wè mbɨ̀Ꞌɨ̀ àyê

¹ Bɔnyɨ bɔ̧, bɨ̀a wu bɨa ngȩ̀ȩ̀nà mbɨ̀Ꞌɨ̀ Fo Mbɔ̧ɔ̧mà nàa nkɨà la, bɨ yea wòt ngɨa kàbɔ̀ŋ la, bɨ bɔɔle awɨ̧ nkɨ̀ɨ̀te atò bò̧ bò̧. Ka bɨ̀ me ghɨ̀ ale bɨ me baabe awɨ̧ mbɨ̀Ꞌɨ̀ ka bɨ kwen a èbem kàbɔ̀ŋ mɨ̧̂.

² Bɨ̀ me ŋeꞋe ètoole bɔnyɨ bɨ̧ nɨ̀a nyɨ̀Ꞌta nê bɨa ngɨ̀à mbɨ̀Ꞌɨ̀ mbɨ̧ Yesò Klistò shu la.

³ Wòt me mɨ̀ɨ̀te nê ye wu àghɨa ko, kà lem ngu àghɨ, tà wua fɨ̀ta avi zìambɔŋ.

⁴ Ka waa waa saꞋa vi ndze nê kò mènəè mi kùꞋu e me yèa me ŋeꞋe tèkwȩ ti a ègwet la leꞋ. Tà ka me fɨ̀Ꞌnè àvi ane wòt kǒ tsa.

⁵ Aa anè nkàà nê waa waa bɔ ndɨ tàa bòꞋa àbòꞋà zi zìambɔŋ la.

⁶ Wòt wu bɔ̀ɔ nyɨ̀Ꞌte atò èngǎ̧ Mbɔ̧ɔ̧mà la è bɔ ndɨ tàa me ghàbtè èghɨ bi ŋǎ àbəèꞋ abua nyɨꞋtà vi la.

⁷ Ko mbɨ̀Ꞌɨ̀ wòt fɨ̀te awɨ̧. BetsiꞋa wòt kà wȩȩte a Mbɔ̧ɔ̧mà. Àghɨa wòt liꞋi la, wu wuê yùà yu tàa li efùꞋù la.

⁸ Aa ale nkàà nê, wòt me ghɨ̀ àghɨa mbɨ̧̀ ènyit tò nàa nkɨà la, ko àbȩ̀ atò naa li wu èvə, è me wu wòt wu tàa ngɨ̀à àghɨa Fo Mbɔ̧ɔ̧mà nàa nkɨà la, àbȩ̀ atò wu mèmpème kàlìà.

⁹ Ale, bà ka nkaã a màngɨa ntsɔ̧̀ nkàà nê, àfɨ̀Ꞌ aa ghɨ̌ nkùꞋ, ba bɔ àbȩ̀ aya, na è me wu ale ba bakà kaã la.

¹⁰ È wu ale, àfɨ̀Ꞌ àgème èlu̧ e dzə a si ndɨ betsiꞋa ba ghɨa ntsɔ̧̀ ane wòt ègème la, ba ghɨ̀. È bɔ è me wu bɔnyɨ ba bu bɔ zì mèntɨ̧ɨ̧ mɔb ane Yesò la ba ghɨa ntsɔ̧̀ ane yɔb tè ntsè.

MèntsàꞋte enɨ lìa

¹¹ Bɨ̀ ye mèngà̧ maa nàa fàŋka la, mâ nɨ àbu am mmɔ̌ mbɔŋ shɨŋ la.

¹² Wu bòt bu bɔ̀ɔ nɨ̀a èghɨ nàbȩ̂ nkɨ enyɨꞋte nê bɔ ghe la ka nkɨ eŋwèèlè àwɨ̧ nê bɔ̀ naŋe awɨ̧ la. NdàꞋ lə bɔ ghɨ ale la wu mbɨ̀Ꞌɨ̀ bòt e me kɨ àtsə ayɔb enɨ nê bɔɔ̀ ndàꞋà ndɨ Yesò Klistò li mpfə a mbɨ̧̀ mbasa la.

¹³ Ka è màà ngu wuê bòt bu bɔ naŋe awɔb la, ko bɔɔ̀ kà lem ngɨ̀ mbɨ̀Ꞌɨ̀ mbɨ̧te Musì te kɨa la, mbɔ̂ bɔ me kɨ nê bɔ̀ naŋe awɨ̧ mbɨ̀Ꞌɨ̀ bɔɔ me wùꞋtè àwɔb ane àghɨa bɨ ghɨ̀ ane mbɨ̧̀ ènyit yɨ̧ la.

¹⁴ Ka betsiꞋa mmɔ̌ mbɔŋ è nka wuꞋte am ane ànəa ko tsa kà wu mbasa wu Yesò Klistò Lefɨ̀Ꞌ wa li pfə adù̧ la. Èvə tò e li ngɨ̀ e mpfə àghɨ a ngɔ̀ŋ yaa, ngɔ̀ŋ yaà mè mpfə àghɨ am.

¹⁵ Kò bɔ naŋe wòt kò bɔ bakà naŋe leꞋ, ko àyu ntsě ànəê. NdàꞋ àyea è wu ànəê la wu ndɨ wòt nàa tsiꞋi wòt fi la.

¹⁶ Maà ntsàꞋtà nê Mbɔ̧ɔ̧mà ŋa àlàŋkè, mè nkù tèsȩte bòt bɔ̀ɔ ngɨa èlɨ̀ waa la, fɔ̀ɔ̀lè ne bòt Mbɔ̧ɔ̧mà bàgème.

¹⁷ Enɨ lìa, tsiꞋ è shu awɨ̧ nê, e bùꞋu àfɨ̀Ꞌ yaa me ghà ne mbì, wòt ka tsi ŋǎ am ngoꞋ, nkàà nê mâ bɔŋ èlȩê Yesò a mbɨ̧̀ yaã.

¹⁸ Bɔnyɨ bɔ̧, maà ntsàꞋtà nê Yesò Klistò Lefɨ̀Ꞌ wa è me nyɨꞋte a ntsɔ̧̀ vi abua yɨ̧, mè baabe awɨ̧. Àmèn.

« Roimhe

Air adhart »

Lean sinn:

Ceanglaichean taic

Sanasan