Filìpȩ 4 - Mundani

Nkɨ̀atsə

¹ Mbɨ̀Ꞌɨ̀ àa anè la à bɔnyɨ bɔ̧, maà nkɔ̀ŋkà àwɨ̧, mè ndâ me kɨ eye awɨ̧. Bɨà ngɨ̀à èntɨ̧ɨ̧ am e bɔ̀, e mè me wu̧u̧ nkùꞋ yaã nkàà wɨ̧. Ngule bèshu̧ bɔ̧, mbɨ̀Ꞌɨ̀ àa anè la, bɨ̀ baãaã ànəa Tè Yesò me kweele.

² Maà shù̧ù̧ta awê à Èyodià bɨ Sintichè nê, bɨ̀ wu ane ètsəê wemɔꞋ ndɨ̀ wu bɨ̀ wu bòt Yesò la.

³ Mè me shu abua yê, shu̧ yaã wafàꞋ ba nè àa fàꞋà nɔ̂ la nê, à tɨŋe bèzi baa mpaâ nèètè ànəa yɔb. Ba tò ba nè Klemin, nè bòt ko bu bàgème bɔ li ngua nkùŋà àwa la e li ntaꞋa fàꞋà a màntsɔta Ntu̧ Ntsɔ̧̀. Mbɔ̧ɔ̧mà shɨ tèlen tɔb bɔ̀ɔgème a èbem àkata mèmpème.

⁴ Bɨ̀a wu bɨ̀ wu bòt Tè Yesò la, bɨ̀ me wùꞋtè àwɨ̧ àfɨ̀Ꞌ àgème. TsiꞋ è mèe shu awɨ̧ nê, bɨ̀ wùꞋtè àwɨ̧.

⁵ Bɨ̀ me yu ane mènəè mɨ̧ a mbì waa waa mbɨ̀Ꞌɨ̀ nê Tǎt wa bele yàŋe ekɨꞋɨ.

⁶ Ko mbɨ̀Ꞌɨ̀ èntɨ̧ɨ̧ wòt e bentè ane ànəa ko. Ka bɨ̀ me tsàꞋte a Mbɔ̧ɔ̧mà àfɨ̀Ꞌ àgème, ŋǎ mènkɔ̀ŋke abua tò mè ndò̧a àghɨ àgème bɨ̀a nkɨ̀a la abua to.

⁷ Bɨ ghɨ̀ ale ko Mbɔ̧ɔ̧mà naa ŋa awɨ̧ àlàŋkè a tsè ayea betsiꞋa wɔ̀bȩ̂ koê la, aa kaba mèntɨ̧ɨ̧ mɨ̧, nè mèmɨ̀ɨ̀te mɨ̧ mbɨ̀Ꞌɨ̀ àghɨa ko a ghɨ̀ adù̧, ndɨ̀ wu bɨ Yesò Klistò ba è tsiꞋi àghɨ yeamɔꞋ la.

⁸ Bɔnyɨ bɔ̧, ànəa e nkɨ elìa eshu awɨ̧ la wu nê, bɨ̀ me mɨ̀ɨ̀tè wuê mènəè è wû nkûŋ la, nè mènəè bòt àa nkùkta la, mè nè mènəè è kùꞋù la. Bɨ̀ me mɨ̀ɨ̀te mènəè kà ye àŋɔꞋte adù̧, nè mènəè nàa mbɔ̀, bòt e mè me kɔ̀ŋke la. Èghɨ bu e taꞋa wua mbɔ̀, bòt e mè me wùꞋte bùà la wu èbe bɨ̀a me mɨ̀ɨ̀tè la.

⁹ Bɨ̀ me ghɨ̀ mènəè mu mâ nyɨꞋte awɨ̧ mè ndzì à tèkitebu tɨ̧ la, nè mènəè mu bɨ li ndzə a ètsəê am mè ndzě ndɨ e ngɨ̀à la. Bɨ ghɨ̀ ale, ko Mbɔ̧ɔ̧mà wu tàa ŋàa awa àlàŋkè la naa wu ne nɨ̧̀.

Pɔ̂l è kɔ̀ŋkè àwɔb ane àghɨa bɔ li ŋa abua zi la

¹⁰ Maà ngùꞋtà am ànyaꞋne mè nkɔ̀ŋkà Tè Yesò Klistò nkàà nê, bɨ mee mbùꞋ tè me tɨŋe am mbɨ̀Ꞌɨ̀ bɨ li ndâ ngua ngɨ̀à la. È nka shua nê, bɨ li ndèènè am, wu nê èlu̧ e li è ka wuê bɨ̀a tɨŋe am la.

¹¹ Ko mbɨ̀Ꞌɨ̀ e me shu anè, wòt kǒ mɨ̀ɨ̀tè nê maà mbùa àghɨa ko. A nyi àtsə am nê, àghɨa mâ bɔ la à kùꞋ am.

¹² Mâ ko ndɨ betsiꞋa e ntsèke àfɨꞋa è mbaka bɔ àghɨ la, mè nko ndɨ betsiꞋa e ntsekè àfɨꞋa mâ bɔ nyaŋ la. Mâ ko ntsèm yaa mbɨ̀Ꞌɨ̀ è maa è ngà wuê a ka àdziꞋa, ka wuê a ka àfɨ̀Ꞌ leꞋ, mâ bɔ àghɨ kò è mbaka bɔŋ la, e nko ntsèkê. Kò ndzì taã teà nkua, kò teà kà ku leꞋ, ko maa tseke ale.

¹³ BetsiꞋa e nko ngɨ̀ àghɨ àgème, nkàà mètàŋ mu Yesò Klistò nàa ŋǎ abua am la.

¹⁴ Mâ batè ndàꞋ anè, mbɔ̂ ntaꞋa kɔ̀ŋkè àwɨ̧ ndɨ̀ wu bɨ tɨŋe am àfɨ̀Ꞌ yaa è ngu a ngoꞋ la.

¹⁵ Bɨ̀a bòt Filìpȩ e ko nê, e ndi sà àbâ àlaꞋ a Màsèdonìà ane èli mbì bu màa ntsɔ̀tà Ntu̧ Ntsɔ̧̀ yu la ale, bɨ wu ndàꞋà chɔsì è li ntɨ̀ŋe am la. Wu wuê ba nɨ̧̀ ba, ba li ngua ngàbtà èghɨ bàa nkɨ̀ŋkà la.

¹⁶ È li nguê fɔ̀ɔ̀le àfɨ̀Ꞌ yu e ndi ngua Tèsàlonikà la, bɨ me ntsàà èghɨ màa nkɨ̀ŋkà la abua am a ngo̧ a ngò̧.

¹⁷ È ntsě wuê èghɨ bu bɨ li ntsaa abua am la ka èntɨ̧ɨ̧ am àa adù̧ la. Àghɨa àa ngɨ̀à èntɨ̧ɨ̧ am e bɔ̀ kwàꞋ ànyaꞋne la wu èghɨ bu bɨ̀a ngɨ̀à, àa ghɨ̌ Mbɔ̧ɔ̧mà naa kwèꞋne àbȩ̀ a yɨ̧ la.

¹⁸ E ngu anè nkɨ eshu awɨ̧ nê, mâ ye èghɨ bu ègème bɨ tsàà Èpaflɔ̀ditùs tà nɨŋ nkɨ̀Ꞌɨ̂ la, e bɔ̂ ndzà̧ tê me bəèꞋtè am. Èghɨ ngaa bu aà mbɨ̀Ꞌɨ̀ àghɨa àa mbɔ̀ bɔ tô̧ a me nəꞋə àghaa ntsɔ̧̀ nkɔꞋɔ nga a ègwet Mbɔ̧ɔ̧mà naa nɨ la.

¹⁹ Mbɔ̧ɔ̧mà am naa nɨ èghɨ kèfɔ̧̀ vi eŋa èghɨ ègème bɨ̀a nkɨ̀ŋkà la kà kuꞋte àbu, ndɨ̀ wu bɨ Yesò Klistò ba è tsiꞋi àghɨ yeamɔꞋ la.

²⁰ TsiꞋ mèngùꞋte wu abua Tǎt wa Mbɔ̧ɔ̧mà ane àlia nè àlia. Àmèn.

MèntsàꞋte enɨ lìa

²¹ Bɨ̀ tsàꞋte bòt Mbɔ̧ɔ̧mà bu bàgème bɔ̀ tsiꞋi àghɨ yeamɔꞋ bɔ̂ Yesò Klistò ba la. Bɔnyɨ ba bòt Yesò bu bɔ̀ wu a si ŋàa nè nà̧ la aà ntsàꞋtà wɨ̧.

²² Bòt Mbɔ̧ɔ̧mà bu a si ŋàa la bàgème e tsàꞋtè àwɨ̧ mɨ̧̂, tè mpàâ ngu èbu a ntɔꞋɔ empelɔ̀ la.

²³ Maà ntsàꞋtà nê, Yesò Klistò Lefɨ̀Ꞌ è me nyɨꞋte a ntsɔ̧̀ vi abua yɨ̧ bɨ̀agème mè ngu nè nɨ̧̀.