Filìpȩ 3 - Mundani

Ngule màntɨ̧ɨ̧ ndɨŋndɨ̀ŋ e mbì Mbɔ̧ɔ̧mà

¹ Bɔnyɨ bɔ̧, ànəa e nkɨ lìa eshu awɨ̧ la wu nê, bɨ̀ wùꞋtè àwɨ̧ ndɨ̀ wu bɨ Yesò Klistò ba è tsiꞋi àghɨ yeamɔꞋ la. E màà me shɨ wuê mènəè mu e ndi shɨŋ abua yɨ̧ la, à ka lem sàà am. E mè shɨa mùà, ko nàà ngà ekele mbɨ̀Ꞌɨ̀ ànəa kàbɔ̀ŋ a ye awɨ̧.

² Bɨ̀ me ko awɨ̧ ane bòt kàbɔ̀ŋ bu bɔ̀ wu mbɨꞋɨ̀ babə bɔ̀ɔ ŋwèèla shua nê bɔ naŋe wòt mbɨ̀Ꞌɨ̀ mbɨ̧te Bèjuê tèa shua la, ka tà bɔ̂ ngu wòt Mbɔ̧ɔ̧mà la.

³ Bàa ka bà wu ngule bòt Mbɔ̧ɔ̧mà la. Aa anè nkàà nê wu Fo Mbɔ̧ɔ̧mà ka è ŋa awa mètàŋ ba me tsàꞋte atò la, ba mè ngua ngùꞋtà àwa ndɨ̀ wu ba Yesò Klistò ba è tsiꞋi mbɨꞋɨ̀ àghɨ yeamɔꞋ la. Mèntɨ̧ɨ̧ ma ntsě ane èghɨ bu bɔbȩ àa ngɨa ane mɔb ne mètàŋ la.

⁴ Èghɨ mbɔŋ wu èghɨ mâ ghɨ̀ ale ngua nkɨ ewu̧u̧ nkùꞋ yaã adù̧ ko maa ndâ ngù̧a la. Wòt kǒ mɨ̀ɨ̀tà nê betsiꞋa ye me ŋeꞋe avi a ègwet ane èghɨ mbɔŋ, tà ko nê mâ tse atò ane bùà.

⁵ Bɔ li mbi am, è me wu kwàꞋ ane èli befà̧aã bɔ naŋe am. E ngu wòt Izəèlȩê mâ dzə àndǎ̧ Benjamèn la. E ngu wòt Ebùlù ane èbâ ègème. È wu nè, mànɔŋa mbɨ̧te Bèjuê, ko e ndi ngua ngɨ̀à mènəè mbɨ̀Ꞌɨ̀ Bèfalèsiì.

⁶ Ànəa mbɨ̧te Bèjuê a li ngu àtsə am tè e me gheeba nkɨà àtsəa bòt chɔsì enɨ. È wu ànəa màntɨ̧a ndɨŋndɨ̀ŋ a mbì Mbɔ̧ɔ̧mà mbɨ̀Ꞌɨ̀ mbɨ̧te Bèjuê tèa nkɨà la, ko e ndi è nka ghɨ̂ àghɨa ko bòt àa fèèlè am adù̧ la.

⁷ Ka èghɨ mbɔŋ bu e ndi ngua ndzèa mbɨ̀Ꞌɨ̀ àbȩ̀ la, e te ntsě èghɨ abua am àfɨ̀Ꞌ yaa, ndɨ̀ wu màa nkɨ eko a Yesò Klistò la.

⁸ Ane nkûŋ, è ndem ntsě wuê ndàꞋ èbùà. Mâ ntsiꞋa ndzèa èghɨ ègème àfɨ̀Ꞌ yaa mbɨ̀Ꞌɨ̀ e te ntsě èghɨ, mbɨ̀Ꞌɨ̀ e lâ eko wòt Tǎt am Yesò Klistò wû wùà la. Àyaa a bɔ̀ tê ntsè èghɨ tsa bu ègème. Mâ sǎ èghɨ bu ègème e ndi ngua ngɨ̀à la nkaa atò. Mâ ntsiꞋa ndzèa èghɨ ngaa ègème mbɨ̀Ꞌɨ̀ tabtsə, mbɨ̀Ꞌɨ̀ è ngu e tsiꞋi wuê ba Yesò Klistò,

⁹ e mě lâ etsiꞋi àghɨ yeamɔꞋ ba tò. Mmɔ̌ mbɔŋ e mbakà tsi ntɨ̧ɨ̧ ndɨŋndɨ̀ŋ e mbì Mbɔ̧ɔ̧mà nkàà mbɨ̧te Bèjuê tu màa nkùŋà la. Mâ tsiꞋi tɨ̧ɨ̧ ndɨŋndɨ̀ŋ a mbì Mbɔ̧ɔ̧mà àfɨ̀Ꞌ yaa nkàà nê mâ zǐ èntɨ̧ɨ̧ am ane Yesò Klistò.

¹⁰ NdàꞋ àghɨa è ntsiꞋa nkɨ̀a la wu nê, è ndâ nko a Yesò Klistò, mè bɔ mètàŋ mu tà li mbɔ̀ mbɨꞋɨ̀ wòt tà yu̧u̧me la. Maà nkɨ kùŋe atò eye ngoꞋ mɨ̧̂, e mě pfə nkàà nê tà li mpfə mɨ̧̂.

¹¹ Maà nkɨ e ghɨ̌ ale mbɨ̀Ꞌɨ̀ Mbɔ̧ɔ̧mà naa li eyu̧u̧me am ayɔɔ bèmpfəà eŋa am mèmpème.

Mànduula eghà nè mbì

¹² BetsiꞋa è nka shu nê mâ ghɨ àghɨa mâ bɔ ndɨ màa ghɨ̀ la tè ndɔ̀Ꞌ, è nka meè ngu eshu nê mâ kùꞋù àghɨa mâ bɔ ndɨ màa wu yùà la. Ka, maa ndùùlà ngà nè mbì mbɨ̀Ꞌɨ̀ ebɔ èghɨ bàa mâ nɔ̀ŋè èghɨ laã adù̧ la, è wù àghɨa a li ngɨ̀ ka Yesò Klistò zìambɔŋ tɔ am ane wòt vi la.

¹³ Bɔnyɨ bɔ̧, mâ kwaꞋtè nê e mbakà luula te eghǎ ewu adzìꞋa màa bɔ èghɨ bàa la. NdàꞋ àghɨa màa ngɨ̀à la wu nê, maa kà tsi ndɨ̀ŋkè àghɨa a tsè tê ndɔ̀Ꞌ la, mâ tsiꞋa ndɨ̀ŋkà wuê àyea à wu ne mbì la.

¹⁴ Maà ŋwèèlà ngà wuê nè mbì, mbɨ̀Ꞌɨ̀ à gha à me lìa, e mbɔ àghɨ yu, è wù mèmpème mu Mbɔ̧ɔ̧mà tɔ am nê è nkɨꞋɨ a ègwet mbɔŋ ndɨ̀ wu ba Yesò Klistò è tsiꞋi àghɨ yeamɔꞋ la.

¹⁵ A bɔ̂ŋ nê, bàa wu ba tsə tê ntsìꞋi bɔɔjuŋ ane èngǎ̧ Mbɔ̧ɔ̧mà la è me kwàꞋtè mènəè ane èlɨ̀ waa. Mbə è wu nê bòt ko ane yɨ̧ aà nkwàꞋtà èlɨ tsa, ko Mbɔ̧ɔ̧mà naa ghaꞋte ètsə bɔb.

¹⁶ A màà ngu wuê nà leꞋ, ko bɨ̀ tsiꞋ bà ghȩ̀ȩ̀nè wuê ane alu̧ wu baa wua ndzìà ngȩ̀ȩ̀nà te kɨꞋɨ ewu àfɨ̀Ꞌ yaa la.

¹⁷ Bɔnyɨ bɔ̧, waa waa nɨ àka lèghȩ̀ȩ̀nè àzi ane yaã. Bɨ̀ me lɨ̀ŋke bòt bu bɔ̀ɔ ngɨ̀à ntsɔ̧̀ anè la, na ba tò ba e nyiꞋte awɨ̧ ndɨ bɨ wu me ghȩ̀ȩ̀nè la.

¹⁸ Mâ taꞋa elàꞋa èngà̧ waa abua yɨ̧, mè ngu anè nkɨ me làꞋa ne mèsi àghɨ am. Nê, bòt ko aà və a kètsìà wɨ̧, bɔ̀ɔ ngɨ̀à mènəè mɔb mbɨ̀Ꞌɨ̀ bòt bɔ̀ɔ mpaaba ezə nê Yesò Klistò li mpfə a mbɨ̧̀ mbasa la.

¹⁹ Bɔɔ li nyɔ, nkàà bɔ nɨ èghɨ mbɨ̧te ènyit tɔb tèa nkɔ̀ŋkà la ngɨ̀ e tsiꞋi mbɨ̀Ꞌɨ̀ mbɔ̧ɔ̧mà. Bɔɔ ngɨ̀à tè ngù̧a nkùꞋ tɔb ane àghɨa ètsə bɔb e wu me kɔꞋɔ adù̧ la. Bèŋût aà nkwàꞋtà wuê èghɨ ngɔ̀ŋ yaa.

²⁰ Ka è wu awa, ko àpfəa ya a wu nè kèfɔ̧̀ Mbɔ̧ɔ̧mà. Baa nchɨ̀Ꞌà nê Yesò Klistò Lefɨ̀Ꞌ, Mpemnà wa chu a ègwet və nkwène ane ya.

²¹ Taa li nkɨ̀Ꞌɨ̂, nɨ̀ mètàŋ kèkweelè mi mu tàa nɨ e ghɨ̌ àghɨ àgème aa tsiꞋi a èten tò la, enɨ ghɨ̌ mbɨ̧te ènyit ta tàa tèa fìà la, tea kubte etsiꞋi mbɨ̀Ꞌɨ̀ ngule ye tò.