Fȩlemùn 1 - Mundani

¹ Letà Pɔ̂l, wòt tèfȩ ane ànəa Yesò Klistò, bɔ̂ Tɔ̀màtià wanyɨ wa, Abua Fȩlemùn ngule shu̧ ya ba tò àa fàꞋà nɔ̂ la.

² Ba shɨa fɔ̀ɔ̀le abua wanyɨ waa waàvi wu è wu Afìà bɔ̂ Achipùs wu ba tò ba àa fɔ̀ta nua ane ànəa Yesò la, nè bòt chɔsì bu bɔ̀ɔ mbu̧u̧te a lob tò la.

³ Nê, Tǎt waa Mbɔ̧ɔ̧mà bɔ̂ Yesò Klistò Lefɨ̀Ꞌ è me nyɨꞋte a ntsɔ̧̀ wɔb abua yɨ̧ mè ngɨ̀ bɨ̀ bɔ àlàŋkè a mèntɨ̧ɨ̧ mɨ̧.

Èkɔŋ Fȩlemùn nè èntɨ̧ɨ̧ tò ane Mbɔ̧ɔ̧mà

⁴ Màa ngɨ̀ e me tsàꞋte Mbɔ̧ɔ̧mà am àfɨ̀Ꞌ àgème, è ku̧u̧te awê, e ŋa mènkɔ̀ŋke abua tò.

⁵ Màa ngɨ̀ e ngua ngɨ ale nkàà nê, mâ zə ndɨ àa nkɔ̀ŋkà bòt Mbɔ̧ɔ̧mà bàgème la, mè ndzə ndɨ à zi èntɨ̧ɨ̧ wê ane Yesò Lefɨ̀Ꞌ la.

⁶ Maà ntsàꞋtà nê, mbɨ̀Ꞌɨ̀ àa nèètà ndàꞋà ànəa èntɨ̧ɨ̧ wu à zi ane Yesò la abua bòt la, àà nga enèète ko àghɨa ntsɔ̧̀ àgème èntɨ̧ɨ̧ wu à zi ane Yesò Klistò la, e ghɨ ba bɔŋ la.

⁷ Wanɔ̧, èkɔŋ wu à bɔŋ ane bòt Mbɔ̧ɔ̧mà la e taꞋa lɔ̀kte èntɨ̧ɨ̧ am, mè ngɨ̀ e ntaꞋa bɔ mèngùꞋte, nkàà nê à ghɨ mèntɨ̧ɨ̧ bòt Mbɔ̧ɔ̧mà me bɔ̌.

Pɔ̂l shù̧ù̧ta Fȩlemùn ane ànəa Ònesìmùs

⁸ Mbɨ̀Ꞌɨ̀ àa nè la, mâ batè ngu ko eŋwèèle awê mbɨ̀Ꞌɨ̀ wanyɨ wè ane Yesò Klistò aa ghɨ̀ àghɨa à bɔ̂ ndɨ àa ghɨ̀ la,

⁹ ka e ngu anè ntsìꞋa shù̧ù̧te awê shù̧ù̧te nè èkɔŋ. Mmɔ̌ Pɔ̂l, maà ngɨ̀à àyaa anè mbɨ̀Ꞌɨ̀ wòt tà tɨ̧ɨ̧ ane èlen Yesò mbɔ̂ ngu àfɨ̀Ꞌ yaa fȩ ane ànəa tò la.

¹⁰ E ngua shù̧ù̧te awê ane ànəa waã am Ònesìmùs wu mâ tsiꞋi tǎt tò ane Yesò mbɨ̀Ꞌɨ̀ e ngu a tèfȩ anè la.

¹¹ Tà lɔ̀Ꞌ ngu àghɨ aku abua yê, ka nè àfɨ̀Ꞌ yaa, tà lâ ntsìꞋi wòt betsiꞋa tà tɨ̀ŋe awê mè ntɨŋe am la.

¹² E ngua anè mvəèà tò wu tà tsiꞋi kwàꞋ èntɨ̧ɨ̧ am la abua yê.

¹³ È wu nè nà̧ ko mâ kɔ̀ŋkè nê tà tseke ba tò àdziꞋ yaa e ngu a tèfȩ ane ànəa Ntu̧ Ntsɔ̧̀ la, me tɨŋe am mbɨ̀Ꞌɨ̀ àwɔ̀ mbɔŋ à wu etɨŋe la.

¹⁴ Ka maa kà kɨ ghɨ̌ kà à bɨ̧̀ɨ̧̀ne mbɨ̀Ꞌɨ̀ à me ghɨa ntsɔ̧̀ a tsiꞋi fəə ngaa mbɨ̀Ꞌɨ̀ bɔ ŋwèèlè awê ŋwèèle, à wuê ghɨ̀ wuê mbɨ̀Ꞌɨ̀ èntɨ̧ɨ̧ wê e kɔ̀ŋkè la.

¹⁵ Ateko Ònesìmùs wu li me lùùlà awê ane àfɨ̀Ꞌ àko ale ngu mbɨ̀Ꞌɨ̀ tà kua akwèn tà kɨꞋɨ, tà tsìꞋi tèꞋà teꞋa.

¹⁶ Taa àfɨ̀Ꞌ yaa anè tà kà ntsi ngu wuê àbùꞋ, tà bɔ̀ tê ntsè àbùꞋ. Tà tsiꞋi ngule wanyɨ wa ane Yesò. Tà wu ngule wòt abua am, mè ngu ewu ngule wòt abua yê, te etsě fɔɔle ndɨ tàa abua am la, ndɨ̀ wu bɨ tò e wu bòt Yesò tà mè ngu wòt lob yê la.

¹⁷ À yea nê ba nè e wu bɔfàꞋ Mbɔ̧ɔ̧mà, à nɨ atò mbɨ̀Ꞌɨ̀ ndɨ nàà ngu mmɔ̌ ko à nɨ am la.

¹⁸ È wu nê tà fǎ̧ ànəê abua yê, kò mbɔ̌ njû yè leꞋ, à zi ane èlen laã ko maa tsə.

¹⁹ Mmɔ̌ Pɔ̂l ka mâ nɨ àbu am mmɔ̌ mbɔŋ nɨŋ shɨ àdziꞋ yaa la nê, “Maa tsə.” E ndàꞋà anè ngu nê e mbakà tsi mbɔ̌ ndɨ màa mèe ku̧u̧te awê nê, è kà wu mmɔ̌ ko ka wuê àwɔ̀ mbɔŋ à te ntsě la.

²⁰ Wanɔ̧, tɨŋe am ane èlen Tǎt wa. Ghɨa èntɨ̧ɨ̧ am è me bɔ̌ mbɨ̀Ꞌɨ̀ wanyɨ wè ane Yesò Klistò.

²¹ Maà shɨa letà waa anè mbê ndâ nko nê aa ghɨ mbɨ̀Ꞌɨ̀ e nkɨà la, ateko ebɔ ghɨ̀ te tsě ale.

²² Mbɨ̀Ꞌɨ̀ àà ngɨ̀à ale la, à ye nê à nèètè àtsəalob abua am nkàà nê, mâ ko nê Mbɔ̧ɔ̧mà nàà nga ezə ndɨ bɨ dɨa abua tò la e ghɨ̌ maa dzəâ a tèfȩ ekɨꞋɨ kwene ane yɨ̧.

²³ Èpaflàs wu ba tò è wu a tèfȩ ane ànəa Yesò Klistò la laꞋ nê è ntsàꞋtè àwɨ̧.

²⁴ Mak bɔ̂ Àlistakùs nè Demàs, nè Luêk wu ba tò ba àa fàꞋà nɔ̂ la e tsaꞋtè mɨ̧̂.

²⁵ Maà ntsàꞋtà nê Yesò Klistò Lefɨ̀Ꞌ me nyɨꞋte a ntsɔ̧̀ vi abua yɨ̧ mè ngu nè nɨ̧̀ bɨ̀agème.