Bìoball air-loidhne

Ètsə 7 - Mundani

Bòt Izəèlȩê bètɔsì ènkɨ̀ nè èghem yekwì ntsɔ̀b bakwì

¹ ÀfɨꞋa mbɔŋ e ndze bɔntu̧ Mbɔ̧ɔ̧mà bakwì bɔ tɨ̧ɨ̧te a bètɔꞋɔ sitsǎꞋ bakwì la. Bɔ tɨ̧ɨ̧te ale, me baãaã èfeme bu a sitsǎꞋ bekwì la, mbɨ̀Ꞌɨ̀ e me tsě a sitsǎꞋ kò a èbem èdzî, kò adù̧ èyɨt leꞋ.

² Mâ ghɨ̀ ale, mè ndze wantu̧ Mbɔ̧ɔ̧mà kǒ tà dzə àbâ yu nyèm nàa sàꞋa la, nè àghɨa ko àbu azi, è wu àghɨa Mbɔ̧ɔ̧mà yu̧ nàa nɨa ndzìà àlȩê ane bòt la. Tà ŋȩ ntɔ bɔntu̧ Mbɔ̧ɔ̧mà ko bu bakwì Mbɔ̧ɔ̧mà ŋa awɔb mètàŋ a màntsoka sitsǎꞋ nè *èdzî la,

³ nê, “Ka ndzìꞋì ntsòkè sitsǎꞋ, kò *èdzî, kò èyɨt leꞋ, tè bàà ghɨà ndzì èlȩê a mèsi bɔfàꞋ a Mbɔ̧ɔ̧mà.”

⁴ Bɔ ghɨ̀ ale, shu am kèmpà̧ bòt bu bɔ zi èlȩê a mèsi mɔb la nê, wu bòt bètɔsì ènkɨ̀ nè èghem yekwì ntsɔ̀b bakwì. Bòt mbɔŋ e li ndzəè a èndǎ̧ bòt Izəèlȩê bu ntsɔ̀b bebe la. Bòt bètɔsì ntsɔ̀b babe bɔ zi èlȩê a mèsi mɔb la, e li ngua ndzəa a èbem àndà̧ yeamɔꞋ.

⁵ Bòt bètɔsì ntsɔ̀b babe be dzəa àndǎ̧ Judà, bètɔsì ntsɔ̀b babe be dzəa àndǎ̧ Lubèn, bètɔsì ntsɔ̀b babe be dzəa àndǎ̧ Gad,

⁶ bètɔsì ntsɔ̀b babe be dzəa àndǎ̧ Ashà, bètɔsì ntsɔ̀b babe be dzəa àndǎ̧ Naptalì, bètɔsì ntsɔ̀b babe be dzəa àndǎ̧ Mànasì,

⁷ Bètɔsì ntsɔ̀b babe be dzəa àndǎ̧ Simìòn, Bètɔsì ntsɔ̀b babe be dzəa àndǎ̧ Levì, bètɔsì ntsɔ̀b babe be dzəa àndǎ̧ Isakà,

⁸ bètɔsì ntsɔ̀b babe be dzəa àndǎ̧ Zebulùn, bètɔsì ntsɔ̀b babe be dzəa àndǎ̧ Jòsêb, bòt bètɔsì ntsɔ̀b babe be dzəa àndǎ̧ Benjamèn.

TaꞋà ènɔ̧̂ bòt

⁹ Àyaa a tsè ale, e mè ndȩ̀ me ye ndze mènɔ̧̂ bòt kwàꞋ ànyaꞋne, kà wòt wu ko e pà̧aã. Bòt ngaa e li ndzəèa èlaꞋ ègème, nè èndà̧ ègème nè tèwuute bòt tègème, mè nè ndɨ̧ tègème. Bɔ li nkwaãaã ndìte kèfə mè mbèà èwumaŋ àbu bɔb, ntɨ̧̀ɨ̧̀te a mbì àtɨ̧a kèfɔ̧̀ yu nè Wanjɨ̀ wu a ngèt la.

¹⁰ Bɔ me ŋȩa shua nê, “Wu Mbɔ̧ɔ̧mà wa wu a ègwet àtɨ̧a kèfɔ̧̀ yu la, bɔ̂ Wanjɨ̀ wu ka bɔ̀ɔ ŋa awa mèmpème la.”

¹¹ Bɔntu̧ Mbɔ̧ɔ̧mà bu bàgème e tɨ̧̀ɨ̧tè ngààle àtɨ̧a kèfɔ̧̀ yu, nè bɔɔjuŋ bu, mè nè èghɨ bu bekwì, è wu yu̧ la, mbɔ̀tè a si nè ètsə bɔb a si a mbì àtɨ̧a kèfɔ̧̀ yu, ngùꞋtà a Mbɔ̧ɔ̧mà.

¹² Bɔ bɔ̀tè ale, me shu nê, “Àmèn! MèngùꞋte wu abua Tǎt wa Mbɔ̧ɔ̧mà, nè ènɨ̧, nè èyì, nè mènkɔ̀ŋke, nè kènùke nè mètàŋ ane àlia nè àlia! Àmèn.”

¹³ Wajûŋ kǒ ane bɔɔjuŋ bu biite am nê, “À ko bòt baa bɔ kwaãaã ndìtè kèfə la à? Bòt mbɔŋ è dzəa neŋàà?”

¹⁴ E shu abua tò nè, “Tê, wu àwɔ̀ ka à ko la.” Tà mè shu abua am nê, “Eyaa wu bòt bu bɔ tse a èbem ngoꞋ kèkweelè yu la. Bɔ nɨ àlo̧ Wanjɨ̀ wu shùù ndǐ tɔb tè te fəətè.

¹⁵ È wu ale, Eyaa wu lə bɔ wu a mbì àtɨ̧a kèfɔ̧̀ Mbɔ̧ɔ̧mà, fàꞋà ngùꞋtà tò a èbem lob tò nèngû̧ nè ètsəꞋ la. Wòt wu tà tseke a ègwet àtɨ̧a kèfɔ̧̀ yu la, nàà wu ne nɔ̀b mbààba awɔb.

¹⁶ Ndzəètsə tè ka li tsi eku awɔb a, ètɔŋ bɔb è ka wu li tsi eyu̧. Nyèm ka li tsi ete awɔb a, è kà mě ngu li tsi etɔ̧̀ɔ̧̀tè àwɔb.

¹⁷ Aa li wu ale nkàà nê, Wanjɨ̀ wu a kètsìà àtɨ̧a kèfɔ̧̀ yu la, naa li wu mbààba awɔb, e me nɨa awɔb ngà a badzì mèleb nàa ŋa mèmpème la. Mbɔ̧ɔ̧mà mè ngu li yòò mèsi ègème àghɨ ayɔb.”

« Roimhe

Air adhart »

Lean sinn:

Ceanglaichean taic

Sanasan