Bìoball air-loidhne

Ètsə 5 - Mundani

Àbaa àkatè ko

¹ E me ye ndze àbaa àkatè ko àbualu̧ wòt wu tà tseke a ègwet àtɨ̧a kèfɔ̧̀ yu la. Bɔ shɨ èghɨ ko ane àkatè mbɔŋ àbâ mbì nè àyea kwèn, mbɔ̀ ndèbte, nɨ àmènà nɨŋ shɨ̀ŋ èdziꞋ besà̧à̧mbe ane àkatè mbɔŋ enɨ nyɨꞋte nê wòt bakà bɔ ndɨ tàa tsɔꞋɔ la.

² ÀfɨꞋa mbɔŋ e ndze wantu̧ Mbɔ̧ɔ̧mà ko tà taꞋa bɔ mètàŋ la, tà me ŋȩ shua nê, “Wòt wu tà kùꞋ a màntsia àmènà yu ane àkatè yu, è ghaꞋa àkatè ngaa la wu wàà?”

³ Tà làꞋa ale, ka wòt kà wu a ègwet, kò a sitsǎꞋ, kò a èten sitsǎꞋ leꞋ, tà kùꞋa màngaꞋa àkatè yu e tɔ àghɨa àa èbèm la.

⁴ Àyaa a li ngɨ̀ e ndɨ̀ kwàꞋ ànyaꞋne, nkàà ndɨ è mbaka ye wòt tà kùꞋa màngaꞋa àkatè yu e tɔ àghɨa àa èbèm la.

⁵ AfɨꞋa mbɔŋ wajûŋ kǒ ayɔɔ bɔɔjuŋ bu èghem yebe ntsɔ̀b bakwì la è shu abua am nê, “Ka tsi ndɨ̀. Ye, wòt wu bɔ̀ɔ ntɔ atò ane sambàŋ àlaꞋ a Judà la wu àdziꞋ yaa. Tà wu èntaãaã e tu àndǎ̧ fɔ̧̀ Dàbid la. Tà nù tê ntsè àghɨ àgème. Ta kuꞋ wê tàa tsi àmènà yu a èdziꞋ besà̧à̧mbe ane àkatè yu la, e tɔ àghɨa àa èbèm la.”

⁶ ÀfɨꞋa mbɔŋ e ndze Wanjɨ̀ tà tɨ̧ɨ̧ a mbì àtɨ̧a kèfɔ̧̀ yu la. Èghɨ bu bekwì è wu yu̧ la, nè bɔɔjuŋ bu èghem yebe ntsɔ̀b bakwì la e ghaale Wanjɨ̀ wu ndzì a kètsìà. Wanjɨ̀ mbɔŋ tɨ̧ ale nɔ̀ŋkè mbɨ̀Ꞌɨ̀ bɔ le lɔ̀Ꞌ mbùŋè atò. Tà li mbɔ ndɔŋtsə tesà̧à̧mbe àtsə azi, nè àghɨ yea sà̧à̧mbe, è wu fote Mbɔ̧ɔ̧mà tu tesà̧à̧mbe bɔ tsàà àdziꞋ ègème a sitsǎꞋ ŋaa la.

⁷ Tà ghà nɨ àkatè yu àbualu̧ a wòt wu tà tseke a ègwet àtɨ̧a kèfɔ̧̀ yu la.

⁸ Mbɨ̀Ꞌɨ̀ tà ghà tê nɨ àkatè yu la, èghɨ bu bekwì è wu yu̧ la, nè bɔɔjuŋ bu èghem yebe ntsɔ̀b bakwì la, bɔ bɔ̀tè a si a mbì Wanjɨ̀ wu. Wòt ègème ane yɔb bèà àkalàku, nè èpfəèꞋ ko bɔ ghɨ̀ ane goêl la. Mèwet ko li ngu a èbem èpfəèꞋ lu nàa nəꞋa mbɔ̀, è wu àtsaꞋta bòt Mbɔ̧ɔ̧mà la.

⁹ Bɔ me kɔ̧ ètsəkù̧ fi shua nê, “Wu àwɔ̀ à kùꞋa mànɨa àkatè yu etsi àmènà yu adù̧ la, nkàà nê bɔ li mbùŋè awê, àlo̧ yê a chùꞋù ètsə bòt, mè nɨa awɔb nkɨ̀Ꞌɨ̂ abua Mbɔ̧ɔ̧mà. Bòt ngaa à li ngɨ̀ bɔ pem la, e dzəa èndà̧ ègème, nè èlaꞋ ègème, nè ndɨ̧ tègème, mè ndzəè ayɔɔ tèwuute bòt tègème.

¹⁰ À ghɨ̀ àwɔb ane bòt lèfɔ̧̀ wê, bɔ mè ngu bèntsìà mèpɨ̧̀ abua Tǎt wa Mbɔ̧ɔ̧mà. Bɔ̀ɔ li me baãaã ngɔ̀ŋ yaa.”

¹¹ E ndȩ̀ mè ndzəè bɔntu̧ Mbɔ̧ɔ̧mà bètɔsì nè bèmilèyɔ̂ŋ kà wòt wu ko pà̧aã. Bɔ tɨ̧ɨ̧te a ngèt àtɨ̧a kèfɔ̧̀ yu, nè èghɨ bu bekwì è wu yu̧ la, mè nè bɔɔjuŋ bu èghem yebe ntsɔ̀b bakwì la.

¹² Bɔ me kɔ̧a ŋȩ̀a shua nê, “Wanjɨ̀ wu bɔ li mbùŋè la è kùꞋa màmbɔ mètàŋ, nè èghɨ nyaŋ nè èyì mè nè ènɨ̧. TsiꞋ bòt è ŋa kènuke abua tò, ngùꞋtè atò mè nkɔ̀ŋkè atò.”

¹³ AfɨꞋa mbɔŋ e ndzə àtɔŋ àghɨ yu̧ àgème nkɔ̧̀a la. À yea à wua a ègwet la, nè sitsǎꞋ, nè èten sitsǎꞋ, fɔɔle ne è bu a èbem mèleb la, e me kɔ̧a shua nê, “Ba wùꞋta wòt wu tà tseke a ègwet àtɨ̧a kèfɔ̧̀ yu la bɔ̂ Wanjɨ̀ wu. Bà ŋa kènuke abua tò, nkɔ̀ŋkè atò. TsiꞋ ènɨ̧ nè mètàŋ è wu mɔb ane àlia nè àlia!”

¹⁴ Èghɨ bu bekwì è wu yu̧ la e nê “Àmèn!” Bɔɔjuŋ bu èghem yebe ntsɔ̀b bakwì la e bɔ̀te a si me dèbè èbu ngùꞋtà wòt wu tà tseke a ègwet àtɨ̧a kèfɔ̧̀ yu la bɔ̂ Wanjɨ̀ wu.

« Roimhe

Air adhart »

Lean sinn:

Ceanglaichean taic

Sanasan