Bìoball air-loidhne

Ètsə 4 - Mundani

MànguꞋta Mbɔ̧ɔ̧mà a ègwet

¹ Mènəè maa ègème tsè e mè ndze àtsə, me ye ètsələèꞋ ko etsɔꞋɔ a ègwet. E ndzə àtɔŋ yu a li ndàꞋà abua am mbɨ̀Ꞌɨ̀ èsɔndɨk la, a nê “KɔꞋ àdziꞋ yaa mbɨ̀Ꞌɨ̀ maa nyɨꞋte àwê èghɨ è bele kaa ghɨ̀ la.”

² KwàꞋ àfɨꞋa mbɔŋ Fo Mbɔ̧ɔ̧mà kɨꞋɨ adù̧ yaã ngɨ̀ e ndze àtɨ̧a kèfɔ̧̀ a ègwet wòt kǒ tseke adù̧ la.

³ Èsi wòt wu a ègwet àtɨ̧a kèfɔ̧̀ yu la e wu mbɨ̀Ꞌɨ̀ àti ako àa fəèəèta nkàꞋtà, bɔ̀ɔ ntɔ ane jaspà nè kànelìan la. Nàmbəabaŋ la è ghaale àtɨ̧a kèfɔ̧̀ a mbɔŋ, me kàꞋtè mbɨ̀Ꞌɨ̀ èti ko bɔ̀ɔ ntɔ ane emelà la.

⁴ Ètɨ̧ kèfɔ̧̀ ko èghem yebe ntsɔ̀b bekwì e ghaalè àtɨ̧a mbɔŋ. Bɔɔjuŋ ko èghem yebe ntsɔ̀b bekwì e tseke a ègwet ètɨ̧ bu, nkwaãaã ndìte kèfə, mè nkaãaã ntà̧ kèfɔ̧̀ bɔ nɨa goêl ngɨ̀ la.

⁵ E me ye mèkàꞋà nkàꞋà la, mè nê èfàŋ ngwèla la e dzə a ègwet àtɨ̧a kèfɔ̧̀ yu. E mè ndze bètɔsìlam basà̧à̧mbe mbèꞋa a mbì àtɨ̧a kèfɔ̧̀ yu, è wu fote Mbɔ̧ɔ̧mà tu tesà̧à̧mbe la.

⁶ E mè ndzi *èdzî ko a mbì àtɨ̧a kèfɔ̧̀ yu, e me fəəte mbɨ̀Ꞌɨ̀ àlùgɨ̀lâ. Èghɨ ko bekwì è wu yu̧ la e ghaalè àtɨ̧a kèfɔ̧̀ yu ntɨ̧̀ɨ̧̀te abà ègème, mbɔ̀ àghɨ nyaŋ a mbì nè kwèn.

⁷ Àyea mbì adù̧ a wu mbɨ̀Ꞌɨ̀ sambàŋ, àyea a kɨꞋɨ a kwèn tò la a wu mbɨ̀Ꞌɨ̀ lu̧mpɔ̀ŋ. Àyea è wù betat la, a bɔ èsi e fəə èsi wɔ̀bȩ̂ la, àyea, è wù bekwì la, a wu mbɨ̀Ꞌɨ̀ èfaã ko àa ndèa a ègwet la.

⁸ Àghɨ àgème ane èghɨ yu̧ bu bekwì la, a bɔ tèbaabètsə tentùa mè mbɔ̀ àghɨ ane yɔb a èdziꞋ ègème, àbȩ nè èbèm. Àfɨ̀Ꞌ àgème nèngû̧ bɔ̂ ètsəꞋ bɔ me kɔ̧ mèkù̧ shua nê, “Mbɔ̧ɔ̧mà Lefɨ̀Ꞌ Àtsèàngɔ̀ŋ tà tse èghɨ ègème, mè mbɔ̀ èntɨ̧ɨ̧ kèfə ntsè àghɨ àgème. Tà li ndzaŋe wu, mè ngu àfɨ̀Ꞌ yaa, mè ngu e li ekɨꞋɨ.”

⁹ Èghɨ bu bekwì, è wu yu̧ la e me kɔ̧ mèkù̧ ngùꞋtà, nkùkta mè nkɔ̀ŋkà wòt wu tà tseke a ègwet àtɨ̧a kèfɔ̧̀ yu, tà wu ane àlia nè àlia la. Mbɨ̀Ꞌɨ̀ bɔ ghɨ̀ ale la,

¹⁰ bɔɔjuŋ bu èghem yebe ntsɔ̀b bakwì la e bɔ̀te a si a mbì wòt wu tà tseke a ègwet àtɨ̧a kèfɔ̧̀ yu la, me dèbè èbu ngùꞋtà tò wu tà wu ane àlia nè àlia la. Bɔ li ntsì ntaãaãte kèfɔ̧̀ tɔb nɔ̀ŋè a mbì wòt wu a ègwet àtɨ̧a kèfɔ̧̀ yu la, me kɔ̧ mèkù̧ shua nê,

¹¹ “Mbɔ̧ɔ̧mà Lefɨ̀Ꞌ wa leꞋ, à kùꞋu we bòt àa me shu nê à ghe, mè nkùkta we, mè ngùꞋtà we ane mètàŋ mè la. Wu àwɔ̀ à lè ghɨ èghɨ ègème, è mě ngu ane mènkɔ̀ŋke me ka èghɨ ègème e li ngu, mè ntsìꞋi èghɨ yu̧ la.”

« Roimhe

Air adhart »

Lean sinn:

Ceanglaichean taic

Sanasan