Ètsə 3 - Mundani

Ntu̧ abua chɔsì wu a Sadìs la

¹ “ ‘Shɨa àkatè abua wantu̧ Mbɔ̧ɔ̧mà wu tàa ndȩa chɔsì wu a Sadìs la nê: ‘Eyaa mèngǎ̧ wòt wu tà bɔ fote Mbɔ̧ɔ̧mà tu tesà̧à̧mbe nè těnto̧ tu tesà̧à̧mbe la. Mâ ko èghɨ bɨ̀a ngɨ̀à la, bòt aà ndzèa wɨ̧ nê bɨ wu bòt yu̧, ka bɨ bɔ ngu bèmpfəà.

² Bɨ̀ lɔ̀ka wɨ̧, mbɨ̀Ꞌɨ̀ adziꞋi fo wu a èbem lɨ̧ la paa mì bɨ paà mpfə, nkàà nê mâ ye nê mènəè mɨ̧ bakà kùꞋ a mbì Mbɔ̧ɔ̧mà.

³ Ale, bɨ̀ ku̧u̧te àghɨa bɨ li ndzə mbɨ̧̀ɨ̧̀nê la, me ghɨa yùà ngà nè mbì, mbɔ̂ mè nkùbte mèntɨ̧ɨ̧ mɨ̧ ane kàbɔ̀ŋ wu bɨ̀a ngɨ̀à la. Bɨ baka lɔke wɨ̧, ko maa kɨꞋɨ àfɨꞋa kà bɨ ko, mbɨ̀Ꞌɨ̀ tsɔŋ nàa ngɨ̀ tà kɨ̀Ꞌɨ̂ la.

⁴ “ ‘Ka bɔlɨ bòt ko e bele ayɔɔ yɨ̧ a Sadìs və kà dɔte ndǐ tɔb. Bòt ngaa aa li kwaã ndìte kèfə e wu ba tò ba, nkàà nê bɔ kuꞋ.

⁵ Wòt kùùla èntɨ̧ɨ̧ vi nùà tè ntsèà, ko tàa li kwaã ndìte kèfə, è nka mè ngu tsì èlen tò a èbem àkata mèmpème. Maa li mě tɨ̧ɨ̧ a mbì Tǎt am nè bɔntu̧ bi e shu nê tà wu wòt am.

⁶ Wòt bɔ ètû̧, tà yùte ànəa Fo Mbɔ̧ɔ̧mà wua shua abua bèchɔsì bu la.

Ntu̧ abua chɔsì wu a Fìlàdefìà la

⁷ “ ‘Shɨa àkatè abua wantu̧ Mbɔ̧ɔ̧mà wu tàa ndȩa a chɔsì wu a Fìlàdefìà la nê: ‘Eyaa wu mèngǎ̧ Ngule Waã Mbɔ̧ɔ̧mà, tà mèe ngu wòt nkûŋ la. Nkȩte fɔ̧̀ Dàbid te wu abua tò. Tàa ngɨ̀ tà kȩ ètsələèꞋ, wòt kà ko ntsɔꞋ; tà ntsɔꞋ ètsələèꞋ, wòt kà ko nkȩ̀.

⁸ Mâ ko èghɨ bɨ̀a ngɨ̀à la. Bɨ̀ ye, mâ tsɔꞋɔ ètsələèꞋ abua yɨ̧ betsiꞋa wòt kà koê ngàbà la. Mâ ko nê bɨ batè mbɔ wuê adziꞋi mètàŋ ale, ka mbɔ̀ me ghɨ̀ àghɨa mâ shu la, bɨ̀ ka mè ntu̧ èlen laã.

⁹ È me wu bòt ènɔ̧̂ Satàn, bòt mèfà̧ bu bɔ̀ɔ shua nê bɔ wu Bèjuê kà wu bùà la, ko maa ghɨ̌ bɔɔ kɨꞋɨ eŋɔꞋne a si a mbì lɨ̧ ekukte awɨ̧. Bɔɔ ko bàgème nê maà nkɔ̀ŋkà àwɨ̧.

¹⁰ Mâ shu nê ndɨ̀ wu bɨ kuule mèntɨ̧ɨ̧ mɨ̧ ngɨ̀ mbɨ̀Ꞌɨ̀ mâ shu la, maa baaba awɨ̧ àfɨꞋa màa nɨ ngoꞋ enyɔ̀Ꞌte bòt sitsǎꞋ bàgème la.

¹¹ “ ‘E mbele yàŋe kɨꞋɨ, è wu ale bɨ̀ baãaã èghɨ bu bɨ bɔ tê ndɔ̀Ꞌ la ntsɔ̧̀, mbɨ̀Ꞌɨ̀ ka wòt kǒ fàà ènɨ̧ wu Mbɔ̧ɔ̧mà nɔ̀ŋe abua yɨ̧ la.

¹² Wòt tà kuule èntɨ̧ɨ̧ vi nù tè ntsè la, maa li ghɨ̌ tàa bɔ àdziꞋ a lob Mbɔ̧ɔ̧mà am ane àlia nè àlia. Àfɨ̀Ꞌà ko tàa li sà àdziꞋa mbɔŋ la a ntsě. Maa shɨ èlen Mbɔ̧ɔ̧mà am a èsi tò, nè èlen àdziꞋ yu Mbɔ̧ɔ̧mà am nàa ntsèka, è wu Jèlusalèm fi, è dzəa ègwet abua Mbɔ̧ɔ̧mà am la. Maa shɨ èlen fi laã mɨ̧̂ a èsi tò.

¹³ Wòt bɔ ètû̧, tà yùte ànəa Fo Mbɔ̧ɔ̧mà nàa shua abua bèchɔsì bu la.

Ntu̧ abua chɔsì wu a Làoêdisìà la

¹⁴ “ ‘Shɨa àkatè abua wantu̧ Mbɔ̧ɔ̧mà wu tàa ndȩa chɔsì wu a Làoêdisìà la nê: ‘Eyaa wu mèngǎ̧ wòt wu bɔ̀ɔ ntɔ atò nê Àmèn, mè ngu wòt nkûŋ, mèngǎ̧ tò è kùꞋu me bòt àa bɨ̧ɨ̧ne la. Mbɔ̧ɔ̧mà li ngɨ̀ àghɨ àgème a bùꞋ ane tò.

¹⁵ Mâ ko èghɨ bɨ̀a ngɨ̀à la, bɨa kà lù̧, bɨ̀ ka wua fia. Ka bɨ wu me lù̧u̧ ko bɨ me fi.

¹⁶ Ka ndɨ̀ wu bɨ̀a ka lù̧, bɨ̀ ka wua fia la, maa tsəè awɨ̧ a si mbɨ̀Ꞌɨ̀ mattsə.

¹⁷ Bɨà shua nê bɨ wu bòt èsi ntsɔ̧̀, mbɔ àghɨ àgème, tè bɨ ka tsi ngua mbùa àghɨ. Ka bɨà shua ale bɨ̀ ka lem nko nê bɨ bakà bɔ àghɨ, ngu mbɨ̀Ꞌɨ̀ bòt bòt aa me ku tèsȩ tɨ̧ la, ngȩ̀ȩ̀nà mbɨ̀Ꞌɨ̀ bòt ntseb kà kwaãaã ndǐtsə, mè ngu mbɨ̀Ꞌɨ̀ bòt àghɨ àleme.

¹⁸ Ale, mâ kɨɨte awɨ̧ nê bɨ̀ kɨꞋɨ abua am njû̧ a ngule goêl bɔ to̧ a èwet tè ndɔ̀tetsə te dzə adù̧ la, mbɨ̀Ꞌɨ̀ wu ndaŋe bòt èsi ntsɔ̧̀. Bɨ̀ kɨꞋɨ mɨ̧̂ njû̧ ndìte kèfə nkàbte mbɨ̧̀ tɨ̧, mbɨ̀Ꞌɨ̀ tea ghɨ̌ bɨa baka tsi mbɔ̀ àtsəa kɔꞋɔ. Bɨ̀ mě nkɨ̀Ꞌɨ̂ njû̧ èghɨbə ndzì àghɨ ayɨ̧ mbɨ̀Ꞌɨ̀ e me ye èdziꞋ ntsɔ̧̀.

¹⁹ “ ‘Bòt bu màa nkɔ̀ŋkà la wu bòt màa ŋȩ awɔb, mè mbà̧à̧ta wɔb ane èbu kekweelè mbɨ̀Ꞌɨ̀ bɔɔ bɔ èyì la. È wu ale, bɨ̀ kwàꞋte ntsɔ̧̀ nkùbte mènəè kàbɔ̀ŋ mɨ̧.

²⁰ Bɨ̀ ye, e ngua ètsələèꞋ mâ tɨ̧ me luꞋte la, wòt zəèa àtɔŋ am ntsɔ̀Ꞌɔ ètsələèꞋ, ko maa nyi a lob e wu ne tò, ba tò àa jɨ èghɨjɨ nɔ̂.

²¹ “ ‘Wòt kuule èntɨ̧ɨ̧ vi nù tè ntsèà ko maa li ghɨ tàa tseke a ègwet àtɨ̧a kèfɔ̧̀ am ba tò, wuê mbɨ̀Ꞌɨ̀ e ndi kuule èntɨ̧ɨ̧ am nù tè ntsè, Tǎt am ghɨ̀ e ntsèke ba tò a ègwet àtɨ̧a kèfɔ̧̀ tò la.

²² Wòt bɔ ètû̧, tà yùte ànəa Fo Mbɔ̧ɔ̧mà nàa shu abua bèchɔsì bu la.”