Bìoball air-loidhne

Ètsə 21 - Mundani

Ègwet fi nè SitsǎꞋ fi

¹ ÀfɨꞋa mbɔŋ e ndze ègwet fi nè sitsǎꞋ fi, nkàà nê ègwet mbì nè sitsǎꞋ mbì e nyɔ̂, *èdzî nyɔ̂ àzi mɨ̧̂.

² E ndze àpfəèà nɨ̧ a Mbɔ̧ɔ̧mà yu, è wu Jèlusalèm fi la, a lɔ̀Ꞌa abua Mbɔ̧ɔ̧mà a ègwet me chu a si. Bɔ nèètè yùà a tsiꞋi mbɨ̀Ꞌɨ̀ ndzà bɔ wèa tò tà me chɨ̀Ꞌɨ̀ lu̧ vi la.

³ E me zə àtɔŋ ko a dzəê adù̧ àtɨ̧a kèfɔ̧̀ yu è shuê nê, “Bɨ̀ ye, àpfəèà Mbɔ̧ɔ̧mà a kɨꞋɨ tê ntsìꞋi a kètsìà bɔbȩ. Taa me tseke bɔ̂ tò ba, bɔ̀ɔ wu bòt tò, Mbɔ̧ɔ̧mà wu zìambɔŋ naa mě wu Mbɔ̧ɔ̧mà wɔb.

⁴ Tàa yòò mèsi ègème àghɨ ayɔb, èvə è ka wu li tsi wu, wòt kà wu li tsi edɨ̌ ko me shùù mèsi leꞋ, àdziꞋa wòt à kà wu li tsi saa, nkàà nê èghɨ nyaꞋ e tsě ègème.”

⁵ Wòt wu tà tseke a gwet àtɨ̧a kèfɔ̧̀ yu la nê, “Bɨ̀ ye, maa ghɨ̌ èghɨ ègème aa tsiꞋi be fi.” Tà mè shu abua am nê, “Shɨ àghɨ yaa, nkàà nê mèngà̧ maa wu mèngǎ̧ nkûŋ, è kùꞋu me wòt nàa bɨ̧ɨ̧ne la.”

⁶ Tà ghɨ̀ ale, mè shu abua am nê, “A mî, E ngu mbì nè kwèn, MèmbùꞋu nè Mèndìa. Maa ŋa mèleb è dzəâ a èbem adzì wu nàa ŋa mèmpème la, àku, abua waa waa àtɔŋ tò a yu̧ la.

⁷ Wòt tà nù tê ntsè la naa bɔ èghɨ bàagème, maa wu Mbɔ̧ɔ̧mà tò, tàa mě wu waã am.

⁸ Ka è me wu bòt bu kà bɔ èntɨ̧ɨ̧ kekweelè la, nè bòt bu kà zi mèntɨ̧ɨ̧ mɔb ane Yesò la, nè bòt bu bɔ̀ɔ ngɨ̀à èbɨꞋte mènəè la, nè bòt bu bɔ̀ɔ mbùŋà bòt la, nè bòt bu bɔɔ njɨ̀a ngò̧ò̧tètsə la, nè bɔtebə, nè bòt bu bɔ̀ɔ ngùꞋtà bènàmbəa la, ndɔ̀Ꞌ nè bòt mèfà̧ bàgème, ko bɔɔ li màꞋà àwɔb a èbem èlemè wu èwet àa nkòòla adù̧ nè èkem la. Eyaa wu èvə lu wòt nàa mpfəa mè mpfəa la.”

Jèlusalèm fi

⁹ Wantu̧ Mbɔ̧ɔ̧mà kǒ ane bɔntu̧ Mbɔ̧ɔ̧mà bu basà̧à̧mbe tà bèà tèpfəèꞋ tu tesà̧à̧mbe, te lu̧u̧ nè ngoꞋte Mbɔ̧ɔ̧mà tu tesà̧à̧mbe tê lìà la, kɨꞋɨ shu abua am nê, “KɨꞋɨ, maa nyɨꞋte awê ndzà yu Wanjɨ̀ wu yɔꞋɔ la.”

¹⁰ Fo Mbɔ̧ɔ̧mà kɨ̀Ꞌɨ̂ ane yaã, wantu̧ Mbɔ̧ɔ̧mà wu ŋeꞋe am ngà a ègwet taꞋa èbȩ seè kǒ, nyɨ̀Ꞌte am àpfəèà nɨ̧ a Mbɔ̧ɔ̧mà yu bɔ̀ɔ tɔ nè Jèlusalèm, a dzə a ègwet abua Mbɔ̧ɔ̧mà me chu a si la.

¹¹ Ènɨ̧ Mbɔ̧ɔ̧mà e me kàꞋte adù̧ àpfəèà mbɔŋ mbɨ̀Ꞌɨ̀ ngule àti a ko àa nkàꞋtà bɔ̀ɔ ntɔ ane Jaspà la, mè me kàꞋtè mbɨꞋɨ̀ àlùgɨ̀lâ.

¹² Àpfəèa mbɔŋ a bɔ tàꞋà àkaã a ko bɔ̂ bɔ̧ a kɔꞋ ngà tea ègwet la. Àkaã mbɔŋ a li mbɔ̀ mètsəê ntsɔ̀b yebe. Bɔntu̧ Mbɔ̧ɔ̧mà ntsɔ̀b bebe e tɨ̧ɨ̧tè me baabe mètsəêkaã mbɔŋ. Bɔ mè shɨ̀ tèlente èndǎ̧ bòt Izəèlȩê bu ntsɔ̀b bebe la adù̧ mètsəêkaã mbɔŋ.

¹³ Àpfəèa mbɔŋ a li mbɔ ètsəêkaã yetat a èbâ ègème. Àbâ kɔꞋɔ a bɔ ètsəêkaã yetat, àyea tsɔꞋɔ a bɔ ètsəêkaã yetat, àbâ àbualu̧ a bɔ ètsəêkaã yetat, àyea àbuatoŋ a bɔ ètsəêkaã yetat.

¹⁴ Bɔ bɔ̧ àkaã yu bɔ nɨŋ ngààle àpfəèa mbɔŋ la a ègwet àti àtetsialob ntsɔ̀b yeabe, è shɨ tèlente bòt bu ntsɔ̀b babe, bɔ li ngu bɔntu̧ Wanjɨ̀ la adù̧.

¹⁵ Wantu̧ Mbɔ̧ɔ̧mà wu ndàꞋà abua am la bɔ ayɨ̌t kǒ bɔ ghɨ ane goêl la àbu azi, tàa nɨ fɨ̀Ꞌte àpfəèà nɨ̧ yu, nè mètsəêkaã mu, mè nè àkaã yu la.

¹⁶ Èbâ ègème ane àpfəèà nɨ̧ a mbɔŋ e li ngu ndɨŋndɨ̀ŋ. Wantu̧ Mbɔ̧ɔ̧mà wu fɨ̀Ꞌtè àpfəèà nɨ̧ a mbɔŋ ane ayɨ̌t wu àbu azi la. Tà fɨ̀Ꞌte ale àbâ takɨꞋ a wu bèmȩl tɔsì nè e ènkɨ̀ yetà̧â̧, mè me fa mè sàà wu a èlɨ mbɔŋ.

¹⁷ Wantu̧ wu fɨꞋtè mbɨ̧̀ àkaã yu a wu èka ènkɨ̀ yebe ntsɔ̀b bentùa, mbɨ̀Ꞌɨ̀ bɔbȩ àa fɨ̀Ꞌtà èghɨ la. Eyaa wu àghɨa wantu̧ wu li ngua nɨa fɨ̀Ꞌtà la.

¹⁸ Bɔ li bɔ̧ àkaã mbɔŋ ane àti ko àa nkàꞋtà bɔ̀ɔ ntɔ ane jaspà la, mè bɔ̧ àpfəèà nɨ̧ a mbɔŋ ane ndaŋa goêl bɔ tò̧ tê è tsìꞋa fəèəèta mbɨ̀Ꞌɨ̀ àlùgɨ̀lâ la.

¹⁹ Bɔ li mbùùle àti àtetsi yu ntsɔ̀b yeabe bɔ bɔ̧ àkaã àpfəèà nɨ̧ yu a ègwet la ane èwuu àti a ntsɔ̧̀ àko. È le mbì bɔ nɨŋ mbùùlè la wu jaspà, è le yeabe wu safayà, è le yeatat wu agatè, è le yeakwì wu emelà,

²⁰ è le yeatà̧â̧ wu olìk, è le yeantùa wu kàniliyàn, è le yeasà̧à̧mbe wu kwɔts, è le yeafà̧aã wu belì, è le yeabəèꞋa wu topàs, è le èghem wu klisopàlàs, è le ntsɔ̀b lemɔꞋ wu jasìn è le ntsɔ̀b yeabe wu ametìs.

²¹ Bɔ li nɨ àti a ntsɔ̧̀ àko bɔ̀ɔ ntɔ ane pêl la ntsɔ̀b yeabe ka nɨŋ ngɨ̀ ètsəêkaã yu ntsɔ̀b yebe la. Nɨa pêl wemɔ̀Ꞌ ka nɨŋ ngɨ̀ ètsəêkaã ègème. Bɔ mè nɨa ndaŋa goêl nàa mbɨꞋɨ̀ glasì betsiꞋa bɔ ye wòt àbâ ako adù̧ la ka nɨŋ ngɨ̀ èlu̧ nɨ̧ wu a èbem àpfəèa mbɔŋ la.

²² E ndi è ka ye lob nɨ̧ Mbɔ̧ɔ̧mà a èbem àpfəèa mbɔŋ, nkàà nê Mbɔ̧ɔ̧mà Lefɨ̀Ꞌ Àtsèàngɔ̀ŋ bɔ̂ Wanjɨ̀ wu ka bɔ wu lob mbɔŋ la.

²³ Àpfəèa mbɔŋ a li à ka tsi ngua nkɨà nyèm kò èŋu leꞋ ea me bàŋe yùà, nkàà nê ènɨ̧ Mbɔ̧ɔ̧mà è le wua mbàŋà àyùà mbɨ̀Ꞌɨ̀ èkaꞋà, Wanjɨ̀ wu mè ngu èkaꞋà àpfəèa mbɔŋ.

²⁴ Bòt èlaꞋ ègème aa li me ghȩ̀ȩ̀ne èbem èkaꞋà àpfəèa mbɔŋ, bèfɔ̧̀ sitsǎꞋ e mè ngu nɨ ènɨ̧ wɔb enyi a èbèm ekukta Mbɔ̧ɔ̧mà bɔ̂ Wanjɨ̀ wu.

²⁵ Mètsəêkaã àpfəèa mbɔŋ naa li wu jìa àfɨ̀Ꞌ àgème, nkàà nê àfɨꞋa ko ndzěm nàa kwene abot la a ntsě.

²⁶ Bɔɔ li nɨ ènɨ̧, nè kènùka èlaꞋ ègème a sitsǎꞋ e kɨꞋɨ a èbèm.

²⁷ Ka àghɨa kàbɔ̀ŋ ko àa li nyi a èbèm la à ka wuê, fɔɔle nê bòt bɔ̀ɔ ngɨ̀à èbɨꞋte mènəè, kò fɨ̀ta la leꞋ. Bòt bu bɔ li shɨ tèlen tɔb a èbem àkatè mèmpème Wanjɨ̀ wu la, ka bɔ̀ɔ li e nyi a èbem àpfəèà nɨ̧ a mbɔŋ la.

« Roimhe

Air adhart »

Lean sinn:

Ceanglaichean taic

Sanasan